Eşq və müqəddəslik duyğusu
Gənclik hisslərin aşıb-daşması, sevginin, arzuların pardaxlanıb çiçəklənməsi ilə səciyyələnir. Bizim gənclərin yaradıcılığına baxanda, ilk baxışda hər şeyin başında məhz sevginin durduğunu zənn etmək olar. Bu baxımdan, bəlkə də, gəncliyin fəlsəfəsini məhz sevgi ilə başlamağın daha məntiqli olduğunu düşünmək olardı. Bizim sevgini sona saxlamağımızın öz səbəbi var. Belə ki, bu gənclərin sevgisinin kökü yuxarıda nəzərdən keçirdiyimiz hisslərlə – qorxu, cəngavərlik, tənhalıq və s.-lə – sıx bağlıdır. Yəni içində bu qədər ziddiyyətlər daşıyan, bu qədər mürəkkəb düşüncələr içində vurnuxan bir insanın sevgisini təcrid olunmuş, ayrıca gözəl bir hiss kimi nəzərdən keçirmək düzgün olmaz. Digər tərəfdən, həyat adlanan qısa bir zaman kəsiyində yalnız ilk məhəbbətin aldadıcı parıltısından gözləri qamaşmağa imkan tapan bir gəncdən dərin bir məhəbbət ummaq və onu digər hisslərin başına qoymaq da doğru bir nəticəyə gətirib çıxartmaz. Bununla belə, deyilənlər heç də bu gənclərin gözəl bir məhəbbətə qadir olmadıqları demək deyil. Sadəcə, onların sevgisi bir sıra özünəməxsus keyfiyyətlərə malikdir ki, gəncliyin fəlsəfəsinin tamamlanması üçün mütləq nəzərə alınmalıdır. Elə isə gənclik fəlsəfəsində sevgi, eşq nədir?
Bəli, doğurdan da, bu gənclərin yaradıcılığında ilk nəzərə çarpan sevgidir. Ancaq bu sevgi özünün uşaqlığı, saflığı ilə seçilir. Bu, hələ dünyanın çirkablarına batmamış, ikiüzlülükdən uzaq, maddiyyatın «ləl-cəvahiratına» bürünməmiş bir sevgidir. Məsələn, istər Bayronun, istər Lermontovun, istər Müşfiqin, istərsə də Ülvinin sevgi şeirlərinin ünvanı onlarla gözəllərdir. Lermontov yazır:
Gedir – bütün hərəkətləri,
Dinir – hər cizgiləri,
Hisslərlə, ədayla doludur,
Bir ilahi sadəliklə doludur.1
Müşfiq:
Sənin mərhəmətli, dolğun gözlərin
Mənim hisslərimi məndən də dərin
Necə anlatmada bilməm, şirin qız?2
Ülvi:
Baxışları sirli nağıl
Gözlərindən alov yağır.
Tez-tez sağa-sola baxır,
Bu qız görən hara gedir?3
Bu gənclərin şeirlərində hər şey hiss etmək mümkündür: görüşmək sevinci, ayrılıq qüssəsi, gözəlin təsviri, busənin şirinliyi, sərt baxışın acılığı və s. Hamısı hisslər səviyyəsində! Heç bir məsuliyyət, heç bir cavabdehlik, heç bir sabah arzuları, heç bir düşüncə, heç bir dərinlik! Əslində, bunu qəlbin, könülün gözəlliyə təbii meyli və ya uşağın sevimli, qeyri-adi bir şeyə qarşı ilk sövq-təbii reaksiyası, yəni əlini uzadıb götürmək, onu dadmaq istəyi adlandırsaq daha doğru olar. Məhz uşağın. Burada heç bir hiylənin, heç bir vəhşi ehtirasın, qara niyyətin, xəbis planlamanın izini tapmaq olmaz.
Hisslər oynaqdır. Gənc eyni səmimiyyətlə müxtəlif gözəllərin sehrinə düşür, vurulur, aşiq olur, ancaq bir yerdə qərar tuta bilmir. Maraqlı bir haldır ki, istedadlı uşaqlar daha nadinc olurlar. İçlərində qaynayan enerji, ətrafla harmoniyaya can atma meyli, eyni zamanda, sabit olmayan emosiyalar, ətrafındakı hadisələrə qeyri-ciddi münasibət. Bu nədir? Dayaz düşüncə? Kyerkeqorun fikrinə görə, «günah – inkar deyil, nə isə müsbət bir şeydir»1 və «günahın pozitivliyi məhz Allahın qarşısında olmaqdır».2 Məlum olduğu kimi, uşaq diqqət tələb edəndə, öz varlığını ətrafındakılara çatdırmaq istəyəndə nadinclik edir. Kyerkeqor da bu nadincliyin daha böyük miqyasda edilməsinin daha böyük səbəbinin olduğuna işarə edir. Lakin nadinclik yalnız öz varlığını eşitdirmək ehtiyacından yox, həm də içindəki yükdən azad olmaq istəyindən ola bilər. Yenə Kyerkeqor bildirir ki, «mütəəssir olan Allah qarşısında özü olmaq istəyəndə və ya olmaq istəməyəndə günah işlədir».3 Deməli, gənci nadinclik etdirən həm də çiyinlərindəki ağır yükdən azad olmaq və ya bir az da olsa onu unutmaq istəyidir.
