təfəkkür tipinin
üstünlüyünü nümayiş etdirmək, xüsusən də cəmiyyətin təşkili və idarə
olunmasında, hüquqi dövlət və vətəndaş cəmiyyəti quruçuluğunda bu təfəkkür tipinin yerini
və rolunu açıqlamaq.
Son 5 ildə sosial idaraetmənin fəlsəfi problemlərinin öyrənilməsinə xüsusi fikir verilmişdir.
İlk növbədə yeni idarəetmə metodologiyasının işlənilməsinə diqqət yönəlmişdir ki, nəticədə
əhəmiyyətli elmi məhsul əldə edilmişdir. Şöbənin nəşr etdiyi məqalələr toplularında (artıq 3
buraxılışı çap edilib) və "Yeniləşən cəmiyyət. Müasir elmi paradiqma və idarəetmə"
(Ə.F.Abbasov) kitabında bu nəticələr ictimaiyyətə təqdim olunub. Bir çox elmi məqalələrdə
də problem müxtəlif aspektlərdən işıqlandırılıb.
Aparılmış tədqiqatların nəticəsi olaraq, cəmiyyətin idarə olunmasında yeni metodologiyanın
mahiyyəti, yeri və rolu haqqında oxuculara yığcam məlumat verməyi vacib hesab edirik.
Yaşadığımız mürəkkəb, ziddiyyətli keçid dövrünün, cəmiyyətimizin ümumi inkişaf
mənzərəsinin acı təəssüf doğuran başlıca qəribəliklərindən biri də ondan ibarətdir ki, yeni
cəmiyyət quruculuğundan və yeni iqtisadi münasibətlərə keçiddən çox danışılıb yazılsa da,
yeni cəmiyyətin və yeni iqtisadiyyatın təminatçısı olan müasir idarəetmə metodologiyasının
qərarlaşması üçün nəzəri və əməli iş qaneedici surətdə və ümumdövləti səviyyədə
aparılmır.
Bəs yeni idarəetmə metodologiyasının mahiyyəti nədən ibarətdir və onun zəruriliyi nə ilə
diqtə olunur?
Əvvəla, onu qeyd edək ki, əsl idarəçilik həmişə öz dövrü üçün müasir olur. Onun
səmərəliliyi məhz zamana, tarixi dövrə uyğun olub-olmaması ilə bağlıdır. Müəyyən tarixi
dövrlərdə az-çox gözə çarpan, inkişaf əldə etmiş ölkələrdə məhz belə olub. Tarixi tələblərə
cavab verən idarəetmə metodologiyası, digər amillərlə yanaşı, bu cəmiyyətlərin sosial-
iqtisadi dayanaqlığını, iqtisadi inkişafını təmin edib. Sosial-siyasi prosesləri, iqtisadiyyatı,
dövlətin özünü dövrünü yaşamış köhnə üsullarla, təfəkkür üslubu ilə tənzimləmək və idarə
etmək heç vaxt fayda verməyib. Köhnə idarəçilik düşüncəsi ilə cəmiyyəti
ağır vəziyyətdən çıxartmaq, onun mövcudluğunu və gələcək inkişafını təmin etmək
qətiyyən mümkün deyil. Cəmiyyəti yüksək, kamil struktur-funksional səviyyəyə çıxartmaq
üçün müasir idarəçilik dunyagörüşünə, özünu doğruldan idarəetmə metodologiyasına
əsaslanmaq gərəkdir.
