RÖYALARDA ÇƏMƏNLİKDƏ GƏZİRDİN
Röyalarda çəmənlikdə gəzirdin,
Çiçəklərdən dəstə-dəstə üzürdün,
Gizli-gizli məni hərdən süzürdün,
Belə gördüm yenə səni yuxumda,
Ovsunladı gecə məni yuxum da.
Çay aşağı marallar da keçirdi,
Ceyranlar da oradan su içirdi,
Şər qarışıb, göz-gözü pis seçirdi,
Zorla duydum baxışını yuxumda,
Baxışının naxışını yuxumda.
Sonra birdən gurşad yağış yağırdı,
Sellər çayın boğazından boğurdu,
Ay da, hənuz buludlardan doğurdu,
İslanmışdı üst-başımız yuxumda,
Üz-gözümüz, göz-qaşımız yuxumda.
Xəfif-xəfif əsən gecə küləyi,
O göylərin şıltaq, nazlı mələyi,
Oynadırdı sinəmizdə ürəyi,
Yox olmuşdu ədamız da yuxumda,
Öpüşürdü sevdamız da yuxumda.
Ayılanda gördüm yasdıq yaş olub,
Ağırlaşan ürək dönüb daş olub,
Röyalarım, sanki sənə faş olub,
Sevgiləri adlamısan yuxumda,
Məni yaman odlamısan yuxumda.
Nə edim ki, sən də, gülüm, beləsən,
Şadimanı əfsunladın elə sən,
Deyirəm ki, bunu yaxşı biləsən,
Ürəyimi almayasan yuxumda,
Məni eşqə salmayasan yuxumda.
22.09.1998
SƏN YADIMA DÜŞÜRSƏN
Sönür könül işığı,
Pozulur yaraşığı,
Qəm olub qəlb aşığı…
Sən yadıma düşürsən.
Ürək boynun bükəndə,
Qəlbə duman çökəndə,
Gözlərim yaş tökəndə,
Sən yadıma düşürsən.
Yanır ağızda dilim,
Doğranır dilim-dilim,
İtir can ilim-ilim,
Sən yadıma düşürsən.
Sönür eşqin çırağı,
Yanır tale varağı,
Artır sinəm fərağı,
Sən yadıma düşürsən.
23.11.1998
AÇILSIN MƏHƏBBƏT BAĞINDA GÜLLƏR
Açılsın məhəbbət bağında güllər,
Bizə qanad versin sevdalı illər,
Bir-birinə həsrət qalmasın dillər,
Fələk ağlatmasın gözü, sevgilim,
Heç vaxt ayırmasın bizi, sevgilim.
Ömrümüzdən bahar getməsin hələ,
Hicran bəxtimizi almasın ələ,
Taleyin yolunda verək əl-ələ,
Fələk ağlatmasın gözü, sevgilim,
Heç vaxt ayırmasın bizi, sevgilim.
Aləmə nur versin könül atəşi,
Səmada odlasın doğan günəşi,
Düşsün ayağına həsrətin nəşi,
Fələk ağlatmasın gözü, sevgilim,
Heç vaxt ayırmasın bizi, sevgilim.
Ürəklər hicrandan, eyvah, dolmaya,
Vəfasız adına layiq olmaya,
Könül qəm əlindən saçın yolmaya,
Fələk ağlatmasın gözü, sevgilim,
Heç vaxt ayırmasın bizi, sevgilim.
09.10.1998
QOVA BİLMİRƏM
Sənin o ilahi məhəbbətini
Borandan, tufandan, qardan qorudum.
Bükdüm ürəyimə səadətini,
Qəfəsdən, zindandan, dardan qorudum.
Günəşə tuş olmuş qar dənəsi tək,
Əridim ah ilə baxışlarında,
Ağlayan, üşüyən yar sinəsi tək,
İslandım həsrətin yağışlarında.
Mən canda axtardım hey sevdamızı,
Onu duyğularda tapa bilmədim.
Diləklər öldürən bu ədamızı
Bisütun dağı tək çapa bilmədim.
Hicran otağında vüsalımız kül,
Əsdirdi baxışda qədər küləyi.
Xəzan bağçasında açılan bir gül,
Sanki payızların solğun mələyi.
Xəyalın gözümdə əsir olandan,
Evimin ən əziz qonağı olub,
Eşqin ürəyimdə bir sirr olandan,
Könlümün, qəlbimin qınağı olub.
Gözümdən bağrıma axır göz yaşı,
Sevgilim, duyğunu yuva bilmirəm.
Dərddən sızıllayır qəlbimin başı,
Səni ürəyimdən qova bilmərəm.
26.XI.1999
NƏ DƏ HƏYAT VAR
Əvvəlki illərə qayıdaydım kaş,
Mən səni sevəydim, əzizləyəydim.
