4
dövründə müdriklik ilahəsinin adını daşıyan şəhər Yunanıstan mədəni həyatının
mərkəzinə çevrildi.
Afinanın uğurlu xarici siyasəti onun rəqibi Spartanı və axırıncının yaxın
müttəfiqi Korinfi ciddi surətdə qıcıqlandırmaya bilməzdi. V əsrin 40-cı illərinin
sonunda isə afinalılar Qara dənizyanı ərazidə öz ağalıqlarını qurmaq planlarını
həyata keçirməyə başladılar. 437-ci ildə yaxşı silahlanmış eskadra və seçmə hoplit
dəstələri Periklin başçılığı altında Ponta göndərildi. Səfər çox uğurlu oldu, 600
afinalı Xalq yığıncağının qərarı ilə yaşamaq üçün Sinopaya göndərildi və bu şəhər
Qara dənizdə Afina dövlətinin dayaq nöqtəsi oldu. Afina dövlətinin nüfuzu iri Qara
dənizətrafı mərkəzlərdə çox gücləndi, bu geniş əraziyə nəzarət onun bol
resurslarına da nəzarət etmək imkanı yaradırdı. Lakin afinalılar bununla
kifayətlənmədilər və Böyük Yunanıstan yaratmaq yolunda öz nəzərlərini Cənubi
İtaliya və Siciliyanın üzərinə saldılar. Böyük Yunanıstanda Afinanın
hegemonluğunun qurulması Afina dövlətini bütün yunan dünyasının siyasi
birliyinə çevirməklə yanaşı, Spartanın izolyasiyasına səbəb olacaqdı. Bu həm də
Korinfin iqtisadiyyatına ölümcül zərbə vurardı. 440-cı illərin ortalarından afinalılar
öz qərb siyasətlərini planlı qaydada həyata keçirməyə başladılar. 435-433-cü
illərdə afinalılar Kerkira adasındakı qızışan daxili mübarizəyə cəld şəkildə qarışdı
və bu varlı adanı Afina dəniz ittifaqına qəbul etdilər. Yaxşı donanması olan ada
Afina ittifaqının hərbi qüdrətini gücləndirdi. Afina Cənubi İtaliyaya və Siciliyaya
nüfuz etmək üçün 443-cü ildə maraqlı tədbir həyata keçirdi. Dağıdılmış Sibaris
şəhərinin yerində Cənubi İtaliyada ümumyunan koloniyası yaratdı. Kifayət qədər
kolonistlər yığıldı, görkəmli yunan mədəniyyət xadimləri yeni yaşayış yerinə
getmək arzularını bildirdilər. Onların sırasına tarixçi Herodot, arxitektor və
şəhərsalan Hippodam (o, yenicə Pireyi yenidən tikib qurtarmışdı), sofist Protaqor
və yeni şəhərin qanunlarının tərtib edilməsinə öz xidmətini təklif edən filosof
Empedokl daxil idi.
Afina demokratiyasının rəhbərləri xarici siyasət uğurlarını inkişaf etdirərək
yunanlar arasında öz rəhbərliklərini möhkəmləndirmək üçün ümumellin konqressi
çağırmaq ideyasını ortaya atdılar. Plutarx yazır ki, “Perikl xalq qürurunu daha da
5
oyatmaq və vətəndaşları böyük işlərə səy göstərməyə təlqin etmək üçün Xalq
yığıncağına təklif verdi ki, harada, Avropada və ya Asiyada, böyük və ya kiçik
şəhərlərdə yaşamasından asılı olmayaraq bütün ellinlər Afinadakı ümumi qurultaya
öz nümayəndələrini göndərsinlər ki, burada barbarlar tərəfindən yandırılmış ellin
məbədləri, qurbanlar barədə məsləhətləşmə aparsınlar. Bu allahlara verilmiş anda
uyğun olaraq, Elladanın xilasına gətirib çıxaracaqdı. Onlar barbarlarla vuruşanda
bu andı dənizdə və dünyada hamının təhlükəsiz üzməsi barədə içmişdilər. Bu
məqsəd üçün afinalılar yaşı 50-dən yuxarı olan iyirmi adam göndərdilər”. Səfirlər
ellinləri Afinaya gəlmək və sülh haqqında və Elladanın birgə hərəkətləri barədə
müşavirələrdə iştirak etmək üçün dilə tuturdular.
Ümumellin konqressinin çağırılması hamıdan əvvəl Afina üçün faydalı idi,
bu onun Yunanıstandakı siyasi nüfuzunu möhkəmləndirərdi, ellinləri Afinanın
yunan dünyasında tanınmış rəhbər olması fikrinə alışdırardı. Təbiidir ki, Sparta və
Peloponnes ittifaqı belə konqressin çağırılması əleyhinə çıxdı, görülən tədbirlər
konqressin çağırılmasına əngəl törətdi və konqress baş tutmadı.
