49
briqadir Pirəli asanlıqla həll edə bilərdi. Həyət-bacaya hərdən əl
gəzdirməklə onu qaydaya salmaq çətin deyildi. Bu evin çırağını
Nemətin və Pirəlinin ürək qızdırdığı adamlardan biri yandıra bilərdi.
Nə üçün ana Kürün dodaqları Dədə palıdın köklərinə çatmır?
Doğrudur, Kürün keçmiş hay-harayı, ”özbaşınalıqları” qalmayıb. İndi
o, bəndləri yarıb sahilləri basa bilmir. Kür suları nizamla paylanır və
bu sularda Dədə palıdın da payı var; lakin İdrisov meşədəki böyük
talada dirrik düzəltdirdikdən sonra Dədə palıdın payı özünə çatmır.
Məlum olur ki, Dədə palıdı öldürən sərvət ehtirası, pula hərislikdir.
Burada Piti Namaz obrazı təsadüfən meydana çıxmır. Piti Namazla
İdrisovun arasında gizli müqavilə var və o bu dirriyin pomidor-xiya-
rını öz furqonu ilə öz kababxanasına daşıyır; bu hesabdan gələn gəlir
İdrisovun cibinə dolur. Dirriyi əkib-becərən, müftə yerə qabıqdan
çıxan Bağır bu şeylərin mahiyyətini başa düşməsə də, bunları sadəcə
olaraq İdrisovun ”təsərrüfatçılığı” kimi qiymətləndirsə də, Nurcabbar
bu dirriyin və Piti Namazın bu dirriyə möhkəm ayaq açmasının
nəticələrini aydın görür, Dədə palıdı öldürən səbəbləri incəliklərinə
qədər dərk edir: ”Sən burada dirrik əkməsəydin, Namaz qoduq bu
meşəyə dadanmazdı. Namazın ayağı dəyən yer qurumalıdı, küllü-küf
olmalıdı...” Burada məsələ geniş qoyulur - Piti Namazların ticarəti
olan yerdə Dədə palıdlar yaşaya bilməz!
İdrisov yalnız bu dirrikdən gələn gəlirlə kifayətlənmir və belə
nəfsin sahibi bununla kifayətlənə bilməzdi. İdrisov meşənin məsul
cavabdehi yox, indiki halda ağasıdır, sahibidir: ”...meşənin pisinə də,
yaxşısına da cavabdeh İdrisovdur. İdrisov istəsə burada bostan əkdirər,
istəsə ağac kəsdirər, istəsə Kürün ağzını bura döndərər, istəsə Bağırı
da, Nurcabbarı da bir günün içində işdən çıxardar. Yəni Nur cabbar
bilmir bunu? Lap yaxşı bilir. Bilir ki, bu meşədə səhərdən axşamadək
gövşək vuran on səkkiz qoyunun dördü Bağırındı, on dördü İdrisovun.
Üç inəyin biri Bağırındı, ikisi İdrisovun. Bu meşədə bir camış var, o
da İdrisovundu, Bağırın camışı yoxdu. On iki bal yeşiyinin ikisi
Bağırındı, onu İdrisovun. Dirrik də onundu, a kişilər.” Bağır belə
düşünür, belə deyir və gördüklərini, başa düşdüklərini deyir. Buradakı
”istəsə Kürün ağzını bura döndərər” sözlərində dərin məna
gizlənmişdir. Demək, İdrisov Kürdən də istədiyi kimi istifadə etmək
iqtidarına malikdir və deməli, istəsə, dirriklə yanaşı, Dədə palıdı da su
ilə təmin edə bilər. Lakin bu onu əsla maraqlandırmır, qətiyyən dü-
şündürmür. Bu öz mənafeyinin qulu olan ”məsul” şəxsin ictimai
mənafeyə dəhşətli laqeydliyidir. Dədə palıdın ölümündən bir tükü də
tərpənməyən İdrisov meşədə saxladığı heyvanların üstündə zağ-zağ
50
əsir, doğmaqda olan düyəni Bağıra dəfələrlə tapşırır: ”Gözdə-qulaqda
ol ha, birinci doğuşudu, tələf olar.”
