41
Telsizdən Tankçı Vanyanın səsi gəldi:
- Slışu Komandir! Slışu!
- Vanya, qırıldıq!
- Slış, Komandir, jdi! Qırdırma! Çatmışam!
Komandir məlumat istədi.
- Ölənlər də var, yaralananlar da.
- Yaralıları görün ortadan çıxara bilirsinizmi? Medbrat hardadı?
- Bakılılardan biri həkimiymiş, medbratla işləyir. Amma uşaqların birinin vəziyyəti çox
ağırdı.
- Yaralıları mənim maşınımla yollayın şəhərə.
***
BMP-nin gizləndiyi yerin yüz-yüz əlli addımlığındaydılar, burdan belə meşə qurtarırdı,
yaxınlaşmaq çətin idi. BMP-dəkilər çox arxayınıydılar, yaxşı da yer seçmişdilər. Bir nəfər
buferin üstündə oturub siqaret çəkirdi. BMP-nin üstündə xaç nişanı da yox idi. Bunların hamısı
Xankəndindəki 366-cı polkun texnikalarıydı. Verirdilər ermənilərə. Yoxlama gələndə də
yığırdılar polkun həyətinə ki, buyurun, hamısı burdadı.
Drakon:
- Dörd-beş belə beempemiz olsa Əsgəranı çoxdan şumlamışdıq.
Pələng:
- Şerbak birini iki yüz əlli m
inə satır, gedib alsınlar dana.
- Bizə min manat qıymayan, iki yüz əli minə beempe alacaq?! Davay, işində ol. Vura
biləssənmi?
- Anasın ağladacam.
Pələng bir ağacın arxasında yerini rahatladı. Məsafəni gözəyarı ölçüb-biçdi, səhv etmək
olmazdı. Qumbaraatanı sığallayıb öpdü. Adəti idi, həmişə döyüşə girəndə silahını oxşayıb
öpərdi.
Bir dəfə bir BPM-ni vurandan sonra sevindiyindən çaşıb qumbaraatanı öpmüşdü.
Dodaqları necə yanmışdısa, ağız-burnu xeyli sarıqlı qalmışdı.
İndi onun qumbaraatanı öpdüyünü görən Drakon zarafatla dedi:
- Ə, o qız deyil ey, dəmirdi. Gözlə, birdən sonra yenə öpərsən. Onda gərək sənə təzə ağız,
burun alaq.
Lazım olan anı gözləməyə başladı. Bircəcik mərmisi vardı. Və hər şey bu bircəcik
mərmidən asılı idi. Bircəcik mərmi, bircəcik sərrast atəş...
Drakon hiss elədi ki, Pələng çox həyəcanlanır:
- Özünü toparla! Bax ha, vura bilməsən, səni doğrudan öldürəcəm. Tələsmə. Birinci dəfə
deyil ki? Mən də getdim bir az yuxarı, o daşı görürsən, onun arxasına. Mənim işarəmi gözlə.
Yenə deyirəm, qorxma. Vura bilməsən mən həll edərəm. Sən də məni qoruyarsan ki, qumbara
məsafəsinədək yüyürə bilim, yaxşı?
Pələng başı ilə işarə elədi ki, yaxşı.
Drakon kol-kosun içiylə göstərdiyi qaya parçasına tərəf sürünməyə başladı.
Drakonun qaya parçasına çatanadək keçən beş dəqiqə Pələngə bir saat kimi gəldi. Drakon
qaya parçasına çatdı, avtomatı qoydu yerə, sonra çantasından iki qumbara çıxarıb taxdı
kəmərinə. Məsafəni ölçdü, qumbaranı atmaq üçün azı otuz-qırx addım qaçmalı idi. Hər anı bir il
çəkəcək qədər böyük məsafəydi. Gərək bu otuz-qırx addımda vurulmayaydı. Özünü sakitləşdirdi,
gücünü tamam yığdı, özünə tam arxayın olandan sonra Pələngə işarə elədi.
BMP-ni Pələngin gözü yesə də, onu soyuq tər basmışdı. Əlindəkinə çox güvənmirdi. Bu
biratımlıq qumbaraatanlar o qədər də etibarlı deyildi, dəfələrlə onları pis vəziyyətdə qoymuşdu.
Əlinin arxası ilə alnının tərini sildi, barmağını qoydu tətiyə, BMP-ni götürdü nişana, amma
atmadı. Hiss elədi ki, hazır deyil. Yenə də üz-gözünün tərini sildi, yenə barmağını qoydu tətiyə,
dərindən bir nəfəs aldı, sonra bütün nəfəsini buraxıb bir anlıq dondu və...
