Şeirsiz yaşamaq olmayan yerdə

 
372
 
EYLƏMƏZ 
 
Əsil aşiq eşqini qəlbində bir dərd eyləməz, 
bivəfadır o kəs ki, fəryad edər, mərd eyləməz. 
 
Vəslinə yetmək üçün dəmbədəm can qurban dilər, 
yansa hicran oduna gündə yüz yol, fərq eyləməz. 
 
Fəzayi-eşqi görənlər tərki-dünyadır, canım, 
binəsib pərvanələr heç birini görk eyləməz. 
 
Qaldı qovğalar içində Məcnun, Fərhad və Kərəm, 
min şükür, aşiqləri eşq ümmanı qərq eyləməz. 
 
Ən böyük ziyarətgah, ya Rəbbim yar otağıdır, 
ora qədəm basmağa hansı kafər ərk eyləməz? 
 
Fəxrəddin, məsləhətin divanəyə faydası yox, 
bəlayi-eşqə düşən nəsihəti dərk eyləməz. 
 
 
  
KÜSMÜŞƏM 
 
Görmürəm hüsnün haçandır, o pəridən küsmüşəm, 
olmayan dərdimə həmdərd dilbərimdən küsmüşəm. 
 
Bilməm neyçün bu əsirin saxlayıbdır naümid, 
qalmışam qovğa içində, sərvərimdən küsmüşəm. 
 
Hər görəndə, gül üzündən Gün doğardı ömrümə, 
açılmır könlüm səması, xavərimdən küsmüşəm. 
 
Bir gileymi, bir istəkmi, ya incilik, bilmirəm, 
o mələk adı dilimdə əzbərimdən küsmüşəm. 

---

 
373 
 
Ah necə xoş günlər idi “can” deyirdim nazına, 
indi bir nisgil qalıbdı şakərimdən, küsmüşəm. 
 
And içib əhd eyləmişdim işvəsindən kam alam, 
müstəcab olmadı əhdim, and yerimdən küsmüşəm. 
 
Fəxrəddin, qəlb göynədən sevgi bəladı Tanrıdan, 
odur ki, mən bu bəlanın cövhərindən küsmüşəm. 
 
 
 
BİLSİN  
 
Şair odur, hər hissini sözlə verə bilsin, 
arif odur, batindəki gözlə görə bilsin. 
 
Dünya yaranandan ağıl, zəka məkanıdır, 
bu hikməti hər an, hər işində hərə bilsin. 
 
İnsanlar üçündürsə bu candan şirin aləm, 
insan da gərək kam ala, dövran sürə bilsin. 
 
Allah qədər, Quranca müqəddəsdi bu torpaq, 
imanı olan səcdəyə gəlsin Yerə, bilsin. 
 
Min arzu ilə can qoyub, övlad böyüdənlər, 
kaş əkdiyinin barını hər kəs dərə bilsin. 
 
Acizləri sevmir yaranışdan bu təbiət, 
güclü gərək öz taleyini güldürə bilsin. 
 
Fəxrəddin, nədir sözlərinin qədri-qiyməti, 
bu zəhmətini vurmasın kimsə yerə, bilsin. 
 
 

---

 
374
 
OLMASIN 
 
Oxu, ey bülbülü-şeyda, səsin nalan olmasın,  
sən gəzən bağ-bağçanın gülləri xəndan olmasın.  
 
Əssə rüzgar yelləri duyğusuz qəlblərdə, nə qəm,  
təki sevda yollarında vaxtsız xəzan olmasın.  
 
Gündə yüz yol yar ilə küsüb-barışmaq dərd deyil,  
olsun bu xiffət dəmadəm, bircə hicran olmasın.  
 
Qoy uzansın hər ömürdə bir şirin sevda yolu,  
ruhu saflar öz eşqində, kaş peşiman olmasın.  
 
Yüz heyif, haqq sevgisində kimsə kama yetmədi,  
ya Rəbbim, rəhm et mənə, bağrım başı qan olmasın.  
 
Fəxrəddin, hər misranda bir hala düşsən də, gərək  
haldan-hala düşməyi şairə nöqsan olmasın. 
 
 
 
YENƏ O CAN DEDİYİM...  
 
Yenə o can dediyim tən tutur əğyarə məni,  
bu sayaq naz-savaş olmaz, qoyub avarə məni.  
 
Nə yaxın düşməyə qoymur, nə uzaq getməyə bir dəm,  
o Günəş üzlü dəmadəm edir səyyarə məni.  
 
Yüz günah işlədirəm ki, kəssin hər gün ömrümdən,  
gündə məcbur eyləsin verməyə kəffarə məni.  
 
Nə bir rahat gündüzüm yox, nə bir aramlı gecəm,  
döndərib yollarında bisəmər zəvvarə məni.  

---

 
375 
 
Bitdikcə min dərd qapımda, solur bəxtim bağçası,  
gəlməyir dərdim əlacı, tamayır çarə məni.  
 
Bu qədər ağrı-acıyla vəslə yetməz bir aşıq,  
Fəxrəddin, yar biryolluq öldürüb qurtara məni. 
 
 
 
DÜNYA GÖZ AÇANDAN... 
 
Dünya, göz açandan, mənə, ey can, qəhər oldu, 
ömrüm bir ömür olmadı, ağır səfər oldu. 
 
Heç gülmədi bir yol üzüm bir xoş xəbər ilə, 
qəlbimsə dəmadəm qəm ilə dərbədər oldu. 
 
