61
-Arfenik bacı, evin avadan, doyunca yedim. Düzü bərk acmışdım.
Kərbəlayı Cəfərin görüm evini allah dağıtsın! Yaylaqda Nəbiyə şər atdı...
-Alo kibrə, hamısından xəbərdaram. Hə, məzhəb haqqı, mən də sınamışam,
həmişə kasıbın saçı qızanda gündəsi qurtarar. Bizim də dolanacağımız elə
Kinikor ilə getdi. Indi tövləmizə baxasan, dördayaqlıdan bir pişiyimiz də
yoxdur. Karapet də gedib özgənin dövlətini saxlayırdı... Nəbiyə görə balası
ölmüş Kabla Capar onu hampaya şeytanladı. Indi cüt, şana, yaba satıb başını
girləyir.
Arfenik kövrəlmişdi. Alo onun sözünü kəsmirdi.
-Məzhəb haqqı, daha yaşamaq olmur. Vergi bizi lap əldən salıb: biri deyir
sənin qızıl pulun qalıb, o biri deyir, tüstü pulunu hələ verməmisən, bir başqası
da o yandan çıxır ki, balam, bəs sapalaq pulun nə vaxt verəcəksən? Daha nə
bilim... məzhəb haqqı, keçən cümə pristav Əlağa mənə ə qədər vergi adı saydı
ki... atlı pulu, bağ pulu, çöpbaşı pulu... huşum qalıb ki, çoxu yadımdan çıxdı.
Yaman əzazil pristavdır. Şallağından qan damır. Hanı elə bir igid ki, onun
başına batıra!
-Arfenik bacı, bizim Zəngəzurda da zülm ərşə dayanıb. Dillə deyiləsi deyil.
Başlı başını saxlasındı. Bıçaq lap sümüyə dirənib. Padşah təzə torpaq zaqunu
çıxarandan bəri didişmə daha da artıb. Camaat başlaıyb qaçaqlığa. Bax,
Həmzəli kor Camal qaçdı, kürd Lətif qaçdı, İsgəndər qaçdı. Mənim oğlanlarım
da ki, özün bilirsən, nə üstə didərgin düşüblər...
Çırağın alovu göz qırpa-qırpa əyilir, düzəlir, titrəyir, içəridəki kölgələri
oynadırdı. Arfenik maşa ilə hey ocağı qarışdırırdı.
-Məzhəb haqqı, Alo kibrə, demək yaxşı deyil, bo qor kimi olmuşam.
Naxçıvan mahal naçalniki Slavçinski neçə dəfə xəlvəti evimizə soxulub... Yaxşı
ki, uşaqları tapa bilmədi. Karapet Nəbigilin bizim tövlədəki mağarada
gizlətmişdi. Oranı sən görmüsən, etibarlı yerdi... Karapetin qardaşı yoxdur,
təkdir, sığınıb sizin uşaqlara. Neynək, Nəbi də, Mehdi də, Məhərrəm də
olsunlar onun qardaşları.
Qoy olsunlar dörd qardaş.
-Nə deyirəm, allah qayım-qədim eləsin. Bircə qaçaq olub eldən-obadan
uzaq düşməsinlər. Gəlib əkində-biçində bizə kömək eləsinlər, ev-eşik sahibi
olsunlar. Qaçaqlığın axırı yoxdur. Iranlı qaçaq Nəbini eşitmişən də?.. Camaat
onun ölümünü istəyir. Zalım oğlu koru da söyür, şili də.
-Allah bəlasını versin!
Uzun, kədərli payız gecəsi yavaş-yavaş əriyib saxsı çırağın nefti kimi
tükənirdi.
-Eh, Arfenik bacı, danışmaqla dərd qurtaran deyil. – Alo ayağa qalxıb
çomağını götürdü. – Səhər açılır, tələsirəm, gedək bir uşaqların yanına.
...Kahanın böyründə keşikdə dayanmış Karapet anasının səsini dərhal tanıdı.
Qaçaqlar sevindilər. Alo əvvəlcə Karapetin, sonra Nəbinin boynunu qucaqladı.
