32
dirçəlişi, quruculuq missiyası, ümumxalq sevincləri yaradıcılığına ilham verdiyi kimi, Vətənin
üzərindən əsən qara yellərə, tarixin qara səhifələrinə də heç zaman biganə olmamışdır. Süleyman
Vəliyev cəsarətli yazıçı idi, xalq mövqeyindən günün həqiqətlərini yazmaqdan, təsvir etməkdən
çəkinmirdi. Sürgündə üzləşdiyi gerçəkləri o hələ sovet ideologiyasının kəskin dövründə ayrı-ayrı
əsərlərinə hopdurmağı bacarmışdır. “Şəlalə” hekayəsində Bodaybonun qılınc kimi kəsən şaxtalı
günlərini, insanlar arasındakı mənəvi çarpışmaların təsvirini yazıçı inqilabdan əvvəlki dövrə
keçirməklə təqdim edir. 1957-ci ildə işləyib “Səadət yollarında” adı ilə yenidən çap etdirdiyi “Bığlı
ağa” povestində yazıçı Sibir həqiqətlərindən də danışır və bu zaman şəxsən yaşadığı həyat
materiallarına əsaslanır.
1966-cı ildə Süleyman Vəliyevin “Düyünlər” romanı çap olunur. Roman Azərbaycan
ədəbiyyatında repressiya olunmuşların taleyindən söz açan iri həcmli ilk əsərlərdən biri idi. Əsərin
qəhrəmanı Vasifin sürgündən qayıtması ilə başlayan roman ölkədə baş verən gerçəklərin üzünə
cəsarətlə baxır. Repressiya faktoru ilə birgə, yazıçını da, onun baş qəhrəmanını da ilk növbədə
cəmiyyətin, insanların bu hadisəyə münasibəti, insanlar arasında yaşanan gərgin psixoloji
münasibətlər düşündürür. “Balaxan, sən tayqada ağac qırmamısan, ağcaqanadlarla əlbəyaxa
olmamısan, altmış dərəcə şaxtanı görməmisən. Allaha şükür et. Mən bunu demək istəyirəm...
İnsanın böyüklüyü onun rütbəsində yox, qəlbinin böyüklüyündədir. Bəzən heç bir vəzifəsi olmayan
bir adam sənə elə yaxşılıq edir ki, ömrün boyu kifayətdir, onu heç zaman unuda bilmirsən. Deyirsən
uşaqlarıma da, nəvəmə də bu barədə bildirməliyəm. Bütün nəslim bundan xəbərdar olmalıdır...
Onlar kim olduğumu soruşmadılar, vəzifəmi də... ” (6, s. 284) Əqidəli insan olan Vasif yalan və
saxtakarlıq üzərində həyatını qurmuş nakəslərlə axıracan barışmır, həyatını sıfırdan başlamaqla və
yenidən ucalmaqla insanlıq şərəfinin hər şeydən üstün olmasını sübuta yetirir. Roman bütün
çətinliklərə baxmayaraq, oxucuları sağlam həyata, mənəvi ucalığa səsləyən əsərlərdən idi.
“Əvvəllər “Mübahisəli şəhər” romanına yüksək qiymət verən akademik Məmməd Arif
sonralar yazmışdı: “Düyünlər” romanı maraqlı əsərdir. Onun baş qəhrəmanı gənc neftçi Vasifdir.
Vasif ən dərin qazma quyuları sahəsində təcrübə aparır. Bu çətin iş həm böyük ixtisasa malik
olmaq, həm də istedad tələb edir. Vasifin əleyhdarı isə o şəxslərdəndir ki, o, yeni fikirdən ya şəxsi
mənafe üçün istifadə edər, ya da işi pozar. Beləliklə, əsərdə istehsalat konflikti mənəvi və ictimai
əhəmiyyət kəsb edir” (4, s. 9)
Bununla belə, Süleyman Vəliyev onu ağrıdan əsl repressiya həqiqətlərini daha sonralar, artıq
xatırlatdığımız kimi, 1980-ci illərdə qələmə aldığı «Qanadı qırıq quş da uçarmış» roman-
memuarında etiraf və təsvir etdi. Yazıçının Sibir sürgünündə yaşadığı amansız gerçəklər, acı
faciələr romanda böyük ustalıqla, sənədli dəqiqliklə əksini tapmışdır. Bu əsər həyat faktları və fakta
yanaşma etibarilə ədəbiyyatımızda tamamən təzə olub, tarixi həqiqətlərin bədii formada bərpasına
xidmət edirdi. Yazıçının şəxsən yaşayıb qələmə aldıqları uydurma və bəzəkli müharibə ədəbiyyatı
şablonlarını təkzib edirdi. Repressiya mövzusunda həqiqəti söyləyən bu xətt ədəbiyyatımızda yalnız
1990-cı illərdə, müstəqillik dövründə davam tapa bildi. O da təsadüfi deyil ki, Süleyman Vəliyev
1994-cü ildən Azərbaycanın Günahsız Siyasi Qurbanlar Assosiasiyasının rəyasət heyətinin üzvü
seçilir, rəsmən reabilitə olunur. Böyük bir dövr – sovet dönəmində Azərbaycan həqiqətlərinin
nəsrdə ifadəçisi kimi əsərləri ədəbiyyatımızda layiqli yerini tutur.