Arzu çiçəyim açmadı, ta ki, verə müjdə, 
hər həsrət ilə gözlədiyim bisəmər oldu. 
 
Gündüz susub könlümdəki nisgilləri qovdum, 
göz yaşım ilə hər gecəm ötdü, səhər oldu. 
 
Bəxtsiz olanın zəhmətinin bəhrəsi yoxmuş, 
ömrüm uzunu bəslədiyim bar zəhər oldu. 
 
Duyğumla xəyal aləmində ixtiyar idim, 
duyğum da, xəyalım da dönüb dərdi-sər oldu. 
 
Bu halıma da kimsələr həsəd çəkib deyir, 
Fəxrəddin Ziya şair olub bəxtəvər oldu. 

---

 
376
 
HARDASAN 
 
İlk sevincim, xoş gümanım, son pənahım, hardasan, 
səcdəsindən doymadığım qibləgahım, hardasan? 
 
Mən özümü tanıyandan varlığına tapındım, 
ümidiylə yaşadığım hər sabahım, hardasan? 
 
Puç gördüm çox təriqəti, bütpərəstlikdən həzər,  
nurundan kamyab  olduğum tək Allahım, hardasan? 
 
Tərk eyləmiş ulu Adəm bir kəlmənlə cənnəti, 
hökmü ədalət sayılan şahənşahım, hardasan? 
 
Harınların qarşısında yazıqların qul oldu,  
Səbri hər əzaba yetən səbrullahım, hardasan? 
 
"La İlahə" söyləyəndə silkələnər vücudum, 
təkrarından doymadığım "İlləllahım", hardasan? 
 
Üzün dönsə Fəxrəddindən ummaz nicat kimsədən, 
yüz tövbəyə bağışlanmaz bir günahım, hardasan? 
 
 
 
 
 
 
 
 
 
 
 
 
 
 

---

 
377 
MÜNDƏRİCAT 
 
REDAKTORDAN .................................................................................................................. 4
 
BİR ŞAİR ÖMRÜ ................................................................................................................... 8
 
 
KİTABLAR KİTABIM VƏ YA HƏYATLA ÜZ-ÜZƏ 
 
MÜNACAT .......................................................................................................................... 19
 
ŞEİRİM ................................................................................................................................. 20
 
NİKBİNLİK ..........................................................................................................................  21
 
ŞAİRLİK .............................................................................................................................. 22
 
YA QİSMƏT ........................................................................................................................ 23 
ARZUDUR ........................................................................................................................... 24
 
GÖZƏLLİK .......................................................................................................................... 24
 
ŞEİR DÜNYASI ................................................................................................................... 25
 
MİLLƏT ŞƏRQİSİ ............................................................................................................... 26
 
DURBİN ............................................................................................................................... 27
 
CƏSURLARIN NƏĞMƏSİ ................................................................................................. 28
 
XƏTAİ İŞIĞINDA ............................................................................................................... 29
 
ŞAH XƏTAİNİN RUHU İLƏ GİLEY-GÜZAR .................................................................. 30
 
QALXIN Kİ, QALXAQ ....................................................................................................... 31
 
MƏN SARAY ŞAİRİ OLA BİLMƏRƏM ........................................................................... 32
 
KİŞİLİK ................................................................................................................................ 33
 
YERİYİN DÜŞMƏN ÜSTÜNƏ ........................................................................................... 35
 
KİM İDİN, KİM OLDUN .....................................................................................................  36
 
BÜTLƏR, HEYKƏLLƏR .................................................................................................... 37
 
DÖRDLÜKLƏR ................................................................................................................... 39
 
SƏKKİZLİK ......................................................................................................................... 44
 
BAYATILAR ....................................................................................................................... 45
 
QƏHRƏMANLAR LAYLASI ............................................................................................. 50
 
SOYUQ TƏNDİRLƏRƏ ÇÖRƏK YAPILMAZ .................................................................. 51
 
YAXŞILAR .......................................................................................................................... 52
 
BİZİ BAĞIŞLAYAN OLARMI ........................................................................................... 53
 
QULAQ AS, BALA ............................................................................................................. 56
 
KEÇİD DÖVRÜ ................................................................................................................... 57
 
PULSUZ KİŞİLƏR .............................................................................................................. 59
 
GÖZLƏRİ YOL ÇƏKƏN VƏTƏN ...................................................................................... 60
 
MƏNİM SARBANIM .......................................................................................................... 61
 
ŞAİRLƏR ÇOXALIR ...........................................................................................................  62
 
MƏMMƏD ARAZ KARANDAŞI ....................................................................................... 64
 
ARTAN BƏLAMIZA, AZALAN YAŞIMIZA .................................................................... 66
 
ÖZ YERİNİ BİLMƏYƏNLƏRƏ ......................................................................................... 67
 
GÖZƏLLİK QADINDIR, QADIN GÖZƏLLİK .................................................................. 68
 
YAXŞI KİŞİLƏRƏ .............................................................................................................. 70
 
MİNİLLİYİN AYRICINDA ................................................................................................. 71
 
QARIŞDIRMA ..................................................................................................................... 73
 
GÖRÜNMƏYƏN BÖYÜKLÜK .......................................................................................... 74
 
QOCALAR EVİ ................................................................................................................... 75
 
TALESİZ QIZLAR............................................................................................................... 77
 
YAŞINDAN NEÇƏ İL TEZ QOCALANLAR ..................................................................... 78
 

---