Yol
Xatirəsi mənim üçün daim əziz olan, həyatın xaosundan mənə ilk yol göstərən müəllimim – Seyfullah SEVİMƏ.
Həyat bir yoldur. Doğulandan düzəlirsən bu yola və Aşıq Veysəl demiş, gecə-gündüz gedirsən. Başlanğıc bəlli, son bəlli. Amma bu iki bəlli nöqtənin arası fərqli, müəmmalı, enişli-yoxuşlu olur.
Ustadlarımdan birindən kiçik bir hekayə dinləmişdim və yol haqqında bu həqiqət açılmışdı mənə.
Hər kəs dağın zirvəsinə qalxmağa çalışır. Bu yolda başlıca şərt bələdçidir. Bələdçisiz qalxanda çox çətin, hətta qorxulu olur. Adam aza bilər, qayadan uça bilər, vəhşi heyvanlara tuş gələ bilər. Bəlkə də sən özbaşına, hansı isə üsullar tapıb məqsədə çata bilərsən, lakin bu, o qədər əzablı və çətin olur ki, yolun sonuna çatanda sənin nə öz məqsədindən faydalanmağa gücün çatır, nə də bir başqasına özündən sonra bələdçilik etməyə həvəsin. Halbuki bu yolu sona vurmağın əsas ləzzəti də məhz bu ikisidir.
O boyda dağa qalxmaq üçün kifayət qədər savadlanan, özündə əzm, iradə toplayan bir insanın dinməz-söyləməz bir başqasına tabe olması, onun dediyi ilə oturub-durması, tənbehlərinə dözməsi çox ağırdır. Bu səbəbdən yolu sona vurmaq üçün digər şərt sənin fərasətin, təvazökarlığın, iradən, söz dinləmək, gördüklərindən, yaşadıqlarından ibrət götürə bilmək bacarığındır. Yolun sağ-salamat keçilməsi və sona varılması üçün bunlar çox əhəmiyyətlidir.
Bələdçinin vicdanlı, dinli-imanlı, təcrübəli olması da bu yolun keçilməsində əsas şərtdir. Bələdçilər çoxdur. Niyyətlər müxtəlifdir. Sənə lazım olan niyyəti sənin (!) niyyətinlə üst-üstə düşən, zamanında sənin gücünü düzgün dəyərləndirib sənin keçə biləcəyin yolu seçə bilən bir bələdçidir.
Ən qorxulu hal bələdçinin səni mənzil başına çatdırandan sonra səni buraxmamasıdır! Hər bələdçi yalnız öz sahəsini tanıyır. Əlbəttə, bütün yolu tanıyan bələdçi də tapmaq mümkündür. Lakin bu, Allahın elə bir nadir lütfüdür ki, hər adama qismət olmur. Öz sahəsinin sonuna gələndən sonra bələdçi özü kimi səni də inandırmağa çalışır ki, bu, bütöv yolun sonudur. Burdan o tərəfə keçsən qayadan uçacan, məhv olacan və s. İndiyə qədər inandığın bir bələdçiyə inanmamaq çox çətindir, hətta mümkün deyil.
Hər üç şərti tamamlayan isə səni bütün yol boyu izləyən içindəki Bələdçindir – Allah. Ona olan imanın və inamın sənin yanında olan müddətdə sən həm düzgün bələdçi seçə bilərsən, həm missiyan naminə Ustadın hörməti qarşısında qürurunu sındıra bilərsən, həm yolun hər əziyyətinə dözərsən, onu başa vura bilərsən, həm də gücün qalar ki, başqalarına bələdçilik edəsən.
Bunları mənə öyrədən Ustadım vaxtı çatanda məni rahatca, sevə-sevə buraxdı, yolumun qalanında uğur dilədi. Başqalarını da bu yerə gətirmək üçün özü geri qayıtdı. İndən sonra onunla qala bilməyəcəyimi bilirdi, çətin də olsa bununla barışdı. Çünki Ustad idi. Öz işini gözəl bilən, qəlbi Allahın nuru və lütfü ilə güzgü qədər cilalandığına görə İnsanı, onun istedadını, həyatdakı missiyasını aydınca əks etdirən və anladan Ustad.
Dağ və daş
Uca bir dağ ətəyindəki yamaclara, düzənlərə, dərələrə baxıb öz ucalığını daha yaxşı dərk edir. Öz varlığını, mahiyyətini, məqsədini anlaması ona var olmaqda kömək edir, varlığının mənasını artırır. Hər halda bu uca dağlar Allahın «beşik kimi yaratdığı Yerin dayaqları olduqlarını» (Quran 78/6-7) bilir və bu məsuliyyətlə dayanırlar.
