260
dair əsər ərəb dilindən Azərbaycan dilinə tərcümə edilmişdi. XVIII əsrin II
yarısında əsasən əlifba prinsipi əsasında Azərbaycan dilində bir sıra lüğətlər tərtib
olunmuşdur. Beləliklə, ədəbiyyatda aparıcı olan Azərbaycan dili biliklərin geniş
kütlələr arasında yayılması üçün əlverişli zəmin hazırlamışdı.
Dövrün epiqrafik abidələri eyni zamanda xalq sənəti nümunələridir. Bu
abidələr sayəsində tarixçilər həmin dövrün ictimai-siyasi, dini-ideoloji, mədəni
həyatının epizodlarını, sənətşünaslar isə xalq sənətinin bədii-estetik
xüsusiyyətlərini araşdırırlar. Memarlıq abidələri, məzar daşları, saxsı, metal, taxta
və s. əşyaların üzərindəki müxtəlif formalı sənduqələr, başdaşı, sinədaşı, qoç və at
fiqurlu məzar daşları, məscid, hamam, ovdan, karvansara, mədrəsə, qala divarları,
istehkamlar və ictimai binalar üzərində qoyulmuş yazılı lövhələr (daş kitabələr)
epiqrafikanın tədqiqat obyektidir. Həmin abidələrin özləri, onların bədii
keyfiyyətləri isə sənətşünasların araşdırma predmetidir. Mətnlərin məzmununa
görə XVIII yüzilliyin kitabələrini beş qrupa bölmək mümkündür: İnşaat xarakterli
(yəni tikinti tarixindən bəhs edən) kitabələr (1); mətni nisbətən geniş, lakin sayı
çox az olan sənədlərin lapidar nüsxələri (2); epitafiyalar məzar daşlarına qısaca
həkk olunmuş yazılar (3); dini mətnlər (4); adətən məzar daşları üzərinə həkk
olunmuş mənzum parçalar (5).
169
Əhəngdaşı üzərində həkk edilmiş kitabələr
əsasən Bakı, Şamaxı, Qarabağ, Dərbənd, Quba xanlıqlarının ərazisində, Qəbələdə
tapılmışdır. Şimal-qərb bölgələrində yaşayıb yaratmış xəttat – həkkaklar çay
daşları üzərində işləmişlər. Yerli material ustaların iş üslubuna ciddi təsir
göstərmişdir. Epiqrafik araşdırmalar sübut edir ki, Nadir şahın apardığı amansız
müharibələr, Nadirə qədərki zaman ərzində baş vermiş hərbi-siyasi çəkişmələr
nəticəsində “XVIII əsrin I yarısında Azərbaycanda tikinti işləri əsasən aparılmamış
və bununla əlaqədar kitabələr də yazılmamışdır”.
170
Epiqrafik materiallar təsdiq
edir ki, əsrin II yarısında tikinti fəaliyyəti canlanmış, Şəki, Şuşa və Naxçıvanda xan
sarayları, Ağdamda imarətlər, Pənahəli xana və onun nəslinə aid olan günbəzlər
tikilmiş, Bayat və Şahbulaq, Pənahabad (Şuşa) qalaları salınmış, həmin qalalarda
bazar, karvansara, hamam, məscid və s. ictimai təyinatlı obyektlər tikilmişdir. Bu
dövrdə Ordubad, Şamaxı, Dərbənd, Quba, Bakı şəhərlərində hərbi istehkamlar,
ictimai-mülki binalar inşa olunmuşdur. Kitabələrdə memarlıq obyektlərinin inşası
tarixinə, onların bərpa və təmir olunması zamanına, həmin obyektlərin inşasında
rolu olmuş sənətkarlara, bir çox ictimai-iqtisadi və siyasi, inzibati məsələlərə dair
materiallar mövcuddur.
Azərbaycanda nisbi siyasi sabitlik (xanlıqların meydana gəlməsi və
təşəkkülü) bərqərar olunanadək memarlıqda canlanma müşahidə olunmamışdır.
Aramsız müharibələr, xarici qoşunların müdaxilələri, feodal ara çəkişmələri
memarlığı inkişaf stimulundan məhrum edirdi. XVIII əsrin II yarısında memarlıq
üçün müəyyən əlverişli şərait yarandı. Azərbaycanın şimal-qərb bölgəsində və
Şamaxıda bir çox sufi mürşidlərinin, ruhani alimlərin, müqəddəs hesab olunan
şəxslərin məzar daşlarının aşkar olunması təsdiq edir ki, XVIII yüzillikdə
261
ölkəmizdə “Nəqşbəndiyə”, “Ələviyyə” təriqətləri geniş yayılmışdı. Bu dövrdə xalq
memarlıq ənənələri memarlıq fəaliyyətinin başlıca ünsürü idi, lakin əski
zamanların monumental memarlıq ənənələri yenə də mühüm təsirini qoruyub
saxlamışdı. Azərbaycanda xanlıqlar dövrünün əsas cəhətlərindən biri iqamətgah və
onun müvafiq istehkamı kimi saray komplekslərinin yaradılması zərurəti olmuşdur.