Süleyman Vəliyev 1996-cı il martın 7-də Bakıda vəfat etmiş, xalqımızın iftixar mənbəyi olan
insanların əbədiyyət tapdığı Fəxri Xiyabanda dəfn olunmuşdur.
Süleyman Vəliyevin zəngin yaradıcılığı sağlığında geniş oxucu marağına səbəb olmuşdur.
“Şor cüllütü”, “Bığlı ağa”, “Mübahisəli şəhər”, “Düyünlər” povest və romanları dəfələrlə
Azərbaycan və rus dillərində çap olunmuş, əsərləri dünya dillərinə tərcümə edilmişdir. “Şor cüllütü”
povesti əsasında “Qara gölün cəngavərləri” adlı film (1984) çəkilmişdir. Filmin ssenarisini
S.Vəliyev özü yazmışdır. 1983-cü ildə “Yazıçı” nəşriyyatı S.Vəliyevin 2 cilddən ibarət “Seçilmiş
əsərləri”ni çap etmişdir. Nəşrə yazıçının iki romanı (“Mübahisəli şəhər”, “Düyünlər”), beş povesti
(“Şor cüllütü”, “Bığlı ağa”, “Kerç səhəri”, “İşıqlıq”, “Türk qızı”) və 23 hekayəsi daxil edilmişdir.
“Daşlı bulaq” (1983), «Qanadı qırıq quş da uçarmış» və bir çox sənədli hekayələri (1987) yazıçının
Süleyman Vəliyevin yaradıcılığında XX əsr həqiqətləri
33
yaradıcılığının son dövrünü əhatə etməklə tarixi həqiqətlərin yenidən və yeni rakursdan
işıqlandırılmasında mühüm önəm daşıyır.
Süleyman Vəliyevin yazıçı əməyi daim dəyərləndirilmiş, Azərbaycan Rəyasət heyətinin fəxri
fərmanı (1967-1986), "Xalqlar dostluğu" ordeni (1984) və medallarla təltif olunmuş, ədib
Azərbaycan SSR əməkdar mədəniyyət işçisi (1977), Azərbaycan SSR əməkdar incəsənət xadimi
(1987), Əmək veteranı (1976), müharibə veteranı (1981) fəxri adlarını qürurla daşımışdır. Ömrü
uzunu dövrün, zamanın qarşısına çıxardığı çətinliklərlə üzləşən yazıçı bu təltifləri fədakar xalqının
yaradıcılığına verdiyi qiymət kimi qəbul etmiş, eyni zamanda xalqının həqiqətlərini fədakarcasına
qələmə almışdır. Süleyman Vəliyevi oxucularına bu gün də sevdirən onun həqiqət dolu əsərləridir.
ƏDƏBİYYAT
1.
Süleyman Vəliyev, Seçilmiş əsərləri. İki cilddə. İkinci cild. Bakı: Yazıçı, 1983, 436 s.
2.
Azərbaycan yazıçıları. Ensiklopedik məlumat kitabı. Azərbaycan Ensiklopediyası. Bakı: Öndər,
1995, 639 s.
3.
Süleyman Vəliyev. Mübahisəli şəhər. Bakı: Azərnəşr, 1962, 259 s.
4.
Famil Mehdi, Sənətkarın qüdrəti // Süleyman Vəliyev. Seçilmiş əsərləri. İki cilddə. Birinci cild,
Bakı: Yazıçı, 1983, s.5-10.
5.
Əli Səbri, Süleyman Vəliyev haqqında // Süleyman Vəliyev. Mübahisəli şəhər. Bakı: Azərnəşr,
1962, s.252-258.
6.
Süleyman Vəliyev, Seçilmiş əsərləri. İki cilddə. Birinci cild. Bakı: Yazıçı, 1983, 518 s.
РЕЗЮМЕ
РЕАЛИИ ХХ ВЕКА В ПРОИЗВЕДЕНИЯХ СУЛЕЙМАНА ВЕЛИЕВА
Ширинов Ф.И.
Ключевые слова: нефтяной Баку, тема рабочих, социалистический реализм, движение
сопротивления, военный роман, смелый писатель, правда о
репрессиях.
В статье говорится о нелегкой жизни и разностороннем творчестве выдающегося
представителя азербайджанской литературы ХХ века Сулеймана Велиева (1916-1996).
Романы, повести, рассказы и мемуары, автором которых является Сулейман Велиев, в
полной мере отражают азербайджанское общество ХХ века и советского периода, этапы
исторического пути, пройденного его представителями, важные события и явления.
SUMMARY
THE REALITIES OF THE XX CENTURY IN THE WORKS
OF SULEYMAN VELIYEV
Shirinov F.I.
Keywords: Baku oil, working theme, socialist realism, the resistance movement, war novel, a
bold writer, the truth about the persecution.
The article deals with the rich creative and complex life of Suleyman Veliyev who is the great
representative of Azerbaijan literature in the XX century. Suleyman Veliyev was an author of the
novels, narratives, tales and memoirs literature. His poems widely reflicts colorful conditions of life
and the historical stages passed by national human and Azerbaijan society during XX century and
Soviet Union.
Daxil olma tarixi:
İlkin variant
28.12.2016
Son variant
16.03.2017
Şirinov F.İ.