30
Ertəsi gün Raziyə işə getmək istəmədi. Ancaq o, bu barədə
İradə ilə hökmən danışmalıydı.
O, əvvəlcə qızını bağçaya apardı, sonra tələsmədən iş
yerinə yollandı. Qərara gəlmişdi ki, gedən kimi, ərizəsini yazıb
işdən çıxacaq. Raziyə redaksiyaya daxil olarkən İra onu
çoxdan gözləyirmiş kimi:
- A-a-a-z, harada qalmısan bu vaxta kimi? Sən ki işə hamıdan
tez gələrdin. Bu gün nə oldu belə gecikdin? Aslan müəllim
səhərdən bəri düz üç dəfə səni soruşub. Dedi ki, “Raziyə
xanım gələn kimi, yanıma göndərin!” - uca səslə dedi .
- İra, səninlə ikilikdə danışmaq istəyirəm, - deyə Raziyə
İradəni onunla söhbət etmək üçün çayxanaya apardı.
Raziyə axşamkı əhvalatı yerli-yataqlı İradəyə söylədi.
- Gördünmü?! İndi mənə inandınmı? Bu kişilər hamısı bir
bezin qırağıdır. Onlara qətiyyən etibar etmək olmaz! İndi fikrin
nədir? Nə etmək istəyirsən? - İradə cavab gözləyirmiş kimi
gözlərini Raziyəyə zillədi.
- Nə edəcəyəm. Ərizəmi yazıb işdən çıxacağam. Amma
çıxarkən ona dişimin dibindən çıxanı deyəcəyəm, sonra da
üzünə tüpürəcəyəm. - Raziyə dedi.
- Dayan bir görüm. Onun üzünə tüpürməyə hər zaman vaxtın
olar. Amma de görüm, mənim planım barədə düşündünmü
heç? - İradə Raziyənin fikrini bilmək istədi.
- Yaxşı, bundan sonra necə desən, elə hərəkət edəcəyəm.
Yetər ki, bu binamusu ifşa edək. Bəlkə, başqalarına da dərs
olar. - Raziyə bundan sonra İradəyə inandığını və ona bel
bağladığını təsdiq etdi.
- Bura bax, mən bu Aslanın ciyərini bilirəm. İndi o səni otağına
dəvət edəcək və səninlə aranızda heç bir şey olmamış kimi
davranacaq, səndən üzr istəyəcək. Onun üzə gülümsəməsinə
baxma, o, çox kinli adamdır. O səni ya bu gün, ya da sabah
yazı hazırlamaq üçün hökmən yaxın dostlarından birinin
yanına göndərəcək. Oraya tək getməzsən, gedərkən mənə də
xəbər verərsən. Mən o zaman əsas planım barədə sənə ətraflı
31
danışacağam. Planım baş tutarsa, kasıbçılığın daşını birdəfəlik
atacaqsan, - deyə İradə Raziyəni baş redaktora qarşı
təlimatlandırdı.
Bu vaxt çayxanaya onların iş yoldaşı Elçin daxil oldu. O,
hər tərəfə nəzər saldı. Raziyə ilə İradəni birlikdə görcək, gülə-
gülə onlara yaxınlaşdı:
- Mən də sizi axtarırdım, Raziyə xanım. Aslan müəllim sizi
çağırır - dedi.
- İndi gəlirəm. - Raziyə dilləndi.
Elçin daha gözləməyib, tez geri qayıtdı. Raziyə ayağa
qalxarkən, İradə astadan dedi:
- Dediklərimi unutma! Al, mənim mobil telefonumu, oturduğun
kresloya qoyarsan. Sən bayıra çıxandan sonra, Aslan hökmən
hansı bir dostu ilə danışacaq. Qoy onların danışığını mobilim
yazsın. Bu bizə lazım olacaq.
- Bəs mən telefonu sonra oradan necə götürəcəyəm?