Deməli, Dədə palıdı öldürən şəxsi mənafe, təmahkarlıq və
dövlət işinə İdrisov kimilərin tükürpədən münasibətidir.
Bəs Nemət müəllimi, hələ anasının qırxı çıxmamış, evlərini,
ata yurdunu satmağa məcbur edən nədir? - o evi ki, həyətə girən kimi,
ona elə gəlir ki, indicə göy qapı açılacaq, anası sinəsinə döyə-döyə
özünü oğlunun üstünə atacaq; o həyəti ki, atası dərhal kərkisini yerə
qoyub qalxacaq, üst-başını çırpa-çırpa talvarın altından oğluna
yaxınlaşacaq...
O, doğrudur ki, torpağın üstündə insan gəzməlidir; o,
doğrudur ki, torpağa insan təri qarışmalıdır. Lakin bir müddət səbr
etmək olmazdımı? Bu torpağı yaxşı əllərə tapşırmaq olmazdımı?
Bu ev, bu torpaq Nemətin ailəsini - arvadını və uşaqlarını niyə
bu qədər narahat edir? Onlar niyə səbirsizlik edirlər?
Kənddən birbaş şəhərə - Nemətgilə gəlib evin ”yarıpulunu”
gətirmiş Mehmanın - Nemətə ”əmi” deyən bu şəxsin təklifi arvad-uşa-
ğı qızışdırır. Burada da, göründüyü üzrə, maddi cəhət həlledicidir.
Nemət müəllimdir və ailəsini öz qazancı ilə saxlayır, təmiz dolandırır.
Lakin onun arvadı Şəfiqənin arzuları var: o da bəzi qonşuları kimi
yaxşı geyinmək, uşaqlarını geyindirib-kecindirmək, onlar üçün cehiz
hazırlamaq, maşında gəzmək, daha firavan yaşamaq arzusundadır.
Şəfiqəni bu cür şeylər maraqlandırır və o, Nemətin öz ata-anası, doğ-
ma yurdları barədə kədərli duyğularını qətiyyət anlamır və anlamaq
istəmir. Şəfiqə fürsəti əldən vermədən, müştəri var ikən bu işi sürətlə
həll etməyi lazım bilir; bəzən ərini o dərəcə təhrik edir ki, Nemət -
həmişə öz həyat yoldaşına ehtiramla yanaşan Nemət labüd olaraq ”yad
qızıdır” deyə düşünür. Əgər bu təhrik, ailə danlaqları olmasa idi, bəlkə
Nemət müəllim heç o evi satmazdı, pulsuz-pənəsiz, kasıb Əkbərin
uşaqlarına bağışlardı. Bu, birinci və az əhəmiyyəti olmayan amildir.
İkinci amil, əslində, birinci üçün əsas olmuş və onu qüvvətləndirmiş,
qızışdırmışdır. Kənddə Nemətin bacısının əri Pirəlini dinc qoymurlar,
hələ qoca arvad rəhmətə getməmiş, yüz yerdən bu evin sevdası
başlanır. Kimlər bu yurda sahib olmaq istəyirlər? Pirəli bir-bir sayır:
Səmədin oğlu Mehman, topal Cəfərqulu, Kərimoğlulardan bığlı
Məmməd, kosa Qələndər, Allahverdi kişi, bankasatan Zeynal və s.
Lakin Nemət əlacsız qalıb evi satmalı olsa da, bunların heç birinə bu
yurdu vermək istəmir, razı olmur ki, oğurluqla dolanan topal
Cəfərqulu, heç kəsin yaxşı gününü görmək istəməyən bığlı Məmməd,
imzasız məktubları ilə yaxşı adamların ürəyini partladıb öldürən və
51
bundan bir qazanc mənbəyi kimi istifadə edən kosa Qələndər, sələmçi
Allahverdi kişi, bankasatan Zeynal onun ata yurduna ayaq bassınlar.
