33
A Z Ə R B A Y C A N V Ə K İ L İ ‐ IX nömrə
tapmamışdır. Həm də özümüzün belə bir subyektiv fikrimizi də qabartmışdıq ki, əvvəlki normanın
saxlanılması proses iştirakçılarından heç kəsin hüquqlarına xələl gətirmirdi.
"Azərbaycan Respublikasının Cinayət‐Prosessual Məcəlləsində dəyişikliklər edilməsi haqqında"
Azərbaycan Respublikasının 2012‐ci il 11 dekabr tarixli Qanunu ilə CPM‐yə söhbət açdığımız
məsələləri nizama salmalı olan yeni normalar əlavə edildi. Həmin Qanunla CPM‐nin 41.2, 43.3,
93.4.13, 119.4, 281.1, 383.1.5, 409.4 və 422.3‐cü maddələrə dəyişikliklər edilməsi ilə yanaşı
Məcəlləyə 43.3‐1, 44.2.‐1, 92.3.14, 92.3.15, 106‐1, 282.1‐1 kimi yeni maddələr də əlavə olundu.
Qanuna edilən bu dəyişikliklərlə CPM‐nin 41.2‐ci maddəsinin 10 iyun 2011‐ci il redaksiyasındakı
mətni də dəyişikliyə uğradı. Hazırda 41.2‐ci maddənin son mətni aşağıdakı kimidir:
Təhqiqatçı, müstəntiq və ya prokuror bəraətverici əsaslar olmadan təqsirləndirilən (şübhəli) şəxsin,
habelə ölmüş təqsirləndirilən (şübhəli) şəxsin və ya cinayət qanunu ilə nəzərdə tutulmuş əməli
törətmiş, lakin təqsirləndirilən (şübhəli) şəxs qismində tanınanadək ölmüş şəxsin hüquqi varisinin,
hüquqi varisi müəyyən edilmədiyi, o cümlədən bu Məcəllənin 106‐1.4‐cü maddəsində nəzərdə
tutulmuş hallarda müdafiəçinin razılığı olmadan cinayət təqibinə xitam verilməsi barədə qərar
çıxara bilməz. Belə halda cinayət təqibi üzrə icraat bu Məcəllə ilə müəyyən edilmiş qaydada
davam etdirilir və hökmün, məhkəmənin digər qərarının çıxarılması ilə başa çatdırılır.
Həmin Qanunla həmçinin cinayət‐prosessual qanunvericiliyə "ölmüş təqsirləndirilən (şübhəli)
şəxsin hüquqi varisi" adlı yeni anlayış gətirildi, bu şəxsin hüquq və vəzifələrindən bəhs edən
normallar daxil edildi. Dəyişikliyə uğrayan maddələr, həmçinin Məcəlləyə əlavə edilən digər
maddələr əslində 41.2 və 106‐1‐ci maddələrin təcrübədə tətbiqi məsələlərinə xidmət edir.
CPM‐yə 11 dekabr 2012‐ci il tarixli Qanunla edilən dəyişikliklərin istintaq‐məhkəmə təcrübəsində
dolaşıqlığa və anlaşılmazlığa gətirib çıxaracağı ilə bağlı mülahizələrimizi aşağıda əsaslandırmağa
çalışacağıq. İndi isə edilən dəyişikliklərin mətnindən doğan anlaşılmazlıqların bir neçəsini qeyd
etmək istəyirik.
1. 41.2‐ci maddənin son redaksiyasından belə çıxır ki, cinayət hadisəsi törətmiş şəxs yalnız
təqsirləndirilən şəxs qismində tanınanadək öldüyü hallarda ona hüquqi varis təyin oluna bilər.
Halbuki, cinayət törətmiş şəxsin təqsirləndirilən (şübhəli) şəxs qismində cəlb edildikdən sonra
ölməsi halları da istisna olunmur. Belə hallarda, həmçinin cinayət işi məhkəmənin icraatında olarkan
təqsirləndirilən (şübhəli) şəxsin ölməsi hallarında yaxın qohumarından birinin hüquqi varisi ola
bilməsi məsələsi açıq qalmışdır.
2. 44‐cü maddənin əvvəlki redaksiyasında məhkəmə baxışının nəticəsi olaraq ittiham hökmü
çıxarılması zamanı təqsirləndirilən şəxsə cəza təyin edilib‐edilməməsi məsələlərindən danışılır.