Bu uca dağın başında kiçik bir daş nə hiss edir? O da dərələrə-düzlərə yuxarıdan aşağı baxır, özünü onlardan ucada görür. O, hətta dağın özündən belə üstdədir. O, bu dağın «balasıdır». Bu, onun varlığının yeganə mənasıdır. Yeganəmi?
O, nə bir divara hörülmür, nə bir hasara. Onun üzərində nə ot bitmir, nə çiçək. O, hətta üzərinə yağan yağış damlalarını belə uda bilmir. O, gözünü bu yüksək dağın başında açıb, aşağıdan xəbəri də yoxdur. Aşağıdan xəbəri olmadığına görə, …oturduğu ucalıqdan da xəbərsizdir. Xəbərsiz olduğuna görə, öz mahiyyətində də yanılır. Özünü hamıdan, dağdan da uca bilir. Amma ucalmağın nə əziyyətindən, nə də ləzzətindən xəbərdardır. Deməli, bu ucalığın məsuliyyətini də bilmir.
Dağa çıxmış bir adam qalxdığı yüksəkliyi hiss etmək üçün aşağılara bir «xəbər» göndərmək həvəsinə düşür: yerdən daşı götürür və uzaqlara atır. Haralarasa aşağılara. Bir anın içində daş bir məchulluqdan digər məchulluğa düşür.
Yüksəklikdən düşmək nə asanmış, nə mənasızmış… Nə əziyyəti varmış, nə ləzzəti. Sadəcə, düşdüyü dibdən yüksəklikləri seyr etməyin həsrəti və əzabı varmış.
Özü ucalığa qalxmayan və ucalığın mahiyyətini dərk etməyən düşdüyü aşağıların necə, mənasını anlaya bilərmi? Bunun yeni bir başlanğıc ola biləcəyini güman edirmi? Yoxsa bu dəfə də içindəki hikkə, həsrət gözünü kor edər?
Zirvə
Uşaq doğulur və onun kiçik dünyasından hər şey elə böyük, elə nəhəng görünür ki! Uşaq böyüyür və o, əvvəlcə özündən böyük uşaqlar boyda, sonra da hamıdan «böyük» atası boyda olmaq istəyir. Beləcə həvəslə böyüyür. Gün gəlir onun fiziki boyartımı dayanır, ancaq onun böyümək arzusu hələ təzə-təzə başlayır. Bu dəfə o, mənən böyüməyə başlayır. Təhsilini artırır, dünyagörüşü böyüyür.
Ancaq bu «böyümə»ni gözlə görmək çətindir, ona görə də… Bəziləri öz «yekə» boy-buxununa baxıb özünü hamıdan yekə, hamıdan nəhəng bilir və bundan artıq böyüməyə lüzum görmür. Belə olanda onun böyüməyi də dayanır.
Zirvəyə qalxmaq istəyən geri boylananda keçdiyi yolun böyüklüyündən qürurlanıb daha artığına ehtiyac hiss etmir. Amma zirvəyə və ora qalxanlara baxan özünün kiçikliyini dərk edir, görür və «böyüməyə» cəhd edir.
Kamillik
Kamillik bütöv və sadə bir fenomendir. Yəni o, elə bir tamamlanmış, bitkin, müəyyən keyfiyyətlərə malik bir məfhumdur ki, onun kiçik və əhəmiyyətsiz görünə bilən bir xüsusiyyətinin olmaması artıq bütöv kamilliyin pozulması deməkdir.
Kamillik – vəhdətdir, ayrı-ayrı xüsusiyyətlərin üzvi şəkildə birləşdiyi bir vəhdət. O bölünməzdir. Onu hissələrə bölmək və hissələr vasitəsilə dərk etməyə çalışmaq kamilliyin dərki yox, ayrıca keyfiyyətlərin dərki sayıla bilər ki, bu xüsusiyyətlər də fərqli bir şəraitdə və fərqli bir şeyin tərkibində kamillikdən çox uzaq ola bilər. Və ya eyni xüsusiyyətlər fərqli şəraitlərdə kamilliyə apardığı kimi, naqisliyə də apara bilər.
