167
14 May – Şair Əli Qurban Dastançının 90 illiyi, (1928-2004)
Əli Qurban Dastançı (Əli Abdulla oğlu Qurbanov) 1928-ci
il may ayının 14-də Qərbi Azərbaycanın Basarkeçər rayonunun
Ağkilsə kəndində dünyaya gəlmişdir. Ədəbiyyata 13 yaşında
yazdığı "Hanı dağlar" (1943) şeiri ilə gəlib. 1948-ci ildə orta
məktəbi bitirən gənc şair bir il həmin məktəbdə kitabxanaçı
işləmişdir. Sonra Həsən bəy Zərdabi adına Kirovabad Dövlət
Pedaqoji İnstitutunun Azərbaycan dili və ədəbiyyatı
fakültəsinə daxil olmuş və 1953-cü ildə ali təhsilini
tamamlamışdır. Kəlbəcər rayonu Maarif şöbəsində inspektor
kimi əmək fəaliyyətinə başlayan Əli müəllim (artıq onu belə çağırırdılar) 1989-cu
ilə qədər burada qalıb işləməli olur, Oktyabr kəndində məktəb direktoru, rayon
maarif şöbəsində inspektor, metodist, 1979-cu ildən 1986-cı ilə qədər rayon
"Yenilik" qəzetinin redaktoru vəzifəsində çalışır. Onun özünə "Dastançı" təxəllüsü
götürməsi də təsadüfi deyildi. Artıq "Koroğlu" dastanının bir hissəsi hesab edilən
"Mərcan xanımın Çənlibelə gəlməyi" qolunu da o toplayıb işləmiş, araya-ərsəyə
gətirmişdir. Bundan əlavə "Yetim Hüseyn dastanı", "Səməd ağa dastanı", "Məşdisə
dastanı", "Dəli Alı dastanı", "Dəmirçi Abbas", "Allahverdi", "İsmayıl və Pəri",
"Molla Umud" kimi dastanlar yaratmışdır. Ə.Dastançı bir sıra lirik poemalar da
yazmışdır. Bunların içində ən çox diqqəti cəlb edən 1955-ci ildə dahi şair Səməd
Vurğunun məşhur Kəlbəcər səfəri ilə bağlıdır. "Tanış səs" adlanan bu poemada
böyük sənətkara ümumxalq məhəbbəti tərənnüm edilir. 1966, 1988, 2003-cü illərdə
çap olunmuş "Deyişmələr, dərdləşmələr" ədəbiyyatımızın çağdaş və gələcək
tədqiqatçıları üçün qiymətli mənbədir. Bu kitablarda Əli Qurban özü ilə bərabər,
dövrün az və çox tanınmış el şairləri haqqında məlumatlar vermiş, orijinal tərzdə
onların çoxlu şeirlərini çap etdirmişdir. 2003-cü ilə qədər "Balasıyam bu dağların"
(1989), "Beş dastan" (1996), "Koroğlular uzaqlardan gələn yolda" (1998),
"Çıraqqala dastanı" (1999), "Müdriklik mücəssəməsi" (2003), "Kürən köhlən"
(2003), "Qaxın möcüzələri" (2003) və s. kimi 22 kitab nəşr etdirmişdir. Əli Qurban
Dastançı 1976-cı ildə Bakıda keçirilən "Bədii söz ustası" festival-müsabiqəsinin
laureatı olmuş, birinci yeri tutmuşdur. Dərin hafizəyə malik olan bu şəxs gözəl şair
olmaqla bərabər, gözəl insani keyfiyyətlərə malik olmuşdur.
Böyük şairin Göyçə,
Kəlbəcər, Qarabağ həsrətinə dözməyən ürəyi 2004-cü ilin mart ayının 19-da əbədi
dayandı. Gəncə şəhərində dəfn edilmişdir.
Kitabları: “Yetim Hüseyn dastanı”, “Səməd ağa dastanı”, “Söz dəyirmandakıdı”,
“Çıraqqala dastanı” və s.
