34
1. Ədəbiyyatların icmalı
Levis və Lays (2002) tədqiq etmişlər ki, uğurlu fiskal və monetar siyasətlərinin koordinasiyası
çərçivəsində faiz dərəcələri vasitəsi ilə inflyasiyanı aşağı salmaq mümkündür. Büdcə kəsirinə yönələn
fiskal siyasət həyata keçirildikdə, lakin monetar siyasət ilə koordinasiya edilmədikdə Mərkəzi Bank
özünün inflyasiya hədəfindən yayına bilər. Lambertini və Rovelli (2003) makroiqtisadi stabilləşmə
siyasəti çərçivəsində monetar və fiskal davranışların Staklberq oyunu vasitəsilə modelləşdirmişlər.
Əldə edilmiş nəticələrə görə fiskal qurum makroiqtisadi siyasət oyununda daim lider mövqeyə
malikdir. Bu səbəbdən monetar qurum da fiskal qurumun mövqeyi ilə razılaşmalı və onu izləyərək
stabilizasiya hədəfinə nail olmalıdır. Dikst və Lambirtini isə (2001) qeyd edirlər, fiskal və monetar
siyasət bir-birindən iki əsas səbəbə görə fərqlənir:
1. Mövcud makroiqtisadi durum həyata keçirilən bu və ya digər iqtisadi siyasətin təsirlərinin
mənfi və ya müsbət olacağını müəyyən edir;
2. Fiskal və monetar qurumlar arasında kordinasıyanın səviyyəsi hər iki qurum tərəfindən aparılan
siyasətin iqtisadiyyata təsirini müəyyən edir. Ölkədə iqtisadi, o cümlədən makromühit əlverişli
olmadıqda bu və ya digər siyasətin təsir effekti arzu edilən səviyyəyə çata bilməz. Əlavə olaraq
iqtisadi agentlər verilən siqnalları yanlış və ya fərqli qəbul edərlərsə, nəticədə onların sərmayə və
istehlak davranışları iqtisadiyyatda əhəmiyyətli fluktuasiyalara səbəb ola bilər.
Zorilli (2005) Braziliya və Argentinanın makroiqtisadi stabilləşmə təcrübəsində fiskal
dominantlığı araşdırmışlar. Əldə edilmiş nəticələrə görə fiskal siyasət monetar fundamentallara təsir
göstərir, xüsusilə məzənnədə dəyişkənliyə səbəb olur. Əlavə olaraq onların tədqiqatı göstərir ki,
inflyasiya fiskal fenomen olduğu üçün monetar siyasətə bilavasitə təsir göstərir. Bu səbəbdən monetar
və fiskal qurumlar arasında sıx koordinasiya arzuolunandır.
Bu arqument Fridmanın məşhur “inflyasiya həmişə və hər yerdə monetar fenomendir” şüarını
təkzib edir. Hətta bəzi tədqiqatçılar (Çarls, 1999 və s.) qiymət səviyyəsinin fiskal nəzəri əsasını
formalaşdırmışlar. Onların fikrincə, fiskal nəzəriyyə iki hissədən ibarətdir: ı) zəif fiskal nəzəriyyə və
ıı) güclü fiskal nəzəriyyə. Zəif fiskal nəzəriyyədə inflyasiya həqiqətən monetar fenomen hesab edilir.
Lakin, pul kütləsinin artımı fiskal siyasət səbəbindən baş verir. Bundan fərqli olaraq, güclü fiskal
nəzəriyydə pul kütləsinin hətta dəyişmədiyi halda, fiskal siyasətin müstəqil surətdə qiymət
səviyyəsinə və inflyasiyaya təsir etməsi göstərilir. Hər iki yanaşmaya görə monetar qurum təkcə özü
inflyasiya hədəfinə nail ola bilməz. Çünki o, pul kütləsinə nəzarət etmir (zəif yanaşmada olduğu
kimi) və ya inflyasiya onun tərəfdən formalaşmır (güclü yanaşmada olduğu kimi) (Çarls, 1999).
Lakin, əksər inkişaf edən və tədiyə balnasının profisitinə malik iqtisadiyyatlarda fiskal və
monetar qurumlar arasında daim əməkdaşlıq problemi yaranır. Dövlət büdcəsinin formalaşması
monetar siyasətə əhəmiyyətli təzyiq yarada və ciddi monetizasiya tələb edə bilər. Yüksək
monetizasiya iqtisadi artıma və məşğulluğa şərait yaratmaqla yanaşı yüksək inflyasiyaya da yol aça
bilər. Bu isə öz növbəsində ev təsərrüfatları və sahibkarlar üçün gəlirlərin real ifadədə
dəyərsizləşməsinə və qeyri-müəyyən investisiya mühitinə gətirib çıxara bilər. Nəticədə fiskal
davranışı izləyən monetar davranışın yaratdığı inflyasiyanı monetar qurumun özü tərəfindən aradan
qaldırılması zərurəti yaranır. Bu səbəbdən Lambertini və Rovelli (2003) makroiqtisadi stabilizasiya
prosesində hər iki qurum arasında koordinasiyanı olduqca vacib hesab edirlər.