Kamillik – harmoniyadır, vəhdətdə olan hissələrin arasında harmoniyadır. Bir daş bacarıqlı ustanın əlində gözəl bir sarayın bir hissəsi, naşı ustanın əlində evi təhlükə qarşısında qoya bilən artıq bir detal ola bildiyi kimi. Kamillik nə daş deyil, nə usta, nə də sarayın layihəsi. Kamillik hazır evdir. Burada hər şey vacibdir: həm düzgün seçilmiş sağlam daşlar, həm bacarıqlı usta əli, həm gözəl layihə, həm bu layihəyə uyğun məkan, …həm də onun sakinləri.
Kamilliyin hissələri onun tamının daşıdığı mahiyyəti daşımadığına görə, onun ayrı-ayrı hissələrinə malik olmaq kamil olmaq deyil. Hər hissənin öz mahiyyəti var, lakin bu mahiyyət bütövün tərkibində dəyişir. Başqa sözlə desək, təklərin mahiyyəti tamın mahiyyətində əriyir.
Üzündə göz izi var…
Məlum bir mahnıda deyildiyi kimi… Kiminsə baxışları doğurdanmı iz qoyur? Kiminsə surəti gözlərdə qalırmı? İz qoyan hansı baxışlardır? Qalan hansı surətdir?
Sən bir dənizsən… Gah sakit, müəmmalı, gah dalğalı, coşqun. Gah könül gəmilərini oyuncağa çevirib atıb-tutan, sonra da qırıqlarını bəyənməyib sahilə atan, gah dərinliklərində min bir ağrı və nəvazişlə inci yetişdirən.
Sən bir dənizsən… İnsan sənə yaxınlaşmaqdan qorxur. Bilir ki, sənin hökmünə düşsə, Sənə təslim olmalı, özündən imtina etməlidir. İnsan Səndən aralana da bilmir. Sənin cazibən ahənrüba kimi adamı özünə çəkir. Beləcə dayanıb sahilində tərəddüdlər içində quruyursan, … gizlin-gizlin arzu edirsən ki, güclü bir dalğa səni bu tərəddüddən qurtaraydı.
Sən bir dənizsən… Sahilindəkilərə sığal verib aparan, …sonra da onu sahilin uzaq bir küncünə atan.
Sən bir dənizsən… Sal qayaları oxşaya-oxşaya qoynuna alan və onları əbədi unudan, başqa qaya axtaran.
Sən bir dənizsən… Haralardasa sahilin var. Ancaq Sənin sərhədlərini nə göz görür, nə ağıl kəsir… Sənin böyüklüyünü hiss etmək üçün ancaq özünü Sənin hökmünə vermək lazımdır ki, Sənin dünyana tam bələd olmasa da, Sənin aləmində ərisin, qarışsın…
Sən bir dənizsən… Hər kəsi möhtəşəmliyi ilə heyrətə salan, hər kəsi müəmması ilə tilsimləyən bir sirli dünyasan.
Sən bir dənizsən… Sənə hər yaxından baxana onun öz əksini göstərən. Yəqin buna görə Sənin üzündə göz izini görmək olmur. Yəqin buna görədir ki, kimsə Səndə iz qoya bilmir.
Sevgiyə fatihə
Sevgi – gözəldir. Sevgi – müqəddəsdir. Sevgi – ülviyyətə aparan yoldur. Sevgi – ruhun dilidir. Sevgi – ruhun özünü reallaşdırma yoludur. Sevgi haqqında necə gözəl sözlər deyilib, nəğmələr oxunub. Heç kimin də ağlına gəlməyib ki, sevginin bir …fatihəyə də ehtiyacı ola bilər.
Ruhların məkanı göylər, bədənlərinki yerdir. Ruhlar yerdə darıxır, sıxılır, bədənlər göyə qalxa bilmir, orada onların ağırlığı daha artıq nəzərə çarpır. Hər ikisini birləşdirən sevgidir.
Bədən ruhun tərcümanıdır. Yoxsa sevgini kimsə duymaz, anlamaz. Bədən öz işinin öhdəsindən gəlmirsə – dili bilmirsə, bu səsə qarşı laqeyddirsə, kardırsa, sevgi aciz qalır: eşidən, duyan, amma danışa, anlada bilməyən bir bədbəxtə çevrilir.
Bədən pərvazlanan ruhun dincəlmək məkanıdır. Bədən ruha gen gələndə ruh bir də təkan verib uça bilmir, dar olanda, ruhun qanadları əzilir, yenə uçmaqdan məhrum qalır. Sevgi qalır dörd divar arasında: səmaların sonsuzluğunun dadını bilən, iki qanadı olan, amma oralara bir də qalxa bilməyən bir bədbəxtə çevrilir.