Atıb vüsalının bulağına daş
Çağlayıb çeşmə tək, dənizləyəydim.
Pərişan telləri töküb çiynimə,
Baxıb qızaraydım səni görəndə,
Geyəydim təzə bir donu əynimə,
Sən gəzən çəməndən çiçək dərəndə.
Yolunun üstünə çıxaraq hər gün,
Guya təsadüfü qarşılaşaydım,
Salıb bəxtimizə yenə səda, ün,
Sənin xəyalınla pıçıldaşaydım.
Üzünə tamarzı qalaydım yenə,
Yuxuma gələydin gecələr gizli,
Sənin atəşinlə alışan sinə,
Aşiqin olaydı, ey aybənizli.
Ondakı illərə qayıtsaydım mən,
Tək səni sevərdim yenidən, ey yar.
Mənim həyatımda olmasan ki, sən
Onda nə Şadiman, nə də həyat var.
5.02.2000 / Pirallahı
OLDUM
Ey mənim könlümü ovlayan ovçu-
Vurdun ürəyimə yaralı oldum.
Bu dərddən Tanrıya mən ki, duaçı,
Atdığın nişanın maralı oldum.
Düşdüm hicranların qəm yatağına,
Bir gələn olmadı heç otağına,
Qar düşdü könlümün sevda tağına,
Sazaqdan, şaxtadan saralı oldum.
Ürək hə deyəndə, yox dedi dilim,
Doğradı bağırı qəm dilim-dilim,
Özüm də bilmədim nədən, sevgilim,
Niyə bu sevgidən aralı oldum?
Səndədi könlümün, qəlbimin canı,
Fələyin bəxşişin, əzizim tanı,
Kim poza bildi ki, fələk yazanı?
Mən ki, bəxt sarıdan qaralı oldum.
Etmə Şadimanı dərdindən xəstə,
Sağ ikən sən məndən könlümü istə,
Yolunu salanda məzarım üstə,
Sonradan demə ki, haralı oldum?!
10.12.1999
NƏ LAZIM?
Salmısan könlümü dərmansız dərdə,
Daha oğrun-oğrun baxış nə lazım?
Gözümdə sel təki yaş olan yerdə,
Buluddan tökülən yağış nə lazım?
Söylə, sevgi oldu bunun harası?
İtdi yollarında gözün qarası,
Vurmusan qəlbimə sevda yarası.
Xalı tək min yerdən naxış nə lazım?
Onsuz da üşüyür ürək, könül, can,
Donub damarlarda dövran edən qan,
Mənim tək çovğunda, borandadı an,
Daha təbiətə bu qış nə lazım?
Dünyanın özü də haraya dönə,
Onsuz da harayım yetməyir sənə.
Ürək olan yerdə başa sal mənə,
Sinənin içində o daş nə lazım?
27.08.2001
ÜMİD VER MƏNƏ
İynə ucu boyda ümid ver mənə,
Bu ümid ovutsun qoy ürəyimi.
Sənsiz işgəncədir bu göy-yer mənə,
Uçurtma sinəmdən eşq dirəyimi.
İynə ucu boyda ümidin özü,
Qaranlıq gözlərə işıqdır axı,
Sənsən kainatım, dilimin sözü,
Sənə bu ürəyin aşiqdir axı.
Səndən doymaq olmur xəyallarda da,
Gözümün önündən gedən deyilsən.
Həsrət kabusu var vüsallarda da,
Əgər ayrılığa sarı əyilsən.
Dağıtma könlümün xanəmanını,
Hicranın boyunu göstərmə mənə.
Uçurd bu qəlbimin ah-amanını,
Hər qəmli göz yaşı bir zümrüd dənə.
İynə ucu boyda ümidin olum,
Gəl keçird könlünün tale sapından.
Düşübdü bəxtinə bu həyat yolum,
Qovlama sevdanı belə qapından.
11.07.2001
O GÜN
O gün bir küçədə gəldik üz-üzə,
Ürəkdən xəbərsiz alışdı canlar.
Zaman xatırladı o eşqi bizə,
Lövbərsiz gəmiyə bənzədi anlar.
Donub ikimiz də qaldıq, o yerdə,
Nə dillər danışdı, nə qəlblər dindi.
Bir anlıq səcdəyə döndü o yer də,
Yuxulu xəyallar özü diksindi.
Sənin bəbəklərin şimşəyə döndü,
Alışdı bağrımın asimanında.
Elə bil könüllər eşqlə döyündü...
Qovruldu zamanın dar gumanında.
Ötən xatirələr baharda qar tək,
Əridi anların yoxuşlarında.
Qaldı aralıqda o sevgimiz tək,
Döndü bir xəyala baxışlarında.
