Mühazirə 7.ƏHALİNİN MÜLKİ MÜDAFİƏ ÜZRƏ
MAARİFLƏNDİRİLMƏSİ
Əhalinin fövqəladə hallardan qorunması üçün MM sahəsində maarifləndirilməsi vacib şərtlərdəndir.
Əhaliyə düşmən tərəfinin istifadə edə biləcək kütləvi qırğın silahlarının və digər hücum vasitələrinin təsirindən qorunmasının öyrədilməsi mülki müdafiə orqanlarının ümdə vəzifələrindən biridir.
Tədris işi mülki müdafiə və onun qərargahlar rəhbərlərinin, eləcə də mülki müdafiə məsələləri üzrə yerli orqanların göstərişləri əsasında təşkil edilərək keçirilir. Bu məsələ bu gün də olduqca aktualdır.
Yerlərdə mülki müdafiənin rəhbər tərkibinin, eləcə də bu və ya digər obyektlərin fəhlə və qulluqçularının, əhalinin öyrədilməsinə məsuliyyət obyektin mülki müdafiə rəisinin üzərinə qoyulmuşdur. mülki müdafiə qərargahı vasitəsilə, o, tədris tədbirlərini təşkil və təmin edir, məşğələlərin, təlimlərin vaxtlı-vaxtında və yüksək keyfiyyətlə keçirilməsinə rəhbərlik cavabdehdir.
Fəhlə və qulluqçular obyektdəki mülki müdafiə üzrə funksional vəzifələrinə uyğun şərti olaraq aşağıdakı kateqoriyalara bölünürlər: mülki müdafiənin rəhbər tərkibi; fəhlə və qulluqçular; istehsalatda və xidmət sahələrində məşğul olmayan və idarə evində yaşayan əhali. Hər bir kateqoriya xüsusi hazırlanmış proqram əsasında öyrədilir.
Əhaliyə mülki müdafiə əsaslarının öyrədilməsinin təşkilində və keçirilməsində əsas prinsiplər aşağıdakılardır:
- elmilik;
- hərbi zaman şəraitinə uyğun zəruri biliklərin tədrisi;
- sistemlilik və ardıcıllıq;
- şüurluluq və fəallıq;
- əyanilik və anlaşıqlıq;
- biliklərə və təcrübəyə mükəmməl yiyələnmə;
- tədrisə kollektivlik və fərdilik nöqteyi-nəzərindən yanaşma;
- mənəvi-psixoloji dayanıqlığın tərbiyələndirilməsi.
Əhaliyə mülki müdafiənin əsaslarını, vəzifələrini, hər bir fövqəladə hal zamanı daşıdığı məsuliyyəti və yerinə yetirdiyi işlərin mahiyyətini öyrətməklə keyfiyyətli tədrisə nail olmaq olar.
Tədrisin forması tədris prosesinin təşkilati tərəfini ifadə edir. Tədrisin formaları aşağıdakılardır:
- sinif məşğələsi;
- məşqlər;
- xüsusi taktiki təlimlər;
- komanda-qərargah təlimləri;
- obyekt məşqləri;
- kompleks təlimlər.
Proqramın öyrənilməsi rəhbəredici tərkibin mülki müdafiə üzrə kompleks təlimdə iştirakı ilə bitir. Bu təlimin gedişatında alınan nəzəri və praktik biliklər müxtəlif şəraitdə bir daha təkmilləşdirilir və cilalanır.
Komanda heyətinin hazırlanmasında seminarlardan, sinif qrup və praktik məşğələlərdən, eləcə də qərargah məşqlərdən və komanda-qərargah təlimlərindən, sıravi tərkibin hazırlanmasında isə praktik məşğələlərdən istifadə edilir. Praktik məşğələlər aşağıdakı bilik və vərdişlərə yiyələnmə məqsədlərini güdür:
- radiasiya və kimyəvi kəşfiyyat cihazları ilə işləmə və onlardan düzgün istifadə;
- radioaktiv çirklənməyə və şüalanmaya nəzarət;
- düşmən tərəfin tətbiq etdiyi kütləvi qırğın silahlarının, təbii fəlakətlərin, iri qəzaların və faciələrin nəticələrinin ləğv edilməsi üzrə işlərin aparılması;
- kütləvi qırğın silahlarından qorunmaya aid praktik tədris üzrə normativlərin işlənib hazırlanması.
