23
AZƏRBAYCAN MEŞƏLƏRİNİN DAVAMLI İDARƏ EDİLMƏSİNİN ƏSASLARI.
BİOEKOLOJİ TƏLƏBLƏR
Kiçik Qafqazın cənub yamacında (Həkərəçay hövzəsi) dağətəyi zonada Araz palıdı,
ardıc və saqqız, arid tipli meşələr, aşağı dağ meşə qurşağında arid meşələr və iberiya palıdı
meşələri yayılmışdır. Bu regionda fıstığa təsadüf olunmur.
Dağlarımızın dərə hissələrində qarışıq cökə, ipəkyarpaq qızılağac, Qafqaz xurması,
məxməri ağcaqayın, qoz meşələrinə də rast gəlinir. Yuxarıda göstərilən meşə qurşaqlarının
yayılması qanunauyğunluqları demək olar ki, respublikamızın bütün dağlarında insan
fəaliyyətinin mənfi təsiri nəticəsində pozulmağa məruz qalmışdır.
Bitki qurşaqları qanunauyğunluğunun pozulması ən çox yuxarı dağ qurşağında
müşahidə olunur. Burada çox yerdə tozağacı, şərq palıdı və ardıc qurşaqları məhv edilmiş,
onların yerini törəmə subalp çəmənləri, qayalıqlar əvəz etmişdir. Aşağı və orta dağ meşə
qurşaqlarında meşələr antropogen landşaftlarla (kənd təsərrüfatı bitkiləri sahələri, bağlar,
yaşayış məntəqələri və s.) əvəz olunmuşdur. Tədqiqatlar göstərir ki, respublikamızda
meşənin iqlim sərhəddində demək olar ki, meşə bitkisinə təsadüf edilmir. Meşənin
müasir yuxarı sərhəddi respublikamızın dağlıq rayonlarında orta hesabla 1600-2000 m
hündürlükdən keçir.
Böyük Qafqazın cənub yamacının (Şəki-Zaqatala zonasının) yuxarı dağ qurşağında
yamaclar çox dik və kəskin parçalandığından, burada yaşayış məntəqələri əsasən aşağı,
bəzən isə orta dağ-meşə qurşağında yerləşir. Meşənin yuxarı iqlim sərhəddinin aşağı
düşməsinə əsas səbəb uzunmüddətli köçəri mal-qaranın yaylaq zonasında, yəni meşənin
yuxarı sərhəddində sistemsiz otarılması olmuşdur. Burada iqlim sərhəddi geri çəkilən
ərazidə meşə əsasən çəmən və boz-qır çəmən bitkiləri ilə əvəz olunmuşdur. Burada
Muxaxçay hövzəsində meşənin yuxarı sərhəddi 1800-2000 m-ə, Qoşaçay hövzəsində 1550-
1650 m-ə, Zəkitçay hövzəsində 2000-2100 m-ə endirilmişdir.
Böyük Qafqazın cənub yamacının şərq hissəsində bütün dağ-meşə qurşaqlarında meşə
örtüyü daha intensiv antropogen dəyişikliyə məruz qalmışdır. Belə ki, Pirsaatçay hövzəsində
yuxarı dağ meşə qurşağı tamamilə sıradan çıxarılmışdır, orta dağ meşə qurşağı isə yalnız
sağ sahil yamacında qalmışdır. Qozluçay hövzəsində meşə ilə örtülmə dərəcəsi 5%-dən
aşağıdır, burada dəniz səthindən 1400-1800 m yüksəklikdə güclü pozulmuş kiçik meşə
sahələrinə rast gəlinir. Qozliçaydan şərqdəki ərazilərdə Çilikçay və Çebotarçay hövzəsində
meşə yalnız törəmə tipli kolluqlardan ibarətdir.
