132
Bura gətirilən yüzə yaxın insandan üç qız qalmışdıq. Bu,
bizim bildiyimiz idi. Öldürülənləri və qaytarılanları görmüş,
qalanlardan isə xəbərimiz yox idi. Beləcə bizi qarşıda yeni
vəhşiliklə dolu macəralar gözləyirdi. Bu macəralar ölümə
yaxınlaşdıracaq, sonra da kimsəsiz, vəhşi sahillərə atacaqdı...
Öldürüb-dirildəcəkdi......
133
19. Təhlükə uzaqda deyil
Maşın kiçik çaylaq daşları tökülmüş sahəyə daxil oldu.
Bura Bakı kəndlərindən birində yerləşən kiçik evin həyəti idi.
Tahir bir maşının güc-bəla ilə keçə bildiyi darısqal küçəyə
nəzər yetirib vaxt itirmədən taybatay açılan darvazanı
bağladı. Cəld maşına tərəf gedib qonağını salamladı:
– Xoş gördük! Nəhayət ki, səni görə bildik!
– Tapşırıq necə keçdi? – gələn şəxs vaxt itirmədən
salamlaşaraq birbaşa evə qalxdı.
– Gəl otur, danış görək, – gələn adamın diqqətli baxışları
Tahirin üzünə zilləndi. Səbirsizliklə onun nə deyəcəyini
gözləyirdi. Bu xəbər son günlərdə onun bütün vaxtını alan
hansısa bir sualın cavabı üçün çox vacib idi.
– Həsrəti tapşırdığın kimi məktəbin qarşısında düşürdüm.
Özüm isə...
– Həsrət həmin dilənçi oğlanın adıdır? – qonaq onun sözünü
kəsdi.
– Hə.
– Yaxşı sonra? Əvvəldən axıra qədər izləyə bildin Ramilin
oraya gəlib-getməsini?
– Bütün tapşırıq boyu orada oldum. Yəqin ki, fikrimizdən
yayınan heç nə olmayıb. Mən gəldiyimiz maşınla Həsrəti
134
məktəbin qarşısındakı dayanacaqda düşürəndən sonra
yaxınlıqda maşının içində izləməyə başladım. Ramil gəlib
məktəbə girəndən sonra isə dilənçi oğlanı sürücü ilə buraya
göndərdim. Özüm isə Ramilin tədbirdən qayıtmasını
gözlədim.
– Ramil həmin dilənçi oğlanı tanıyırdı, səncə? Bizim əsas
məqsədimiz onun Həsrəti tanıyıb-tanımadığını aşkara
çıxarmaq idi. Sən buna yaxşı nəzarət edə bildin də?
– Bəli, əsas diqqət mərkəzində olan bu idi. Ramil məktəbə
gələndə sanki oğlana yaxınlaşmaq istəyirdi. Amma telefonuna
gələn zəngdən sonra tələsik məktəbə girdi. Məncə, o dilənçi
oğlanı tanımırdı.
– Tahir, əminsən buna?
– Məncə, hə. Çünki Həsrət də onu görəndə üzü nə isə şübhəli
bir şey ifadə etmirdi. Sonra isə Ramil qızı ilə tədbirdən
qayıdıb evlərinə getmək üçün dayanacağa gəldi.
– Sən tapşırıq yerindən nə vaxt çıxdın?
– Onlar gedəndən təxminən iyirmi dəqiqə sonra.
– Sənin dediklərindən aydın olur ki, Ramil bu oğlanı tanımır.
Yaxşı bəs onda?.. – gələn şəxs fikrini tamamlamayıb siqaret
yandırdı. Sonra sanki yadından çıxacaqmış kimi tələsik əlavə
etdi:
– Qulaq as, sən sabah Gəncəyə getməlisən. Al, burada
axtaracağın adamın adı və 17-18 il yaşadığı ünvan yazılıb.
Onu tapmaq mənim üçün çox vacibdir.