Bədən ruhun yerdə bələdçisidir. O olmazsa, göylərdə maneə tanımayan ruh yerdəki ilk yolayrıcında qəzaya düşər. Nur dolu bir harmoniyadan yerin xaosuna düşəndə sevgi itib-batır, toqquşan bədənlər arasında əzilir. Sevginin gözü ancaq nurun rənginə alışdığından qırmızı və yaşıl işıqların hökmünə düşəndə tez-tez cəzalanır və bundan çılızlaşır, solğunlaşır. Zəngin bir dünyanın sultanı ola-ola kasıb bir məkanda qolu bağlı bir bədbəxtə çevrilir.
Bu bədbəxt sevgiyə ən böyük yaxşılığımız ona Fatihə oxumaq olar.
Fatihə!
Bədən, ruh və eşq
Dəli sevgi – bütöv bir həyat,
ağıllı sevgi – həyatın bir hissəsidir.
Əbu Turxan
Ruh özünə uyğun gələn, onu öz könül güzgüsündə aydınca əks etdirən başqa bir ruhu görən kimi tanıyır, duyur, onunla vəhdətdə olmağa çalışır.
Bədən də özünə uyğun, öz zövqünü oxşayan başqa bir bədəni görən kimi ona can atır, ona qovuşmağa çalışır.
Ruh tapdığı ruhun bədənini ilk anlar seçmir… bu, heç onun üçün maraqlı da olmur.
Bədən də tapdığı bədənin ruhunu ilk anlar görmür… bu, ona heç maraqlı da deyil.
Ruh öz bədənini unudaraq yad bir bədəndəki ruhla doğmalaşır.
Hər ikisi öz zövqünə can atır, bütün vasitələrlə öz varlığını qarşısındakına çatdırmaq istəyir, ən kiçik imkanları belə qaçırmaq istəmir, harmoniya axtarır. Ruhun silahı yalnız baxışlar, atəş dolu nəfəsdir, bədənin silahı isə çoxdur – insanın bütün imkan və bacarıqları: bütün hiss orqanları üstəgəl söz.
Ruh daha sərbəst, daha azaddır. Onlar tez qovuşur, tez dil tapırlar.
Bədənlər isə maneə tapmaqda sanki bir-birilə yarışa girirlər. Bunun adı gah naz olur, gah qürur, gah küsü, gah abır-həya, gah ictimai rəy, gah da romantika.
Ruhlar heç cür bir ahəngə gələ bilməyən bədənləri görmədən belə öz vəhdətlərinin zirvəsinə çatırlar.
Hər addım başı maneələri dəf etməklə məşğul olan bədənlər üçün heç bir sərhəd tanımayan ruhların ardınca yetişmək çox çətindir, hətta mümkünsüzdür.
Ruhlar bərabər ola bilməyəndə bədənlər ünsiyyətdə olsalar da, bir-birilə müəyyən şərtlərlə bağlı qalsalar da, özləri də bilmədən ayrı yaşayan, haralardasa öz həmdəmini axtaran ruhlarının ayrılığını yaşamalı olurlar, bərabər olsalar da elə hey bir ayrılıq mehindən üşüyürlər.
Bədənlər dil tapa bilməyib ayrılsalar da, ruhlar bərabər qalırlar. Hərəsi öz bədənində təklikdən üşüsə də, bir-birinin hənirinə qızına bilirlər, bu atəş onları donub heç olmağa imkan vermir.
Ruhlar və bədənlər arasındakı təmaslar böyüdükcə, hisslər dolub-daşdıqca, zövq oxşamaqdan sevgiyə, sevgidən eşqə yüksəldikcə bir an gəlir ki, ruhun bədənə, bədənin də ruha möhtaclığı ortaya çıxır. Yaşanan duyğuların tam olması üçün ruh və bədənin təklikdə yox, bir-birilə vəhdət halında olması bir zərurətə çevrilir. Ya bədən ruhu öz dalınca sürüməyə çalışır, ya da ruh bədənə öz qanadlarını taxmağa cəhd göstərir. Bəlkə buna görə Əbu Turxan deyir ki, «məhəbbət ruhla bədənin ittifaqından yaranır»? Bəlkə bu ittifaq olmayanda yaranan duyğular qırıq və yarımçıq qalır? Bəlkə ruh və bədəni bir ittifaqa gətirən elə məhəbbətdir?
