ilqar Mammadov
laşdığından dövlət inkişaf etdikcə onun leqallaşma texnikası da
təkmilləşmişdir. Bu inkişafın nəticəsində leqallıq, yəni dövlət
orqanlarının qanunlara əsaslanan fəaliyyəti hüquqilik ideyasının təsiri
ilə yeni keyfiyyət qazanmışdır. Hüquqilik, yəni qanunların özünün
hüquqi olması tələbi dövlətin müəyyənləşdirdiyi qanunların istənilən
məzmunda olmasını istisna etmiş və bunun nəticəsində yalnız insan
hüquq və azadlıqları ilə məhdudlaşan qanunların dövlət
mexanizminin fəaliyyətini tənzimləməsi gerçək hadisəyə çevrilmişdir.
Bu, dolayısı ilə dövlət vəzifəli şəxslərin, məmurların fəaliyyəti
üzərində yüksək vəzifəli şəxslərlə yanaşı, həm də cəmiyyətin özü,
onun bütün üzvləri tərəfindən nəzarətin həyata keçirilməsini ehtiva
edir.
Dövlət hakimiyyətinin leqallığının bir əhəmiyyəti də ondan
ibarətdir ki, o dövləti hüququn subyektinə çevirir. Beləliklə, dövlət
hakimiyyəti hüquq subyektliyinə malik olan hakimiyyət kimi çıxış edir
və hakimiyyət-tabeçilik münasibətlərində hüquq və vəzifələrə malik
olan orqanlar, vəzifəli şəxslər, məmurları vasitəsilə təmsil olunur.
Dövlət hakimiyyətinin universal və ümumi hakimiyyət olması
onun mühüm əlamətlərindən biridir. Dövlət hakimiyyəti subyektlərinin
fəaliyyəti, onların hakimiyyət funksiyaları, o cümlədən, dövlət
hakimiyyətinin özü universal xarakter daşıyır. Dövlət hakimiyyəti və
dövlət hakimiyyəti subyektlərinin hakimiyyət funksiyaları bütün
cəmiyyətə, cəmiyyətin bütün üzvlərinə, strukturlarına sirayət olunur
və o, bütün cəmiyyət üzrə yeganə ali hakimiyyət, universal təşkilat
kimi çıxış edir. Dövlət özünün idarəedici, tənzimləyici və
mühafizəedici fəaliyyətinə uyğun olaraq ictimai həyatın müxtəlif
sahələrini əhatələyir, həmin sahələrdə yaranan münasibətləri
müvafiq axara salır və onların inkişafına təsir göstərir. O, siyasi,
hüquqi, iqtisadi, mədəni, ekoloji və s. sahələrə öz məqsədlərinə
uyğun qaydada təsir edir. Bütün bu sahələr üzrə münasibətlərin eyni
əsasda tənzimlənməsi, onların eyni əsaslarla idarə olunması yalnız
dövlət tərəfindən həyata keçirilir. Lakin bütün dövlətlər cəmiyyətin
sosial, iqtisadi, ruhi-mənəvi, siyasi sahələrinə heç də eyni dərəcədə
müdaxilə etmir. Bir
174
Dövlət və hüquq nəzəriyyəsi
dövlətdə bu müdaxilə və hakimiyyətin həmin sahələrə sirayət
olunması total xarakter daşıyır və totalitarizmə, avtoritarizmin ifrat
formasının yaranmasına gətirib çıxarır. Başqa bir dövlətdə isə həmin
müdaxilənin
məqsədyönlü
şəkildə
və
hüquqi
əsasda
məhdudlaşdırılması hakimiyyətin ümumiliyinin və universallığının
rasional hüdudunu yaradır. Demokratik, liberal dövlət ideyalarının
inkişaf etməsi dövlət hakimiyyətindəki universallığın və ümumiliyin
cəmiyyətdə rasional hüdudlar çərçivəsində təzahür olunmasına
xüsusi təsir göstərmişdir.
Bir daha qeyd edək ki, dövlət hakimiyyətinin universallığı və
ümumiliyi onun bütün cəmiyyətin adından çıxış edərək fəaliyyət
göstərməsindən irəli gəlir. V.M.Korelski təsadüfi olaraq yazmır ki,
bütün cəmiyyətə sirayət olunan bu hakimiyyət cəmiyyətin özü ilə
üst-üstə düşməsə də, onun adından, bütöv xalqın adından çıxış
etməklə onu elə bütövlükdə də təmsil edir.