O gəncdir. Təbiət öz gücünü göstərir, hisslər qaynayır, coşur, sevib sevilmək arzusu oyanır. Lakin maraqlı, eyni zamanda, qəmli bir şey müşahidə edilir: bir belə sevgi şeirlərinin müəllifini sevgi sevindirə bilmir. Həyat tarixçəsindən məlum olduğu kimi, həmişə gözəl qadınların əhatəsində olan Lermontov nədən yazır ki,
Nə olsun ki, kimi isə sevirəm,
Sevgi mənim həyatımı bəzəmir.1
Nədən yaşının sevib sevilən vaxtında Ülvi deyir ki,
Hər həvəs, hər həyəcan məgər sevgimi?
Aldatma özünü, nə də ki, məni.2
Bəli, ilk baxışda həyatlarındakı hisslərin güclü olmasına baxan, bu yaradıcı gənclərin eşq haqqında çoxlu şeir yazdığını güman edir. Əslində isə bu şeirlər ayrı-ayrı hadisələrin, ötəri həyəcanların qısa təsvirlərindən başqa bir şey deyil. Əsl sevgini – ruhun mahiyyətini təşkil edən, bütün varlığın, yaradılışın səbəbi olan, insanı adi canlı səviyyəsindən ucaldıb İnsan edən qüvvəni isə hələ tanımırlar. Bunu onların yaşı, təcrübəsi rəva görmür. Hər varlıq özündən daha kamilə meyl edir. Sührəvərdinin də qeyd etdiyi kimi, «hər naqis nurun kökündə özündən yüksək nura qarşı eşq, hər ali nurun kökündə isə özündən aşağıdakına qarşı qaliblik (idarəçilik) var».3 Gənc də bütün ruhu ilə özündən yüksəkdəkinə böyük bir sevgi, eşq duyur. Yəni onun ruhu sevgi ilə dolub-daşır. Onun hər gün rastlaşdığı və müvafiq olaraq təsvir etdiyi sevgilər isə hiss səviyyəsindən o yana keçmir. … Və bu isə onları qane etmir. Gənclərin duyduqları ilahi harmoniyanın, gözəlliyin yanında bu keçici hisslər o qədər kiçik, əhəmiyyətsiz, zəif görünür ki, düşünmədən ondan uzaqlaşırlar. Bu səbəbdən onlar maddiyyatın hüdudları boyda olan bu sevgidən bir ruh düşgünlüyü ilə, bədbinliklə yazırlar. Lermontov mələyin qucağında bu dünyadan köç edən bir gənci belə təsvir edir:
Bu dünyada o çox əziyyət çəkdi,
Ürəyi min bir arzuyla doluydu.
Səmanın möhtəşəm səslərini
Yerin sıxıcı nəğməsi əvəz edəmmədi.1
Həmin qəmli notlar Müşfiqdə də hiss olunur:
Olmadan aşikar doğduğu yerdən,
Böyük tanrı kimi düşmüş nəzərdən,
Çöhrəsi gülməyən xarabalardan
Daha qəmli, izsizdir eşqim!
Ülvi isə sevginin sevinc gətirməməsinin səbəbini onun «qocalmasında» axtarır:
Qocalmaz, sevgi qocalmaz,
Ürək, ümid qocalmasa,
Qocalmaz, sevgi qocalmaz,
Onu qocaldan olmasa.2
Gəncin ehtiyacı hissə deyil. Onların özündə bu, kifayət qədərdir. Əslində, onun ehtiyacı, bütün digər yaşıdları kimi, tamamlanmayadır. Şellinq yazır: «Yalnız insanda bir söz deyilir ki, o, başqa şeylərdə də var və tam deyilmir. Söylənmiş sözdə isə ruh özünü açıqlayır, yəni actu kimi var olan Allah».1 Gəncin məhz bu sözə ehtiyacı var. Bunu isə ilahi aləmdən bixəbər, yalnız zahiri gözəlliyi ilə alışıb yanan həmyaşıdında tapa bilmir. Bayron yazır:
Bəs qadın? Mən səni ümid,
Təsəllim, hər şeyim sanardım.