Bəs ittifaqa gələ bilmiş ruh və bədən nə əldə edir?
Ruh bədənə ağırlığını, nisbiliyini, qara torpaqdan yarandığını unutdurur. Bədən ruhun aşıb-daşan işıq selini zahirə çıxardır. Ruh bədənin qaranlıqda azmış, vurnuxan hisslərinə nur verir, bədənin özünün də xəbərsiz olduğu cəhətlərini işıqlandırır. Bədən ruhun duyduqlarını, təsəvvürlərini reallaşdırır, onlara maddiyyat qatmaqla ruhun təsəvvürünə belə gəlməyən həqiqətlər anladır ona.
Bir-birini kəşf edə-edə ruh və bədən bir varlıq kimi kamilləşir, bir-birini tamamlaya-tamamlaya bir varlıq kimi bütövləşirlər.
İlk vaxtlar kənar bir qüvvə kimi təsir göstərən eşq hər ikisinin tərkib hissəsinə çevrilir: nur olub ruhun işığına qarışır, qan olub bədənin damarlarında axır, … mahiyyət olub İnsanı var edir.
İnsan
Ruhunla ülvi, kamil bir dünyaya bağlısan. Bu bağlılığı dərk etdiyinə görə həmin ülvilikdən, kamillikdən öz payını ala bilirsən. Böyük qara bir pəncərədə iynə boyda görünən işıq get-gedə böyüyür, qaranlıq azalır və bir bədən çərçivəsinə sığmayıb ətrafa da saçılmağa başlayır. İçində qaynayan, dolub-daşan bu duyğular, düşüncələr yazıya, tabloya, notlara köçür. Qara dünya sənə yadlaşdıqca, nurlu aləm sənə doğmalaşır. Bu işıqla hansı qaranlığa baxsan, orada basırılmış, çirklənmiş nuru görə bilirsən… və onun da parlamasına çalışırsan.
Bu SƏNƏ baxanda necə də doğmasan!
Adam əlindən tutub nurlanmaq istəyir!
Bədənin dünya adlı bir binanın gəlib-gedən qonaqlarından biridir. Həm bu binada öz yerini tutmağa, yerini rahat, isti etməyə, həm də bu binanın özünü daha işıqlı, daha sakit bir vəziyyətə gətirməyə çalışırsan. İstəyirsən dörd yanındakılar da bu gözəllikdən doyunca bəhrələnsin. Yenə istəklər, arzular, planlar köçür yazıya, tabloya, nota.
Nə qədər çalışsan da bu binanın dörd divarını aşa bilmirsən, elektrik olmayan otağı işıqlandıra bilmirsən, bir otağın sakinini o biri otağın sakini ilə barışdıra bilmirsən. Çalışa-çalışa, yarada-yarada… bu binadan kənarda da bir həyatın olduğunu unudursan, ya da xatırlamağa vaxtın qalmır.
Bu SƏNƏ baxanda necə də yadsan!
Adam SƏNdən üz döndərib bu binanı tərk etmək istəyir!
«Bədənlə çəpərlənən», «aşağıdan bədənə, yuxarıdan ruha bağlı» (Əbu Turxan) bir nəfsinin olduğunu bilirsən. Ruhunun verdiyi nurun cazibəsini bilsən də, nəfsini ruhunun itaətinə vermirsən. Bədəninin qaranlıqdan kənara çıxa bilmədiyini dərk etdiyinə görə, nəfsini ondan da uzaqda saxlayırsan. Nəfsin varlığı belə yaddan çıxır! Sən: «bu binanın sakiniyəm», – deyib çiyinlərindəki yükü daşıyırsan, ruhunu dinləməyə vaxtın qalmır. Bir də bu binada ruhun dedikləri keçərli deyil ki! Bu binaya lazımlı olmaq istəyirsənsə, ruhunun gözünü bağlayıb, dilini lal eləməlisən.
Bu SƏNƏ baxanda necə də MƏNsən!
Adam lal-kor bir ruhun başqa bir lal-kor ruhu görməyinə təəccüb edir!
Bir udum nəfəs
Görəsən hər an rahatlıqla nəfəs alan və bunun heç fərqində olmayanlar bilirlərmi ki, bir udum nəfəsin nə böyük hikməti var? Yəqin ki, yox. Bunu yalnız o bir uduma həsrət qalanlar bilər.