Qərbdə və Şərqdə, bütün inkişaf etmiş ölkələrdə vüsət tapmış müasir idarəetmə
dünyagörüşünün əsasında özünütəşkilatlandırma və sinergizm fəlsəfəsi dayanır. Onun
mahiyyətini qeyri-xəttilik, ünsürlərin əvvəlcədən bir "nöqtədə" təsbit olunmaması, sistemin
və altsistemlərin müəyyənləşmiş meyarlar daxilində açıqlığı, təfəkkürdə və praktikada
müxtəlifliyin (alternativliyin) mümkünlüyü, qeyri-dizyunktivlik, özünütəşkilatlandırma və
özünütənzimləmə təşkil edir. Burada başlıca ideya isə özünutəşkilatlandırma və sinergizm
ideyalarıdır ki, onlar da pozitiv liberal demokratizmin və eyni zamanda müasir funksional
elmi paradiqmanın məğzini ifadə edirlər. Bəzən yeni idarəetmə fəlsəfəsinə "sinergizm
fəlsəfəsi" də deyirlər. Qeyd etmək vacibdir ki, mürəkkəb sistemlərin təşkilindən,
inkişafından və idarə olunmasından bəhs edən sinergetikanın kökləri Şərq fəlsəfəsinə
gedib çıxır, xüsusən də, Uzaq Şərq fəlsəfəsinə.
Özünütəşkil və sinergizm fəlsəfəsində Təbiət-İnsan - Cəmiyyət üçlüyü ən optimal qarşılıqlı
əlaqəsini tapır; hissə ilə tam, fərdlə çəmiyyət münasibətlərində, qapalıqla açıqlıq, azadlıqla
zəruri məhdudiyyətlər arasında dinamik, çevik dayanıqlığa malik harmoniya və təbii nizam
durur. Bu fəlsəfi metodologiyaya söykənən idarəetmə bürokratizmlə demokratizmin yaxşı
mənada sintezi, qarşılıqlı fayda verən sinergizmi deməkdir. Fəaliyyəti, idarəetmə
mexanizmləri, strukturları, üsul və formaları özünütəşkilatlanırma fəlsəfəsinə əsaslanan
sosial-mənəvi, iqtisadi-siyasi sistemlər ətraf mühitlə əlverişli informasiya və enerji
mübadiləsinə, az "əmək" sərf etməklə yüksək güc toplamaq xüsusiyyətlərinə malikdirlər.
Belə sistemlərdə ünsürlərin və parametrlərin fəaliyyəti sərt determinasiya, amirlik-inzibati
formalar çərçivəsində yox, sosial özünütəşkilatlandırma və özünütənzimləmə proseslərinin
sərbəst həyata keçməsində, şəxsi təşəbbüslərin, maraqların və zövqlərin, bütün
rəngarənkliyinə baxmayaraq, fərdi fəallıqların ahəngdarlığında, üfüqi əlaqələrin
optimallaşmasında həyata keçir. Nizam və dayanıqlıq üçün bütün cəmiyyət üzərində total
nəzarətə artıq ehtiyac olmur. Bütövlükdə cəmiyyətin bir sistem kimi, onun ayrı-ayrı
altsistemlərinin idarə olunması əlavə enerjinin, resursların, maliyyənin, insani ehtiyatların
xərclənməsini, sərf olunmasını tələb etmir, israfçılığa yer qalmır, yəni sistemin fəaliyyəti
"qlobal optimum" deyilən məfhuma uyğun reallaşır. Parametrlərin, təşkiledici elementlərin
sinergetik fəaliyyəti daxili ehtiyatların optimal tərzdə səfərbər olunmasına, sistemin ətraf
muhitlə, onu əhatə edən digər sistemlərlə qarşılıqlı fayda verən mübadilə əlaqələrinə
girməsinə imkan yaradır. Və sistemin belə səmərəli açıqlığı nəticəsində əlavə inkişaf və
qida mənbələri formalaşır, staqnasiya və durğunluq təhlükəsi aradan qalxır, sistemin özünü
ifadə etmək qabiliyyəti yüksəlir.
Başlıca cəhətlərdən biri odur ki, cəmiyyətin bir sistem kimi idarəolunma ağırlığı yalnız
subordinasiya (şaquli) əlaqələrinin üzərinə düşmür, ağırlığın müəyyən miqdarı koordinasiya
(üfüqi) əlaqələrinin üzərinə düşür. Bu "miqdar" nə qədər çox olarsa, bir o qədər ictimai
sistemin "vətəndaş cəmiyyəti" kimi fəaliyyət göstərib özünü ifadə etmək imkanı artar.