Mən necə cansız bir daşa döndüm,
Sənin siman qəlbimin səsinə kar olanda.2
Və gənc yalnız zahiri zövqü oxşayıb mənəvi aləmə isə kiçicik bir nur belə verməyən bu yalançı hissə nifrət edir, onu puç sayır. Lermontov şikayətlənir:
Sevgini, nifrəti dərk etmək
Bir dəfə ondan çərənləmək üçündür…3
Ülvi isə qarşısındakına ümumiyyətlə onu unutmağı tövsiyə edir:
Ürəyim deməyir gözüm deyəni,
Baxma ki, eşqini gözündən alıb.
Bəlkə də sevərdim, ay gözəl, səni,
Heyif ki, ürəyim erkən ovlanıb.4
Bütün bu ruh düşkünlükləri gənci öz dünyasına qapılmağa sövq edir. Məsələn, Ülvi qarşısındakından bir dünya, bir sonsuzluq umur, amma … öz dünyasından ayrılmadan:
Bircə anlıq baxışında,
Bu dünyanı umuram mən.
Səni görmək istəyəndə,
Gözlərimi yumuram mən. 1
Gənclərə xas sevgini «özündə qapanma», hər şeyə öz könül evindən dəyər verib, özü kimi zənn etmə kimi keyfiyyətlərlə təsvir edən S.Xəlilov onu qısa qapanma adlandırır – alimlərin uzaq qaçdığı, şairlərin isə böyük şövqlə tərənnüm etdiyi qısa qapanma.2 Filosofun dedikləri əksər gənclərin «sevgisinin» çox dəqiq şərhidir. Doğurdan da, sevgisi hisslər səviyyəsində boğulub qalan gənclər öz dünyalarında yaratdıqları xəyalın gücündən, sehrindən heç cür azad ola bilmirlər. Hər şey onun təsiri altına düşür və gənc həqiqi sevginin nə olduğunu bilmədən özünün qaladığı yalançı odda yanıb kül olur.
Bizim gənclər isə bu qısa qapanmaya düşmürlər, düşə bilmirlər. Əvvəla, onların könül dünyası elə dərin, elə zəngindir ki, oradan verilən dəyər də çox yüksək olur. Məhz bu dəyərin nəticəsidir ki, ruh özünə bir həmdəm tapa bilmir, gözəl qaş-göz iki gündən sonra onu bezdirir. İkincisi, onlar öz «sevgisinin» təsvirində nə qədər hissə qapılıb, onların gözəlliyini tərənnüm etsələr də, onların həyatında aparıcı rol ağılın olur, hissin deyil. Ümumilikdə götürəndə gənc sanki bir dəryadır və bu sevgi təlatümləri yalnız onun səthində, üst qatında baş verir. Dərinliklərində isə başqa bir həyat, başqa bir aləm var və okeanın – gəncin əsl mahiyyəti həmin aləmdədir. Bəli, hisslər güclüdür, lakin üzdədir. Düşüncə isə dərindir və sahibini bütünlüklə hisslərin itaətinə düşməyə qoymur. Bundan başqa, əvvəlki başlıqlardan da məlum olduğu kimi, bu gənclər nə qədər romantik, xəyalpərvər olsalar da, öz cəmiyyətlərinin əyrisini-düzünü daha yaxşı hiss edirlər, onun bütün çətinliklərini öz üzərlərində «sınaqdan keçirməklə» onlara reaksiya verirlər. Başqa sözlə desək, öz zirvəsindən cəmiyyəti seyr edən gəncin düşüncələri əks tərəfin gərginliyini duyduğuna görə, «normal elektrik cərəyanı» da yaranır.
Nəhayət, üçüncüsü, bu gənclərin daşıdıqları müqəddəs missiya onlara yalnız öz könül dünyalarına qapanıb qalmağa imkan vermir. Gəncin başqa bir qüvvə qarşısında duyduğu məsuliyyət, cavabdehlik hisslərin çağırışından daha ağırdır, daha tələbkardır. Bu səbəbdən də onun şəxsiyyətində bir ikilik sezilir, sevgisinin ən səmimi anında belə öz sevgilisinə tamam yad bir insan təsiri bağışlaya bilir. Əlbəttə, bu, onun istəyi ilə baş verən bir proses deyil. Bu, onun daim axtarışda olan mən-inin dar çərçivədən genişliyə çıxmaq istəyidir. Dediklərimizdə sanki bir ziddiyyət var. Həm sevginin yalnız hisslər səviyyəsində olduğunu və hisslərin dərinliyə enmək qüdrətində olmadığını deyirik, həm də gəncin öz sevgisi üçün geniş üfüqlər axtardığını iddia edirik. Əslində isə bu, maddi dünyadan başlayan hisslərin ruh səviyyəsində bir sonsuzluğa qovuşmaq ehtiyacıdır. Ülvi bu duyğuları necə gözəl çatdırır:
İlki varsa, sonu yoxdu sevginin,
Sevgi böyük bir dəryadı, səmadı.
