______________________________________________________ Poetika.izm
153
əsrlər boyunca daxilən zənginləşə-zənginləşə, həm də, müəyyən xüsusiy-
yətlərini itirmişdir. Burada söhbət poemanın həcmindən, onun kiçikliyi,
yaxud böyüklüyündən getmir, poemanın strukturunu müəyyənləşdirən
komponentlər daim təkmilləşmiş və belə deyək, hər hansı struktur müəy-
yənləşdirici komponentin “ideyası köhnələn kimi” o, yeni poetik ideya-
ların təcəssüm forması ilə əvəz edilmişdir.
Lirik poema “...zamanın mühüm hadisələrinin şair qəlbindəki güclü
əks-sədası” kimi insanın hiss və düşüncələrinin kadr arxasını göstərir, hə-
min hiss və düşüncələrin haradan başlanğıc götürməsi və sair bu kimi
məsələləri həll etməyə çalışır. Çox güman ki, lirik poemanın bu cəhəti
əsrin əvvəllərində romantiklərimizin diqqətini cəlb etmiş, onlar qəlblərin-
dəki duyğuları, arzu və istəklərini məhz bu janrda əks etdirməyi müvafiq
hesab etmişlər. Əsrin ilk onilliklərində ədəbiyyatımızda realizm və ro-
mantizmin təşəkkülü və inkişafı yeni janrların yaranmasını şərtləndirdiyi
kimi, bu janrın strukturunda da dəyişikliklərə, həmçinin romantik və
realist poema növlərinin yaranmasına təkan verirdi. Lakin ədəbiyyatşü-
naslıqda belə bir fikir də mövcuddur ki, poema nə romantizmə, nə də
realizmə, nə də klassisizmə, bütövlükdə ədəbiyyata, cəmiyyətə, insanlığa
aiddir. Estetik ab-havanın dəyişməsindən asılı deyildir. Bu fikir bir qədər
birtərəfli xarakter daşıyır, çünki müxtəlif ədəbi cərəyanların
hakim olduğu
dövrlərdə yazılan əsərlər bir çox cəhətlərinə görə fərqlənir. Yəni, tutaq ki,
romantizmin hakim olduğu bir dövrdə yuxarıda deyildiyi kimi, bu dövrün
kontekstinə girməyən, ondan kənarda “nəfəs alan” poemadan söz gedə
bilməz. Bu müxtəliflik əsərlərin ideya-məzmununda, forma və struktu-
runda, təsvir vasitələrində, surətlər aləmində özünü daha çox büruzə verir.
Bu prinsipi əsas götürərək əsrin əvvəlində yazılan poemaları nəzərdən
keçirdikdə romantik poemaların üstünlüyü ilə qarşılaşırıq.
Romantizm cərəyanının A.Səhhət, A.Şaiq, H.Cavid, M.Hadi kimi
nümayəndələrinin yaradıcılıq məhsulu olan bu poemalarda cəmiyyəti, dü-
şünən beyinləri narahat edən, insanlığın xoşbəxtliyinə mane olan bir çox
məsələlər işıqlandırılmışdı. Bu poemalarda yeni azadlıq ideallarından,
mənəvi dəyərlər uğrunda mübarizədən (“Beşikdən məzara qədər bəşərin
əhvalı”, “Bir sərgüzəşti-xunin” – M.Hadi, “Məsud və Şəfiqə” – H.Cavid),
azadlıq mübarizəsinin təsvirindən (“Əhmədin qeyrəti” – A.Səhhət), xalq
adət-ənənələrindən (“İki familiyanın məhvi”, “Mərhəmətli Ədhəm” –
A.Şaiq), sənət adamlarının cəmiyyətdəki mövqeyindən (“Şair, şeir pərisi
və şəhərli” – A.Səhhət), eləcə də müharibə dəhşətlərindən (“Əlvahi-
intibah” – M.Hadi) söz açılırdı. Təbii ki, romantizmin yaradıcılıq idealları
bu mövzuların işlənməsini zəruri edirdi. Çünki ümumi, narazı, üsyankar
bir ruh, küskün əhvali-ruhiyyə romantiklərin nəinki epik – lirik əsərlərinə,
bütün yaradıcılığına hakim idi. Mövzu orijinallığı, məzmun yeniliyi ilə
seçilən romantik poemalar XX əsr ədəbiyyatımızda mühüm yer tutur. Bu
______________________________________________________ Poetika.izm
154
poemalar təkcə çoxcəhətli müasir məzmun, mübariz ideyasına görə yox,
süjet quruluşuna, maraqlı kompozisiyasına görə də mükəmməl sənət nü-
munələri idi. Bu əsərlərdə iki tendensiyanın – həm Avropa romantizmi-
nin, həm də klassik Şərq ədəbiyyatının təsirini aydın görmək olurdu. Epik
poeziya nümunələrində bir tərəfdən yeni məzmun və süjetlərdən istifadə
edilsə də, forma cəhətdən klassik ənənələrə və ədəbi formalara müraciət
olunurdu. Bütün bu cəhətlər orijinal xüsusiyyətlərlə zəngin yeni Azərbay-
can poemasının yaranmasını şərtləndirirdi.
