28
UOT 82-31
SÜLEYMAN VƏLİYEVİN YARADICILIĞINDA XX ƏSR HƏQİQƏTLƏRİ
ŞİRİNOV FAİQ İMAMƏLİ oğlu
Sumqayıt Dövlət Universiteti tədris bölməsinin müdiri,
e-mail: faiq.shirinov.2016@mail.ru
Açar sözlər: Neft Bakısı, fəhlə mövzusu, sosializm realizmi, müqavimət hərəkatı, müharibə romanı,
cəsarətli yazıçı, repressiya həqiqətləri
Süleyman Vəliyev (1916-1996) XX əsr Azərbaycan ədəbiyyatının
görkəmli
nümayəndələrindən biridir. Romanlar, povestlər, hekayələr müəllifidir. Sovet dönəmində yaşamış,
dövrün ağrı-acılarını da, ziddiyyətlərini də görmüş, yaradıcılığında əks etdirmişdir. II Dünya
müharibəsinin iştirakçısı olmuş, əsirlik çəkmiş, alman düşərgəsindən qaçaraq faşizmə qarşı
müqavimət hərəkatında vuruşmuş və ədəbiyyatımızda bu hərəkatı əks etdirən ilk romanın
(“Mübahisəli şəhər”) müəllifi olmuşdur. Müharibədən sonra ədalətsiz olaraq repressiyaya məruz
qalmış, Sibirə sürgün olunmuş, mənəvi əzab və yaşantılarını hekayələrində, “Düyünlər” romanında
qələmə almışdır. S.Vəliyev Azərbaycan ədəbiyyatında repressiya həqiqətlərindən söz açan ilk
memuar əsərinin (“Qanadı qırıq quş da uçarmış”) müəllifidir. Ümumən yazıçının yaradıcılığı sovet
dövründə Azərbaycan xalqının həyatının bütün mərhələlərini ümumiləşmiş şəkildə əks etdirir.
Süleyman Vəliyev 1916-cı il dekabrın 21-də Bakının Ramana kəndində dünyaya gəlmişdir.
Neft Bakısının inkişaf etdiyi ərazilərdən olan Ramanada, fəhlə ailəsində böyüyən Süleyman
Vəliyevin atası Məşədi Vəli kənddə köklü maşılılar nəslindən sayılıb, sovet dövrünə qədər
imkanlılar sırasına aid olmuşdur. Ramanada səkkiz illik məktəbi yüksək qiymətlərlə bitirən
Süleyman dövrün qabaqcıl məktəblərindən sayılan “Qulam şqolası”nda təhsilini tamamlaya
bilmişdir. Uşaqlıqdan yazıb-oxumağa, xəyalpərəstliyə meyilli gələcək yazıçının ədəbi yaradıcılığa
həvəsi də bu zaman yaranmışdır. Oxuduğu məktəbdə bu baxımdan biliklərə yiyələnmək üçün tam
şərait var idi. Üstəlik, neft mərkəzi olan Sabunçu rayonunda ədəbiyyat, dram və musiqi dərnəkləri
fəaliyyət göstərirdi. Bütün bunlar barəsində S.Vəliyev sonralar həmin məktəbin müdiri haqqında
qələmə aldığı «Qulam müəllim» oçerkində bəhs açmışdır.
“Neft Bakısı”nın uşaqlıq xatirələri dolayısı ilə Süleyman Vəliyevin “Şor cüllütü” (1939)
povestində də əksini tapmışdır. Povestdə XX əsrin əvvəlləri neft Bakısının səciyyəvi obrazını görə
bilirik. Mədən sahibi Musanın surətində ağa sinfinin firavan həyatı, zəngin məişəti, psixologiyası və
əxlaqı təsvir olunursa, mədən fəhləsi Qulunun timsalında kasıb təbəqənin ağır həyatı, yarı-ac, yarı-
tox yaşayışı, həyat uğrunda mübarizəsi qələmə alınmışdır. Milli cəmiyyətin gerçək mənzərələrini
təqdim edən əsər həm də onunla maraqlıdır ki, belə bir şəraitdə dünyaya göz açan, yaşayan,
böyüyən uşaqların, gənc nəslin obrazını təcəssüm etdirir. Yaşayış uğrunda mübarizədə Şor gölün
üstünü basmış neft təbəqəsini yığıb ucuz qiymətə alverçilərə verən, neftə bulaşıb qalmış şor
cüllütlərini ovlayan, əhəng yığıb bayram günlərində divarları ağartmaq üçün kənd qadınlarına satan
İbiş, Cəbi və s. kimi zəhmətkeş balalarının fədakar insan surətləri povestdə harın, zəhmətsiz
böyüdüyü kimi, yekəxanalığa, qorxaqlığa, satqınlığa, namərdliyə malik Fərrux kimi ağa balasına
qarşı qoyulur. “İbiş yerinin içində qovrulurdu. O, buna dözə bilərmi? Fərrux kimi azğın bir uşaq
onun atasını təhqir etsin! İbişin qeyrəti buna yol verərmi? O mütləq atasının intiqamını almalı idi...”
