79
məhv olmasında karaxanovların, tumanyanların tərəfindən öz soydaşlarımız da
iştirak etmişdilər.
Həmin sənədi diqqətinizə çatdırıram:
Əmr.
Surəti:
Azərbaycan SSR Xalq Daxili İşlər Komissarı 01 yanvar 1940-cı il. № 24.
Bakı şəhəri.
1927-ci ildən Nuxa rayonunun ərazisində fəaliyyət göstərən Xudu İbrahim
Abdulla oğlunun Zəyzid və Cəfər Mirzə oğlunun Bideyiz siyasi quldur qruplarının
son qalıqlarına qarşı əməliyyat aparılıb.
Adı çəkilən quldur qruplar illər ərzində Nuxa, Vartaşen və b. qonşu
rayonlarda kolxozçular, kənd fəalları, partiya-sovet aparatı nümayəndələrinə qarşı
50 terror aktı törətmişlər.
1932-ci ildə həmin banda ilə toqquşmada Azərbaycan SSR DSİ-nin
Cəfərabad rayon şöbəsinin mütəvəkkili Aqacanov yoldaş öldürülmüşdür. Qətllərlə
yanaşı quldur dəstəsi soyğunçuluq, kolxoz əmlakının, evlərin yandırılması və s.
məşğul olmuşdur.
«Sovet» adına kolxozun sədri Əsgərov Abdulla Məmməd oğlunun, Aşağı
Şabalıd kəndinin sakini Mahmudov Həsənin, Yun tədarükü idarəsinin Nuxa rayon
şöbəsinin rəisi Tumanyan Sərkis Avahimoviçin, Aşağı Göynük kəndinin sakini
Sadıxov-Əsgərov Talıbın, meşəbəyi Mustafa Qurban oğlunun və «Sovet» adına
kolxozun briqadiri Həbillah Nəsrulla oğlunun XDİK-na etdikləri köməyin
sayəsində, göstərdikləri fədakarlıq və qətiyyət hesabına 1939-cu ilin martından
sentyabrına kimi olan müddət ərzində bu quldur dəstələrinin başçıları Xudu
İbrahim Abdulla oğlu, Cəfər Mirzə oğlu və həmin dəstələrin üzvləri İsgəndər
Molla Məmməd oğlu, Əşrəf Cəfər oğlu məhv edilmiş, Yəhya Abdulla oğlu və
Sabir Qafar oğlu diri ələ keçirilmişlər. Beləliklə, birləşmiş Zəyzid-Bideyiz siyasi
quldur dəstəsi tamamilə ləğv edilmişdir.
Əsgərov Məmməd Abdulla oğlunun, Mahmudov Həsənin, Mustafayev
Mustafa Qurban oğlunun, Tumanyan Sərkis Avahimoviçin, Sadıxov-Əsgərov
Talıbın, Rəhim Məmməd oğlunun və Həbillah Nəsrulla oğlunun yüksək
vətənpərvərliyini qeyd edərək onların hamısına pul mükafatı verməklə təşəkkür
elan etmək XDİK-nin Nuxa şəhər şöbəsinin rəisi Karaxanova həvalə edilsin.
Əmrin əsli Azərbaycan SSR XDİK-nin bütün rayon şöbələrinin operativ
heyəti qarşısında, həmçinin XDİK-nin bütün hərbi hissələri qarşısında elan edilsin.
Azərbaycan SSR Xalq Daxili İşlər komissarı, təhlükəsizlik xidməti
mayoru Yemelyanov.
Azərbaycan SSR Xalq Daxili İşlər Komissarlığı ikinci şöbənin rəisi,
təhlükəsizlik xidməti kapitanı Qriqoryan.
80
Doğrudur: Azərbaycan SSR Xalq Daxili İşlər Komissarlığının Nuxa
şöbəsinin rəisi təhlükəsizlik xidməti baş leytenantı Karaxanov.
