55
Mövzu 12.
Müvəqqəti saxlanc
İlk növbədə müvəqqəti saxlanc anbarı və gömrük rejimlərinin bir növü olan gömrük anbarı
məfhumlarını bir-birindən ayırmaq lazımdır.
Gömrük anbarı rejimində gətirilən mallar gömrük nəzarəti altında gömrük rüsum və vergiləri
tutulmadan və iqtisadi siyasət tədbirləri tətbiq edilmədən 3 il müddətində saxlanıla bilər.
Mallar müvəqqəti saxlanc anbarına isə bəyannamə verilməsi və gömrük rejimi seçilməsinə hazırlıq
ərəfəsində yerləşdirilir. Müvəqqəti saxlanc anbarı elə bir yerdir ki, mallar gömrük orqanına təqdim edildiyi
andan, müəyyən gömrük rejiminin seçilib, onların buraxılmasına qədər gömrük nəzarəti altında yerləşdirilir.
Beləliklə, elə hal ola bilər ki, mal müvəqqəti saxlanc anbarından gömrük anbarına göndərilsin və gömrük
anbarlaşdırılması rejimində saxlanılması davam etsin.
Mal və əşyaların gömrük nəzarəti altında müvəqqəti saxlanma rejimində yerləşdirilməsinin texnoloji
sxemi DGK tərəfindən 14 aprel 1995-ci il tarixli əmrlə təsdiq edilmiş 22.01.98-ci il tarixli 035 saylı əmrlə
dəqiqləşdirilmişdir.
Müvəqqəti saxlanc anbarında malların və nəqliyyat vasitələrinin saxlanmasının ümumi müddəti iki
aydan, Gömrük Məcəlləsində nəzərdə tutulan digər müddətlər üçün isə həmin müddətlərdən artıq olmamalıdır.
Dövlət Gömrük Komitəsi malların ayrı-ayrı kateqoriyaları üçün daha qısa saxlanc müddətinin son həddini
müəyyən edə bilər. Tez xarab olan malların, canlı heyvanların, bitkilərin və həmçinin Azərbaycan
Respublikasının gömrük sərhədindən keçirilməsi qadağan edilən malların saxlancı üçün Dövlət Gömrük
Komitəsi tərəfindən minimum vaxt müəyyən edilir (məsələn, üç günə qədər).
Müvəqqəti saxlanc gömrük rəsmiləşdirilməsi prosedurası üçün məcburi mərhələ sayılmır. Əgər xarici
ticarət yükü gömrük orqanına təqdim edildiyi gün, gömrük rəsmiləşdirilməsi bitirilirsə müvəqqəti saxlanc
əməliyyatına ehtiyac qalmır.
Bütün digər hallarda yük avtomatik olaraq müvəqqəti saxlanca verilmiş mal statusu alır və bir sutka
ərzində gömrük orqanının icazəsi ilə anbara yerləşdirilir. Bu zaman mühüm məsələlərdən biri də odur ki,
malların müvəqqəti saxlanca verilməsi, qabaqcadan baytarlıq, fitosanitar, ekoloji və digər dövlət nəzarət
tədbirlərinin həyata keçirilməsindən asılı olmur.
Müvəqqəti saxlanc daxil olan yüklərin uçotunun aparılmasını nəzərdə tutur. (Əlavə 7). Bu məqsədlə
daşıyıcı malların gəldiyi barədə gömrük orqanlarına xəbər verdikdən iki gündən gec olmayaraq nəqliyyat, mal-
müşayiət və digər kommersiya sənədlərini təqdim etməlidir ki, mal və nəqliyyat vasitələrini identifikasiya etmək
mümkün olsun. Əgər bu müddət ərzində sənədlər təqdim edilə bilmirsə, qısa bəyannamə verilir.