«İlk»im daşa dəydi, «son»um…! – deyənin,
Ürəyi də «ilk-son» arasındadı.1
Sonsuzluğun ənginliyini hiss edən gənc bir sonlu varlığı, o nə qədər dünya gözəli olsa da, sevə bilmir, sevgisini bu dar hüdudlara sığdıra bilmir. S.Xəlilov yazır: «Sonsuz hissin sonlu varlığa yönəldilməsi sözün müstəqim mənasında məcnunluqdur».2 «Məcnunluq» öz mən-indən keçməyi tələb edir. Bu gənclərin mən-i isə onsuz da onların ixtiyarında deyil.
Maraqlıdır, gənc bütün bunları yaşayırsa, yalançı hisslərin, həyəcanların sevgi olmadığını bilirsə, nədən yeni «sevgilər» axtarışına çıxır? Yuxarıda da qeyd etdiyimiz kimi, axtarış gəncin həyatını stimullaşdıran, onu sınmağa qoymayan bir duyğudur. Gəncin axtardığı sevgidir, sonsuzluqdur, əbədiyyətdir, ülviyyətdir. Şellinq yazır: «Sevginin sirri ondadır ki, o, elə əkslikləri birləşdirir ki, onların hər biri özü üçün ola bilərdi, ancaq yenə də olmur və ola da bilmir».3 Bir daha təkrar edirik: gəncin bir insan kimi tamamlanmağa, kamilləşməyə ehtiyacı var. Lakin S.Xəlilovun da dediyi kimi, «insan təkcə tərəf-müqabillə deyil, onun simasında dünya harmoniyası ilə vüsal tapmağa çalışır…».4 Bu baxımdan, bizim gənc bədbəxtdir. Onun cismani tərəf-müqabilləri çoxdur, əsl könül yoldaşı isə yoxdur. O, içindəki böyük sevginin ünvanını tapa bilmədiyi üçün əzab çəkir. Deyilənlərdən sonra Lermontovun nə demək istədiyi də aydın olur:
Gələcəyə qorxu ilə baxıram
Keçmişə qüssə ilə boylanıram.
Edama yollanan cinayətkartək,
Ətrafda doğma bir ruh arayıram.1
Yaxud Müşfiq:
Fəqət yabançıdır coşqun ruhuma,
Elimə, ölkəmə, təbi-şuxuma
Mənasız gözəllik, mənasız gözəllik!2
Ülvi də öz ruh həmdəmini insanların deyil, ulduzların arasından «tapır»:
Heç bilmirəm yenə mənə nə olub,
Görürəm gözümdə özümü yalnız.
…
Ah, necə də alicənab ulduzdur,
İstəmir ki, bu tufanda tək qalam.3
Amma gənc həm də əzab çəkdirir – onu sevənlərə. O, gözlə görülən, amma əllə tutulmayan günəş şüasına oxşayır. Başdan başa sevgilə yoğrulmuş bu gəncin sevgisini qazana bilməmək, bu aşıb-daşan sevgidən bir pay ala bilməmək böyük əzabdır.
