169
sənətkar bu dərin fəlsəfi mahiyyətin əsl mənasını anlamayanları töhmətləndirir.
Məlum olduğu kimi, “təsəvvüfün yayılmasında əvəzedilməz xidmətləri olan dərvişlər
türk sufi tarixində yeni məna qazandılar. Əslində “dərviş” sözü ibarət olduğu dal, ra,
vav, ye və şin hərflərinin simvolik olaraq ifadə etdiyi dünya, riya, varlıq, yalan və
şəhvətdən özünü uzaq tutan insan mənasındadır” [46, 237]. Aşığın lirik “məni” ilahi
eşqin əzəmətini başa düşə bilməyən biganələrə üz tutuaraq Tanrı yoluna qulluq
etdiyini, eşq məqamının bu biganələr tərəfindən görünə bilmədiyini bildirir.
Təsəvvüfdə həqiqətə qovuşmağın 40 məqamı mövcuddur ki, təriqət yolçusunun
tutduğu məqamı heç vaxt bu yoldan uzaq olanlar görə bilməzlər. Bu məqama
yüksələn təriqət mərhələlərini keçməklə ilahi nişanəsini daşımağa, vəhdətə
qovuşmağa can atır.
Vəhdətdə vahidiz ey çeşmi - ahu,
Ezkarımız Lailahə-illahu.
Biganə zənn edib xor baxma yahu,
Biz də bu təkkənin dərvişanıyız. [224, 730]
Aşıq Əmrahın şeirlərində tez-tez rast gəldiyimiz “hu”, “təkkə”, “dərgah” və s.
sufi rəmzləri sənətkarın dini-ürfani görüşlərini əks etdirməklə yanaşı, həm də bu
şeirlərin poetik effektinə yeni çalarlar əlavə edir. Bir sıra bu cür təsəvvüf
terminlərinin aşığın poeziyasında sıx-sıx işlənməsi, özünü “təkkələrin dərvişi”
adlandırması onun yuxarıda qeyd etdiymiz kimi nəqşbəndilik təriqətini sadiq
müridlərindən olduğunu bir daha göstərir. “Təkkələr ətrafında toplanan müridlər,
aşıqlar, şeyxlər aracılığı ilə möhkəm bir kültür çevrəsi əmələ gəlmiş və Balkanlarda
olduğu kimi Anadoluda da xalq arasında sağlam bir əlaqə qurulmuşdur” [171, 35].
Aşıq Əmrah “Keçdi” rədfli qoşmasında haqqa can atdığını, bir ürfan əhli kimi məcazi
eşqə deyil, həqiqi eşqə qovuşmaq istədiyini poetikləşdirir:
Əmrahı məlumdur bu naz əhlinə,
Sarayı vəhdətdə niyaz əhlinə.
Gözəllər naz etsin məcaz əhlinə,
Mənim həqiqətim məcazı keçdi. [218, 742]
170
Prof. F.Köprülü Aşıq Əmrahın təsəvvüf poeziyasından söhbət açarkən
sufizmin müxtəlif cərəyanlarının təsiri altında şeirlər yazmasını onun
dünyagörüşündəki ziddiyyətlərlə əlaqələndirir. “Xalidi dərvişi olması baxımından
bəzən tamamilə zahidanə, əxlaqi nəsihətlər yazmış, bəzən bəktaşi dərvişləri tərzində
da
ha laübali, daha qələndəranə nəfəslər, dövriyyələr söyləmişdir” [218, 719].
F.Köprülü aşığın sufiyanə mahiyyət daşıyan əsərlərini heca vəznində yazdığı digər
şeirlərə nisbətən məzmun və sənətkarlıq baxmından zəif əsərlər hesab etsə də,
“Anadolunun bir çox
yerlərini dolaşan bu dərviş – şairin” [218, 712] yaşadığı dövrün
ən böyük saz-söz ustadı kimi yüksək nüfuz qazandığını qeyd etməyi də unutmur.
Türk-
islam təsəvvüf terminlərinin Aşıq Əmrahın şeirlərinin dilini müəyyən dərəcədə
ağırlaşdırması, görünür ki, görkəmli alimi bu qənaətə gətirmişdir. Əslində isə,
fikrimizcə, Aşıq Əmrahın şəxsiyyətindəki qeyri-adiliklər, dünyagörüşündəki
ziddiyyətlər onun dini-ürfani şeirlərinin müəyyən qatını təşkil edir. Türk-müsəlman
təsəvvüf ədəbiyyatının simvol və rəmzləri aşığın yaradıcılığında klassik ədəbiyyatın
müəyyən ünsürləri kimi özünü göstərməkdədir. Bu cəhət orta əsirlərdə təkkə
ədəbiyyatının və klassik poezyanın aşıq şeirinin təşəkkülünə göstərdiyi təsirin ayrıca
bir istiqamətini təşkil edir. Klassik ədəbiyyata hakim olan ideologiya, müxtəlif
məfhum və məcazlar XV əsrin sonlarından başlayaraq aşıq poezyasına daha çox
nufuz edir. Bu cəhəti nəzərdə tutan F.Köprülü yazır ki, “aşıq şeirinin ümumi
təkamülünü göz önünə alırsaq, bu ünsürlərin getdikcə artdığını görürük” [217, 189].