Dəqiqə ötüşdü, sanki bir ilğım,
Budaqdan yarpaq tək ayrıldı yollar...
Bizim sevgimizin həsrəti lağım,
Udar məhəbbəti, məzara yollar.
4.12.1999
NECƏ KEÇİM?
Alıb ürəyimi atəşə saldı,
Alışır bağırım, alışır içim.
Hicranın yolunu Günəşə saldı,
Belə məhəbbətdən mən necə keçim?
Deyirlər sevəni Allah da sevər,
Dünyaya nur verən sabah da sevər,
Sevgi günahdırsa, günah da sevər,
Belə məhəbbətdən mən necə keçim?
Ucaldıbdı ərşə eşq sarayımı
Nəşənin əliylə boğub vayımı,
Duyur bir baxışla hay-harayımı
Belə məhəbbətdən mən necə keçim?
Bu sevda könlümə pərişan deməz,
Qəlbimi hicrana heç nişan deməz,
Bağrımı bu eşqə necə şan deməz?
Belə məhəbbətdən mən necə keçim?
Şövqüylə sinəmə səadət damlar,
Tutub ayrılığı həbs edər, damlar,
Dünyada saf eşqə həsrət adamlar,
Belə məhəbbətdən mən necə keçim?
17.03.2001
YADINDAMI?
Yadındamı o illər?
Eşqlə yanğılı dillər,
Alışardı, yanardı,
Zamanım dayanardı.
Sənsiz dünyam küsərdi,
Ümidimi kəsərdi,
Xəyallarım uçardı,
Tez yanına qaçardı,
Küsüşüb barışardıq,
Od olub alışardıq.
Yadındamı bir səhər?
Aldı könlümü qəhər,
Sənsiz həyat daraldı,
Gözümdə gün qaraldı.
Küləklər sayaq, əsdim,
Görüşünə tələsdim,
Qıvrıldım ilan təki,
Gözüm görmədi səki,
Eşqin çapdı başımda,
Səni gördüm qarşımda.
Yadındamı səadət?
Can tək sevgili həyat,
Könlümüzə yar idi,
Həsrət, vüsal var idi.
Sellər təki coşardıq,
Çeşmələr tək daşardıq.
Bizə dünyada əziz,
Həm duyğulu, həm təmiz,
Saf məhəbbət nəsibmiş,
Üstümüzdə əsibmiş.
Yadındamı o vaxtlar?
Ayrı yanardı baxtlar,
Alışardım oduna,
Heç düşməzdim yadına.
Öz içimdə yanardım,
Səni dünyam sanardım.
Sənsə çəkib özünü,
Yan tutardın üzünü.
Məni oda atardın,
Yuxuları qatardın.
Yadındamı küləklər?
O göy atlı mələklər,
Darayardı telimi,
Qucaqlardı belimi,
Dodağımda gülüşlər,
O xəyali görüşlər...
Yuxumuza gələrdi,
Həsrət dərddən ölərdi.
Səni mənə yar edən,
Bağrımın başın didən,
Yuxumu qısqanardım,
Gizli-gizli yanardım...
Yadındamı, sevgilim?
Sənsiz ağlardı ilim.
Dərd başımdan aşardı,
İçimdə dolaşardı,
Həyat adiləşərdi,
Can gözümdən düşərdi.
Könlüm səni arardı,
Qəlbimi dərd sarardı.
Ağlardım için-için,
Sənin o sevgin üçün,
Demə ki, bu eşqimiz,
Qoymayıb qəlbimdə iz,
Kökü gedib dərinə,
Ürəyimin yerinə,
Sənin sevgin yerləşib,
Əbədi sehirləşib.
15.02.2000
BİR SƏN OL
Bir sən ol, mən olum, bir uçuq kaha,
Heç nə istəmirəm Tanrıdan daha!
Səhər yelləri tək, bəxt cilvələnsin,
Ey yar, ömrümüzə şadlıq ələnsin.
Nə sərvət, nə dövlət, nə pul, nə para,
Heç zaman tay olmaz əhdə, ilqara.
Təmizliyə bağlı saf mənəviyyat,
Onun sayəsində bərqərar həyat.
Var, dövlət isidə bilməz ürəyi,
Sevgidir qəlblərin ürkək mələyi.
Bir sən ol, mən olum, bir uçuq kaha,
Düşüb var dərdinə batmayaq aha.
Yansın, şölələnsin könül şamımız,
Qalmasın ürəkdə həyat kamımız.
Ömür yollarında sevgi bələdçi,
Ona yuva olsun könlümün içi.
Bir sən ol, mən olum, bir uçuq kaha,
Bu həqiqi sevgi yetsin Allaha!...
