28
Azərbaycan qarşıya çıxan bir sıra mühüm problemlərin, ilk növbədə dövlət
müstəqilliyinin qorunub saxlanması və möhkəmləndirilməsi, Dağlıq Qarabağ
probleminin sülh yolu ilə həll olunması, bazar iqtisadiyyatı istiqamətində
islahatların həyata keçirilməsi və dünya inteqrasiya prosesinə sıx cəlb olunmasında
beynəlxalq təşkilatların rolundan istifadə etmək məqsədilə qısa müddət ərzində
Birləşmiş Millətlər Təşkilatı (BMT), Avropada Təhlükəsizlik və Əməkdaşlıq
Təşkilatı (ATƏM, daha sonra ATƏT), İslam Konfransı Təşkilatı (İKT), Avropa
Şurası, Avropa Birliyi, NATO və başqa beynəlxalq və regional qurumlarla
qarşılıqlı faydalı əlaqələr yaratdı. Müstəqil Dövlətlər Birliyi (MDB), GUAM, Qara
Dəniz İqtisadi Əməkdaşlıq Təşkilatı (QDİƏT) kimi qurumların yaradılmasında
yaxından iştirak etdi.
1991-1992-ci illərdə - BMT-yə, ATƏT-ə, İslam Konfransı Təşkilatına daxil
olmaqla Azərbaycan müstəqil dövlət kimi iradəsini ifadə edərək beynəlxalq aləmdə
ilk addımlarını atdı.
Bu gün Azərbaycan dövlətinin xarici siyasət kursu ölkənin müstəqilliyinin,
təhlükəsizliyinin, ərazi bütövlüyünün təmin olunması, Azərbaycanda iqtisadi
islahatların həyata keçirilməsi üçün əlverişli şəraitin yaradılması, digər dövlətlərlə
formalaşmış bərabərhüquqlu və faydalı münasibətlərin sərhədlərinin genişlənməsi
və balanslaşdırılmış praqmatik xarici siyasətin həyata keçirilməsindən ibarətdir.
Bu gün Azərbaycan, demək olar ki, əksər nüfuzlu beynəlxalq təşkilatların
üzvüdür. Avropanın demokratik və təhlükəsiz əraziyə çevrilməsinə kömək üçün
üzv dövlətlər arasında sıx əlaqələr yaratmasında müstəsna xidmətləri olan Avropa
Şurası ilə Azərbaycan arasında əməkdaşlığın təhlili öz aktuallığı baxımından digər
qurumlarla müqayisədə daha yüksəkdə durur.
Bu gün Avropa Şurası ilə yeni dövlətlərin əlaqələrinin yaranması formaları,
mahiyyət
və məqsədləri, inkişaf istiqamətləri geniş tədqiq edilməli
məsələlərdəndir. Azərbaycan Respublikası ilə Avropa Şurası arasında bu əlaqələr
aktuallığına görə son dərəcə diqqəti cəlb edir.
Azərbaycan Respublikası ilə Avropa Şurası arasında əlaqələrin
yaranmasının, inkişaf edib möhkəmlənməsinin, onların tarixi kökləri və hüquqi
əsaslarının tədqiq edilməsi, Avropa Şurası ilə əməkdaşlığın ölkənin xarici
siyasətindəki və daxili həyatındakı rolunun öyrənilməsi, Azərbaycanda
demokratiyanın inkişafı və insan hüquqlarının qorunması sahəsində əldə olunmuş
nailiyyətlərdə Avropa Şurasının rolu, bu təşkilatlarla perspektiv istiqamətlərin
müəyyənləşdirilməsi, ümumiyyətlə, Avropa Şurası təşkilatının öyrənilməsi, onun
mahiyyətinin, quruluşunun və fəaliyyətinin tədqiqi bu gün Azərbaycan üçün
zəruridir.
Azərbaycanın beynəlxalq münasibətlər sisteminə daxil olması, dünya
siyasət aləminə qoşulması çətin və ağrılı olmuşdur. Əslində, suveren Azərbaycanın
diplomatiyasının qurulmasına sıfırdan başlanmışdır. Yeni epoxaya qədəm qoyan
Azərbaycan çoxlu problemlə üzləşmiş, bunlardan ən kəskin və qorxulusu
29
ölkəmizin beynəlxalq aləmdən təcrid edilməsi təhlükəsi olmuşdur. Bu çətin
vəziyyətdən çıxmaq məqsədilə neçə illər ərzində ardıcıl səylər göstərilmişdir.