Həmin maddənin bəndlərində (44.1‐44.2.4‐cü maddələr) məhkəməyə verilən şəxs "təqsirləndirilən
şəxs" adlandırıldığı halda, CPM‐ə yeni əlavə edilən 44.2.1‐1‐ci maddədə bu prosessual şəxsin adı
iki yerdə "təqsirləndirilən (şübhəli) şəxs" kimi göstərilmişdir. Halbuki, cinayət işinin məhkəmə
baxışı mərhələsində məhkəməyə verilən şəxs "şübhəli şəxs" adlandırıla bilməz. O, artıq bütün
hallarda təqsirləndirilən şəxsdir. Şübhəli şəxsin anlayışı, hüquq və vəzifələrindən bəhs edən
CPM‐nin 90‐cı maddəsinin mətnindən də bunu görmək olar.
3. CPM‐nin 41.2‐ci maddəsinə dəyişiklik edilməsi, Məcəlləyə yeni 106‐1‐ci maddənin əlavə olunması
qanuna digər normalar əlavə edilməsi, bəzi maddələrin dəyişdirilməsi ilə nəticələnməli idi və bu
qanunda müəyyən dərəcədə öz əksini tapmışdır. Yuxarıda qeyd edildiyi kimi 11 dekabr 2012‐ci il
tarixli Qanunla CPM‐nin səkkiz maddəsi dəyişikliyə uğramış, ona beş yeni maddə əlavə olunmuşdur.
Əslində yeni normanın qəbul edilməsi ilə Məcəllənin daha çox maddəsi dəyişikliyə məruz qalmalı
idi. (məsələn, 7, 154, 181, 183, 197, 198, 284‐288, 291, 292, 299, 300, 358, 407 və sair). Həmin
maddələrdə, habelə digər müvafiq maddələrdə dəyişiklik edilməməsi istintaq‐məhkəmə
təcrübəsində dolaşıqlıq və anlaşılmazlığa gətirib çıxarmalıdır.
İndi də 11 dekabr 2012‐ci il tarixli Qanunla CPM‐yə edilən dəyişikliklərin nəzəri cəhətdən
əsaslandırılması və yeni normaların təcrübədə tətbiqində yaranacaq problemlər barədə:
Qeyd etdiyimiz kimi 11 dekabr 2012‐ci il tarixli Qanunla cinayət‐prosessual qanunvericilikdə o
vaxtadək mövcud olmayan yeni prosessual şəxs ‐ ölmüş təqsirləndirilən (şübhəli) şəxsin hüquqi
34
A Z Ə R B A Y C A N V Ə K İ L İ ‐ IX nömrə
varisi meydana çıxdı. Bizimlə razılaşarsınız ki, nə təhsil illərində, nə də hüquqşünaslıq ixtisası üzrə
işlədiyimiz uzun illər ərzində bu terminlə ilk dəfədir ki, rastlaşırıq. Həmişə hesb etmişik ki,
cinayət‐prosessual hüquqda ölmüş təqsirləndirilən (şübhəli) şəxsin hüquqi varisinin olması
qeyri‐mümkündür. Çünki hər bir prosessual qanunda hüquqi varislik institutu nəinki hüquqlar əldə
etməklə, həm də vəzifələr daşımaqla bağlıdır.
Hüquqi ədəbiyyatda prosessual hüquq varisliyi qismində ölmüş təqsirləndirilən (şübhəli) şəxsin
hüquqi varisi anlayışı ilə rastlaşmamışıq. Hüquqi varislik termini hüquqi ədəbiyyatda əsasən mülki
prosesdə əmlak‐hüquq münasibətlərinin, beynəlxalq hüquqda isə yeni dövlətin yaranması, ləğv
edilməsi, onların hüquqi vəziyyətinin dəyişdirilməsi zamanı meydana çıxan münasibətlərin nizama
salınması ilə əlaqədar işlədilirdi.
Hüquq ensiklopediyası lüğətlərində də qeyd edilir ki, hüquq varisliyi hüququn qanuna, yaxud sazişə
əsasən bir şəxsdən başqasına keçməsidir. Hüquq varisliyi zamanı hüquq münasibətlərinin yeni
subyekti əvvəlkini əvəz edir, lakin ona keçmiş hüquq və vəzifələr dəyişmir. Mülki hüquqda, ailə
hüququnda, əmək hüququnda yalnız əmlak hüquq və vəzifələri vərəsəlik yolu ilə keçir. Prosessual
hüquq varisliyi mülki prosesdə iştirak edən maraqlı şəxsin onun maddi hüquq münasibətində hüquq
varisi ilə əvəz edilməsidir. Beynəlxalq hüquqda isə dövlətin hüquq varisliyi yeni dövlətin yaranması,
dövlətin başqa dövlətin tərkibinə daxil olması, dövlətlərin bölünməsi (ayrılması) zamanı hüquq və
vəzifələrin bir dövlətdən başqasına keçməsidir.