- Çox sadə. Beş-on dəqiqə keçəndən sonra, yenidən geri
qayıdıb, telefonunu unutduğunu söyləyəcəksən, vəssalam.
- Yaxşı, sən heç narahat olma, İra. Mən dediyini edəcəyəm, -
Raziyə rəfiqəsini əmin etdi.
Raziyə baş redaktorun otağına girən kimi, Aslan tez ayağa
qalxıb gülə-gülə:
- Raziyə xanım, xoş gəlmisiniz. Buyurun, əyləşin. Dünən
axşam olanlar üçün sizdən üzr istəyirəm. Özümdə
olmamışam, nə danışdığımı bilməmişəm. İçki məni tez tutub.
Siz allah məni bağışlayın - dedi.
- Aslan müəllim, mənim yerimdə olsaydınız, sizə qarşı bu cür
hərəkət edəni bağışlardınızmı? - Raziyə sınayıcı nəzərlərlə
baş redaktora baxdı.
- Haqlısan, Raziyə xanım. Mən düzgün hərəkət etməmişəm.
Amma xətamı istədiyin zaman nə ilə desən düzəltməyə
hazıram. Günahımı yumaqdan ötrü xahiş deyil, nə əmr
etsəniz, yerinə yetirməsən heç kişi deyiləm! Yetər ki, məni əfv
edəsiniz. - Aslan açıqcasına Raziyəyə yalvarırdı.
32
- Yaxşı, qoy bu birinci və sonuncu olsun. - Raziyə özünü guya
onu bağışlayırmış kimi göstərdi.
- Raziyə xanım, bir nəfər biznesmen tanışımdan yazı
hazırlamaq lazımdır. Düşündüm ki, bu yazını ancaq siz
hazırlaya bilərsiniz. Onun yanına sizdən başqa kimi
göndərsəm, bilirəm ki, yarıtmayacaq. Çünki onların gətirdikləri
materialı sonda özüm hazırlamalı oluram. Amma siz mənə
hazır yazı gətirirsiniz. Hə, nə deyirsiniz? O, sizə necə
lazımdırsa, “hörmət” də edəcək.
- Kimsənin “hörməti”nə ehtiyacım yoxdur, Aslan müəllim.
Amma yazını hazırlayacağam. Onun yanına nə vaxt
getməliyəm? - Raziyə soruşdu.
- Mən indi onunla əlaqə saxlayandan sonra sizə bildirəcəyəm.
Siz bir yerə getməyin, hələlik otağınızda olun. Mən sizi
yenidən çağıracağam. - Baş redaktor Raziyəyə getməsinə
işarə etdi.
Raziyə baş redaktorun otağını tərk edərkən, İranın ona
verdiyi mobil telefonu diktafona qurulmuş halda oturduğu
kresloya qoyaraq, otağı tərk etdi və birbaş İradənin yanına
tələsdi. Və baş redaktorla aralarında olan söhbəti ona danışdı.
- Gördünmü, Raziyə? Sənə dediklərim bir-bir düz çıxır. İndi
bundan sonra mən deyənlə hərəkət etməlisən,- deyə İradə
biznesmenə qarşı nəzərində tutduğu planla Raziyəni də tanış
etdi.
- İra, səndən qorxmaq lazımdır. Təcrübəli müstəntiq kimi iş
görürsən. Bütün bunları necə öyrənmisən? - Raziyə təəccüblə
İraya baxdı.
- Bütün bunları mənə yaşadığım həyat öyrədib. Gündə bir
neçə rola girməsən, həyatda istədiyinə nail ola bilməzsən.
Rola girərkən ilk növbədə insanları özünə inandırmağı
bacarmalısan. Bu əsas şərtdir. İkinci bir tərəfdən də, mən bu
yolları artıq çoxdan gedib qayıtmışam. - İradə gülərək kişiyanə
tərzdə sağ əlini rəfiqəsinin çiyninə qoydu.
Dostları ilə paylaş: |