Yeri gəlmişkən, onu da qeyd edək ki, tarixdə bəzi gənclərin «bəxti gətirib» – onlar özlərini tamamlaya bilən bir dost, həmfikir tapa biliblər və bu fakt onların həyatında əvəzsiz rol oynayıb. Gənc nə qədər təbiətcə gənc olsa da, onun təfəkkürünü, dünyaya baxışını gənc adlandırmaq olmur. Məhz bu səbəbdən onları tamamlaya bilən tərəf-müqabil də yaşca onlardan çox böyük, artıq həyatın müdrikləşdirdiyi insanlar olur. Onu da əlavə edək ki, gəncin düşüncələrini cilalayan tərəf-müqabilin «dəst-xətti» mütləq gəncin yaradıcılığında özünü göstərir. Məsələn, Puşkinin sevgi məkanında Yevgeni Oneginlə yanaşı, Tatyana Larina da var. Bu, təsadüf deyil. Bu, Puşkinin sirli ünvanlara yazdığı şeirlərindəki hər hansı bir xanımın təsiri, daha doğrusu, Puşkinin onun vasitəsilə tanıya bildiyi ali sevgidir, ülviyyətdir. Tarixdən başqa bir misal. Şellinqin həyatında və yaradıcılığında ondan yaşca çox böyük, ümumiyyətlə alman romantizmi və fəlsəfi ədəbiyyatında xüsusi rola malik Karolina Şleqelin müstəsna yeri var. Onunla evli olduğu müddətdə (1799-1809) yaradıcılığının ən məhsuldar dövrünü yaşayan və fəlsəfəsinin zirvəsinə qalxan Şellinqin Karolinanın vəfatından sonra (1809) «bədii yaradıcılığı, demək olar ki, tamamilə dayandı və yalnız kafedradakı çıxışları Almaniyaya təfəkkürlərin keçmiş hökmdarını xatırladırdı».1 Əlbəttə, bu xoşbəxtlik hər gəncə qismət olmur. Bunun üçün həmin cəmiyyətdə hər şeydən əvvəl yüksək təfəkkürlü, onu mənən tamamlaya, ucalda biləcək insanın olması, bu dünyanın xaosunda onların rastlaşması və cəmiyyətin bütün qınaqlarına və maneələrinə sinə gərmələri lazımdır.
Reallaşmamış sevgi gəncin «ünvan axtarışını» başqa səmtə yönəldir – ona Mütləq həqiqətdən daha kamil xəbər verə bilən bir «ünvana» – Allaha. Sührəvərdi yazır: «Şövq bacarıqlı zatları Nurlar Nuruna aparır. Ən tam şövq ali nura cəzb və ucalmaqla tamamlanır» .1 Bəli, məhz bacarıqlı, yəni həyatın yalançı parıltılarından gözü qamaşmayan, dünya xaosunnda öz yolunu itirməyən, öz Sevgisini min bir sevgi arasında qoruyub saxlaya bilən insan eşqin ali zirvəsinə qalxa bilər. Gənci bütün varlığı ilə ehtiva edən, öz nurlu sonsuzluğunda əridib yox edən, çiyinlərindəki yükü yüngülləşdirən, gözəlləşdirən, içini müqəddəslik duyğusu ilə işıqlandıran İlahi eşq. Şellinqin dediyi kimi, «…ilahi sevginin şüaları düşür və mənəvi həyatın zərifliyə, ilahi gözəlliyə ülvi çevrilməsi baş verir».2
Bu ali sevgi onların bütün varlığına elə hakim kəsilir ki, müraciət etdikləri hər bir obyektə, istər mürəkkəb olsun, istərsə də adi şeylərə məhz bu gözlə baxırlar. Maraqlıdır ki, bu işıqla baxanda, əslində insanların mürəkkəbləşdirdiyi bu hissi dünyanın bütün sadəliyi, adiliyi üzə çıxır. Və belə aydın olur ki, lap Ülvi deyən kimi, «bu «adilər» içərisində bircə şey mürəkkəbmiş: hər şeyin adi olması. Bəli, adi kənddə iki cür adamlar – adi yaxşılar və adi pislər yaşayarmış. Adi yaxşılar adi işlər görürmüşlər, tikib qururlarmış. Adi pislər də adi işlərlə məşğul olurmuş, söküb dağıdırmış».3
Belə güman etmək olar ki, öz ətrafında özünə həmdəm tapa bilməyən gənc məcbur olub ilahi aləmə üz tutur. Bir növ həyatdan küskün olan rahiblər, dərvişlər kimi. Lakin bu belə deyil. Kyerkoqor yazır: «İnsan nəfs və bədənin sintezi idi, eyni zamanda həm də müvəqətti və əbədinin də sintezidir».1 Məhz özündə əbədiyyətin bir zərrəsini daşıması, ilahi aləmlə sıx əlaqədə olması və həmin aləmin işığında maddi dünyanın nöqsanlarını, yalan pərdələrini sezməsidir ki, gəncə imkan vermir bu cismani, hissi aləmdə özünə həmdəm tapsın. Yəni əsl Gözəlliyi görəni bu dünyanın keçici gözəllikləri ovutmur, tamamlaya bilmir. Axtardığını bu məhdud dünyada tapa bilməyən üz tutur Allahın onun üçün açdığı aləmə: ya səslərin, ya sözlərin, ya da rənglərin harmoniyasına. Ən əsası isə bu aləmə keçid gəncə həm də fəlsəfənin, müdrikliyin qatlarını açır. Təsadüfi deyil ki, Şellinq fəlsəfəni «azad sevgi»2 adlandırır və bildirir ki, «fəlsəfə qətiyyət tələb edir – qətiyyət isə həmişə hər hansı bir istiqamətdə son həddir, – fəlsəfənin təbiəti budur ki, təfəkkürün zirvəsinə yüksəlsin. Onun uçuşuna bilavasitə və ya dolayısı ilə mane olanda isə o, doğma vətəni, qayanın ucu əlçatmaz olan qəfəsdəki qartala dönür».3 Belə məlum olur ki, gözəl hisslərdən doğan bu duyğu – sevgi təfəkkürün dərin qatlarına qədər aparır. Zahirdən batinə, bədəndən mən-ə qədər uzanan bu yolun əslində özü sevgi üzərində mövcuddur.