35
Bu mövqeni 1981-ci ildə Sarjent və Varlas monetarist arifmetika arqumenti ilə sübut etmişlər.
Onların fikrincə, hökumət orta müddətli dövrdə büdcə siyasətini balanslaşmış formada həyata
keçirmədikdə, monetar siyasət aşağı inflyasiya səviyyəsini ən yaxşı halda qısa müddət ərzində qoruya
bilər. Eyni zamanda onların hesablamaları göstərir ki, koordinasiya mövcud olmadıqda,
balanslaşmamış büdcə siyasətinə qarşı yönələn antiinflyasion monetar siyasət uzunmüddətli dövrdə
yüksək inflyasiyanın qarşısını ala bilməz.
Karl Uolş (2011) qiymət səviyyəsinin fiskal nəzəriyyəsini təhlil edərkən dövlət borcunun real
dəyəri ilə gələcək fiskal profisitlərə dair ictimaiyyətin gözləntiləri arasında əlaqəyə baxmışdır.
Tədqiqat iki tarazlıq şərtinə nail olmağa imkan vermişdir. Belə ki, pula olan real tələb real təklifə,
dövlətin real öhdəlikləri isə gələcək birbaşa kəsirin xalis dəyərinə bərabər olmalıdır. Uolş qeyd edir
ki, dövlət borcuna tələbin dəyişməsi öz növbəsində məcmu tələbi də dəyişdirir. Maraqlıdır ki, həmin
tədqiqat çərçivəsində monetar və fiskal siyasət arasında heç də həmişə daimi koordinasiyanın
olmaması sübut edilmişdir. Eyni zamanda tədqiqatın nəticələrinə əsaslanaraq Uolş normal
makroiqtisadi dövrlərdə qurumlar arasında koordinasiyanın məhdud şəkildə həyata keçirilməsini
tövsiyyə edir. Belə ki, monetar siyasətdən fiskal siyasətin yaratdığı makroiqtisadi effektlərin qarşısını
alan bir alət kimi istifadə etməklə məcmu buraxılış kəsiri və inflyasiyanın sabitliyini təmin etmək
olar.
Bir çox ölkələr əhəmiyyətli dərəcədə fiskal təzyiq dövrü yaşamaqdadırlar. Bu təzyiqin fiskal
nəzəriyyəyə əsaslanaraq perspektivdə daha da genişlənməsi və monetar təzyiqə çevrilməsi
ehtimalının artıb-artmaması düşündürücü məqamlardandır. Çünki, dövlətin iki mümkün gəlir
mənbəyi mövcuddur: vergilər (bütün növ rüsumlar) və senyoraj. Məlum olduğu kimi, senyoraj pulun
emissiyasından əldə edilən gəlirdir. Gəlirlərin bu cür formalaşması fiskal quruma daima birinci
siyasət qərarı verməyə və monetar qurumu ardınca aparmağa imkan verir.
Ümumiyyətlə, zəif formalı fiskal nəzəriyyənin əsas nəticələrindən biri aparılan sərt monetar
siyasət və ya məhdud pul təklifinin gələcəkdə inflyasiyanın artmasına səbəb ola bilməsidir. Burada
intuisiya ona əsaslanır ki, bu günki məhdud pul kütləsi bilavasitə qiymətləri azaldır, lakin, gələcəkdə
yüksək inflyasiya nominal faiz dərəcələrini artırır və real pula tələbi azaldır.
Makrofiskal çərçivədə siyasət münasibətləri və davranışları orta və uzunmüddətli ssenarilər
əsasında tədqiq olunmuşdur. Bu tədqiqatın əvvəlki tədqiqatlardan fərqi ondan ibarətdir ki, burada beş
model çərçivəsində monetar və fiskal qurumların informasiya assimmetriya və simmetriyası
şəraitində davranışları tədqiq edilmiş və nəticələr müqayisə olunmuşdur. Monetar qurum sosial-
iqtisadi öhdəliyi çərçivəsində nizamlayıcı funksiyanı həyata keçirərək fiskal qurumun iqtisadiyyata
təsirlərini neytrallaşdıra bilər. Nizamlayıcı funksiya oyun nəzəriyyəsində inflyasiya hədəflənməsi
kimi başa düşülür (Franta, 2011).
2. Fiskal və monetar davranışların oyun nəzəriyyəsi əsasında tədqiqi
2.1. Oyun nəzəriyyəsi əsaslı fiskal və monetar siyasət
Oyun nəzəriyyəsindən istifadə etməklə koordinasiya və qeyri-koordinasiya şəraitində monetar
və fiskal qurumların davranışları orta müddətli dövrdə iki seçimə söykənir:
Dostları ilə paylaş: |