51
Buna görə də bu ədəbiyyat daha çox həyatdan şikayət, etiraz və böhran kimi mövzuları
işləmişdir. İnsanın həyatda qarşılaşdığı mənəvi sarsıntılar qarşısındakı acizliyi, insanın
yalnızlığı, güvənsizliyi Sərvəti Fünun poeziyasının əsas şeir mövzuları arasında idi.
Sərvəti Fünunçular arasında həm forma, həm də məzmun baxımından fərqli
əsərlər yaradan sənətkar sözsüz ki, Tofiq Fikrət olmuşdur. Onun poeziyasında aid
olduğu ədəbi topluluğa xas olan xüsusiyyətlərlə yanaşı, hürriyyət, azadlıq, haqq, ədalət,
mübarizə kimi inqilabi mövzular çoxluq təşkil edir. Şair qadınların haqlarının əzil-
məsinə qarşı etiraz səsini ucaltmış, ailə münasibətlərinə, tərbiyə, təhsil mövzularına
toxunmuşdur. O, uşaq tərbiyəsində vacib olan əsas məsələləri Şərmin adlı uşaq şeirləri
toplusunda işləmişdir. Şair həm də fəlsəfi düşüncələrlə dolu olan şeirlər də müəllifi
olmuşdur. Tofiq Fikrətin dindən öz məqsədləri üçün istifadə edənlərə qarşı yazdığı
şeirləri də var. Tofiq Fikrət əsl humanist olaraq çıxış etmiş, insanları dil, din, irq fərqi
olmadan sevmiş və bu fikirləri təbliğ etmişdir. Türkiyənin gələcəyinin gənclərin əlində
olduğunu başa düşən sənətkar bütün ümidlərini gələcəyi quran nəslə bağlamışdı. Bu
nəsli isə onun əsərlərində oğlu Haluq obrazı əks etdirirdi. Haluqa yazdığı müxtəlif
şeirlərində Tofiq Fikrət onun timsalında bütün gəncliyə səslənirdi. Sərvəti-fünun
poeziyasının ən fərqli sənətkarı sözsüz ki, Tofiq Fikrət olmuşdu.
Türk fikir həyatında millət, xalq, cəmiyyət, ümmət sözlərinin XIX əsrin ortalarına
qədər sosial-psixoloji, sosial-iqtisadi və sosial-siyasi bir məfhum miqyasında işlə-
dilmədiyini görürük.
Millət, ümmət və cəmiyyət ifadələrinin eyni dinə sitayiş edənlər mənasında
işlədilən, sosioloji bir termin olmadığı XIX əsrin ilk yarısına qədər Anadolu türk
ziyalılarında da, geniş xalq kütlələrində də üstüörtülü bir mənsubiyyət şüuru var idi.
XIX əsr Avropasında 1789-dan başlayaraq ortaya çıxan və bir dünyagörüşü
formasını alan məfhumlardan biri də millət və bu sözdən əmələ gələn milli, milliyyət,
milliyyətçilik ideyalarıdır. XIX əsrə qədər ziyalıları üç əsas fikirdən irəli çıxırdılar:
Xanədanın davamı, dövlətin güclülüyü, dinin qorunması və yayılması. Bu üç əsas
meyar hər tipli sosial mövcudluğun lazımlı və əsas şərti hesab edilirdi. XIX əsrdə Qərbi
Avropa, Şərqi Avropa, Balkanlar, Çin, Osmanlı və Rus İmperiyalarında milli oyanış və
milliyyətçilik hərəkatları baş qaldırdı. Liberalizm, demokratiya, sosializm kimi fikirlərlə
müqayisədə bütün ölkələri yaxından maraqlandıran və təsiri altına salan Milliyyətçilik
məfhumu tam dəqiq bir siyasi forma daşımırdı. ( 3. s479)
Milliyyətçilik fikrinin qaynağında üç fərqli düşüncə var idi:
1.
Milli
birlik
2.
Müstəqillik
3.
Dinin birləştirəcəyi yerinə tarixi və digər sosial-mədəni əsalara dayanan
bütövləşmə arzusu.
Bu dövrdə başlıca mətbu orqanların nəşrlərinin təsirilə düşüncə və ədəbiyyat
həyatı, filoloqlar, tarixçilər, filosof və sosioloqlar Milliyyətçilik fikrinin oyanışında
mühüm rol oynadılar. Əvvəlcə filosoflar, sonra isə sosioloqlar millət, milliyyət, soy,
milli dövlət məfhumlarının təbliğinə başladılar. İstər ədəbi əsərlərdə, istərsə də məqalə
və çıxışlarda bu mövzular işlənməyə başlandı.
Milliyyətçilik əsasən dildə saf türkcəyə qayıdış, keçmişin şanlı səhifələrini
araşdırmaq və qürurla bunları üzə çıxarmaq, xalqın təlim və tərbiyəsinə əhəmiyyət
vermək və bu məsələləri müxtəlif ədəbi və elmi araşdırmalarda işıqlandırmağı nəzərdə
tuturdu. Şübhəsiz ki, milliyyətçilik ideyasını yaymaqda, onu xalqa çatdırmaqda əsas rol
maarifçilərə, ədəbiyyatçılara düşürdü.
Milliyyətçilik fikrinin yayılmağa başladığı dövrdə yeni-yeni qəzet və jurnallar işıq
üzü görməyə başladı. Onların arasında “Gənc qələmlər”, “Türk yurdu”, “Yeni
Məcmuə”, “Böyük Məcmuə”, “Böyük Əməl”, “Böyük Duyğu” kimi jurnalları qeyd
52
etməliyik.