[1, 17]. Həyat uğrunda mübarizədə həlak olmuş İbişin taleyi yazıçının uşaqlıq dünyasından qoparıb
yüksək dərəcədə ümumiləşdirdiyi süjetdə əbədiləşmişdir.
Süleyman Vəliyev ədəbiyyata birbaşa həyatdan gəlirdi. Onun yaradıcılığında dil açıb-danışan
canlı həyat epizodları, süjetləri idi. İlk hekayəsi «Əmanət kassası» 1932-ci ildə «Hücum» jurnalında
çap olunan S.Vəliyev dövrün ədəbi prosesinə istedadlı gənc yazıçı kimi qədəm qoymuş, “fəhlə
Sumqayıt Dövlət Universiteti – “ELMİ XƏBƏRLƏR”– Sosial və humanitar elmlər bölməsi
Cild 13 № 1 2017
29
kadrı” kimi rahat qəbul olunmuşdur. 1937-ci ildə hərbi qulluğa çağırılana qədər məhz istedadlı
qələm sahibi kimi Lökbatanda çıxan az tirajlı «Neft uğrunda» qəzetində, bir müddət «Azərbaycan
gəncləri», «Kommunist» qəzetlərində müxbir olmuş, «İnqilab və mədəniyyət» jurnalında ədəbi işçi
kimi fəaliyyətə başlamışdır [2, 447]. 21 yaşında ikən, 1937-ci ildə qələmə aldığı, inqilabi fəhlə
hərəkatından bəhs edən «Bığlı ağa» povesti «Azərnəşr»də ayrıca kitab şəklində çıxdıqdan sonra
imzası ədəbi mühitdə parlamış, Süleyman Vəliyev birdəfəlik olaraq taleyini ədəbiyyata bağlamışdır.
Süleyman Vəliyev üçün fəhlə mövzusu və inqilabi hərəkat kənardan gəlmə bir hadisə deyildi.
Neft mərkəzi olan Sabunçu mədənlərində baş verən yaxın tarixin hadisələri xatirələrdə hələ diri idi.
“Bığlı ağa” povesti prototipləri yazıçıya yaxşı tanış olan canlı obrazlar, həyat hadisələri üzərində
qurulmuşdu. Mədən sahibinin rus sahibkar Şaparinski olması, fəhlələrin tərkibinin beynəlmiləl
olması, Pavel və qızı Ninanın Samaradan olub Sibirdə sürgün həyatı sürməsi, Sibirdə sürgündə olan
Mustafanın Bakıda onları tanıması, Bığlı ağanın – Abbas Əlicanın Cənubi Azərbaycandan gəlib
neft mədənlərində işləməsi və s. ümumiləşdirilmiş olsa da, real həyat motivlərinə əsaslanırdı. Hətta
əsərdə epizodik olaraq obrazı yaradılmış bolşevik-inqilabçı, sonradan sovet hakimiyyətinin
Azərbaycanda rəhbər nümayəndələrindən olan Həmid Sultanovun Ramana neft mədənlərində
işlərkən, Süleyman Vəliyev gilin həyətində kirayədə qaldığı da bəllidir. Əsərin sonrakı nəşrində
yazıçı həmçinin daha sonralar, əllinci illərdə Sibirdə sürgündə olarkən yaşadığı hadisə və faktlardan
da bəhrələnmişdir. Bütün bunlar əsərə canlı nəfəs gətirmiş, inqilabi hadisələrin təsvirini verərkən
sosializm realizminin sxematik qəliblərindən çıxmağa imkan vermişdir. Povestdə təsvir olunan
fəhlə hərəkatı bir tərəfdən bolşeviklərin irəli sürdüyü quru inqilab şüar və tələblərini əks etdirirsə,
digər tərəfdən insanlar arasındakı gərgin psixoloji münasibətlərə, mərdlik və ikiüzlülük, xeyirxahlıq
və xəbislik, məkr-hiylə və sevgi-ülfət kimi mənəvi qarşılaşmalara nüfuz edir.