Dövrün poemaları içərisində orijinal məzmunu və xüsusi daxili dra-
matizmi ilə seçilən Məhəmməd Hadi poemaları XX əsr romantik ədəbiy-
yatını kompozisiyası, orijinal poetikası ilə zənginləşdirmişdir. Belə ki,
M.Hadi bəzən klassik ənənələrdən bəhrələnsə də, əsərlərini yeni keyfiy-
yətlərlə zənginləşdirməyi daha üstün tuturdu. İşgəncələrlə dolu həyat
haqqında düşüncələrdən doğan dərin kədər Hadi lirikasının, Hadi şeirinin
başlıca ideya istiqamətlərindən olmuşdur. Onun epik əsərlərində də məhz
bu cəhət – insanın bütün əzab-əziyyətlərdən qurtulub azad, müstəqil hə-
yatda xoşbəxt yaşamaq arzusu qabardılır. M.Hadinin “Aləmi müsavat-
dan” poemasında olduğu kimi, “Beşikdən məzara qədər bəşərin əhvalı”
poeması da bu fikirlərin davamı xarakteri daşıyırdı.
Hürriyyəti mən istər idim dəhrdə, heyfa, –
Olmuş bu cahan cümlə yaranmışlara mənfa!
Zənn eylər idim aləmi rəxşəndə cahandır...
Madam şikəmindən daha zülmətli məkandır.
Fikr eylər idim cənnəti-ülviyyətə düşdüm,
Nirani ələmdir bura, süfliyyətə düşdüm [5, s. 308].
Azadlıq həsrəti, hər cür zülm və ədalətsizliklərdən uzaq olan cəmiy-
yət, insan və onun səadəti haqqında utopik arzular bu poemanın əsas mo-
tivlərini təşkil edir. Burada bir cəhəti də qeyd edək ki, Hadi poetik təfək-
kürü etibarilə, yuxarıda da qeyd etdiyimiz kimi orijinal bir şair idi, o yaz-
dığı əsərləri ürəyində yaşatdığı ideyaların bədii təcəssümünə çevirməyə
çalışırdı və təsadüfi deyil ki, bu cəhd əsərlərin poetik strukturunun fərqli
olması ilə nəticələnirdi. XX əsr romantik poemalarında nəzm və nəsr
hissələrinin növbələşməsi (“Bir sərgüzəşti-xunin”) məsələsi də məhz bu
ayrıntı ilə bağlıdır. Çünki, bədii mətndə ideya axtarışları kəskinləşdikcə,
daha doğrusu, dərinləşdikcə əsər daha çox öz forması ilə danışmağa
üstünlük verir.
Bu dövr poemalarında hadisələrin, situasiyaların təsvirindən çox,
qəhrəmanların daxili aləmi, düşüncə və duyğularına daha geniş yer veri-
lirdi. Bu poemalarda müəlliflər tarixi simalardan, ənənəvi qəhrəmanlıq