Vətəndaş cəmiyyətinin də məğzi, məhz, üfüqi əlaqələrin cəmiyyətin idarə olunmasında
üstünlük (prioritet) təşkil etməsindədir. Daha dəqiq desək, cəmiyyətin fəaliyyət göstərib
inkişaf etməsi şaquli və üfüqi əlaqələrin optimal nisbətindədir, yəni müəyyən konkret
şərtlərə cavab verən ölçünün saxlanmasındadır. Bu ölçü total surətdə şaquli əlaqələrin
xeyrinə pozulursa cəmiyyət totalitarizmə yuvarlanır, üfüqi əlaqələrin xeyrinə pozulursa
cəmiyyət özbaşınalığa, anarxiyaya yuvarlanır. Ona görə də arzu olunan demokratik
cəmiyyət forması yalnız və yalnız müvafiq ölçü nisbətlərinin ödənilməsi daxilində
mümkündür ki, bu da zəruri qadağa (məhdudiyyət) prinsiplərinin gözlənilməsini tələb edir.
Bu prinsipləri cəmiyyətin "saxlanma qanunları" da adlandırmaq olar. Saxlanma qayda-
qanunları müəyyən dərəcədə əxlaqi-irsi, milli-tarixi ənənələrə, vərdişlərə arxalansa da,
əsasən hüquqi normalar və qanunverici aktlar sisteminin özünü müəyyənləşdirən "hüquqi
dövlət" konsepsiyasına əsaslanmalıdır.
Özünütəşkil və sinergizm fəlsəfəsinə arxalanan idarəetmə metodologiyasının digər başlıca
tərəflərindən biri odur ki, enerji və güc mənbəyi kimi maddi olan yox, ideal olan (ruh, şüur,
təfəkkür) götürülür və bu mənbə cəmiyyətin əsas məhsuldar qüvvəsi hesab edilir. Beləliklə,
maddi nemətlərin azlığından və yaxud tükənməsindən irəli gələn məhdudiyyətlər dəf edilir,
insan təfəkkürü qarşısında onlar sanki öz hökmranlığından əl çəkib təslim olurlar. Məhz bu
baxımdan müasir dövrün görkəmli alimləri indiki və gələcək iqtisadiyyatı "təfəkkür
iqtisadiyyatı" adlandırırlar.
Müasir idarəetmənin əsasında dayanan yeni metodologiyanı, yeni təfəkkür üslubunu
mənimsəmədən ictimai həyatımızda hər an müşahidə olunan illyuziyaçılıqdan, formal-
məntiqi təsəvvürlərdən xilas olmaq, zəruri islahatlar həyata keçirib azad iqtisadi sistem
yaratmaq, totalitar vərdiş və ənənələrdən yaxa qurtarıb demokratik dövlət qurmaq mümkün
deyil. Elə ona görə də bu məsələdə müxtəlif alim və mütəxəssislərin kompleks səylərinin
artırılmasına böyük ehtiyac var.
Son illər şöbənin elmi fəaliyyətində yeni bir istiqamət- qender problematikası da xususi yer
tutmuşdur. Bildiyimiz kimi, bu sahə müasir dünya elmində çox aktual sahələrdəndir.
Qender- cəmiyyətdə cinslərin qarşılıqlı münasibətlərinin və ifadə formalarının sosial, siyasi,
etik, psixoloji, mədəni və s. sahələrdə xüsusiyyətlərini öyrənən bir nəzəriyyədir. Qender
problematikası Qərb elmində artıq 30 ilə yaxın bir muddətdir ki, tədqiq və təbliğ olunur.
Azərbaycan Respublikasında isə bu problematika son beş ildə diqqət dairəsinə daxil edilib.