Mərkəzi və Şərqi Avropa ölkələrinin sosialist blokundan çıxması və eləcə
də yeni müstəqil dövlətlərin yaranması Avropa Şurasının siyasətində köklü
dəyişikliklərə gətirib çıxardı və "qapılarının onların üzünə açılması" ilə nəticələndi.
1989-cu ildə Avropa Şurası namizəd ölkələrin nümayəndələri ilə AŞ PA
məruzəçiləri arasında diskussiya üçün əsas ola biləcək "check list" hazırladı.
Adətən, hüquq ekspertlərinin məruzəsindən sonra müvafiq məruzəçilər barəsində
məruzə və ya rəy hazırlanmalı olan ölkələrə bir neçə səfər etdilər. AŞ PA
qəbulolunma proseduru zamanı AŞ PA yanında "xüsusi dəvət olunmuş statusu"
deyilən effektiv bir alət işləyib hazırladı. 1992-ci ilin yanvarında Azərbaycan
rəsmi olaraq "xüsusi dəvət olunmuş statusu"nun verilməsi barədə xahişlə
Avropa Şurasına müraciət etdi. Bu status assambleyanın və bir çox komissiyaların
işində səsvermə və AŞ PA tərəfindən qəbul olunacaq mətnə təkliflər verilməsi
hüququ istisna olmaqla, iştirak etmək hüququ verirdi. "Xüsusi dəvət olunmuş
statusu" almamışdan əvvəl xahiş edən tərəf insan hüquqları sahəsində siyasi və
hüquqi əhəmiyyət kəsb edən məcburi xarakterli bir sıra beynəlxalq alətləri qəbul
etməlidir. O, AŞ PA-ya məruzəçilərin səfəri zamanı təşkilata məlum olan layiqli
tərəfdaşlara malik olmaq imkanı verir, bu da missiyanın uğurunu təmin edir. Qeyd
etmək lazımdır ki, əslində, yeni dövlətin qəbulu assambleyanın məruzəçiləri ilə
"xüsusi dəvət olunmuş" milli parlamentin nümayəndə heyətinin əməkdaşlığının
nəticəsidir; bu əməkdaşlığın effektivliyi bir çox hallarda qəbulolunmanın tezliyini
şərtləndirir. Son məruzə AŞ PA-nın plenumuna təqdim olunur. Prosedur namizəd
dövləti Avropa Şurasına üzvlüyə dəvət etməyi Nazirlər Şurasına tövsiyə edən rəyin
qəbul olunması ilə başa çatır. Bu normativ fəaliyyət təşkilata qəbul olunan zaman
dövlətin öz öhdəliklərini yerinə yetirməsində ifadə olunur və 1993-cü ildə nəzarət
prosedurunun yaranmasına gətirib çıxardı.
Lakin 1992-ci ildə Avropa Şurasının özü Cənubi Qafqaz regionuna qədər
genişlənməyə hazır deyildi. Üstəlik, bu təşkilatın ölkəmizə münasibəti də müsbət
deyildi və hətta 1992-ci ildə Avropa Şurasının qeyri-üzv ölkələr üzrə komitəsi
Ermənistan — Azərbaycan, Dağlıq Qarabağ münaqişəsi ilə əlaqədar
respublikamızın əleyhinə bəyannamə qəbul etmişdi. Belə bir şəraitdə ilk növbədə
Avropa Şurasında Azərbaycanın obyektiv, düzgün imicini formalaşdırmaq lazım
idi.
Müdafiə və təhlükəsizlik məsələləri istisna olmaqla, Avropa Şurası bir çox
fəaliyyət istiqamətlərini əhatə edir. Onun proqramına insan hüquqları, kütləvi
informasiya vasitələri, hüquq sahəsində əməkdaşlıq, sosial və iqtisadi
problemlər, səhiyyə, təhsil, mədəniyyət, idman, gənclik, yerli və regional
idarəetmə və ətraf mühitlə bağlı məsələlər daxildir.
Avropa Şurasının Nizamnaməsinə görə, onun üzvü "qanunun aliliyi
prinsipini tanıyan və yurisdiksiyası altında olan şəxslərə insan hüquqları və əsas
azadlıqlarından istifadə etməyə şərait yaradan" Avropa dövlətləri ola bilər.
Dostları ilə paylaş: |