517
madığına görə onunla Əlimirzə xanın arasını vurubmuş. Amma
Şahımız onun comərdliyini dəyərləndirib, arvadı Tamarayla
birgə Dərbəndə çağırıb, bir neçə gün qonaq saxlayıb, qiymətli
hədiyyələr bağışlayıb, “dövləti-şərik” çininə layiq görüb, üstəlik,
Araqvi vilayətini də hökmü altına verib, təhmurəs Mirzəni
Kartliyə, oğlu İraklinisə Kaxetə hakim təyin eləyib. Başqa çox
şeylərdən də danışdıq, son görüşümüz idi, bunu ikimiz də gözəl
dərk eləyirdik, bu səbəbdən söhbətdən doymurduq. O, Dağıs-
tanın dağlıq və meşəlik yerlərində dağlılarla döyüşməyin necə
çətin olduğundan danışırdı. Dediyinə görə, iki il ərzində qazan-
dıqları, cəmi-cümlətanı vadiləri bir neçə də qalanı ələ keçirməkdi,
basqınlarda on minlərlə əsgər tələf olub, üstəlik, nə qədər də at,
silah-sursat itiriblər, bədbəxt Şahzadənin başına gələnlər, ola bil-
sin, Şahımızın bu uğursuzluqlarla azalan nüfuzunu nəyləsə qay-
tarmaq istəyinin nəticəsiydi. Mirzə Mehdi amansız şaxtanın, qar
qasırğalarının, aclığın törətdiyi görünməmiş müsibətlərdən elə
danışdı ki, göz yaşım təzədən sel oldu. Dediyinə görə, Samur ça-
yından Şabrana çatanacan itkiləri görünməmiş həddə çatıb, atlar,
dəvələr, qatırlar, öküzlər bir yana, adamlar da həm soyuqdan,
həm aclıqdan çəyirtkə kimi qırılıblar, yollar əsgər meyitləri, hey-
van cəsədlərilə dolubmuş, əvvəlcə öküzləri, dəvələri, sonra atları,
qatırları kəsib yeməyə məcbur olublar. Dərbənddən buracan olan
uzaqbaşı bir həftəlik yolu üç həftəyə gəlmişdilər, Muğan çölünə
də, yəqin, azı, bir həftəyə çatardılar. Mirzə Mehdi həyatının ən
ağır səfəri saydığı bu səfərdən sonra Şahımızdan əfv istəyib, yur-
duna dönmək, Astarabadda yazı-pozuyla məşğul olmaq barədə
düşündüyünü söylədi, amma istəyini hökmdarın hüzurunda dilə
gətirə biləcəyini güman eləmirdim. Bəlkə buna özü də o qədər
əmin deyildi, çünki başladığı işi sona çatdırmaqdan, Şahımızın
tarixini yazmaqdan əl çəkə bilməzdi – bu gerçəkliyi səsindən
duyurdum. Bir sözlə, mənim kimi o da taleyindən qaça bilməzdi;
Aşağıbaş qacarlarının başçısı Fətəli xan Qacarın xidmətində ol-
duğu vaxt Nadir xana rast gəlmişdi, neçə illər idi ki, onun ya-
nından ayrılmırdı, ağır və şad günlərinin şahidi olmuşdu, hətta
Rzaqulu Mirzəylə Fatimə bəyimin nikah şəhadətnaməsini öz əlilə
yazmışdı. Şahımızın aradabir şeir söylədiyini mənə Mirzə Mehdi
danışmışdı; demişdi, bir şeir söyləyib soruşdu ki, necədi, imanı-
518
mı yandıra bilmədim, dedim, zəifdi, o da qəzəbləndi, əmr verdi
ki, məni axur təmizləməyə göndərsinlər; əlbəttə, sonra yumşa-
lıb əmrini dəyişdi; bir dəfə də şeir oxuyanda dinməzcə durub
qapıya doğru getdim, soruşdu ki, mirzə Mehdi, hara gedirsən,
dedim, Şah sağ olsun, axur təmizləməyə; bunu eşidəndə qəhqəhə
çəkdi, sonra mənə şeir oxumadı. Şahımız şəkkaklıq bəlasına dü-
çar olanacan ona sözünü deyə, qəlbinə yol tapa bilirdi, amma
indi ondan çox aralı düşmüşdü, bununla belə, mən bilən, tale
ayıranacan hökmdardan ayrılmayacaqdı.