Lit.az
42
... BMP alovlandı.
BMP-nin vurulduğunu görən Komandir sevinclə bağırdı:
- Drakon beempeni vurdu!
Drakon geri sürünməyə başladı. Pələng isə ağaca söykənib gözünün yaşını silirdi.
Sürünə-sürünə gəlib Pələngin dörd-beş addımlığına çatan Drakon baş barmağını qaldırıb dedi:
- Kişisən ey!
Bu vaxt yanan BMP-nin arxasından əli karabinli bir erməni çıxdı, dərhal da Drakonun
kürəyini nişan aldı. Hər şey bircə anda oldu - erməninin yanan BMP-nin arxasından çıxması da,
Drakonu nişan alması da, Pələngin çığırması və özünü işığa atılan ilan kimi Drakona uçan
gülləyə atması da, güllə dəymiş Pələngin Drakonun üstünə düşməsi də. Hər şey bircə anda oldu,
bircə anda... milyard illik tarixin bircə anında, bircə göz qırpımında...
Drakon güllə səsinə geri çevriləndə erməni ikinci gülləni lüləyə verirdi, macal tapmadı,
Drakon erməniyə tərəf bir qatar güllə yolladı...
Tələm-tələsik Pələngi meşənin dərinliyinə sürüməyə başladı.
Pələng xırıltılı səslə soruşdu:
- Oğraş məni vurdu?
- Qorxma, qorxma, boş şeydi.
BMP-nin gözlənilmədən vurulması erməniləri çaş-baş salmışdı. Bir neçəsi yüyürüb
gəlmişdi yanan BMP-nin yanına, çaşqın halda ətrafa baxırdılar, amma atəşin hardan açıldığını
dəqiqləşdirə bilmirdilər. Meşəni atəşə tutmağa başladılar. Amma Drakon cavab vermədi, Pələngi
bir az da dərinliyə sürüdü.
Ermənilər bir-iki daraq boşaltdıqdan sonra gördülər cavab gəlmir, dayandılar, meşəyə
girməyə ürək eləmədilər, qayıtdılar əvvəlki mövqelərinə.
Drakon ermənilərin onların ardınca gəlmədiyinə əmin olduqdan sonra dayandı.
Pələng yenə zarıdı:
- Oğraş məni vurdu?
- Ə, dedim ki, qorxma dana! Boş şeydi!
Pələngi soyundurdu. Güllə sağ döşündən girmişdi.
Yaranın ağzını bağlamaq üçün patronun birinin mərmisini çıxartdı. Barıtından bir azca
tökdü yaraya və yandırdı. Pələng fınxırdı, sonra bədəni titrədi, titrədi və sakitləşdi. Özü də
soyundu, köynəyini çıxartdı yaranın üstünə basıb kəməri ilə möhkəm-möhkəm sarıdı, aldı
çiyninə. Amma bir az gedəndən sonra yoruldu, gördü gücü çatmır, qoydu yerə ki, bir az nəfəsini
dərsin.
Pələng zəif səslə yenə soruşdu:
- Denən qardaşımın goru haqqı boş şeydi?!
- Qardaşımın goru haqqı boş şeydi.- dedi Drakon, sonra bir siqaret yandırıb qoydu
Pələngin dodaqlarına.
Pələng siqaretin bal kimi acı tüstüsünü zorla çəkdi ciyərlərinə, bu bal kimi acı tüstü
ağrılarının üstünə bir sığal çəkdi, bir qurtum da aldı.
Yara nə qədər bərk sarınsa da qan dayanmırdı, gözləmək olmazdı, birtəhər gücünü
toplayıb yenidən onu belinə aldı, amma Pələng yalvardı:
- Qurban olum, qoy yerə, sinəm deşilir. Qoy, qoy yerə.
Qaytarıb ehtiyatla uzatdı yerə və başını da qoydu dizinin üstünə.
- Qoyma ölüm, qardaş, qoyma. Ölmək istəmirəm.
Drakonu qəhər boğdu, udqunaraq içindən fınxırıb çıxmaq istəyən hıçqırtının qarşısını
zorla kəsdi:
- Dedim ki, qardaşımın goru haqqı boş şeydi. Ə, mən səni heç belə qorxaq bilmirdim.
- Ölümdən qorxmuram ey!
- Bəs onda nə sarsaq-sarsaq danışırsan?
- Arvadın ürəyi partlayacaq.
- Ə, sarsaq-sarsaq danışma. Bir az da döz ki, səni həkimə çatdıra bilim.