64
çalışırdılar ki, birdən onların maşını duru palçığın nəhəng kütləsi içərisindən çıxaraq bərk
süxur olan tərəfə atılır, sözün tam mənasında sanki uçur. Özünə gələn Ernesto gözlənilməz
xilaskarlara təşəkkürünü bildirməkdən ötrü kabinadan çıxır, ancaq oğlanlar heç bir tərəfdə
görünmürlər, sanki onlar burada olmamış və maşının böyük gölməçədən çıxarılmasına
kömək etməmişdilər. Çox qısa vaxt ərzində onlar yoxa çıxmışdılar. Ərlə arvad kifayət
qədər düz olan, praktik olaraq ağacsız, çılpaq hesab edilən bir yerdə onların necə tez
gözdən itdiklərini xeyli müddət götür-qoy etsələr də, xəyala qapılaraq təsəvvür etməyə
çalışsalar da, ancaq heç bir nəticəyə gələ bilməmiş, qəti fikir söyləməkdə çətinlik
çəkmişlər. Belə danışıqlar alimləri əsla təəccübləndirmirdi. Çünki onlar bu cür söhbətləri
artıq çox eşitmişdilər. Ancaq alimləri düşünməyə vadar edən bir neçə sual vardı: görəsən
bu iki oğlan kimdir, onlar burada əsasən nə edirlər? Böyük ehtimalla onların yadplanetli
olduqları qənaətinə gəlinir. Hər halda onlar «çətin situasiyalarda ümumkosmik təcili
yardım» dəstəsinin işçiləri deyildilər.
Qeyri-adi siması, qəribə zahiri görünüşü, təəccüblü sifəti və heyrət doğuracaq
davranışı olan dərrakəli varlıqlarla görüşlərin olması haqqında ən birinci və kifayət qədər
etibarlı dəlillər XX əsrin əvvəllərinə aiddir. Bizim günlərdə də belə xəbərlərin ardı-arası
kəsilmir.
Əvvəllər olduğu kimi, indinin özündə də xeyli sayda gəlmə, yadplanetli olduğu
iddia edilən neçə-neçə məxluq «sükut zonası»nı ziyarət edir.
Şəkil 69. Luis Ramires Rayes (Luis Ramirez Reyes)
Humanoidlər (insana bənzəyən məxluqlar) ilə çoxlu sayda görüşlərin olmasını
izah etmək çətinlik törədir. Ancaq belə görüşlər haqqında savadlı və dünyagörüşlü insanlar
xəbər verdikdə məsələyə artıq ciddi yanaşmaq lazım gəlir. Belə ki, 1978-ci ilin noyabrında
meksikalı jurnalist Luis Ramires Rayes (Luis Ramirez Reyes) öz peşə yoldaşlarının təşkil
etdiyi qrupun tərkibində «zonaya» yollanır. L. R. Rayes və onun fotoqrafı qrupun qalan
hissəsini qabaqlamaq və «Biosfer» elmi şəhərciyinə daha tez çatmaq qərarına gəlir, cipə
65
minib səhranın içərilərinə yollanırlar. Son məntəqəyə hələ xeyli yol qalmış Ramires birdən
anlayır ki, onlar özlərilə heç bir ehtiyat – nə su, nə də proviziya (azuqə) götürməyiblər.
