23
tapşırığı ilə evlərinə baş çəkdim ki, deyim yaxşıdır, narahat olmasınlar.
Məni anası qarşıladı və oturmaq üçün stul təklif etdi. Vəziyyəti, Əminənin
özünü yaxşı hiss etdiyini, təkcə əlinə batan tikanlardan əziyyət çəkdiyini
danışdım. Qadın birdən əsəbiləşdi, qızının qarasına deyinməyə başladı,
ortada ərini də yaddan çıxarmadı. Deyəsən, mənim də şəhərli olmadığımı
hiss edibmiş kimi, qızının o ilan mələyən xarabaya ayağı dəyməsinə
qətiyyən yol vermək istəmədiyini dedi və sonra bildirdi ki, Əminənin
inadkarlığı və atasının onu müdafiə etməsi ananı tərkisilah edibmiş. Tikan
məsələsindən, günorta vaxtı, payızın sərin havasında quru torpağın üstdə
qızların uzanıb dincəlmələrindən xəbər tutanda lap əsəbiləşdi, bunları adi
bir hal kimi danışdığıma görə, mənə də hirsləndi və bir daha şübhəli-
şübhəli soruşdu ki, səni niyə onlara başçı qoymuşdular, yəqin ki, təcrübəli
rəhbərləri olsa, onları ağılsız hərəkətlərdən çəkindirər, işləmək üçün
tikansız, təmiz tarla seçərdi. Cavan qızları uşaq-muşağa etibar edəndə,
nəticəsi də belə olur. Mən Əminənin anasının xoşuna gəlməyə nə qədər
can atsam da, özümü yaxşı tərəfdən qələmə verməyə cəhd etsəm də,
deyəsən işləri daha da korlayırdım. Qızların fədakar işindən, gündə
qoyulan normanı yerinə yetirmələrindən sevinclə danışanda qadın lap
hirsləndi və dedi ki, axı mənim qızımın orada nə ölümü var idi ki, ona da
norma qoyulsun və daim başqalarına nümunə olmağa çalışdığından özünü
hər cür cəfaya salıb belə ağılsızlığa da getsin. Sonra kinayə ilə dedi ki,
yəqin öhdəlik götürübmüşsünüz ki, fərqlənib ad çıxarasınız. Mən də
ağılsızlıq edib, fəxrlə dedim ki, bəli, beş günün nəticəsinə görə biz
fakültələr arasında qalib hesab olunduq və Bakıdan çox yüksək vəzifəli
şəxs gəlib bizə qırmızı bayraq verdi. Elə bunu demişdim ki, ev sahibəsi
bildirdi ki, o, dərsə gecikir, bu, mənim evi tərk etməyimə işarə idi.
Qapıdan çıxanda bircə onu eşitdim ki, heç yaxşı olmadı, bir stəkan çay da
içmədin.
Məəttəl qalmışdım, Əminə kimi xoşxasiyyət qızın anası necə sərt və
kobud bir insan imiş. İlk təəssürat şüuruma həkk olundu və heç vaxt bu
rəy məni tərk etmədi. Onu da qeyd etməliyəm ki, ana da axıra qədər mənə
kənddən çıxmış xudpəsənd adam kimi baxmaqda davam etdi və sonralar
Əminə ilə münasibətlərimiz nisbətən sıx və doğma xarakter alanda da
rəyini dəyişdirmədi.
Heç bir həftə keçməmiş bütün tələbələr pambıq yığmaqdan
qayıtdılar və biz Əminə ilə universitetin binasında tez-tez görüşür, hal-
əhval tuturduq. Anasının tünd xasiyyətinə görə mənimlə gəzməyə
24
çıxmaqdan imtina edirdi. Evin bütün işlərini o görürdü. Anasının elə bir
evdarlıq qabiliyyəti yox idi. Atası da yeri gəldikcə qeyd edirmiş ki, Əminə
olmasaydı, bizim evimizdə səliqə-səhman olmazdı, çünki müəllimə
institutda dərs deməkdən başqa, ictimai işlərin fəalı hesab olunduğundan,
bir çox cəmiyyətlərin və komitələrin üzvü idi, tez-tez konfranslarda və
digər tədbirlərdə iştirak edirdi. Bəzilərinin isə hətta təşkilatçılığını öz
üzərinə götürürdü. Əminə paltar yuyur, atasının paltarlarını ütüləyir,
bişmiş bişirir, qab-qacağı yuyur, evin təmizliyinə xüsusi diqqət yetirirdi.
Atası qonaqpərvər insan olduğundan tez-tez dostlarını evinə, axşam
yeməyinə dəvət edirdi. Özü aşağıda manqal qoyub kabab bişirirmiş.
Əminə isə qonaqlar üçün dadlı plov dəmləməyi öyrənibmiş. Belə hay-
küylü qonaqlıqların səhəri günü Əminə olduqca yorğun, yuxusuz
görünürdü, səbəbini soruşduqda az yatdığını, bütün gecəni qab-qacaq
yuduğunu deyirdi. Ana isə yalnız süfrə arxasında əyləşir, ərindən rütbəcə
aşağı olanlara söz atmaqdan, irad tutmaqdan da çəkinmirdi. Dadlı xörəklər
və şərablar onun tənəli sözlərini, şənliyin ruhu isə ev sahibəsinin yersiz
müdaxilələrinin izini asanlıqla yuyub aparırmış. Mən ümumiyyətlə, belə
məclislərdə, bircə dəfədən başqa ümumən onların evində də olmamışdım.
Əminə baş verənlərin hamısını heç bir detalı belə ört-basdır etmədən
danışır və hətta ciddi narazılıq hallarını da zarafatyana qaydada təsvir
etməklə xeyli yumşalda bilirdi. Mən hiss edirdim ki, o, atasına xüsusilə
bağlıdır. Anasının tündməcazlığından, yersiz sərtliyindən xoşu gəlmir.
Lakin bir dəfə də olsun anasına cavab qaytarmır, onun haqsız iradlarına
dözür və təqsirli olmayanda belə məzəmməti itaətlə qəbul edən katolik
rahibələr kimi ananın şıltaqlıqlarını sakit qaydada qarşılayır. Ana qızının
necə həlim bir insan olduğunu anlasa da, bu təzimə düzgün qiymət vermir,
çox vaxt bundan sui-istifadə etməkdən də qalmırdı. İctimai işlərdə onunla
birgə çalışanlar isə bu qadının yaxşı xasiyyətini, mehribanlığını xüsusi
qeyd edir, həssaslığını göylərə qaldırırdılar. Hətta tələbələr də
obyektivliyinə və ədalətliliyinə görə onu sevirdilər. Əslində onun xasiyyəti
ikili xarakter daşıyırdı, iş üçün olan və evdə geyilən paltar kimi bir-
birindən tam fərqli idi. İşdə o, çox təvazökar, hər bir adamın yerini bilən,
başqalarının problemlərinə, dərdinə ürəkdən yanaşan, şad gününə səmimi
qaydada sevinən bir insan kimi tanınırdı. Evdə isə özünü hirsli, qəzəbli
aparırdı, addımbaşı ərinə və qızına yerli-yersiz iradlar tutur, bəzən səsinin
tonunu da dəyişir, az qala isterikaya keçirdi. Sonralar mən öyrəndim ki,
«histerikos» qədim yunan sözüdür, «uşaqlıq» mənasını verir. İsterika
Dostları ilə paylaş: |