Süleyman Vəliyevin sovet dönəmində uğurla başlayan həyat və yazıçılıq bioqrafiyası çox
keçmir ki, keşməkeşlərlə üzləşir. Əslində, həyatının hər mərhələsində örnək olası insan xarakteri
yaşayan və bunun bədii obrazını yaradan ədibi zaman özü sınağa çəkir, stalinizm epoxasının və qatı
sovet ideologiyasının amansız zərbələrinə məruz qoyur. 1937-1939-cu illərdə Ukraynada hərbi
xidmətdə olan Süleyman Vəliyev Böyük Vətən müharibəsi başlayan kimi, 1941-ci il iyun ayının
23-də hərbi komissarlığa ərizə ilə müraciət edib cəbhəyə gedir. Səməd Vurğunun arxada qalmaq və
vətənpərvərlik təbliğatı ilə məşğul olmaq tövsiyəsini gənc ədib qəbul etmir. 1941-ci il iyunun 29-da
«Ədəbiyyat qəzeti»ndə yazıçıların xalqa ünvanlanmış «Qəhrəman ordu sıralarına» adlı müraciətinin
altında görkəmli yazıçılarla yanaşı, gənc Süleyman Vəliyevin də imzası var idi.
S.Vəliyev azərbaycanlıların məşhur 416-cı milli diviziyasının tərkibində Şimali Qafqazda,
daha sonra Kerç yarımadasında vuruşur, 1942-ci ilin may ayının 8-də kontuziya olub Krım
yaxınlığında əsir düşür. Bu zaman o, 416-cı Azərbaycan diviziyasının «Azərbaycan döyüşçüsü»
adlı qəzetində hərbi müxbir kimi fəaliyyət göstərmişdir. Yüz minlərlə əsir kimi düşərgədən
düşərgəyə düşən yazıçı Almaniyanın dərinliklərinə doğru aparılır. 1944-cü ilin yazında S.Vəliyev
müttəfiqlərin ağır bombardmanı zamanı düşərgədən qaçıb Triyest vilayətinin dağlarında bina salmış
partizan dəstələrinə qoşulmuş, burada Sila adı ilə cəsur döyüşçü və qisasçı kimi qəhrəmanlıqlar
göstərmişdir. Sovet İttifaqı qəhrəmanları Mehdi Hüseynzadənin, Mirdaməd Seyidovun keçdiyi
müqavimət hərəkatını əli qələmli Süleyman Vəliyev də keçir. Yazıçının “Kerç səhəri” povestində,
bir çox hekayələrində (“Mənə “sən” de”, “Çörək”, “Zorən qoca”, “Qurtuluş”, “Həyatın dadı”,
“Gözlənilməyən məktub” və s.) döyüş cəbhələrində yaşanan müharibə həqiqətləri real boyalarda
əksini tapmışdır.
Bununla belə, yazıçının müharibə mövzusunda ən böyük uğuru “Mübahisəli şəhər” romanı
hesab olunur. Bu, qeyd olunduğu kimi, Azərbaycan ədəbiyyatında II Dünya müharibəsində
müqavimət hərəkatını işıqlandıran ilk romandır. 1946-1947-ci illərdə yazılıb, yalnız 1957-ci ildə
çap oluna bilən əsərin taleyi də müəllifinin bioqrafiyası kimi keşməkeşlidir. Roman hadisələrin
birbaşa izi ilə, prototipi yazıçının özü olmaqla Aslanın gizli partizan fəaliyyətini, əsirlikdən necə
qurtulmasını, Yuqoslaviyada Triqlava dağlarında, Triyest şəhərində şücaətlərini, rus, sloven,
azərbaycanlı və s. millətlərdən olmaqla faşizmə qarşı xalqların birgə mübarizəsini olmuş əhvalatlar,
Şirinov F.İ.