Aşıq Əmrahın poezyasının dini-ürfani xüsusiyyətləri yuxarıda qeyd olunan ünsürlərlə
sıx bağlı şəkildə olmuşdur.
Aşıq Əmrahı xalq arasında məşhurlaşdıran xüsusiyyətlərdən biri də onun
özünəməxsuz tərzdə saz çalarkən ekstaz anında cəzbə getməsidir. Folklorşunas-alim
M.Hacıyeva İbrahim Aslanoğluya istinad edərək yazır ki, Aşıq Əmrah saz çalarkən
bəzən özündən keçərcəsinə sarsılır və bütün vücudu titrəyirmiş. Bu hal ömrünün
sonunadək davam etmişdir. XIX əsrdə yaşayıb-yaratmış görkəmli Azərbaycan şairi
Əbülqasım Nəbatının da ekstaz anında qeyri-adi hallar keçirdiyi məlumdur. F.Köçərli
yazır: “Etikafdan çıxan zamanı onun simasında başqa bir parlaqlıq və nuriyyət çilvə
edərmiş; özgə bir halətə düşərmiş və bəzi vaxtı şövqi zövq ilə cuşa gəlib eşqdən, mey
171
və məhəbbətdən dəm vurarmış” [102, 469]. Qeyd edək ki, Ə.Nəbati ilə Aşıq Əmrah
arasında oxşarlıqlar çoxdur. Hər ikisinin eyni və bir neçə dini təriqətə meyl etmələri,
həm klassik, həm də xalq şeiri üslubunda yazıb-yaratmaları, ekstaz anında ruhi
sarsıntılar keçirmələri eyni əsrdə yaşayıb-yaratmış bu görkəmli sənətkarları
birləşdirən ümumi cəhətlərdir. Əlbəttə, bu, ayrıca bir tədqiqatın mövzusudur. Bizim
məqsədimiz isə Aşıq Əmrahın həm şəxsiyyətindəki, həm də yaradıcılığındakı qeyri-
adi özünəməxsusluqların digər söz sənətkarlarında da müşahidə olunduğunu ötəri də
olsa nəzərə çarpdırmaqdır.
Aşıq Əmrahın bir sıra şeirləri haqqa çatmağın yolunu göstərən
ustadnamələrdir. Bu ustadnamələrdə görkəmli sənətkar təriqətin əsas şərtlərini, təriqət
yolçusunun başlıca vəzifələrini ifadə edir, insanı mənəvi kamilliyə, qəlbindən “kibrü
–
qüruru” silməyə çağırır:
Sufi, istər isən cənnətə huri,
Gətirmə qəlbinə kibrü-qürurü.
Saqın, cahil sanma, ey gözüm nuru,
Hər fənnə alimdir Əmrah, əfəndi. [218, 752]
Aşığın “Bizimdir”, “Bilməzsən”, “Əfəndi”, “Edərlər”, “Bəyənməz” və s.
rədifli qoşmalarında bu cəhət qabarıq şəkildə nəzərə çarpır. Təsəvvüf şeirlərinin
əksəriyyətində olduğu kimi, Aşıq Əmrahın da qoşmalarında tez-tez saqiyə müraciət
olunur, haqqın yolunu, doğru məsləki göstərən şeyx-saqi poetik vasitə kimi aşığın
sufi görüşlərinin daşıyıcısına çevrilir. “Sun, saqi, ləlindən təşnə dillərə”, “Saqi, bir
piyalə sun kərəm eylə”, “kərəm qıl, ey saqi, üz vermə mənə” və s. misralarda
“piyalə”, “ləl” rəmzləri “saqi” simvolunun müxtəlif cəhətlərini əks etdirir.
Aşıq Əmrahın qoşmalarında təsəvvüf poezyasının mürəkkəb anlayışları
poetik misraların axarında aşığın dini-ürfani düşüncə tərzinin kamillik dərəcəsini
göstərən cizgilər kimi diqqəti cəlb edir:
Bir noqtə yetməzmi arifə kafi,
Sirrə məhrəm olan eyləməz lafı,
Çıx aradan, sufi, deyilsən safi,
Təkkeyi-eşq içrə dövran bizimdir. [218, 743]
Dostları ilə paylaş: |