511. O gecə söz-söhbətimiz çox uzun çəkdi, ürəyimizi tam
boşalda bilməsək də, içimizdəki ağır yükün bir qismindən azad
olub, az da olsa yüngülləşdik. Mirzə Mehdini də buraxmadım,
Kərimlə gözətçiyə xidmətçilərin hücrəsində yer düzəltdirib,
sədaqətli qələmdaşımın yatıb rahatlanması üçün mümkün olanı
elədim. Kərimə tapşırmışdım, pul vermişdim ki, obaşdan qalxıb
qonağımın yoluna əlinə keçəndən, yeməli nə tapsa, tədarük gör-
sün. Ayrılanda da İstanbulda bir əntiqfüruşdan od qiymətinə al-
dığım gözəl yazı dəstini – mürəkkəbqabını, altı ədəd lələk qələmi,
bir də Təbrizdən yadigar olan Nəsirəddin Tusinin «Əxlaqi-nadiri»
kitabının əlyazmasını bağışladım. Mənə bir şey bağışlamasına
razı olmadım, dedim, bu halımda dünya malından heç nəyə
ehtiyacım yoxdu, öz içimlə əlləşə-əlləşə Allahın verdiyi möhlətin
nə vaxt bitəcəyini gözləyirəm. Amma sədaqətli qələmdaşım Şahı-
mızın tarixinə çəkdiyi miniatürlərdən bir neçəsini verdi, dedi, bu
da məndən bir nişanə qalsın; təskinlik verməyəsə söz tapmadı,
duyğularını uzun-uzadı sinəsinə sıxıb, səssiz-səmirsiz ağlamaqla
ifadə elədi. Ayrıldıq, daha doğrusu, vidalaşdıq, Kərim qoçaqlıq
göstərib aldığı ərzağı qatıra yüklədi, kəndiri gözətçiyə verəndə
(bunu Mirzə Mehdinin dil-ağız eləməsindən sezdim) bir qədər rahat-
landım. Beləcə, məni böyük dünyayla bağlayan son bağ da qırıl-
dı, bundan sonra kiçik hücrəmə qapanıb fürsət düşəndə Mirzə
Mehdidən, ya da Məhəmməd Kazımdan namə, bir də ölümümü
gözləyə-gözləyə yaşadığım ömrün acılı-şirinli xatirələrini çək-
çevir eləyəcəyəm. Daha dış aləmin yox, iç aləmin səyyahıydım,
o aləmdəsə yolları keçmək, yaxud, istədiyin yerindən başlamaq,
istədiyin şəhərin sakininə çevrilmək, istədiyin hadisəni canlandır-
maq, istədiyin adamı istədiyin yerdən tapıb «həmsöhbət olmaq»
519
çox asan işdi; o aləmdə ancaq sənin hökmün işləyir, şah da, sultan
da sənsən. Bundan sonra yeganə qayğım savadlı, qabiliyyətli, in-
saflı bir Allah bəndəsi tapıb hələ ki, diri olan, amma artıq ordan-
burdan deşilən, süzülən yaddaşımdakıları kağıza köçürtdürməklə
bağlıydı. Kərbəlayı Mahmud Şirvanda Nişat adlı bir şəxsin sora-
ğını çatdırmışdı, gərək bu fürsəti əldən verməyəydim. Hələ ki,
canımda can vardı, yaddaşım olub-keçənləri saxlayırdı, dilim söz
tuturdu, bunu tez eləməliydim, başıma bir iş gəlsəydi, sandığım-
dakı kağızları nizama salmaq asan olmayacaqdı...