Xəbər bülleteni №18

Hesablama Palatası “Azərsu”da nöqsanlar aşkarlayıb

24.12.2015


Hesablama Palatasının iclasında “Azərsu” ASC-də “Azərbaycanın kiçik şəhərlərində su təchizatı və kanalizasiya layihəsi” və “Açıq kommunal infrastruktur proqramı-II” layihələrinə Yaponiya Beynəlxalq Əməkdaşlıq Agentliyindən və Almaniyanın “KfW” Bankından cəlb olunmuş kreditlər və dövlət əsaslı vəsait qoyuluşu üzrə aparılmış auditin nəticələri müzakirə edilib. Rəsmi məlumata görə, iclasda məruzə ilə çıxış edən auditor cəmiyyətin nizamnaməsində onun səhmlərinin dövlət mülkiyyətində saxlanıldığı dövrdə səhmdarların ümumi yığıncağının səlahiyyətlərinə aid məsələlərin həllini hansı dövlət orqanlarının həyata keçirməsinin tənzimlənmədiyini, İdarə Heyəti haqqında əsasnamənin qəbul edilmədiyini diqqətə çatdırıb, kredit vəsaitindən istifadənin gecikməsi nəticəsində 5,5 il ərzində kreditin cəmi 21,2%-nin istifadə olunduğunu, müqavilənin icra müddətinin uzadılması və bəzi xidmətlər üzrə əlavə vəsaitin məbləğinin Azərbaycan hökumətinin payı hesabına maliyyələşdiriləcək müvafiq hissəsinin artmasına şərait yaratdığını bildirib.

Auditor layihələr üzrə investisiya təkliflərinin dəqiq hesablamalarla əsaslandırılmaması və nəzərdə tutulmuş icra qrafiklərinə riayət edilməməsi səbəbindən müvafiq illər üzrə ilkin olaraq dövlət əsaslı vəsait qoyuluşundan ayrılmış vəsaitin məbləğinin dəfələrlə dəyişdirildiyini, layihələr üzrə tikinti-quraşdırma işlərinin ehtimal olunan dəyəri müəyyən edilərkən Azərbaycan Respublikasının ərazisində mövcud olan qiymətlərdən fərqli qiymətlərin tətbiq edildiyini deyib, bəzi hallarda podratçılara artıq vəsait ödənildiyini bildirib.

Transparency.az bildirir ki, məruzəçi nəql borusunda yaranmış nasazlıqların layihələr üzrə əhalinin 24 saatlıq davamlı su təchizatı və kanalizasiya sistemləri ilə təmin olunmasına neqativ təsir etməsinə gətirib çıxardığını qeyd edib.

Nəzarət tədbirinin nəticələri üzrə qərar qəbul olunub.

Hərbi itkilər haqqında monitorinqin nəticələri açıqlanıb

24.12.2015

Xəzər Hərbi Tədqiqatlar İnstitutu Azərbaycanın müdafiə və təhlükəsizlik sektorunda itkilər haqqında monitorinqin nəticələrini açıqlayıb. “Azadlıq” radiosu xəbər verir ki, ölkə mediası və sosial şəbəkələrdə əksini tapan informasiyalar əsasında hazırlanan monitorinqin nəticələrinə görə, 2015-ci ildə (23 dekabradək) ölkənin təhlükəsizlik və müdafiə sektoru 76 hərbi qulluqçu itirib.

İtkilərin 37-nin döyüş, 39-nun qeyri-döyüş itkisi olduğu bildirilir. Hesabata əsasən, bu il 34 hərbi qulluqçu ermənilərin atəşkəsi pozmasına qurban gedib, 3 nəfər mina partlayışında həlak olub.

Xəzər Hərbi Tədqiqatlar İnstitutu 2014-cü ildə yaradılıb. Qurum Xəzər hövzəsi ölkələrinin, eyni zamanda Ermənistan və Gürcüstanın müdafiə və təhlükəsizlik sektorundakı proseslərin təhlili ilə məşğuldur.