Kiçik Qafqaz dağlarının (Gədəbəy, Daşkəsən, Kəlbəcər, Laçın) subalp zonasında və orta
dağ-meşə qurşağında isə ərazinin relyefinin nisbətən sakit olması, dağarası çökəkliklərin
mövcudluğu qədim zamanlardan bəri insanları özünə cəlb etmişdir. Buna görə də yaşayış
məntəqələri əsasən məhz burada cəmlənmişdir. Bununla əlaqədar Böyük Qafqazdan fərqli
olaraq meşənin iqlim sərhəddinin aşağı enməsində maldarlıqla yanaşı, həm də əkinçiliyin
inkişafı böyük rol oynamışdır. Məhz buna görə də Kiçik Qafqaz dağlarında meşənin
yuxarı sərhəddi çox böyük antropogen dəyişikliyə uğramışdır. Uzunmüddətli əkinçilik və
maldarlığın birgə təsiri nəticəsində meşə demək olar ki, heç bir yerdə öz təbii sərhəddində
qalmamışdır. Bir çox yerlərdə subalp tipli meşələr tamamilə sıradan çıxmış, onu dağ
24
GİRİŞ
çəmənləri, kolluqlar və ya qayalıqlar,
daşlıqlar əvəz etmişdir. Bununla əlaqədar
bu zonada meşəlik faizi kəskin aşağı
düşmüşdür.
Gədəbəy, Daşkəsən və Kəlbəcər
rayonlarında dağ yamaclarının şimal
cəhətlərində meşənin müasir sərhəddi
əsasən fıstıq və palıdla, Laçın və Qubadlı
rayonlarında isə yalnız palıdla qurtarır.
Meşənin iqlim sərhəddində uyğun
seyrək, alçaq boylu subalp meşələrinə
olduqca kiçik “ləkələr” şəklində rast
gəlmək olar. Məsələn, Gəncə çayı
və Tərtərçayın hövzələrində dəniz
səthindən 2200-2350 m yüksəklikdə
kiçik sahələrdə tozağacı meşəsi vardır,
ona vələs, bəzən palıd da qarışır. Tozağac
şaxtaya daha çox davamlı olduğu üçün
bu şəraitdə palıda və vələsə nisbətən
daha yaxşı inkişaf edir. Burada tozağacı
meşəliyinin yuxarı qurtaracağında eni
cəmi 10-15 m olan dar zolaqla boyları
0,5-1,0 m olan palıd və vələs ağacları müşahidə edilir. Lakin burada da intensiv mal-qara
otarılması nəticəsində bitki örtüyü pozulmuş və ilkin halını bir qədər itirmişdir.
Gəncə çayının sol sahilində dəniz səthindən 2400-2500 m yüksəklikdə sıx ardıc kollarına
da təsadüf olunur. Zəyəm çayının mənbəyində sürünən formalı ardıc kolları qalıqları dağın
lap zirvəsinə qədər, 2600-2700 m yüksəkliyə qədər qalxır. Hazırda Kiçik Qafqazda dəniz
səthindən 1900-2300 m yüksəklikdə ardıc kolları daha geniş yayılmışdır. Onlar fıstıq, palıd
və tozağacı meşələrinin yerində bitir. Buna səbəb əsas ağac növlərindən ibarət meşələrin
qırılması nəticəsində eroziya prosesinin intensiv inkişafı, yamacların quraqlaşması və mün-
bitliyin azalmasıdır. Belə sahələrdə ardıc daha yaxşı uyğunlaşa bilir. Vaxtilə ardıc kolları
dağlarda dəniz səthindən 2400-2500 m-dən yuxarıda təbii zolaq yaradaraq, ondan aşağıda
yerləşən meşə qurşaqlarını iqlimin mənfi təsirindən mühafizə edirdi. Lakin, sonralar otlaq
sahələrinin genişləndirilməsi məqsədilə bu zolaq aırılaraq və ya başdan-başa yandırılaraq
məhv edilmişdir.
Kontinental iqlimə malik olan Naxçıvan Muxtar Respublikasında dəniz səthindən 3000
m yüksəklikdə ardıc kollarına rast gəlinir.
Lənkəran-Astara zonasında meşənin yuxarı sərhəddi əsasən dəniz səthindən 1500-1800
m yüksəklikdən keçir. Bəzi yerlərdə Alar, Lerik və Soru yaşayış məntəqələri ətrafında
Dostları ilə paylaş: |