– Yaxşı. Sabah tezdən çıxım?
– Hə. Gecikməyək. Onsuz da bu iş çox uzandı. Hə, Zaur ilə
Salah neyləyirlər? Dünən mənə zəng etmişdilər.
– Çoxdandır, səni görmək istəyirlər.
– Gəncədən qayıdandan sonra toplaşarıq – gələn adam bunu
deyib ayağa qalxdı.
– Oğlanı özün də danışdıracaqsan?
135
– Hə, tapşır gözlərini bağlasınlar, maşından səsyazma cihazını
götürüm, gəlirəm.
Gələn adam həyətdə saxladığı “BMW” markalı maşının
yanına çatanda çox fikirli idi. Neçə gündür ümidlə, bəlkə də
həvəslə üzərində dayandığı şübhələrindən biri indi şaxələnərək
daha da çətinə düşmüşdü. O, bu iş üçün xüsusi tapşırıq almasa
da, şəxsi şübhələri ilə buraya qədər gəlib çıxmışdı. İndi yolun
yarısından qayıtmaq heç cür onun ağlına batmırdı. Çünki o,
general-mayor Kamil Əzimovun rəhbərlik etdiyi məxfi
şöbənin ən təcrübəli agenti idi. Bu işdə xüsusi bacarığının
olması son bir ildə yeni fəaliyyətə başlamış bu qurumun əsas
adamına çevirmişdi onu. İndi də özü izinə düşdüyü bu
müəmmalı hadisənin sonuna çıxmadan rahat ola
bilməyəcəkdi. Orta yaş dövrünə bir neçə il əvvəl qədəm qoyan
təcrübəli əməliyyatçı indi bu iş üçün bütün enerjisini
xərcləməyə hazır idi. Keçmiş şöbədən ən yaxın köməkçiləri
Salah və Zaurdan kömək almağa bir-iki dəfə cəhd etsə də,
sonradan bu fikirlərindən daşınmışdı. Çünki keçmiş
köməkçilərindən yalnız Tahir onun – mayor Mikayıl
Qüdrətovun əslində məxfi şöbədə çalışdığını bilirdi. Xocalı
faciəsi ilə bağlı universitetdə keçirilən həmin tədbirdə Ramili
görəndən sonra onu araşdırmaqla bağlı da bütün işləri Tahir
həyata keçirirdi. Aytəkin adlı həmin girov qızın dəftərini
oxumağa başladığı gündən bəri şübhələndiyi bütün
məqamların üstünü açmaq istəyində olsa da, uzun illər
keçdiyinə görə ardıcıl fikir yürütmək mümkün olmurdu.
Həmin girov qızın dəftərinin sonunda yazılanları isə, demək
olar ki, hər gün nəzərdən keçirir və hər dəfə yeni nəsə aşkara
çıxarmağa ümid edirdi. Çətinliklə olsa da, Həsrət adlı bu
dilənçi oğlanı tapa bilmişdi. Qüdrətov yanılmırdısa, bu oğlan
Aytəkinin əmisi oğlu olmalı idi. Əgər Həsrət, həqiqətən də,
onun axtardığı uşaq idisə, deməli, o, doğulmamışdan əvvəl
136
anası erməni girovluğunda olarkən ciddi işgəncələrə məruz
qalmışdır. Sonra isə anası digər erməni əsirləri ilə
dəyişdirilərək Azərbaycana gətirilir. Girovluqda olarkən
aldığı işgəncələrin ucbatından bu oğlan da psixi və ruhi
baxımdan qüsurlu doğulmuşdu. Qüdrətov bir anlıq bunu
düşünüb ondan nəyinsə öyrənməyin o qədər də asan
olmayacağı qənaətinə gəldi. Amma hər halda səbirli olaraq
hər şeyi sonuna qədər götür-qoy etmək, mümkün olduqca çox
məlumat toplamaq lazım idi...
Dostları ilə paylaş: |