Obyektdə mülki müdafiə üzrə hazırlığın planlaşdırılması zamanı aşağıdakı sənədlərin işlənib-hazırlanması tövsiyə edilir:
1. Obyektin MM rəisinin mülki müdafiə üzrə hazırlığın nəticələrinə dair ötən ilin yekunlarına və yeni tədris ilinin vəzifələrinə aid əmri.
2. Rəhbər tərkibin, yeni düzəlmiş hərbi hissənin, fəhlə və qulluqçuların hazırlanması və istehsalat və xidmət sahələrində işləməyən və idarə evində yaşayan əhalinin öyrədilməsinin əsas tədbirlər planı.
3. Hər bir tədris qrupu ilə məşğələ cədvəli, MM üzrə qərargah məşq və təlimlərin mövzu siyahısı.
4. Yeni tədris ilində MM kurslarında rəhbər və komanda heyətinin hazırlığı üzrə sifariş planı.
Göstərilən sənədlərdən əlavə obyektdə digər sənədlər də tərtib edilə bilər. Bunlar: obyektin tədris-maddi bazasının istifadə cədvəli və obyektin mülki müdafiə qərargahının aylıq fəaliyyət planıdır.
Mülki müdafiə üzrə əmr, plan, proqram, rəhbəredici sənədlər əsasında struktur bölmələrdə tədris qrupları yaradılır və hər bir tədris qrupu üçün məşğələ cədvəli tərtib edilir.
Fövqəladə hadisələrdən müdafiəyə respublikanın bütün əhalisi hazırlanır. Bu zaman 6-17 yaşlı şəxslərə – sülh və müharibə dövrlərindəki fövqəladə hadisələrdən mühafizə üsulları, 17 yaşından yuxarı şəxslərə isə, bundan əlavə belə hadisələrin nəticələrini aradan qaldırmaq üzrə fəaliyyət qaydaları da öyrədilir. Fövqəladə hadisələrdən müdafiə qaydalarının və mülki müdafiənin əhaliyə öyrədilməsi respublikanın bütün ərazisindəki nazirlik, komitə, idarə, müəssisələrin, təşkilatların rəhbərləri tərəfindən təşkil edilir, kadrların hazırlanması sistemində işçilərin əsas vəzifələri ilə yanaşı mülki müdafiə üzrə vəzifələr də nəzərə alınmaqla, fərdi və fasiləsiz yerinə yetirilir.
İşçilər fəaliyyətə hazırlanarkən onlara «Mülki müdafiə» mövzularının öyrədilməsi nəzərdə tutulur, həmçinin təhlükəsizlik texnikası üzrə ilkin təlimat proqramlarına, müəssisədə işin xüsusiyyətləri nəzərə alınmaqla mülki müdafiə məsələləri də daxil edilir. Kollektiv və fərdi əmək müqaviləsi, digər müqavilələr bağlanarkən bunlarda mülki müdafiəyə hazırlığın təşkili üzrə işəgötürənin və əmək kollektivinin vəzifələri müəyyən olunur.
Dövlət və qeyri-dövlət təhsil müəssələrində şagirdlərin, tələblərin və dinləyicilərin mülki müdafiə hazırlığı proqramları, mövzuları və tədris saatlarının miqdarı müvafiq nazirlik, dövlət komitələri, baş idarələr, təhsil müəssisələri tərfindən yerli xüsusiyyətlər nəzərə alınmaqla işlənib hazırlanır və Azərbaycan Respublikasının FH Nazirliyi ilə razılaşdırılır.