Nəzərdən keçirdiyimiz hüquq ensiklopediyalarının heç birində təqsirləndirilən (şübhəli) şəxsin
prosessual hüquq varisliyinin başqa şəxsə keçməsinin mümkün olması barədə mülahizə ilə belə
rastlaşmadıq. Hər hansı xarici ölkənin cinayət‐prosessual qanunvericiliyində bizim CPM‐nin 106‐1‐ci
maddəsinin məzmununa oxşar maddəsi olub‐olmaması barədə məlumat əldə edə bilmədik. (RF‐nin
CPM‐də bu məzmunda norma yoxdur). Əlaqə saxladığımız cinayət‐prosessual hüquq sahəsində
çalışan alimlər və stajlı praktiki işçilər də yeni normanın mahiyyəti, onun istintaq‐ məhkəmə
təcrübəsində müsbət rol oynayacağı barədə fikir söyləyə bilmədilər.
CPM‐nin söhbət açdığımız yeni normasının istintaq‐məhkəmə təcrübəsində tətbiqi zamanı baş verə
biləcək bəzi məqamlara diqqət yetirək. Yuxarıda qeyd olundu ki, CPM‐nin 41.2‐ci maddəsinin
mahiyyətinə görə bəraətverici əsaslar olmadan ölmüş təqsirləndirilən (şübhəli) şəxs haqqında
cinayət təqibinə onun hüquqi varisinin, hüquqi varis olmadıqda isə müdafiəçisinin razılığı olmadan
xitam verilə bilməz. Bu zaman cinayət təqibi CPM ilə müəyyən edilən qaydada davam etdirilir və
məhkəmə hökmünün, yaxud başqa növ qərarın çıxarılması ilə başa çatdırılır. Aydın məsələdir ki,
burada hüquqi varis olmağa razılıq vermiş şəxs haqqında deyil, ölmüş təqsirlənsirilən şəxsin özü
haqqında istintaq‐məhkəmə araşdırmaları aparılmasından söhbət gedir.
Belə çıxır ki, ibtidai araşdırmanın gedişində cinayət hadisəsinin məhz şəxsin təqsirli əməlləri
nəticəsində törədilməsi təkzib olunmaz sübutlarla təsdiq edilsə belə, onun hüquqi varisinin, varis
olmadıqda isə müdafiəçisinin razılığı olmadan CPM‐nin 39.1.5‐ci maddəsinə əsasən işin icraatına
xitam verilə bilməz. Cinayət prosesini həyata keçirən orqanın hərəkətlərindən və ya qərarlarından
məhkəməyə şikayət verilməsi, bu işlərə məhkəmədə baxılması barədə CPM‐nin 442, 449‐451‐ci
maddələri ilə müəyyən edilən normaların bu məsələlərə aidiyyəti yoxdur.
Yeni normalara əsasən məhkəmə nəzarətinin həyata keçirilməsi ilə bağlı CPM‐nin 52‐ci fəsli ilə
müəyyən edilən müddəaların belə şikayətlərə baxılması ilə ümumiyyətlə əlaqəsi olması istisna
olunur. Bu isə o deməkdir ki, icraata xitam verilməsinə razılıq alınmaması hallarında müstəntiq
müfaviq qərarla olmüş şəxsi təqsirləndirilən şəxs qismində tanımalı, ibtidai istintaq materialları ilə
tanış etməli onun haqqında ittiham aktı tərtib etməklə cinayət işini baxılması üçün prokurorun
vasitəsilə məhkəməyə göndərməlidir. Daha sonra məhkəmənin hazırlıq iclasının qərarı ilə ölmüş
şəxs məhkəməyə verilməli və nəhayət CPM‐ilə müəyyən edilən qaydalarla mühakimə olunmalıdır.
Bizim bildiyimizə görə dünya istintaq‐məhkəmə təcrübəsində ölmüş şəxsin cinayət məsuliyyətinə
cəlb edilməsi, mühakimə edilməsi hallarına təsadüf edilməmişdir. Hətta bəşəriyyətə qarşı ağır
cinayətlər törətmiş müharibə canilərinə qarşı da belə prosedurlar həyata keçirilməmişdir.
Görünür bu bir tərəfdən onunla əlaqədardır ki, cinayəti törədən şəxsin taleyin hökmü ilə həyatdan