Ədəbiyyat: Əhmədov T. Azərbaycan yazıçıları (XX-XXI yüzillikdə) : Ensiklopedik məlumat
kitabı. – Bakı : Nurlar Nəşriyyat-Poliqrafiya Mərkəzi, 2011.
168
15 May – Şair, ədəbiyyatşünas Bəkir Çobanzadənin 125 illiyi, (1893-1937)
Bəkir Çobanzadə 1893-cü il mayın 15-də Krımda, Tavrida
vilayəti Simferopol qəzasının Qarasubazar şəhərində anadan
olmuşdur. Burada ibtidai təhsil almışdır. 14 yaşında ikən
qeyri-adi zəkası ilə diqqəti cəlb etmişdir. Dini Xeyirxahlar
Cəmiyyəti onu Türkiyəyə Qalatasaray liseyi – "Sultaniyyə"yə
təhsilini davam etdirməyə göndərmişdir (1908-1918). İlk
şeirlərini, "Anan harda?" poemasını tələbəlik dövründə
qələmə almışdır. İstanbul Universiteti nəzdində olan üçillik ali
kursda ərəb və fars dillərini mükəmməl öyrənmişdir.
Türkiyədə "Müstəqil tatar Krımı" ideyaları ilə yaşayan gənclərdən ibarət "Krım-tatar
tələbə cəmiyyəti"nin yaradıcılarından və rəhbərlərindən olmuşdur. Sonra Budapeşt
universitetinin tarix-filologiya fakültəsində türk, ərəb və macar filologiyası ilə
yaxından tanış olmuş, doktorluq dissertasiyası müdafiə etmişdir. Budapeştdə türk
dilində çıxan "Şərq" qəzetinin redaktoru olmuşdur (1919). "Krım", "Göy kitab"
(İstanbul) məcmuələrində və "Şərq" qəzetində şeirləri dərc edilmişdir (1918-1919).
Sonralar "Türk ensiklopediyası"nda "Çoban oğlu", "Bəkir Baybək", "Bəkir Cavbək",
"Bəkir Yaybək", "Çoban oğlu Bəkir Sidqi" imzaları ilə məqalələri dərc olunmuşdur.
Krım Universitetinin rektoru olmuşdur. S.Ağamalıoğlunun dəvəti ilə Azərbaycanda
yeni əlifba komitəsinin sədri, Yeni türk əlifbası Ümumittifaq Mərkəzi Komitəsinin
rəhbəri təyin edilmişdir. Azərbaycan Dövlət Elmi-Tədqiqat İnstitutunun aspirantura
şöbəsinin müdiri işləmişdir (1929). Bir sıra Avropa yazıçıları onun tədqiqat və elmi
maraq dairəsinə vüsət vermişdir. Nəzəri-filoloji irsi zəngin və çoxcəhətli idi. Sovet
Şərqində yaşayan türk xalqlarının bədii ədəbiyyatının, müasir ədəbi prosesin nəzəri
problemlərinin tədqiqinə və dil tarixinin yaranmasında təqdirəlayiq xidmətləri
olmuşdur. O, bir sıra monoqrafik əsərlərlə yanaşı, "Türk dilinin metodikası" (1932),
"Elmi qramerin əsasları" (1932) kitablarını şərikli tərtib etmişdir. Elmi məqalələri və
bədii əsərləri dövri mətbuatda müntəzəm çap olunmuşdur. İlk şeirlər məcmuəsi özbək
dilində kütləvi tirajla buraxılmışdır (1971). 1938-ci il, 13 oktyabrda qətlə
yetirilmişdir.
Kitabları: “Qumik dili və ədəbiyyatı tədqiqləri” (1926), “Türk dili və ədəbiyyatının
tədrisi üsulu” (1926), “Türk ədəbiyyatı” (1929), “Seçilmiş əsərləri” 4 cilddə (2007)
və s.
Ədəbiyyat: Əhmədov T. Azərbaycan yazıçıları (XX-XXI yüzillikdə) : Ensiklopedik məlumat
kitabı. – Bakı : Nurlar Nəşriyyat-Poliqrafiya Mərkəzi, 2011.