172
24 May – Yazıçı Rəşid bəy Əfəndiyevin 155 illiyi (1863-1942)
Rəşid bəy İsmayıl oğlu Əfəndiyev 1863-cü il may ayının
24-də Şəki şəhərində anadan olmuşdur. Hələ XIX əsrin 80-cı
illərində Qori müəllimlər seminariyasında oxuyarkən dram
ilə maraqlanmış, ilk “Qan ocağı” pyesini yazıb məktəb
səhnəsində tamaşaya qoymuşdur. O, M. F. Axundzadədən
sonra ilk dram yazanlardan sayılır. İlk əsərinin
müvəffəqiyyətindən ruhlanan müəllif sonralar da ardıcıl
olaraq bədii yaradıcılıqla məşğul olmuşdur. On il Qutqaşendə
müəllimlik etdiyi, 8 il Tiflis idareyi-ruhaniyyəsində katib
müavini vəzifəsində çalışdığı və nəhayət, 16 il Qori
seminariyasında müəllim olduğu zamanlarda, heç vaxt yazıçılıqdan uzaqlaşmamış,
xüsusilə təlim-tərbiyəyə aid səhnə əsərləri yazmağa səy etmişdir. Rəşid bəy
Azərbaycanın məşhur və çalışqan müəllimlərindən olmuş, ömrünü məktəb, tərbiyə
işinə, dərs kitablarının, uşaqların marağını oxşayan pyeslərin yaranmasına sərf
etmişdir. Onun “Uşaq bağçası” adlı əlifba kitabı və “Bəsirətül-ətfal” adlı qiraət kitabı
Azərbaycanda şöhrət qazanmış ilk dərs kitablarındandır. O, varlı ailədən olan
qadının maddi köməyindən istifadə etməklə dəfələrlə İstanbula getmiş, dərs
kitablarını min zəhmət ilə çap etdirmişdir. Bununla yanaşı səhnə əsərləri yazmış,
birinci növbədə məktəb səhnələrində qoyulmasını təşkil etmiş, hətta şəxsən artist
kimi iştirak etmişdir. Rəşid bəyin “Qan ocağı”ndan başqa, “Saqqalın kəraməti”,
“Qonşu-qonşu olsa, kor qız ərə gedər”, “Pul dəlisi”, “Bir saç telin qiyməti”, “Tiflis
səfirləri”, “Diş ağrısı”, “Təbiətdə əhvaliməişət” adlı dramları vardır. Rəşid bəy elmi,
maarifi, məktəbi təbliğ edən bir sıra mənzumələr yazmış, rus klassiklərindən
(Puşkin, Lermontov, Kırılov) dərs kitablarına münasib parçalar seçib tərcümə
etmişdir. Eləcə də farscadan Firdovsidən “Rüstəm və Söhrab” əhvalatını, Şillerdən
“Cam” adlı mənzuməni tərcümə etmişdir. Rəşid bəy istər şeir tərcümələrində və
istərsə müasir mövzularda yazdığı şeirlərində klassik şeir üslubu və yolu ilə
getmişdir. Görkəmli maarif xadimi, nasir Rəşid bəy Əfəndiyev 1942-ci il avqust
ayının 31-də vəfat etmişdir.
Kitabları: “Pul dəlisi”, “Qonşu qonşu olsa kor qızı ərə gedər”, “Uşaq bağçası”,
“Qan ocağı”, “Tiflis səfərləri”, “Saqqalın kəraməti”, “Qonşu qonşu olsa kor qız ərə
gedər”, “Bir saç telinin qiyməti” və s.
Ədəbiyyat: Əhmədov T. Azərbaycan yazıçıları (XX-XXI yüzillikdə) : Ensiklopedik məlumat
kitabı. – Bakı : Nurlar Nəşriyyat-Poliqrafiya Mərkəzi, 2011.
173
24 May – Ədəbiyyatşünas, tənqidçi Mustafa Quliyevin 125 illiyi, (1893-1938)
Mustafa Zəkəriyyə oğlu 1893-cü il mayın 24-də Azərbaycanın Şəki şəhərində
anadan olmuşdur. Tiflisdə gimnaziyanı bitirmişdir (1913). Kiyev Universitetinin
fizika-riyaziyyat fakültəsində təhsil almışdır. Lənkəran qəza inqilab komitəsinin
sədri (1920), Qaraşəhər Rayon Komitəsinin katibi (1921-1922), Azərbaycan SSR
Xalq Maarifi Komissarı (1922-1928), "Maarif və mədəniyyət", "İnqilab və
mədəniyyət" jurnallarının (1923-1926; 1929-1932) məsul redaktoru vəzifəsində
işləmişdir. 1938-ci ildə cəza tədbirləri dövründə həbs edilib ölümə məhkum
olunmuşdur.
Kitabları: "Azərbaycanda Oktyabr düşmənləri" (1927), "Mədəni inqilab və islam"
(1928), "Türk qadınının yolu" (1930), "Oktyabr və türk ədəbiyyatı" (1930), "Cinayət
nədir və hardan baş verir" (1935).
Ədəbiyyat: Əhmədov T. Azərbaycan yazıçıları (XX-XXI yüzillikdə) : Ensiklopedik məlumat
kitabı. – Bakı : Nurlar Nəşriyyat-Poliqrafiya Mərkəzi, 2011.
174
24 May – Ədəbiyyatşünas, publisist Əli Mirzəyevin 85 illiyi, (1933)
Mirzəyev Əli Sarı oğlu 1933-cü il mayın 24-də Azərbaycanda Kəlbəcər
rayonunun Başlıbel kəndində anadan olmuşdur. Burada kənd yeddiillik məktəbi
bitirdikdən sonra Laçın pedoqoji məktəbində təhsilini davam etdirmişdir (1939-
1948). Azərbaycan Dövlət Pedaqoji İnstitutunun Azərbaycan dili və ədəbiyyatı
fakültəsində təhsil almışdır (1959-1990). Təyinatla Kəlbəcər rayonunun Qılınclı
kənd orta məktəbinə müəllim göndərilmişdir. Azərbaycan Dövlət Pedaqoji
İnstitutunun aspiranturasına daxil olmuş, namizədlik dissertasiyası müdafiə
etmişdir. Ədəbi fəaliyyətlə 60-cı illərdən ciddi məşğul olmşdur. Dövri mətbuatda
elmi-pedaqoji məqalələri, rəyləri ilə yanaşı publisist yazıları, təmsilləri çıxmışdır.
“Klassik poeziya və müasirlik” (1991), “Folklor və Azərbaycan uşaq poeziyası”
(1991), “Azərbaycan uşaq ədəbiyyatı” (1990) monoqrafiyaları, dərs vəsaitləri, eyni
zamanda “Kəlbəcər faciələri” (1993), “Qanlı yanvardan əsən küləklər” (1997),
“Vətən harayları” (1997), “Alı babanın nağılları” (1998), “Çal qılıncın, babam
Qazan” (1990) şeir və poemalar topluları kütləvi tirajla nəşr olunmuşdur.
Kitabları: “Klassik poeziya və müasirlik” (1991), “Azərbaycan uşaq ədəbiyyatı”
(1990), “Çal qılıncın, babam Qazan”(1990), “Folklor və Azərbaycan uşaq
poeziyası” (1991), “Vətən harayları” (1997), “Alı babanın nağılları” (1998), və s.
Ədəbiyyat: Əhmədov T. Azərbaycan yazıçıları (XX-XXI yüzillikdə) : Ensiklopedik məlumat
kitabı. – Bakı : Nurlar Nəşriyyat-Poliqrafiya Mərkəzi, 2011.