Bir udum nəfəsi ciyərinə tam çəkə bilmirsən, yarımçıq qalır, …ancaq sənə bir ömür bəxş edir. Onun dadını ağzında doya-doya hiss etmirsən, çox azdır, …ancaq bütün dadları unutdurur.
Bir ömür yaşayırsan və o bir udumun varlığından belə xəbərsiz olursan… Bir gün o nəfəs səni tapır: bir çiçəyin ləçəyindənmi, bir pıçıltının hənirindənmi, bir təbəssümün cazibəsindənmi, bir çatılmış qaşın düyünündənmi… Tapır, üsuluna, şəraitinə baxmadan. Sən təəccübdən, heyrətdən içini çəkəndə o nəfəs ciyərinə dolur və qanınla bütün bədəninə yayılır. Hər şeyə bir yeni rəng verir, hər şey sanki təzələnir. Baxışların, eşitməyin, hissiyyatın dəyişir, itiləşir, həssaslaşır. Göydə uçan quşun qanadlarının xışıltısını eşidirsən, suda üzən balığın qovaqcığının hava ilə dolub onu günəş işığına qaldırdığını hiss edirsən, bir udum nəfəsə həsrət qalan könüllərin susuz torpaq kimi çatladığını görürsən…
O bir udum nəfəs üçün indiyə qədər necə yaşadığına təəccüb edirsən, onun səni tapmasına sevinirsən, onun yalnız bir udum olmasına təəssüf edirsən. Bircə anın içində hisslər qarışır bir-birinə. Çalışırsan vaxtı dayandırasan ki, o nəfəs sənin içində qalsın, onu itirməkdən qorxursan. Amma o bir udum nəfəs çox kiçikdir, nə əllə tutulmaz, nə zamanla.
Bircə udumluq nəfəs içinə girir, çıxanda isə bütün canını çıxardır. Bəlkə də canın özü ondan qopa bilmir, onunla bərabər getmək istəyir.
O bir udum uçur… ancaq hikməti qanında qalır, ömrü boyu dolanır. Əvvəllər varlığından xəbərsiz olanda heç nəfəs aldığının fərqində belə deyildin. İndi o bir udumun həsrətini çəkə-çəkə geniş dünyada boğulursan, hey o bir udumu axtarırsan. Bu, başqa nəfəslərə qarşı insafsızlıq deyilmi? Bu, bir an, bir udum naminə ömrünü qurban vermək deyilmi? Bəlkə də belədir… yəqin elədir. Ancaq o bir udum nəfəsi ciyərinə çəkən üçün bunların heç bir fərqi yoxdur. Boğulmağın dadını bilən üçün o bir udumun qiyməti yoxdur.
Filosof portreti
Elə bil nə isə demək istəyirsən, amma demirsən, … deyə bilmirsən. İçini dolduran bir hiss, açılmaq həvəsi səni həyəcanlandırır, qanını qaynadır. Bundan rəngin qaçır, baxışların narahat-narahat ətrafı dolanır… dinləyici axtarır, ancaq tapa bilmir. Narahatlıq ümidsizliyə qarışır, həyəcan – təəssüfə.
Elə bil nə isə demək istəyirsən, amma demirsən, … deyə bilmirsən. Gərginləşmiş üz cizgilərin danışır, həyəcan dolu baxışların danışır, hətta saçlarını qarışdıran narahat barmaqların da danışır. Bircə dilin dinmir. Bərk-bərk sıxılan dodaqların açılmır ki, dilinin də tilsimi sına.
Sən çox şey deyirsən, bircə demək istədiyini demirsən. Sən çox simalarla rastlaşırsan, bircə sənin ruhunu əks etdirəcək sima sənə rast gəlmir; çox baxışlar tutursan, bircə sənin baxışının davamı olan baxışları görə bilmirsən.
Elə bil nə isə demək istəyirsən, amma demirsən, … deyə bilmirsən. Anlamayacaqlarından, gözəl bir şeyi ləkələyəcəklərindən, qanından-canından gələn sözlərinin hədər gedəcəyindən qorxursan. Onun nə qədər pak olduğundan əminsən, çıxdığı məkan kimi saf bir məkana düşəcəyindən isə əmin deyilsən.