Azərbaycan xanları başlıca şəhərlərin ətrafında və xanlıqların ərazilərində güclü
müdafiə qurğuları sisteminin inşasına xüsusi diqqət yetirirdilər. Məhəllə məscidləri
bu dövrün mühüm ibadət və tədris ocaqları idi. XVIII əsrin Azərbaycan
memarlığında aparıcı yeri kiçik həcmli, səkkizguşəli türbələr tuturdu. Əsrin
şəhərsalma işində iki başlıca meyl nəzərə çarpırdı. Birinci meyl xanlar tərəfindən
paytaxt kimi Azərbaycanın qədim şəhərlərinin seçilməsi idi. Bakı, Naxçıvan və
Gəncə bunlara misal ola bilər. 1734-cü ildə Nadir xan tərəfindən dağıdılmasına
baxmayaraq, Şamaxını bu tip şəhərlərə aid etmək mümkündür. Lakin XVIII
yüzillikdə bir sıra xanlıqların mərkəzləri də meydana çıxdı, bununla bağlı
şəhərsalmada mühüm tədbirlərin aparılması müşahidə edildi. Quba və Şuşa bu tipli
şəhərlərdən idi. 1772-ci ildə baş vermiş güclü sel nəticəsində qədim Şəki əsaslı
surətdə dağıldı
171
və şəhər yeni ərazidə salındı. Şuşa və Şəki XVIII əsrin
şəhərsalma fəaliyyəti üçün ən səciyyəvi olan memarlıq obyektlərinin məskənləri
idi. Azərbaycan şəhərlərində memarlığın təkamülü bu zaman ərzində saray
komplekslərinin inkişafından, yaşayış məntəqəsinin təbii-coğrafi mövqeyindən,
müdafiə qurğularının tikilməsindən başlanmış, həmin amillərdən asılı olmuşdur.
Şəki öz dövrü üçün yüksək dərəcədə abad olan bir şəhər idi. Şəhərin küçələrinə daş
döşənmişdi, saxsı borularla çəkilmiş su kəməri əhalinin tələbatını ödəyirdi. 1765-ci
ilədək digər orta əsr şəhərlərindən fərqli olaraq Şəki qala divarları ilə əhatə
olunmamışdır. Ona görə də düşmən hücumu zamanı şəhər əhalisi “Gələrsən-
görərsən” qalasına sığınırdı. 1765-ci ildə Şəki qala divarları ilə əhatə olundu.
Qalanın iki darvazası vardı. Lakin hərbi-siyasi təhlükənin qarşısını ala biləcək
müdafiə qurğuları sistemi təbii fəlakət qarşısında aciz idi (1772-ci ilin seli nəzərdə
tutulur). Şəki qalasının daxilində tikilmiş Xan sarayı XVIII əsr Azərbaycan
memarlığının incilərindəndir. 1763-cü ildə inşa olunmuş bu saray geniş saray
kompleksinin hissəsidir. Sarayı “Müştaq” təxəllüsü ilə şeirlər yazmış Şəki xanı
Hüseyn xan tikdirmişdir. Sarayda şəbəkə sənətinin bənzərsiz nümunələri vardır.
Yalnız onu göstərmək kifayətdir ki, “hər kvadratmetr şəbəkə beş min bir-birinə
geydirilən hissələrdən ibarətdir”
172
. Saray qala içərisindədir, lakin əlavə divarlarla
əhatələnmişdir. Şəki xanları sarayının ön fasadı cənuba baxan ikimərtəbəli binadan
ibarətdir. Mərtəbələrin planı eynidir. Bir cərgədə yerləşən üç ev bir-birindən
dəhlizlə ayrılır. Mərtəbələr arasında daxili əlaqə olmamışdır. Birinci və ikinci
mərtəbələr arasında daxili yolun olmaması sarayın iki hissəyə – rəsmi qonaq və
şəxsi, xüsusi hissəyə ayrılması ilə aydınlaşdırılır. Sarayın birinci mərtəbəsinə
yalnız kənar şəxslər daxil ola bilərdilər, “yuxarı mərtəbəyə isə xan ailəsinin üzvləri
və ya onlara qulluq edən adamlar buraxılırdılar”.
173
Sarayın baş-cənub fasadı
Dostları ilə paylaş: |