Digər tərəfdən, Sparta da öz nüfuz dairəsini genişləndirirdi. Bir çox qonşu
dövlətlər Peloponnes ittifaqına daxil olmuşdu, Orta Yunanıstanın böyük hissəsi
spartalıların təsiri altında idi.
Yunanıstanda öz quruluşuna və sosial-siyasi istiqamətinə görə iki fərqli
yunan polislərinin hərbi-siyasi blokunun mövcudluğu və onların arasındakı
gərginliyin artması hökmən müharibəyə gətirib çıxarmalı idi. Afina və onun
müttəfiqləri quldarlıq iqtisadiyyatının intensiv formalarını, sənətkarlıq istehsalını,
əmtəə təsərrüfatını, ticarəti inkişaf etdirməyə can atırdı. Sparta və onun əksər
müttəfiqləri isə əksinə əsasən kənd təsərrüfatının, konservativ natural istehsalı
inkişaf etdirməyə üstünlük verirdi. Biz bunu bizim eranın XIX əsrinin 50-ci
illərində Birləşmiş Ştatları təşkil edən Şimal və Cənubun münasibətində də
görürük. Sənaye cəhətdən inkişaf etmiş Şimal demokratiyanın və liberal
iqtisadiyyatın inkişafına, azad əməyə üstünlük verdiyi halda, Cənub patriarxal
münasibətləri qoruyub saxlamağa, qul əməyinə əsaslanan kənd təsərrüfatının
inkişafına, quldarlığın möhkəmlənməsinə çalışırdı və bu qütbvari münasibətlər
6
ölkəni vətəndaş müharibəsinə gətirib çıxardı. Müharibə Şimalın qələbəsi ilə
bitdiyindən Ştatlar Birliyinin parçalanmasının, ölkənin ərazi və inzibati
bütövlüyünün pozulmasının qarşısı alındı və quldarlığın ləğvinə, bir daha
bağlanması mümkün olmayan qapı açdı.
Siyasi sferada Afina və Spartanın ziddiyyətləri daha kəskin idi. Afinaya
Yunanıstanda demokratiyanın dayağı kimi baxırdılar, bu demokratiya geniş
vətəndaşlıq dairələrinə, onların Xalq yığıncağındakı fəaliyyətinə əsaslanırdı. Sparta
isə əksinə kübar elementləri, vətəndaşların yuxarı hissəsini özünə cəlb edirdi.
Afinanın ən qatı və barışmaz düşmənlərindən biri Korinf idi, bu da V əsrin
ortalarında onların arasındakı iqtisadi rəqabətlə əlaqədar idi. Korinf Balkan
Yunanıstanının ticarət-sənətkarlıq mərkəzi idi və yunan dünyasının qərbində,
Cənubi İtaliyada və Siciliyada həyati mənafelərə malik idi. Afinanın nüfuzu
artdıqca Korinf onun hərbi yolla məhv edilməsini israrlı qaydada tələb edirdi. Bu
Mikena çarı Aqamemnonun başçılığı altında ellin polislərinin kiçik bir bəhanəyə -
Menelayın arvadı Yelenanın prins Paris tərəfindən qaçırılmasına görə Kiçik
Asiyadakı İliona hücum etməsi və 10 illik müharibə nəticəsində Troyanı
darmadağın etməyə bənzəyən bir arzu idi. Ziddiyyətləri birdəfəlik və ən sonuncu
siyasət vasitəsi olan müharibə ilə həll etmək üçün tarix boyu istənilən an səbəblər
olmayanda belə, bəhanələr tapılmışdır. Tarixçi Fukidid yazır ki, “ən həqiqi bəhanə
ondan ibarət idi ki, ...afinalılar özlərinin güclənməsi ilə lakedemonyanlara təhlükə
təlqin edirdilər və bununla da onları müharibəni başlamağa məcbur etdilər”.
Hər iki tərəf böyük hərbi-iqtisadi potensiala malik idi, axı Yunanıstanın
polislərinin əksər hissəsi ya Peloponnes, ya da Afina ittifaqının tərkibinə daxil idi.
Onların hərbi qüvvələri və vasitələri Afina və Spartanın sərəncamında idi.
Peloponnes ittifaqının silahlı qüvvələri 60 min hoplitdən və 300 gəmidən ibarət idi.
Afinanın sərəncamında isə 400 trier, 32 min hoplit və 1200 süvari var idi. O
dövrdə bu qüvvələr olduqca heybətli görünürdü. Yunan-pers müharibələrindən
sonra heç vaxt döyüş əməliyyatlarına belə böyük miqdarda döyüşçü və gəmi cəlb
olunmamışdı.
Dostları ilə paylaş: |