495
xoşbəxtlikdən Şahımızın yarası yüngül olub, amma Ələvi Xan
o vaqiənin hökmdarın ruh halına çox fəna təsir göstərdiyini
Mirzə Mehdiyə söyləyibmiş; bununla yanaşı, Mirzə Mehdi-
nin qorxusu başqa yöndənmiş: gəzən şayiələrə görə Şahımı-
zı öldürtməyi Şahzadə düzüb-qoşubmuş, hələ Mərvdə olanda
Məhəmmədhüseyn xan Qacar və Rəhim Sultanın yanında sərrast
atıcılarından birinə atasını qətlə yetirməyi tapşırıbmış. Mirzə
Mehdi dedi, bu şayiəni kimlərin yaydığını bilmirəm, əgər Şa-
hımızın qulağına çatsa, faciə qaçılmazdı. Eşitdiyimdən o qədər
mütəəssir oldum ki, öz dərdim bilmərrə yadımdan çıxdı. Əlbəttə,
zavallı Şahzadə yanlış əməllərə yol verə, hökmdarın öldüyü
barədə şayiədən sonra şirnikib başqalarının təhrikilə taxt-taca
iddia eləyə bilərdi, amma Şahımızı aradan götürməyə cürəti
çatmazdı, buna şəkk-şübhəm yox idi. Mirzə Mehdinin güman
olunan faciə qarşısında acizliyini səsinin titrəməsindən anladım.
Əlbəttə, o şayiələr gedib Şahımızın qulağına çatacaqdı, marığa
yatıb fürsət gözləyənlər kifayət qədər idi, amma ona qədər Şa-
hımızın qəlbindəki şübhə toxumunu məhv eləmək lazım gəlirdi,
buna da kimsənin qüdrəti çatmırdı – əsl fəlakət bundaydı. Alla-
hın mərhəmətinə bel bağlayıb Şahımızı düz yoldan sapdırmaya-
cağına ümid eləməkdən başqa əlac qalmırdı.
490. O günlərin birində həmişəki yerimdə oturub yadda-
şımı vərəqlədiyim bir vaxtda Əbdülhəsən xanın səsini eşidib
heyrətimdən çaşdım. Ordugahda olduğumu, başıma gələn vaqiəni
Mirzə Mömindən eşitmişdi. Beş il ərzində görmədiyim, amma
üzünün cizgilərini apaydın xatırladığım Əbdülhəsən xan Şahı-
mızın mühafizəsində minbaşıymış, Savadkuh meşəsindəki sui-
qəsddən sonra hökmdarın qəzəbindən güclə qurtulubmuş, indi
ordugahı qoruyan keşikçilərin minbaşısıdı. Səsində yorğunluq-
mu, bezginlikmi vardı, bunu anışdıra bilmədim, amma Qaraba-
ğa qayıtmaq istədiyini gizlətmədi, dedi, Fəzləli bəyin qətlindən,
Pənahəli bəyin qaçışından sonra sarıcalılara etibarı azaldı, mən
də burda lap təkləndim, bu səfər başa çatandan sonra Şahımızın
ayağına düşüb xidmətdən buraxılmasını istəyəcək, öz mülkümdə
arzuladığım ömrü yaşayacağam. Dediyinə görə, erməni xəlifə
Bərdədə keşişlər, kələntərlər, məliklərlə birgə Şahımızın istiqba-
lına gəlib, bəxşişini verib, göz yaşını axıdıb, istədiyi fərmanları
496
alandan sonra işinin dalınca gedib; dedi, sahib çıxmasaq, bir də
görəcəyik, halal dədə-baba torpaqlarımız o kilsələrə, kələntərlərə,
məliklərə satılıb; dedi, Şahımız Arazı keçəndən bəri Pənahəli
bəyi axtardır, onun dağlılara qoşulmasından şübhələnir, görünür,
bu tərəfdə gizləndiyini xəbər veriblər. Əbdülhəsən xanın haqq-