Gəncin qarşısında açılan üfüqün genişliyinə bax! İlahi eşq və Fəlsəfənin ənginliyi! İdrakı və təfəkkürü ilə müqəddəsliyin zirvəsinə yüksəlmək imkanı! Bu üfüqlərin fəthinin nəticəsidir ki, Motsartın musiqisi sadəcə bir not yığnağı deyil, illərdir, əsrlərdir insanı ilahi harmoniyaya qovuşduran bir sehrdir; Bethovenin doqquzuncu simfoniyası yalnız könülləri oxşamır, həm də düşündürür. Bu üfüqlərin fəthinin verdiyi qüdrətdir ki, Sührəvərdi Aristotelin fəlsəfəsini öz işraqilik fəlsəfəsi üçün bir postamentə döndərib üzərində möhtəşəm bir hikmət ucaltdı. Bu üfüqlərin fəthinin sirridir ki, Bayronun, Puşkinin, Lermontovun, Müşfiqin, Ülvinin qələmindən qopan zərrələr çirkab dolu, keşməkeşli illərin, ədəbi çiçəklənmələrin, tənəzzüllərin arasında öz parıltısını saxlayıb bərq vurmaqda davam edir.
Qurani Kərimin ayələrindən birində deyildiyinə görə, «…Rəbbimin kəlamları üçün dənizlər mürəkkəb olsa və bir o qədər də üstünə gəlsə Rəbbimin kəlamları bitmədən onlar tükənər (Quran 18/109). Bir qüdsi hədisdə isə deyilir ki, «Mən gizli bir xəzinə idim, tanınmaq istədim və xəlqi yaratdım». Həllac onu Allahlıq iddiasına düşməkdə günahlandıranlara deyir: «Xeyr, Rəblik iddia etmirəm. …Yazan Allahdır, Allahdan başqa yazanmı var? Mən və əl sadəcə alətik, başqa bir şey deyilik».1 Əsrlər sonra bənzər bir «etirafı» Şellinq də edir: «Şəxsini yalnız şəxsi müalicə edə bilər və Allah insan olmalıdır ki, insan Allaha qayıtsın».2 Bethoven də yazdıqlarının ona Allah tərəfindən diqtə edildiyini bildirir… Yaradan Özünü bütün gözəl vasitələrlə, bütün ülvi, müqəddəs üsullarla tanıdır və bunun üçün saf, təmiz ruhlar seçir və bəxş etdiyi dərin hikməti, ülviyyəti çatdırmaq üçün o ruhlara YARATMAQ qüdrəti verir. Şellinq deyir: «Məxluqda ilk başlanğıc vahidin öz-özünü yaratmaq cəhdidir və ya əsasın (təməlin) iradəsidir. İkinci başlanğıc sevginin iradəsidir ki, onun vasitəsilə təbiətə söz deyilir və onun vasitəsilə Allah özünü şəxsiyyət edir».1 Bəli, məhz bu yaradanların yaratdıqları ilə insanlar Yaradanı tanıyır, Onun gözəlliyinin, möhtəşəmliyinin şahidi olur.
Beləliklə, həm bizim gənclərin eşqi, sevgisi haqqında düşüncələrimiz, həm də ümumiyyətlə gənclik fəlsəfəsi bitdi. Hər halda bizim qələmimizdən qopan kəlmələr bitdi. Yuxarıda qeyd etmişdik ki, sevgini sona saxlamaqda bir məqsədimiz var. Məqsədimiz hər şeyin ucunu sevgiyə, yəni gözəl ülvi bir sonsuzluğa bağlamaq idi. Sevgi bizim gənclərin əmanətini – missiyyasını nurlandırır, cazibəsini artırır, onun …ağırlığını azaldır, qara notlarının çoxluğunu gizlədir. Axı bütün dərin təfəkkürlərinə, müdrikliklərinə baxmayaraq, onlar gəncdir, buna ehtiyacları var!