Onlar yolu azacaqları təqdirdə çox çətin şəraiti olan ölgün bir yerdə aclıq və susuzluqdan
asanlıqla məhv ola bilərdilər. Xüsusən avtomobilin mühərrikində heç bir nasazlıq olmadığı
halda naməlum səbəblərdən onun qəfildən dayanması, yaxud gözlənilmədən qeyri-normal
dərəcədə güclü yağıntı düşməsi nəticəsində maşının təkərlərinin çox qısa zaman ərzində
möhkəm islanmış torpağa batması halları mümkündür və belə şeylər haqqında jurnalistlər
çox eşidiblər. Bütün bunları yaxşıca dərk edən Ramires narahat olmaya bilməzdi. Onlar
qum içərisində hərəkət etmiş avtomobillərin təkər izləri sayəsində güclə açılmış cığırla
gedərək bir yolayrıcına çatırlar. Müəyyən qədər məsafə getdikdən sonra yolu azdıqları,
məntəqəyə aparan cığırla getmədikləri onlara aydın olur. Bir qədər sonra Ramires onlarla
üzbəüz üç fiqurun gəldiyini hiss edir. Gələnlərin yerli sakinlər olduğunu fikirləşən və
onlardan «Biosfer»ə aparan yolu öyrənə biləcəyinə ümid edən jurnalist sükan arxasındakı
fotoqrafdan adamların yanına çatanda maşını saxlamağı xahiş edir. Lakin cip sürətini
azaltmadan onların yanından keçəndə Ramires çox təəccüblənir. Jurnalist yollarının
üstündə olan adamların yanında avtomobili saxlamamasının səbəbini sürücüdən soruşur.
Suala cavab olaraq fotoqraf yolda heç kimi görmədiyini bildirir.
Ramires qorxmağa, özünü qınamağa başlayır. Jurnalist fikirləşə-fikirləşə belə
qərara gəlir ki, müdhiş səhra artıq onun psixikasına təsir edib və onda hallüsinasiyalar
başlayıb. Onun fikirləşdiyi müddətdə cip artıq daha bir mil (təxminən 1,61 kilometr) yol
getmişdi. Birdən Ramiresi yenə heyrət bürüyür, çünki «yerli sakin» bildiyi həmin üç nəfəri
yenidən görür. Bu dəfə yolu tapmağa kömək edə biləcək insanlarla təmas yaratmaq
fürsətini əldən vermək istəməyən jurnalist onların yanında maşını hökmən saxlamasını
xahiş edir. Lakin fotoqraf əvvəlki kimi yolda bir kimsəni görmədiyini bəyan edir. Buna
baxmayaraq maşın fiqurların düz yanına çatanda Ramires fotoqrafdan dayanmasını təkidlə
istəyir. Yoldaşının israrlı olduğunu görən sürücünün avtomaşını saxlamaqdan başqa çarəsi
qalmır. Ramires rastlaşdığı adamlardan «Biosfer»ə aparan yolu soruşur. «Aborigenlər»
haraya dönməyi və necə getməyi çox aydın şəkildə, təfsilatı ilə izah edirlər. Sonra Ramires
gecənin ortasında adamların burada nə etdiklərini soruşduqda onlar öz cavablarında yerli
sakin olduqlarını, ərazini yaxşı tanıdıqlarını deyir və özlərinin itmiş qoyun və keçilərini
axtardıqlarını bildirirlər. Lakin Ramires buradakı çətin şəraitdə yolçuların üstündə mehtərə
(çiyindən asılan və yaxud qurşağa bərkidilən, su və başqa mayeləri daşımaq üçün nəzərdə
tutulan bir qab) və xüsusi zəruri ləvazimatların olmamasına çox təəccüblənir, buna məəttəl
qalır. Ramires və onun boşluqla danışmasından hədsiz heyrətə gələn fotoqraf «izah
edilmiş» yolla «Biosfer»ə qədər sağ-salamat və çox rahat gəlib çıxırlar.
Ramires və onun fotoqrafı qrupun qalan üzvləri ilə rastlaşarkən jurnalist qəribə
və müəmmalı görüşləri haqqında həmkarlarına ətraflı danışır. Onun söhbətinə diqqətlə
qulaq asan laboratoriya rəhbəri Harri de la Penya nağıl edilənlərin həqiqəti əks
etdirmədiyini bildirir. Həmin vaxt «Biosfer»də işləyən və «zonanı» fəal surətdə
öyrənməklə məşğul olan Harri de la Penya jurnalistin yanıldığını izah edir. Tədqiqatçı
narazı bir halda qeyd edir ki, səhrada nə kəndli, nə də başqa bir adam ola bilməz. Burada
ancaq elmi şəhərciyin daimi kontingentini təşkil edən alimlərlə və təzəcə gəlmiş qrupdakı
jurnalist, müxbir və fotoqraflarla rastlaşmaq olardı. Üç nəfərin heç bir ehtiyat tədbiri