501
dua elə, nə günahım vardısa, dualarım gedib Allaha çatmadı,
görünür, belə məsləhətmiş, olacağa çarə yoxdu, mən Mirzə Yusif
Tiflisi yollarda ölməliyəmmiş…
495. Beləcə zülmət günlərim başladı. Daha səhərin açılmağını,
axşamın düşməyini, gün çıxmağını, yağış yağmağını görmür-
düm, ancaq duyurdum. Amma bu da Allahın hikmətiydi, zahiri
aləmin zülməti çoxaldıqca içimin işığı artırdı, olub-keçənləri, ta-
nıdığım üzləri daha aydın xatırlayır, eşitdiyim səslərdən adam-
ları və hadisələri, xəyalımda canlandırmağa çalışırdım. Karvan-
saranın qocafəndi səsli sahibi Kərbəlayı Mahmudun buyruqçusu
Murtuzəlinin, Qütbəddin həyətə gəzdirməyə çıxaranda rastlaş-
dığım kəslərin səslərindən görkəmlərinin təfərrüatını xəyalımda
canlandırmağa başlamışdım. Vəfalı Qütbəddin hər gün məndən
qabaq oyanır, mən qalxmaq istəyəndə qolumdan tutub həyətin
o başındakı ayaqyoluna aparır, sonra əlimə-üzümə su vurmağı-
ma kömək eləyir, yeməyimizi yeyəndən sonra yatağımda yerimi
rahatlayır, özü atlara-qatırlara baş çəkməyə, ya da xırda-para
işlərini görməyə gedirdi. Axır vaxtlar az danışmağa başlamış-
dıq, daha doğrusu, Qütbəddin söhbətlə başımı qatmağa çalışsa
da, mən danışmağa həvəs göstərmirdim. Aradabir Təbrizdəki
günləri, adamları, Mirzə Kəmaləddini, Məhəmməd Kazımı yada
salırdıq, tez-tez Mirzə Mehdidən bir xəbər olub-olmadığını soru-
şurdum. Axır günlər Qütbəddinin halallığını verib Təbrizə yola
salmaq barədə də fikirləşməyə başlamışdım: cavandı, ömrünün
qızıl dəyərində günlərini dünya işığına həsrət qalmış bir qoca-
ya həyan olmaqla keçirməsi günaha yazılardı, evlənməli, köç-
külfət yiyəsi olmalı, öz həyatını yaşamalıydı. Bunu da Şahımı-
zın Dağıstan səfərinin başa çatmasına saxlamışdım. Qütbəddin
müzəffər qoşunumuzla geri qayıdacaq, Təbrizə zəfərlə girəcəkdi.
Bundan sonra mənə karvansara rahatlığı, həyan olan insaf yiyəsi,
söyləyəcəklərimi kağıza köçürəcək qələm sahibi, nəşimi torpağa
tapşıracaq Allah bəndəsi bəs eləyirdi. Artıq özümü bu balaca
hücrədə zahirimdəki zülmət, içimdəki işıqla yaşamağa hazır-
lamışdım, taleyə boyun əyməkdən, keçdiyim sonsuz yollarımı
bu karvansarada başa vurmaqdan başqa güman yerim yox idi.
Günlərim beləcə gəlib keçir, ömür möhlətim sona yaxınlaşırdı…
502
496. Mirzə Mehdidən birinci naməni o ilin ramazan ayının
son günlərində Məşhədə gedən çapar gətirdi. Həmd-sənadan,
halıma dair suallardan sonra yazırdı, cümadi-əvvəl ayının ilk
günü ordugahdan qalxıb Qazıqumuqa getdik, burda Şahımız
özbəklərin, Aral tatarlarının, kazakların Xarəzmə basqını barədə
xəbər alıb çox qəzəbləndi, neçə gün özünü-sözünü bilmədi. Yazır-
dı, bir aya yaxın Qazıqumuqda qalandan sonra Şahımız dağlara
qar yağdığına görə, Dərbəndə sarı üz tutdu, amma qoşunumuz
Çıraqda qaraqalpaqların və tatarların basqınlarına məruz qaldı,
hətta bir gecə basqınçılar Şahımızın iqamətgahınacan soxulub
hərəmindən bir neçəsini qaçırdılar, hökmdar da bundan bərk
qəzəblənib əyan-əşrəfindən və gözətçilərindən bəzilərini edam et-
dirdi, and içdi ki, Dağıstanı diz çökdürməyincə geri dönməyəcək.