Elə bil nə isə demək istəyirsən, amma demirsən, … deyə bilmirsən. İçində alışıb-yanan, səni kül eləyən bu sözün kimi isə yandırmasından, kiminsə ürəyində özünə yer eləyib oranı didib parçalamasından ehtiyat edirsən. Bu sözün nə qədər ağır bir yük olduğunu bilirsən, ona görə hansısa başqa bir ürəyə də bu ağırlığı verməyə qıymırsan. Onu səndən tam alacaq birini yox, onun ağırlığını səninlə bölüşə biləcək birini axtarırsan.
Elə bil nə isə demək istəyirsən, amma demirsən, … deyə bilmirsən. Səni anladacaq, səni təsvir edəcək, sənin bütün varlığını əks etdirəcək bir söz. Bütün ümidin bu sözədir. Gah hələ vaxtının çatmadığını, gah da artıq çox gec olduğunu düşünürsən. Onu eşidəcək qulaq, duyacaq ürək olmayıb daşa çırpılmağındansa, öz içini parçalamasını üstün tutursan.
Elə bil nə isə demək istəyirsən, amma demirsən, … deyə bilmirsən.
Xoşbəxtlik
Hər kəsin xoşbəxtliyi onun könlü qədərdir.
Bir körpənin təbəssümü niyə bu qədər işıqlı, sirayətedici, səmimi, ürəkdolusu olur? Niyə körpələr ən kiçik şeydən xoşbəxt olmağı bacarırlar? Əslində onları xoşbəxt edən onların könüllərindəki nurdur – hələ çirklənməmiş, kobud qabıqlar altında gizlənməmiş. Bu nur nəyin üzərinə düşürsə onu da nurlandırır. Yəqin buna görədir ki, körpənin təbəssümündən hər kəsin üzü də açılır, könlü də.
İnsan böyüdükcə, qayğıları artdıqca … könlü yaddan çıxır. Hər şey yadında olur: məişət qayğıları, vəzifə, mal-dövlət, övlad. Hər şeyin yanında könülə elə az yer qalır ki… Onun nurunu görmək, sevinmək, sevindirmək elə çətinləşir ki… Hələ bu nur bütün gün düşüncəni məşğul edənləri, gündəlik həyatını, cəmiyyətin özünü sənin ruhuna, könlünə yad bir rəngdə olduğunu göstərirsə sevinmək, xoşbəxt olmaq lap çətinləşir.
Könüllə sevinmək çətinləşdikcə, «uşaq böyüdükçə», insan məcbur olur «böyüklər» kimi sevinsin – diplom alanda, övladı olanda, çoxlu pul qazananda, yüksək vəzifəyə qoyulanda, kitabı işıq üzü görəndə. Sevinir və … xoşbəxt olur. Olurmu? Olur, amma xoşbəxtliyinin ipi onu xoşbəxt edən şeyin əlində olur. O da istədiyi vaxt çəkib boğur sənin xoşbəxtliyini. İynə olub xoşbəxtliyini şar kimi partladır. Sən də bu anın qorxusunu çəkə-çəkə «xoşbəxt» olursan.
Sabun köpüyü kimi yox olan «xoşbəxtliklərə» baxanlar bəzən deyirlər: bu dünyada sevinc, xoşbəxtlik elə azdır ki!
Əslində bu dünyada xoşbəxtlik o qədərdir ki! Amma onu könül gözü ilə baxsanız görərsiniz! Könlünüzün nuru nəyə düşsə onu işığa qərq edər! Lap körpələr kimi.
Allah öz nurundan bir nur payı ayırıb sevə-sevə insana verdi, adını ruh qoydu. Bu nurun gözəlliyini duymaq, doya-doya yaşamaq üçün bir könül verdi. Könülün yaşadıqlarını, Allahdan aldığı hikməti dərk edib, başqaları ilə bölüşmək üçün bir ağıl verdi. Hər üçü bir-birini tamamlayanda, bir-biri ilə dil tapanda möhtəşəm bir harmoniya, gözəllik yarandı. İnsan bu gözəlliyin adını xoşbəxtlik qoyub. Bu üçündən ən xoşbəxt olanı yəqin ki, könüldür. Onun xoşbəxtliyini artıran hər ikisi ilə bölüşməsi, harmoniyanın yaranmasına səbəbkar olmasıdır.