Türk Milliyyətçiliyinin sosial-mədəni bütövləşmə, tarix içində özünü axtarış, milli
idealları təbliğ etməkdə, fikri və siyasi həyatda özünə qayıdış hərəkatını xalqa çatdıraraq
Anadolu türklüyüylə birlik fikrinin yayılmasında müxtəlif dərnək və mətbu orqanlar çox
böyük bir iş görürdülər. Əhməd Midhəd Əfəndi, Əmrullah Əfəndi, Nəcib Asim, Əli bəy
Hüseynzadə, Məhməd Əmin Yurdaqul kimi ədiblər bu şanlı işin öhdəsindən gələnlərdən
idilər.
Milli Ədəbiyyat axımı 1908-1922-ci illər arasında davam edən bir ədəbi axım idi.
Bu axım 1908-ci il Türk Dərnəyində çıxan Alangoya şeiri ilə başlayan, “Hüsn və Şeir”
jurnalının yeni forması olan kiçik həcmli “Gənc Qələmlər” jurnalında nəşr olunan
yazılar və Göyalpın Turan şeiriylə əsas məqsədlərini açıqlayan ədəbi axım idi. Bu
axımın içərisində Ömər Seyfəddinin başlatdığı Yeni Lisan , yəni yeni türkçə uğrunda
mübarizə də yer alırdı. Milli ədəbiyyatın nümayəndələrindən biri də şair və ictimai
xadim Məhməd Əmin Yurdaqul olmuşdur.
1869-cu ildə sadə bir balıqçı ailəsində dünyaya gələn şairin ədəbi zövqünü bəlkə
də ilk formalaşdıran məhz onun valideynləri olmuşdur. Türk folklorunu bilən, övladına
uşaq vaxtı müxtəlif xalq ədəbiyyatı nümunələrindən söhbət açan, dastan və nağıl
qəhrəmanlarından bəhs edən şairin atası Saleh Rəis, elə o vaxtdan Məhməd Əmində
milli ruh, öz köklərinə bağlılıq hisslərini oyatmışdı. Elə şair özü də müxtəlif
müsahibələrində hiss və düşüncələrini, xalqçılıq və milliyyətçilik məfkurəsini hər
şeydən əvvəl ata ocağına borclu olduğunu bildirirdi: “Mən xalq çocuğuyam. Xalq
övladı bir ana ilə atanın qucağında böyüdüm. Dədə-babalardan qalma xalq öyüdləriylə,
xalq laylalarıyla uşaqlığımı keçirtdim”. (2.s.5)
1889-cu ildə Hüquq məktəbində təhsil almağa başlayan şair dediyinə görə, yalnız
Münif Paşanın ədəbiyyat, hikmət-i hüquq və Mədxal-i hüquq dərslərini sevirdi.
Müəyyən müddətdən sonra Məhməd Əmin təhsilini davam etdirib, ingilis dilini də
öyrənmək arzusuyla Hüquq məktəbindən çıxır və Amerikaya getməyi planlaşdırır.
Şairin bu arzusunun həyata keçməməsinin səbəbi ona kömək etməli olan vasitəçi xanım
Madam Mutun qəfil ölümü olur. Bu dövrdə 22 yaşında olan şair Hüquq məktəbinə geri
qayıtmır və təhsilini yarımçıq qoyaraq, özünü tamamilə ədəbi fəaliyyətə həsr edir. Daha
çox şairliyilə tanınmış olan Məhməd Əmin əslində ilk əsərini nəsrdə yazır. Bu əsər
1890-cı ildə işıq üzü görən Fəzilət və əsalət əsəriydi.
Məhməd Əmin bu əsərini nəşr etdirməkdən əvvəlcə Rəcaizadə, Hamid və Naciyə
göndərir. Onların əsər haqqında müsbət rəylərini aldıqdan sonra isə əsəri çap etdirir.
1897-ci ildə o dövrdə baş verən Yunan müharibəsinə həsr etdiyi Cəngə gedərkən
şeirinin Əsr qəzetində çap olunmasından sonra Məhməd Əmin məşhurluq qazanmağa
başlayır. 1900-cü ildə çapdan çıxan Türkçə şeirlər kitabı isə şairə yeni ad – Milli şair
adını qazandırır. Bu ad məhz kitabda yer alan şeirlərin həm forma, həm də
məzmunundakı mlliliyə görə şairə verilir. Şair o dövrdə həm oxucuların, həm də ziyalı
kütlənin rəğbətini qazanmış olur. 1907-ci ildə Məhməd Əmin gizli fəaliyyət göstərən
İttihad və Tərəqqi təşkilatına üzv olaraq Sultan Əbdülhəmidin müxalifləri sırasına daxil
olur. Bu dövrdə şair müxtəlif sosial fəaliyyətlərilə seçilir. 1911-ci ildə Türk yurdu adlı
jurnalın nəşr olunmasında mühüm rol oynayır. Bu jurnal türk milliyyətçilik tarixində
xüsusi yer tutan bir mətbu orqan olmuşdur. Türk yurdu jurnalının
nəşri fikrini irəli sürən
də elə məhz Məhməd Əmin özü olur. (2. s24) Bu haqda Yusuf Akçura aşağıdakıları
deyir:
“Türk yurdu fikrini şair Məhməd Əmin Bəy ortaya atdı. İttihad və Tərəqqi
cəmiyyəti bu təşəbbüsə maraq göstərdi”.
Şeir və çıxışlarıyla yurdunda geniş səs-səda yaradan Məhməd Əmin güclü bir
təbliğatçı idi. O, İttihad və Tərəqqi Mərkəzi yaratmaq istəyirdi. Buna görə o, Selanikə