O, bu yurdu qardaş kimi sevdiyi qonşusu Əkbərə vermək istəyir.
Lakin arvadının dediyi qiyməti Əkbər ödəyə bilmir. Torpağın əsl
sahibi onu ala bilmir. Müqəddəs saydığı ata yurduna əyri yollarla
sərvət qazananlar, natəmiz adamlar sahib olurlar. Bəlkə də salam
vermədiyi bu adamlara ata yurdunu niyə verməlidir?
Artıq bildiyimiz kimi, Nemətin valideynləri yoxdur, ona görə
də bu evin satılması barədə söz-söhbət, vaxtından çox tez olsa da, bir
qədər təbiidir. Lakin ”Dədə palıd”da Piti Namaz hələ Bağırın axırını
gözləmədən onun evini, həyətini ələ keçirmək istəyir.
Piti Namaz elə bir şəxsdir ki, puldan ötrü ”anasının əmcəyini
kəsər”. Özünün dediyi kimi, ”vojunu buraxsan, samalyot alar.”
Təzə meşənin girəcəyində kababxana tikdirəndən sonra
əvvəlki kasıb Namazdan əsər-əlamət qalmır. Kababxananın ağ tüstüsü
kabab iyini uzaqlara aparır, ”camaatı boğazlayıb” kababxanaya dartır.
Tədricən bu tüstü geniş eyvanlı, üstü şiferli, ikimərtəbəli ev olur, daş
qaraj olur, təptəzə maşın olur. Bu tüstü Piti Namazı qucağına alıb
qaldırır göyün yeddinci qatına.
Bağırın səliqəli evi, həyəti ilə Piti Namazın evini kiçik bir barı
ayırır. Bağırı qorxudan budur ki, bir gün Namaz öz enli sinəsi ilə bu
barını uçurub, onun yurdunu öz yurduna qatar. Ona görə də evi ona
satmaq barədə Piti Namazın təklifini eşitdikdə iflic vurmuş kimi olur.
Bağırın ailəsində də Nemətin ailəsindəki amillər güclüdür.
Bağırın yeganə qızı Nazlı Bakıda ərdədir. Əri Müzəffər və qızı Tün-
zalə ilə kiçik bir otaqda kirayədə yaşayırlar. Elə bir otaqda ki,
meşədə, dəhşətli ağcaqanadların qulaqbatırıcı səsi və dəhşətli
neştəri altında şirin-şirin yatan Bağır bu otaqda bir gecə yata bilmir.
Piti Namaz kəndə gəlmiş Nazlının bu vəziyyətini bildiyi üçün onu
şirnikdirir, bu evi ikiqat qiymətə almağa hazır olduğunu bildirir.
Nazlı da evi satmaq təklifini müdafiə edir. Həm də bu iş baş
tutmasa, bu evi satıb bir qədər pul əldə edərək kooperativə yazıla
bilməsə, ailələrinin dağılacağını, Müzəffərdən ayrılacağını,
Tünzalənin yetim qalacağını söylədikdə, doğma övladın necə amansız
olduğunu düşünən Bağıra elə gəlir ki, qarşısındakı öz qızı deyil, Piti
Namazdır, cildini dəyişib durub onun gözlərinin qabağında.
Göründüyü kimi, dərdlər eynidir. Nemətin ailəsi yaşayış
imkanlarını Nemətin sahibsiz ata yurdu hesabına genişləndirmək
istədiyi kimi, Piti Namazın pullarına ağzı sulanan Nazlı da öz atasını
diri-diri çölə atmaq, yurdunu haram pullara dəyişmək istəyir və hər iki
Dostları ilə paylaş: |