Qeyd etmək lazımdır ki, Beynəlxalq Mülki Müdafiə Təşkilatı – hökumətlərarası humanitar təşkilatdır. Həmin təşkilat 1972-ci ildə yaranıb. Hər il 1 mart Mülki Müdafiə günü kimi qeyd edilir və konkret bir mövzuya həsr olunur.
Mülki müdafiə – həyatı, gələcək nəsillərin və ətraf mühitin təhlükəsizliyini təmin edir. Mülki müdafiə və tibbi biliklərin əsasları fənni uzun illərdir ki, respublikamızın müxtəlif ali məktəblərində tədris olunur. Mülki müdafiə və tibbi biliklərin əsasları fənninin proqramı Azərbaycan Respublikasının “MM haqqında” qanununa, AR Nazirlər Kabinetinin 20.12.1992-ci il tarixli, 700 və 703 saylı qərarlarına, AR Təhsil və Səhiyyə Nazirliklərinin və MM Qərargahının 18.02.1995-ci il tarixdə birgə təsdiq edilmiş “Ali məktəb tələbələrinin MM üzrə tibb bacıları və sanitar təlimçilərinin hazırlanması haqqında” təlimata əsasən hazırlanmışdır. Mülki müdafiə fənni tələbələrə insanların sağlamlığına mənfi təsir edə biləcək fövqəladə halların növləri, onların baş vermə səbəbləri, gedişatı və nəticələri haqqında məlumat verir. Tələbələr baş verə biləcək FH zamanı davranış qaydalarını öyrənir. Son illər qeyd olunan fövqəladə halların durmadan artması mülki müdafiə üzrə maariflənmə təlimlərinin əhəmiyətini və aktuallığını bir daha sübut edir.
Mülki Müdafiə haqqında təlimlər aparılarkən Azərbaycan Respublikasını ərazilərə( xüsusi göstəricilərinə görə) bölürlər. Belə ki, mülki müdafiə üzrə şəhərlərin üç qrupu: birinci qrup (I qrup), ikinci qrup (II qrup), üçüncü qrup (III qrup) üzrə ayrılır. Zonalar:
Bakı zonası - Bakı şəhərinin 11 rayonu və Apşeron rayonu.
Gəncə zonası – Gəncə və Naftalan şəhərləri, Ağstafa, Qazax, Tovuz, Daşkəsən, Gədəbəy, Kəlbəcər, Şəmkir, Xanlar, Goranboy, Samux rayonları.
Sumqayıt – zonası Sumqayıt şəhəri, Dəvəçi, Quba, Qusar, Xaçmaz, Siyəzən, Xızı rayonları.
Mingəçevir zonası – Mingəçevir şəhəri, Ağdaş, Yevlax, Qax, Ucar, Balakən, Zaqatala, Oğuz, Şəki rayonları.
Şirvan zonası – Şirvan şəhəri, Haciqabul, Beyləqan, İmişli, Saatlı, Sabirabad, Salyan, Neftçala rayonları.
Naxçıvan zonası – Naxçıvan Muxtar Respublikasının bütün rayonları.
Ağdam zonası – Xankəndi şəhəri, Ağdam, Ağcabədi, Bərdə, Zərdab, Tərtər, Xocavənd, Xocalı, Şuşa rayonları.
Cəbrayıl zonası – Cəbrayıl, Zəngilan, Qubadlı, Laçın, Füzuli rayonları.
Şamaxı zonası – Şamaxı, Ağsu, İsmayıllı, Qəbələ, Göyçay, Kürdəmir, Qobustan rayonları.
Lənkəran zonası – Lənkəran, Astara, Lerik, Yardımlı, Biləsuvar, Cəlilabad, Masallı rayonları.
Şəhərlərin qrupları:
I qrup − Bakı şəhəri;
II qrup − Sumqayıt şəhəri;
III qrup − Gəncə şəhəri, Mingəçevir şəhəri, Şirvan şəhəri, Naxçıvan şəhəri.
Dostları ilə paylaş: |