Müvəqqəti saxlanca yüklərin yalnız məxsusi müvəqqəti saxlanc üçün məqbul olan tikililərə (yerlərə)
yerləşdirilməsi şərti ilə yol verilir. Qanunvericiliyə riayət olunmasını təmin etmək üçün müvafiq maddi-texniki
baza yaradılmalıdır. Bu məqsədlə, xarici ticarət yüklərinin daşındığı hava və dəniz limanlarında, yük
həyətlərində, stansiya meydanlarında, həmçinin beynəlxalq avtomobil yollarının keçdiyi sərhəd buraxılış
məntəqələrində müvəqqəti saxlanc anbarlarının açılmasının məcburi qaydaları müəyyən edilir.
Müvəqqəti saxlanc anbarı həm gömrük orqanları, həm də ayrı-ayrı Azərbaycan şəxsləri tərəfindən təsis
edilə bilər.
Dövlət Gömrük Komitəsi, yalnız gömrük orqanının müvəqqəti saxlanc anbarında saxlanılmasına icazə
verilən malların siyahısını müəyyən edə bilər.
Gömrük orqanı tərəfindən təsis edilmiş müvəqqəti saxlanc anbarı fəaliyyət zonasında yerləşdiyi gömrük
orqanının struktur bölməsi sayılır.
Müvəqqəti saxlancx anbarı təsis edən digər şəxslər:
a) Azərbaycan qanunvericiliyi ilə müəyyən olunmuş qaydada hüquqi şəxs statusuna malik olmalıdır;
b) müvəqqəti saxlanc anbarı təsis etmək üçün Dövlət Gömrük Komitəsindən müvafiq lisenziya
almalıdır.
Müvəqqəti saxlanc anbarının sahibinə müəyyən öhdəliklər həvalə edilir. Anbar sahələrinə irəli sürülən
texniki tələblər - mal və nəqliyyat vasitələrinin gömrük nəzarətindən kənar daxil olunmasını və çıxarılmasını
istisna etməlidir.
Gömrük orqanlarının müvəqqəti saxlanc anbarının quruluşu, avadanlığı və yerləşdiyi yerlərə aid tələblər
müəyyən etmək hüququ var. O cümlədən açarının biri gömrük orqanlarında qalan ikiqat qıfılla bağlanılması
belə tələblərdən biri ola bilər.
Anbar sahibi kənar şəxslərin anbara daxil olmasını qeyri-mümkün etməlidir.
Anbara daxil olmaq hüququ olan şəxslərin siyahısı tərtib edilib, aidiyyəti üzrə Gömrük orqanlarına
təqdim edilməlidir. Bu siyahı, təsdiq edildikdən sonra, gömrük orqanının vəzifəli şəxsləri ilə anbar sahibi
56
arasında gömrük nəzarətinin təşkili üzrə münasibətlərin tənzimlənməsində mühüm sənəd olaraq qəbul edilir.
Anbarın mühafizəsi və buraxılış rejiminin təşkili üçün çəkilən xərcləri anbar sahibi ödəyir.
Müvəqqəti saxlanc anbarı rejiminin pozulmasına görə, bilavasitə qanun pozuntusunun obyekti olan mal
və nəqliyyat vasitələri müsadirə oluna bilər.
Qanunvericilik müvəqqəti saxlanc anbarlarının, qapalı və açıq olmaqla, iki tipini nəzərdə tutur.
Açıq tipli anbarların xidmətindən bütün şəxslər istifadə edə bilər. Qapalı anbarlarda yalnız müəyyən
şəxslərin mal və nəqliyyat vasitələri saxlanıla bilər.
Gömrük orqanları tərəfindən təsis edilən anbarlar açıq tipli anbarlardır. Qapalı anbar təsis etmək istəyən
şəxslər açıq tipli anbarın məqsədə müvafiq olmaması barədə əsas təqdim etməlidirlər.
Anbar sahibi və anbara saxlanmaq üçün mal verən şəxslər arasındakı münasibətlər bu barədə bağlanan
müqavilələrlə tənzimlənir. Bu müqavilənin mətni qanunvericiliyin tələblərinə zidd olmamalı, nəzərdə tutduğu
müddət gömrük orqanının müəyyən etdiyi müddətləri olmalıdır. Müvəqqəti saxlanc anbarlarında yalnız gömrük
sərhədindən keçirilməsi (idxal, ixrac) nəzərdə tutulan mal və nəqliyyat vasitələri yerləşdirilə bilər. Bu
məhdudiyyət gömrük orqanları tərəfindən təsis edilmiş anbarlara şamil edilmir.