Rusiyanın ehtiyatları bir həftədə 2 milyard 300 milyon dollar azalıb

24.12.2015


Rusiyanın beynəlxalq ehtiyatları bir həftədə — dekabrın 11-dən 18-nə qədər 2 milyard 300 milyon dollar azalaraq 368 milyard 900 milyon dollara düşüb. Novator.az xəbər verir ki, Rusiya Mərkəzi Bankı dekabrın 24-də belə məlumat yayıb.

Rusiyanın beynəlxalq ehtiyatları Mərkəzi Bank və hökumətin sərəncamında olan yüksək xarici aktivlərdir.

“Şəffaflıq Azərbaycan” yeni müzakirə keçirib tövsiyələr təqdim etdi

24.12.2015

“Şəffaflıq Azərbaycan” Korrupsiyaya Qarşı Mübarizə İctimai Birliyi dekabrın 24-ü Bakıdakı Beynəlxalq Mətbuat Mərkəzində “Qaz təchizatı prosesində istehlakçıların hüquqlarının, şəffaflığın qorunması və mövcud problemlərin həlli yolları” mövzusunda dəyirmi masa keçirib. Transparency.az bildirir ki, Azərbaycan Şəffaflıq Tərəfdaşlığı (AŞT) layihəsi çərçivəsində Amerika Birləşmiş Ştatları Beynəlxalq İnkişaf Agentliyinin (USAİD) dəstəyi ilə keçirilən tədbir hökumət qurumları ilə qeyri-hökumət təşkilatları arasında şəffaflığın və hesabatlılığın artırılması məqsədilə silsilə tədbirlərin davamıdır.

SOCAR, İqtisadiyyat və Sənaye, Fövqəladə Hallar, Energetika nazirlikləri, Baş Prokuror yanında Korrupsiyaya Qarşı Mübarizə Baş İdarəsi və digər dövlət orqanları əməkdaşlarının, kommunal sahə ilə əlaqədar müxtəlif qurumların, vətəndaş cəmiyyəti nümayəndələrinin iştirak etdiyi dəyirmi masanı açan “Şəffaflıq Azərbaycan” təşkilatının icraçı direktoru Rəna Səfərəliyeva kommunal xidmətlər zamanı istehlakçıların qarşılaşdığı problemlərin əksəriyyətinin qaz təchizatı sahəsi ilə əlaqədar olduğunu söyləyib.

Tədbirdə çıxış edən “Azəriqaz” İstehsalat Birliyinin Bakı Regional Qazın İstismarı Departamenti rəisinin müavini Mirəfqan Ağalarov təchizatçı qurum olaraq istehlakçılara göstərilən xidmətlərin keyfiyyət səviyyəsinin və şəffaflığının artırılması, qaz təchizatı ilə əlaqədar bağlanan birtipli müqavilələrin sayının artırılması, smart-kart sayğaclarının quraşdırılması prosesinin sürətləndirilməsi və digər məsələlərlə bağlı görülən işlər və aparılan islahatlar barəsində məlumat verib.

“Azərsu” ASC-nin ictimaiyyətlə əlaqələr şöbəsinin rəisi Anar Cəbrayıllı və “Azərişıq” ASC-nin İnsan Resursları Departamentinin hüquqşünası Venera Əsgərova təmsil etdikləri qurumlarda həyata keçirilən islahatlardan söz açıblar.

Kommunal sahələr üzrə ekspert Ələkbər Ağasıyev təchizat zamanı istehlakçıların hüquqlarının pozulması, eləcə də nəzarətçilərin qazın istifadə edilməsi üçün reallığa uyğun olmayan qeyri-qanuni borc hesablaması hallarının geniş şəkildə yayıldığını qeyd edib. Ekspert “Azəriqaz”ın müstəqil internet saytının olmaması, maarifləndirici vəsaitlərin azlığı kimi məsələlərə də toxunub.

“Şəffaflıq Azərbaycan” qaz təchizatı prosesində istehlakçıların hüquqlarının, şəffaflığın qorunması yönündə tövsiyələr paketini vətəndaş cəmiyyəti üzvlərinin verdiyi təkliflərlə birgə müvafiq dövlət qurumuna təqdim edib.