66
Yuxarıdakı sənəddə ləğv edilənlərin sırasında adı xatırlanan İsgəndər
Molla Məmməd oğlu pəhləvan cüssəli, olduqca cəsur bir insan idi. 1939-cu ildə
onu aldadaraq oylağı olan dağlardan qoparıb əvvəlcədən pusqu qurulmuş San
Qobu deyilən əraziyə gətirmişdilər. Əl-qolu açıq ikən ona yaxın gəlməyə cürət
etməyərək kəməndə salmış, sonra isə güllələmişdilər. Bununla da ürəkləri
soyumamış, meyitin başını kəsmişdilər.
Nuxa-Zaqatala dairəsində qaçaqçılıq hərəkatının məşhur simalarından biri
də Vartaşen (Oğuz) rayonunun Muxas kəndindən olan Tapdıq Üzeyir oğlu
Mikayılov idi. Bolşevik rejiminin müəyyən etdiyi meyarlar baxımından ortabab
kəndli zümrəsinə mənsub olan Tapdığın Muxasda balaca bir dəyirmanı vardı.
1918-ci ildə Calud talanı zamanı islamı qəbul etmiş Ağasəf adlı bir nökəri də olub.
Bu nökər Tapdığın həyatının sonrakı mərhələsində üzləşdiyi bütün fəlakətlərin əsas
baiskarı oldu. On birinci bolşevik ordusu sıralarına qoşulmuş Ağasəf onu yeni
ağalarına sovet hökumətinin təhlükəli düşməni kimi təqdim edir. Bu təqdimat
Tapdığın boynuna keçirilən ölüm ilgəyinə çevrildi. 1920-ci ilin mayında on birinci
ordunun sağa-sola ölüm saçdığı günlərdə onu həbs edib güllələmək üçün Şəkiyə
aparırlar. Sanki hər şey bitmiş, ölüm qaçılmaz olmuşdu.
Lakin möcüzə baş verir. Tapdıq qaçıb xilas ola bilir. O, 1930-cu ilə qədər
yarı qaçaq həyat tərzi keçirir. Bəli, belə hallar da mövcud olmuşdur. Adətən bu cür
gün-güzəran sürən adamlar silahı əllərindən yerə qoymadan təsərrüfatla, əkin-
biçinlə məşğul olurdular.
Qaçaq Tapdıq 1930-cu ildə başlanmış Şəki üsyanında iştirak edir. Üsyan
yatırıldıqdan sonra yenidən dağlara-daşlara pənah aparır.
Tapdıq bolşevik rejiminin törətdiyi rəzalətlərə qarşı çıxıb, üsyan
hərəkatında iştirak edəndə də, ləyaqətinə qarşı yönələn alçaq əmələ görə Muxas
kəndində Qazi və Kamil kimi əclafları güllələyəndə də, bacısının namusuna qəsd
edən Baş Daşağıllı qoçu Məhəmmədi cəhənnəmə vasil edəndə də qisasçı idi. Şərəf
və ləyaqət qisasçısı. Bu elə insanlıq naminə aparılan mübarizə idi.
1930-cu ildə atası Üzeyir kişini və üç əmisini güllələdilər. Doğmalarının
məhv edilməsi onun həyatının ən faciəli səhifələrindən biri idi. Qanı-qanından,
canı-canından olan əzizlərinin qətlindən irəli gələn ürək çatladan, üzücü kədərlə
uzun müddət baş-başa qaldı Tapdıq.
Qaçaq Tapdığı xəyanətin qara kölgəsi tora saldı. 1941-ci ilin oktyabrında
hakimiyyət orqanları onu Şəkinin Oraban kəndində, evində yaşadığı Gözəl adlı
qadının xəyanətindən bəhrələnərək qətlə yetirdilər.
Qaçaqçılıq hərəkatının son mərhələsində qaçaqlara qarşı intensiv təqib
mühiti yaradılmışdı. Bu işə cəmiyyətin bütün zümrələrinin nümayəndələri cəlb
66
Şəki arxivi. Əsas fond 2, saxlama vahidi 219, vərəqə 124