Müvəqqəti saxlanc anbarına yerləşdirilən mal və nəqliyyat vasitələri uçot kitabında qeydiyyata salınır.
Bu sənəd gömrük orqanları tərəfindən aparılan müxtəlif yoxlamalarda hesabat sənədi kimi istifadə olunur.
Həqiqi əqd olaraq saxlanc müqaviləsi mal və nəqliyyat vasitələrinin anbara yerləşdiyi andan qüvvəyə
minir. Gömrük orqanına məxsus olmayan anbarlarda anbara yerləşdirilmə faktının və vaxtının təsdiq edilməsi
üçün gömrük uçot sənədindən istifadə olunur. Belə sənəd kimi, adətən yük gömrük bəyannaməsi, qısa
bəyannamə, yaxud nəqliyyat və mal müşayiət sənədləri istifadə edilə bilər. Bir qayda olaraq, bu sənədlərə
gömrük orqanının səlahiyyətli şəxsi iki ştamp vurur. Birinci ştampr təsvirində daşıyıcı təhvil verdiyini, anbar
sahibi isə aldığını təsdiq edir. İkinci ştamp təsvirində isə anbar sahibi malı və ya nəqliyyat vasitəsini təhvil
verdiyini, alıcı isə qəbul etdiyini təsdiqləyir. Yükün təhvil-təslim əməliyyatı gömrük orqanı vəzifəli şəxsinin
şəxsi nömrəli möhürü ilə təsdiq edilir.
Gömrük anbarı sahibinin hüquqi statusu qanunvericiliklə müəyyən edilir.
Anbar sahibinin hüquqları şərti olaraq iki qrupa bölünür:
1) anbara yerləşdirilmiş mallarla davranış hüququ;
2) müvəqqəti saxlanca görə xidmətlərin ödənilməsi hüququ (müəyyən edilmiş stavkalara və ya
razılaşmaya görə).
Birinci qrupa daxil edilən hüquqlar - baxış, malların ölçülməsi, anbar daxilində yerlərinin
dəyişdirilməsi, zədələnmiş taranın düzəldilməsi və s. yalnız gömrük orqanının icazəsi ilə reallaşa bilər.
Anbar sahibinin əsas vəzifələri mülki qanunvericiliklə müəyyən edilirr: əmlakın qorunub saxlanılması
üçün tədbirlər görülməsi; ona saxlanca verilmiş əmlakdan istifadə etməmək. Gömrük hüququ gömrük
nəzarətinin həyata keçirilməsi üçün normal şəraitin yaradılmasına görə anbar sahibinə əlavə öhdəliklər müəyyən
edir.
Müvəqqəti saxlanc prosedurası ilə bağlı olan mühüm məsələlərdən biri gömrük ödənclərinin
ödənməsinə görə məsuliyyətdir. Qanunvericiliyə görə anbar sahibi bu məsuliyyəti daşıyır. Bu səbəbdən gömrük
orqanı anbar sahibinin ödəməqabiliyyətli olduğunu müəyyən etməli, lazım gəldikdə bank zəmanəti tələb etməli
və ya digər əlaqədar tədbirlər görməlidir.
Müvəqqəti saxlanc barədə müqavilə gömrük ödənişləri üçün məsuliyyəti malı anbara yerləşdirən şəxsin
daşımasını nəzərdə tuta bilər. Amma bu halda da anbar sahibi mal sahibi ilə birgə məsuliyyət daşıyır.
Əgər müvəqqəti saxlanc anbarının sahibi gömrük orqanıdırsa, gömrük ödənişlərinin ödənilməsinə görə
mal və nəqliyyat vasitələrini bu anbara verən şəxs, bu cür şəxs olmadıqda isə mallar və nəqliyyat vasitələrinin
mülkiyyətçisi məsuliyyət daşıyır.