salama sədaqəti də, təəssübkeşliyi də ürəyimi qızdırdı, bir də
üzünü görməyəcəyimdən təəssüflənə-təəssüflənə vidalaşdım. Bu
halımda, əlbəttə, mənə Allahdan başqa kimsənin köməyi dəyə
bilməzdi, qismətimə nə yazılmışdısa, o da olacaqdı. Şübhəsiz,
Tiflisi görmək arzum get-gedə xülyaya çevrilirdi, neçə illərdən
bəri gördüklərimi, öyrəndiklərimi, bildiklərimi kağıza köçürməklə
bağlı borcumsa, hələ qalırdı. Onsuz da gündə bir dəfə baş çəkən
təbib Xeyrullahın səsində ümid əlaməti sezmirdim, məni qor-
xudan gözlərimə çökən zülmətin ruhuma da çökməsiydi. Bir
yana baxanda, altmış səkkiz il o qədər də qısa vaxt deyildi,
bu mənada naşükür olmamalı, əgər ömür möhlətim çatmışdısa
qədərə boyun əyməliydim…
497
XV
BOŞLUĞA UÇUŞ
…Quş olub göyə uçdular, Yusifi axtarmağa başladılar…
Yusif-Nəsib quşu haqqında əfsanədən.
491. Hər şey bitdimi? Təbib Xeyrullah gözlərimdəki sarğını
açıb həyəcandan nəfəsim tıncıxa-tıncıxa kirpiklərimi aralayan-
da, qarşımda üzləri tanış olan adamlar əvəzinə üç tutqun və
uzunsov ləkə görəndə beynimdən bu keçdi. O ləkələrdən biri
– Təbib Xeyrullah əllərini yana açıb digərinə – Mirzə Mehdiyə
əlacsızlığını ifadə elədi, mənəsə başqa sözlər eşitdirdi, dedi, ümi-
dini Allaha bağla, Mirzə Yusif, verən də Allahdı, alan da, na-
güman olma, bir də gördün, hər şey əvvəlki düzəninə döndü.
O gedəndən sonra Mirzə Mehdiylə xeyli susduq, elə bil, daha
danışmağa sözümüz qalmamışdı. Axırda Mirzə Mehdi dedi, belə
halda qoşunla gedib Şahımızın münasib zamanını gözləməyə
ehtiyac yoxdu, axır vaxtlar əhvalını qarışıq görürəm, üstəlik,
erməni xəlifənin Bərdədə peşkəş elədiyi Anuşun dadını-tamını
çox bəyənib, deyəsən; dedi, mən elə indi Mirzə Zəkiylə danışıb
izinini alaram, gedərsən Şəkiyə, bir müddət qalıb dincələrsən,
sonrasa Allah Kərimdi, necə məsləhət bilirsə, elə də olar. Mirzə
Mehdinin bu acı həqiqətinin müqabilində nəsə deməyə ehtiyac
yox idi, ona görə də susdum. Gün batanacan çadırımızın qa-
bağında oturub ordugahdan gələn səsləri dinlədim, hərdənbir
gözlərimin önündən keçən kölgələrdən ötənin insan, ya heyvan
olduğunu sezirdim. Vəfalı Qütbəddin böyrümdə oturub səsini
çıxarmırdı, amma halından duymuşdum ki, dərdimə ağlayıb,
indi özünü mümkün qədər şax tutmağa çalışır. Axşam azanında
dualarımı dinməzcə elədim, yeməyimi Qütbəddinin köməyilə ye-
yib səsimi çıxarmadan oturdum. Mirzə Mehdi gələndə içimin sü-
kutunda, az qala, boğulurdum. Dedi, Mirzə Zəki hər şeyi anlayıb
izinə boyun oldu, üstəlik, xərclik, bir dəst də xələt göndərdi. Ar-
dınca əlavə elədi ki, səhər tezdən çıxmağınız məsləhətdi, çünki