Nəticə
Fəlsəfə elə bir zirvədir ki, hər təfəkkürü, hər yaradıcılığı, hər dünyagörüşü ora aid etmək düz olmazdı. O baxımdan, bəzilərinə də «gəncliyin fəlsəfəsi» ifadəsi ilk baxışda bir-birilə uyuşmayan iki fərqli sözün eklektik birləşməsi kimi görünə bilər. Bəs əslində necədir?
İnsan ömrünü fəlsəfə tarixinə bənzətsək gəncliyi onun orta əsrləri hesab etmək olar. İdeyaların çoxusunun doğulub inkişaf etdiyi, bəzilərinin isə rüşeymlərinin yarandığı orta əsrlər. Hələ coğrafi məkanın Şərq və Qərb deyə iki qütbə bölünüb bir-birinə düşmən kəsilmədiyi, qədim hikmətlərin yeni hikmətlərlə üzvi şəkildə çulğalaşıb bir-birini ən kamil şəkildə tamamladığı orta əsrlər. İrrasional idrakın, mistik təfəkkürün rasional təfəkkürlə sıx əlaqəli olduğu, ilahi duyğuların çox vaxt maddi tələbatları öz təsiri altına aldığı, hətta onun inkişafına maneçilik yaratdığı orta əsrlər.
Hər kəsin qəbul etdiyi bir fakt da var ki, fəlsəfə tarixində ən zəngin, ən mürəkkəb, ən ziddiyyətli dövr də orta əsrlərdir. Tədqiqat obyekti kimi ən çox müraciət edilən bu dövr olsa da, hələ də qaranlıq səhifələri, hələ də orijinallığını qoruyan qatlar qalan orta əsrlər. Nəhayət, onu da əlavə edim ki, orta əsrlərin bütöv mənzərəsini yaratmaq üçün bütün bu deyilən cəhətlər paralel, eyni zamanda, bir-birilə əlaqəli şəkildə tədqiq edilməlidir.
Əlbəttə, orta əsrlər haqqında çox fikir söyləmək mümkündür, lakin bu, sadəcə, gəlişi gözəl sözlər, yaxud təsadüfi bir bənzətmə deyil. Bunlar həm də reallığın bütün ziddiyyətlərini öz nurlu mənəviyyatlarında əridib öz əzabı, qüssələri ilə saf, tər-təmiz ideyalar bitirən gəncliyin təsviridir. Yəni biz məhz orta əsrləri gəncliklə «yaxınlaşdıran» xüsusiyyətlərdən danışdıq.
Dediklərimizlə bir faktın aktuallığını vurğulamağa çalışırıq: gəncliyin məhz fəlsəfi aspektdən öyrənilməsi həm gənclərin özü, həm də fəlsəfə üçün xüsusi əhəmiyyət daşıyır.
Təqdim edilən əsərdə biz gəncliyin fəlsəfəsini bütünlüklə əhatə etməsək də, bir neçə məsələni paralel və qarşılıqlı əlaqəli şəkildə araşdırmışıq. Əvvəla, gəncliyə xas bir sıra xüsusiyyətlər vardır ki, məsələn, üsyankarlıq, nadinclik, qısa müddətdə bir neçə sahə dəyişmək həvəsi və s., onların əsl mahiyyətini aydınlaşdırmaqla, onlara münasibət də və təbii ki, onlara göstərilən reaksiyalar da fərqli ola bilər. Digər tərəfdən, bir faktın üzərində dönə-dönə dayanmalı olduq ki, əhəmiyyətinin böyüklüyünü göstərə bilək. Bu, cəmiyyətin gəncin həyatında oynadığı roldur. Cəmiyyət istər istedadların öz vaxtında, zamanında parlaması, reallaşması üçün uyğun şərait yaradan, istər yaradıcılıq axtarışlarında olanlara düzgün, xeyirli istiqamət verən, istər sevgilərin, təfəkkürlərin tamamlanması üçün nümunə ola biləcək yüksək təfəkkürlü şəxsiyyətlər yetişdirən, istərsə də kimliyindən, yaşından, cinsindən asılı olmayaraq İnsana, müqəddəslik duyğusuna dəyər verən bir faktor olmalıdır. Əks halda gəncin bizim təhlil etdimiz xüsusiyyətlərində bir çat, naqislik yaranır və şəxsiyyət şikəst qalır.