Dövlət hakimiyyəti universal, ümumi olmaqla bərabər, vahiddir
və şəriksizdir. O, özünün sosial məzmununa, təşkilati strukturuna
görə vahiddir. Bu hakimiyyət bütövlükdə cəmiyyətin özündə,
həmçinin ondan kənarda bir neçə ayrı-ayrı hakimiyyətlər kimi yox,
vahid bir hakimiyyət kimi təzahür olunur. Hər bir cəmiyyət yalnız bir
dövlətin hakimiyyətini tanıyır və bu hakimiyyət heç bir hakimiyyətlə
rəqabətdə olmayan ali hakimiyyət kimi tanınır. Vahid ali hakimiyyətin
olmaması dövlətin faktiki olaraq parçalanması, dağılması demək
olardı. Odur ki, dövlət hakimiyyətinin vahidliyi onun ən mühüm və
ayrılmaz əlamətlərindən biri kimi çıxış edir.
Dövlət hakimiyyətinin müxtəlif qollara bölünməsi onun
vahidliyinə zidd olan hadisə kimi başa düşülməməlidir. Belə ki,
hakimiyyətlərin bölünməsi deyərkən, hakimiyyətlərin çoxluğu deyil,
vahid dövlət hakimiyyətinin həyata keçirilməsi prosesində onun
funksional qollara bölünməsi nəzərdə tutulur. Hakimiyyətin hər bir
qolu dövlət hakimiyyətinin müəyyən bir istiqamətdə həyata
keçirilməsini təmin etməklə onun qəsb edilməməsi üçün hakimiyyət
səlahiyyətlərindən bir qismini özündə cəmləşdirir və beləliklə, onun
bir orqanda cəmləşməsinin qarşısı alınır. Bu qol-
175
ilqar Məmmədov
larin hər biri yalnız öz səlahiyyətləri daxilində fəaliyyət göstərir və
başqalarına aid səlahiyyətləri həyata keçirə bilmir. Lakin buna
baxmayaraq, onlar tam müstəqil hakimiyyətlər hesab edilmir.
Hakimiyyətlərdən, yəni hakimiyyət qollarından hər biri müəyyən
səlahiyyətlərə malik olmaqla vahidlik daxilində bir-birini tamamlayır.
Beləliklə də, onlar birlikdə vahid dövlət hakimiyyətinin həyata
keçirilməsinə xidmət edir.
Hüquq ədəbiyyatında dövlət hakimiyyətinin vahidliyinin üç
aspekti müəyyənləşdirilir.
Birinci aspekt dövlət hakimiyyətinin sosial vahidliyini ifadə edir.
Yəni ictimai həyatın bütün sahələrinin idarə olunması yalnız dövlət
hakimiyyəti tərəfindən həyata keçirilir. Cəmiyyətin ayrı- ayrı sahələri
bir siyasi hakimiyyətin təsiri altında olur, bu sahələrin hər birində
münasibətlər vahid bir dövlət hakimiyyətinin müəyyənləşdirdiyi
hüquq normaları ilə tənzimlənir.
Dövlət hakimiyyətinin vahidliyinin ikinci aspekti onun, bütün
dövlət
orqanlarının
prinsipial
məqsədlərinin
və
fəaliyyət
istiqamətlərinin vahidliyi ilə bağlıdır. Dövlət hakimiyyətinin fəaliyyət
istiqamətləri eyni məqsədlərdən irəli gəlir. Bu məqsədlərin özü də
vahid bir mənbədən doğur.
Üçüncü aspektə əsasən, dövlət hakimiyyətinin vahidliyi təş-
kilati-hüquqi vahidlikdir, bütövlükdür. Bu cür vahidlik hakimiyyətlərin
bölünməsi mexanizmi ilə ziddiyyət təşkil etmir. Məlum olduğu kimi,
hakimiyyətlərin bölünməsi hakimiyyətin müxtəlif qollarını təşkil edən
ayrı-ayrı orqanların bir-birindən fərqli istiqamətlərdə, fərqli
səlahiyyətlər çərçivəsində fəaliyyət göstərməsini, həmçinin müxtəlif
cür təşkil olunmasını ehtiva edir. Bundan çıxış edərək dövlət
hakimiyyətində təşkilati vahidliyin olmaması fikrini irəli sürmək,
hadisəyə səthi yanaşıldığına və onun mahiyyətinin düzgün başa
düşülməməsinə işarədir.
Dövlətin mühüm əlamətlərindən biri də ondan ibarətdir ki, o,
hüququ pozitivləşdirən yeganə təşkilat olmaqla qanunların qəbul
olunması, hüquq normalarının müəyyənləşməsi üzərində inhisara
malikdir. Belə ki, normativ hüquqi aktlar müvafiq dövlət orqanları
tərəfindən və onun adından qəbul olunur, yəni yalnız
176
Dostları ilə paylaş: |