Var-dövlət
Bu dünya çox zəngindir. Rəngarəng təbiəti, çeşidli bitkiləri, heyvanları, al-əlvan çiçəkləri. Bu dünyada zənginliklər həm çoxdur, həm də müxtəlifdir. Kiminin pulu-parası, kiminin oğul-uşağı, kiminin evi-tarlası, kiminin də elmi-savabı. Bu dünyanın zənginləri də çoxdur. Əslində zənginliklərin növlərinə baxsaq, bu dünyada çox az adamın kasıb olduğunu görərik. Ancaq bunu dərk edənlər azdır, yəni əsl var-dövlətini tanıyıb, onun dəyərini bilənlər azdır.
Maraqlıdır, var-dövlətin mahiyyəti, meyarı kim tərəfindən təyin edilib? O da maraqlıdır ki, nə zamandan bəri var-dövlət tərəzi və rəqəmlərlə ölçülməyə başlayıb? Bunu kəşf edən kəs tərəzi ilə ölçülə bilməyən, rəqəmlərə sığmayan var-dövlətə nə üçün bir ölçü vahidi düşünməyib? Əbu Turxan deyir:
…….
Böyük kəşf olardı, amma nə yaxşı,
Mənəvi sərvətin ölçüsü yoxdur.
Kimin tərəfindən kəşf edildiyini bilməsəm də, bu tərəzinin çox əhəmiyyətli rolu olduğunu bilirəm. Bilirəm ki, tərəzinin bir gözünə qoyulmuş var-dövlət nə qədər ağır gəlirsə, digər gözündə oturmuş sahibini bir o qədər yuxarı qaldırır. Amma bu işdəki paradoksu izah edə bilmirəm: var-dövlət ağırlaşdıqca, sahibi yüngülləşir?! Var-dövlət artdıqca insan öz çəkisini itirir?! İnsanlıqdan çıxır?! Amma onu da bilirəm ki, doğurdan da son nəticədə var-dövlət öz sahibindən daha ağır və «hörmətli» olur? Yəqin bu «ucalmaya» düçar olmamaq üçün var-dövlət tərəzisinin o biri gözündən uzaq qaçmağı bacarmaq lazımdır. Yəni, bu mümkündürmü? Yenə Əbu Turxan yazır:
Həyatda saxlanma qanunu varmı,
Pak admı üstündür, dövlətmi, varmı?
Biri azalanda o biri artsa,
Məcmuyu bunların sabit qalarmı?
Bəli, təəssüf ki, ancaq tərəziyə gələn, rəqəmlə hesablanan şeylərə var-dövlət deyilir. Başqa şeyləri eyni adla adlandıranda mütləq yanına bir «məcazi məna» ifadəsi də artırırlar. Yoxsa sənə gülərlər ki, bir çiçək balaya da var-dövlət deyirsən. Sənə ağılsız deyib məsxərəyə qoyarlar… malik olduğun dərin təfəkkürünə, sonsuz ideyalarına var-dövlət desən! Sən də ağıllı olmaq üçün bir tərəzi almalısan. Sənin də səsini eşitsinlər deyə «ucalmalısan», malik olduğun dərin təfəkkürünü rəqəmlərə sığdırmalısan.
Yox, əslində bu dünyanın sayıla bilən, rəqəmlərə sığan zənginliyi heç də çox deyil. Bir şey ki, nəyə isə sığa! Əslində o, sadəcə bir ovucdur. Dünya əlindəki bu bir ovuc var-dövləti hər gedəndən alıb təzə gələnlərin başını qatır. Yunus Əmrə demiş:
Mal sahibi, mülk sahibi
Hanı bunun ilk sahibi?
Mal da yalan, mülk də yalan,
Al, bir az da sən oyalan.
Bu dünyanın daha böyük bir xəzinəsi var. Düşünməyi bacaran, içində ilahi hiss, böyük eşq gəzdirən kəslər tapır o xəzinəni. Könlünün səsini qızılın cingiltisi ilə səhv salmayan, onu dinləməyi bacaran tapır o xəzinəni. Bu dünyaya məxsus olanla insanın öz könlü üçün nəzərdə tutulmuş var-dövləti fərqləndirə bilənlər faydalana bilir o xəzinədən.
Bu xəzinənin adını bilmirəm, onu təsvir etsəm də anlaşıqlı olmaz. Axı hər kəsin öz xəzinəsi var! Ancaq bu xəzinənin açarının adını bilirəm: eşq. Ən qəliz qıfılları aça bilən sadə və gözəl bir açar. Bilənlər onunla qapılar açırlar, bilməyənlər tərəzinin gözünə qoyurlar ki, ağır gəlsin, bir az da «ucalsınlar».
Dostları ilə paylaş: |