Üzərində dayanmaq istədiyimiz cəhətlərdən biri də gəncin ruhunun ilahi aləmlə bilavasitə əlaqəli olmasının vacibliyidir. Xüsusilə qeyd edək ki, bu, həm gəncin mənəvi aləminin təmizliyi, həm düşüncəsi ilə ruhunun bir-birini tamamlaması, həm də ruhunun nəbati, heyvani mərtəbədən insani mərtəbəyə yüksəlməsi üçün ən birinci şərtdir. Ən əsası isə, bu, gəncin ən primitiv hisslərdən ən ali duyğulara, müqəddəslik zirvəsinə, fəlsəfi təfəkkür səviyyəsinə yüksələ bilmək imkanıdır.
İkinci cəhətin vacibliyini vurğulamaq üçün yalnız onu əlavə edək ki, məhz ruhunun Allahla bilavasitə əlaqəli olmasıdır ki, insanı cəmiyyətin çirkabından qurtara bilir, onu məhv olmaqdan qoruyur. Bu olmayanda isə gənc olmayanda isə özü təmiz cəmiyyəti korlaya bilər və cəmiyyət üçün bir nöqsana çevrilər.
Nəhayət, biz bu əsərdə insana məxsus hər bir duyğunun məhz gənclik mərhələsinin olmasını vurğulamağa. Əslində dediyimiz yeni bir şey deyil. Lakin yenilik onun özünəməxsus qanunauyğunluqlara malik olmasını göstərməyə çalışmaqdır. Məsələ burasındadır ki, əvvəla, hər hiss müxtəlif yaşlarda fərqli nəticələrə gətirə bilər. Təsadüfi deyil ki, psixologiyada hər yaşın özünə xas hisslərini öyrənməyə xüsusi diqqət yetirilir. Bu baxımdan, onların fəlsəfi aspektdən də öyrənilməsi az əhəmiyyətli deyil.
Digər tərəfdən, elə düşüncələr var ki, onlar məhz gənc yaşa məxsusdur və onları öz zamanında demək vacibdir. Heç kəsə gizli deyil ki, bir çox hallarda məhz gəncliyə xas olduğu üçün bəzi fikirləri, ideyaları «boş şeydir, keçib gedər», – deyə kənara atırlar. Əlbəttə, bu yaşda deyilənlə nisbətən kamil yaşda deyilənlər eyni tərəziyə qoyulmaz. Lakin bu, heç də onun dəyərsizliyinə dəlalət etmir. Gəncliyin insan həyatında öz yeri olduğu kimi, gəncliyin fəlsəfəsinin də insan təfəkküründə öz yeri və əhəmiyyəti var.
Son söz əvəzi
Mən heç vaxt Ülvi haqqında bir sətir belə yazmamışdım. Düşünürdüm ki, heç yazmayacam da. Duyduqlarıma, düşündüklərimə qələmin gücü çatmaz deyirdim. Əslində qələm güclüdür, ancaq güclü əldə və güclü ürəklə. Mən nə ürəyimdə həmin təpəri, nə də öz əlimdə həmin gücü hiss edirdim.
Bu gün də o gücü hiss etmirəm. Düzdür, «Gəncliyin fəlsəfəsini» Ülvini nəzərdə tutaraq, onu düşünərək başlamışdım. Yazdım da. Ancaq tək Ülvidən yox. Buna yenə ürək eləmədim. Amma Ülvi bütün yazının fonunda, kökündə, budağında, çiçəyindədir. Mozaika kimi bütün yazılarıma səpələnib. Ancaq bütöv yazıya baxanda onun gəncliyinin fəlsəfəsini, müdrikliyinin gəncliyini görəcəklər. Mən bu kitabda Ülvini və ülvi gəncləri addım-addım, sətir-sətir tanıtmağa çalışdım. Sonda bir Ülvi dastanının – ülviyyət dastanının alınacağına ümid edərək.
Ülvi!
Bu, sənin məndən gözlədiyin kitabdır. Bu kitabı sən istəmişdin, ona görə mən də sənin sevdiyin şairlərə, filosoflara, sənin seçdiyin mövzulara müraciət etdim. Sən illər idi gözləyirdin məni. Mənim bu yaşıma və düşüncə səviyyəmə gəlməyimi gözləyirdin. Gəldim və yazdım. Bir vaxtlar evimizə pianino alınanda sənin gözəl ifana baxıb: «məni də öyrət», – deyə xahiş elədim. «Əlimə bax, özün öyrən», – dedin. Elə də elədim. İndi də elə oldu. Mən yalnız sənin «əlinə baxdım». Sən isə yalnız kənardan baxıb, yerinə düşən düzgün «notları» axtarmağıma baxıb yüngülcə gülümsədin, qımışdın. Sonralar pianinoda ifamdan razı qalırdın. Yəqin burda da səni razı salan «notlar» vura bilmişəm.
Dostları ilə paylaş: |