Kişinin sinəsi sıxılmış qarpız təki xışıldayırdı. O, Mehdini də, Məhərrəmi də
öpdü.
Alo kənddəki təzə xəbərlərin hamısını uşaqlarına danışdı:
62
-Oğul, siz Həsən Ağanın adamlarını döyəndən sonra nə gecəmiz var, nə
gündüzümüz. Kərbəlayı Cəfər bizim başımıza müsibət gətirib... İstədi
kürəyinin yaralarını oğlanlarına göstərsin, nədənsə bu fikrindən daşındı.
Kərbəlayı Cəfər Nəbigilin acığına Aloya qırx şallaq vurdurub, özünü də ac-
susuz neçə gün tövlədə saxlatmışdı. İsmayılı da qara tuluq olunca döydürüb
Alonun böyrünə yıxmışdı. – Təzə naçalnik Səlim bəy də dostum Vasilini incidir.
Deyərsən, Kərbəlayı, naçalnikin qulağını yaman doldurub. Yazıdakı
torpaqları təzədən ölçdürmək istəyirdi...
Nəbi yumruğunu düyünlədi:
-Yaxşı, qoca kaftar, bir budaqda oturub min budaq silkələ görək. Allah ya
sənə verər, ya da bizə!..
-Oğul, tələsmə, qaraquş sümüyü ölçüb sonra udar,- deyə Alo oğlunu
“yavaşıtmaq” istədi. – Qabaqda
hələ çox işlər olacaq, darıxma...
Alo, oğlu Nəbiyə çox yalvardı. Lakin Nəbi yasavullarla barışmaq istəmədi.
Kişi məcbur olub oğlunun ürəyini yumşaltmaq məqsədilə ona belə bir əhvalat
danışdı:
-Oğlum, rəhmətlik babam nəql edərdiki ki, qədim zamanlarda dünyanın
hansı bir vilayətindəsə qəribə bir tayfa yaşayırmış. Bu tayfada xoşagəlməz bir
adət varmış: elə ki kişi qocalıb əldən düşər, oğlu onu səbətə qoyub aparar,
bizim Qaronu qayasından da hündür bir qayadan atarmış.
Vaxt gəlib çatır, bir kişi də mənim təki qocalıb əsaya möhtac olur. Bir gün
oğlu onu səbətə qoyub atır dalına. Qayanın başına çatanda oğlan, atası ilə
halallaşıb onu səbətlə birlikdə qayadan tullamaq istəyir. Atası deyir ki, oğlum,
məni qayadan atırsan at, amma səbətlə bərabər atma, səbəti qaytar evə, vaxt
çatar oğluna lazım olar.
Nəbini fikir aparmışdı. Qaşının üstündəki çapıq şimşək tək çaxırdı. Alo son
sözünü deyəndə doluxsunmuşdu. O oğlunun boynunu qucaqlayıb üzündən
öpdü.
-İndi, ay oğul, başına dönüm, mən də o qoca təki bu gün-sabah köçəsiyəm,
bir ayağım o dünyadadır. And olsun allaha, sən üzə çıxmasan, Kərbəlayı Cəfər
məni səbətə qoyub qaronun qayasından diri-diri atacaq. Alo oğlanlarından
küsüb getmək istərkən, Nəbi onun qolundan tapışdı:
-Dayan, ata!...
Arfenik məfrəşdən hələ qatı açılmamış ceyranlı bir çul çıxarıb Qəmər dayın
belinə atmışdı. Qotazlı rəşməni isə boynuna dolamışdı. Qəmər day hələ
indiyəcən bu qədər cəzbedici görünməmişdi. Nəbi sevincindən razılıq etməyə
söz tapmadı. O utana-utana arfenikin əllərindən öpdü...
Onlar ayrılanda Arfenik Aloya astadan deyirdi:
-A kibrə, sən məzhəb, kəndə çatan kimi bu saqqalı ağarmışı evləndir,
türkün sözü, başını bağla, mən də görüm bu Karapetə bir ağıllı qız taparammı...
-Arfenik bacı, elə mənim də məqsədim odur.