Yazırdı, Dərbəndə şaban ayının beşinci günü çatdıq, Şahımız
ləngimədən qaraqaytaqlarla haqq-hesabı üzmək qərarına gəldi,
üstəlik, ləzgilərin basqınlarından qorunmaq üçün bir-birindən
iki-üç fərsəng aralı olan qalalar tikmək barədə əmr verdi, amma
qış qapını aldığından gözlənilən nəticə hasil olmadı. Yazırdı,
indi Şahımız Dərbəndin quzey-günbatan səmtində Dəşti-Qafaridə
qışlamağı, Novruz bayramını burda keçirməyi, yaz girib, yollar
açılana kimi Tabasarana hücum eləməyi qərara alıb. Yazırdı,
Məhəmməd Kazımdan namə gəlib dediyinə görə, səfərdən qa-
yıdıb toplara, dəvələrə, qatırlara cavabdeh olan cəbbəxananın
vəziri məqamını alıb, başını qaşımağa vaxtı yoxdu, məndən də
sənin əhvalını soruşur, mən də yazdım ki, narahat olmasın,
Mirzə Yusuf yaxındadı, Allah qoysa Tiflisə yetişəcək. O hüznlü
gönlərimdə Məhəmməd Kazımın Pərixan xatuna aşiq olduğunu
Mirzə Mehdiyə danışmışdım, xatırladırdı ki, bu məsələni ovqatı-
nın yaxşı vaxtında Şahımıza açacaq, ümid eləyir ki, bu sevdanın
baş tutmasına ciddi maneə olmayacaq. Mirzə Mehdi axırda Al-
lahın mərhəmətinin böyük olduğunu, səbir eləməyi, əgər Şəkidə
olsam, inşallah, gələn yaz Şahımız səfərini zəfərlə başa vurub
Məşhədə dönəndə güman ki, yolüstü görüşəcəyimizi yazırdı.
Əlbəttə, Qütbəddinin aramla oxuduğu bu namə dərdimə dərman
olmasa da, mənə bir qədər toxtaqlıq verməyə bəs elədi…
497. Ramazan bayramı könlümə fərəh gətirmədi, orucumu
tutub əl-havasına namazımı qılsam da, müvazinətimi tarazla-
503
yammadım. Uzun qış gecələri arabir Qütbəddinlə kəlmə kəsmək,
uzun-uzadı yaddaşımın işgəncələrilə üz-üzə qalmaq, gündüzlər
hərdən çıxıb karvansaranın həyətində aləmin səslərini dinləmək
hələlik yeganə məşğuliyyətim idi. Novruz bayramını da elə o
ovqatla yola verdim. Mirzə Mehdinin ikinci naməsi bayram-
dan bir ay, ya da qırx gün sonra, ilıq yaz günündə gəldi. Ya-
zırdı, Şahımız bu müddətdə boş dayanmayıb, bəhriyyə işlərilə
məşğul olub, gəmilər düzəltdirib, üstəlik, ruslarla xeyli görüşlər
keçirib, rus elçisinə qiymətli xələt, çoxlu pul verib, ondan dağ-
lılara qarşı hücumda yardım eləməyi, həm də Həştərxandan
ərzaq gətirməkdən ötrü gəmilər tutmağı təvəqqe eləyib. Yazır-
dı, Şahımız bunun xətrinə rus çarının sarayında olub-keçənlərə,
taxta Dəli Petronun qızı Yelizavetanın çıxmasına göz yummaq
fikrindədi. Yazırdı, Novruz bayramı günlərində Şahımız hamını
çaşdıran hökmünü verib, bunu hələ cəmi beş-on nəfər yaxın ada-
mı bilir: hökmdarımız Dağıstanı itaətə gətirəndən, Osmanlı sulta-
nıyla hər şeyi ayırd eləyəndən sonra taxtdan əl çəkmək, səltənəti
oğullarından birinə vermək niyyətindədi, o da yəqin Nəsrullah
Mirzə olacaq, çünki artıq bədbəxt Rzaqulu Şahımızın etibarını iti-
rib. Yazırdı, arada-bərədə Rzaqulu barədə gəzən xəbərlərin axırı,
deyəsən, xeyir olmayacaq, eşitdiklərimdən faciənin addım-addım
yaxınlaşdığını duyuram. Axırda yenə Allahdan mənə səbir və
şəfa diləyib tezliklə görüşməyimizə ümid bəslədiyini yazırdı. O
namədən sonra öz dərdim yadımdan çıxmışdı, hey bədbəxt Rza-
qulunun halını düşünürdüm. Mirzə Mehdinin bədgümanlığından
belə çıxırdı ki, Şahımızın oğluyla bağlı şübhələri get-gedə artır,
bu məsələni ayırd eləyib günahkarı cəzalandırmayınca dinclik
tapmayacaq. Qəfildən onlarla barmağın gözlərimə tuşlandığını,
məni kor eləmək istədiyini (guya kor deyildim) xəyalımda canlan-
dırıb titrəyirdim…
Dostları ilə paylaş: |