19.02.2000. Gəmidə
AMAN YARIM
Dünya gözəl, sevgi şirin, ömür az,
Sən olmusan həyatıma bahar, yaz,
Sevənlərə çox yaraşır işvə, naz,
Kədər nədir, bilməyəsən, gül, yarım,
Aman yarım, gözəl yarım, gül yarım.
Heç sevdadan doyan varmı dünyada?
Eşqimizə heyran olub dünya da.
Axtarmayım gül üzünü röyada,
Könlümə gəl hər dərdimi bil, yarım,
Aman yarım, gözəl yarım, gül yarım.
Saf ürəkdir məhəbbətin adası,
Təmiz eşqdir yaşamağın faydası,
Xiffət çəkmək sevənlərin qaydası,
Eşq nəğməsin sənə söylər dil, yarım,
Aman yarım, gözəl yarım, gül yarım.
Candan əziz sandım səni canıma,
Mələksima, nur verirsən anıma,
Durma gendə bir gəl mənim yanıma,
Cilvələnir ürəyimdə tel, yarım,
Aman yarım, gözəl yarım, gül yarım.
Şadimandan üz çevirmə, amandı,
Ayrılıq ki, ölümdən də yamandı,
Heç unutma dilindəki o andı,
Alışdırıb qəlbi etmə kül yarım,
Aman yarım, gözəl yarım, gül yarım.
18.03.2001
VAR EŞQİDƏ
Sən ey eşqə edən cəfa,
Nə heyrətlər var eşqidə?
Əgər qılsan ona vəfa,
Səadətlər var eşqidə.
Hicrə bulma rəva canı,
Onun ki, heç yox ünvanı,
Başlar könlə qəm divanı,
Müsibətlər var eşqidə.
Ömür elə ötür yel tək,
Gedən gedər tutma el tək,
Qəlbdən qəlbə yol sal tel tək,
Hekayətlər var eşqidə.
Ötürmə heç zamanı ki,
Sev bir mələk simanı ki,
Unutma din-imanı ki,
İbadətlər var eşqidə.
Uyan sevgi dərgahına,
Şükür eylər Allahına,
Səbəb olma qəlb ahına,
İtaətlər var eşqidə.
Sevda çağlar bəhərlərdən,
Gecə ağlar qəhərlərdən,
Həsrət gülər səhərlərdən,
Əziyyətlər var eşqidə.
Qəlbdə ahlar zəban olar,
Qəm ayağa daban olar,
Ürək elə sərban olar...
Nə zillətlər var eşqidə?!
Ey Şadiman, bu nə sevda?
Canı ona eylə fəda,
Tən gəlməyir eşqlə əda,
Məhəbbətlər var eşqidə.
10.11.2001
İLK MƏHƏBBƏT
Salırsan qəlbləri dərmansız dərdə,
Dəvasın nə loğman, nə həkim tapır.
qarşında diz çökür igid də, ər də,
Dərdinin dərmanın söylə kim tapır?
Bir zaman Qeysi Məcnun eylədin,
Leylini dillərdən dillərə saldın.
Əslini, Kərəmi de bir neylədin?
Onları kül edib, guya kam aldın!
Bir vaxtlar Fərhada Şirin eşqiylə,
Bisutun dağını parçalatmısan.
Söylə, ilk məhəbbət nə əsas ilə,
Qəlbləri bu ağır dərdə atmısan?!
Çox könüllər oldu səndən yaralı,
Qoydun sinələri dərd, qəm içində.
Toruna düşəndən qəlbim saralı,
Qoymusan gözümü yaş, nəm içində.
1973 / TAĞAY
EY YAR
Sənin qərib düşmüş məhəbbətinə
Min kərə ürəkdən can dedim, ey yar,
Şükür edib tanrının səadətinə
Sən də mənim təki yan dedim, ey yar.
Həsrətə düşəndə vüsal xoş olar,
Gözlərdən yanağa düşən yaş olar,
Məhəbbət olmayan ürək daş olar,
Sən bu gerçəkliyi an dedim, ey yar.
Yamandır hicrana qəlbin dözməyi,
Möhnət dəryasında könlün üzməyi,
Kimdən öyrənmisən bağrı üzməyi?
Qəmindən ürəyim qan dedim, ey yar.
Əhdi-peymanımız bir söylə hanı?
Basıbdır fəğanın yenə hər yanı,
Niyə qınayırsan bu Şadimanı?
Yolunda qurbanlıq can dedim, ey yar.
10.12.1999
NƏDƏN ÜZ ÇEVİRİB GEDİRSƏN BELƏ?
Nədən üz çevirib gedirsən belə?
Ağlayan könlümün dərmanı sənsən.
Vermə ümidimi, sevdalım, yelə,
Bəxtimin hökümü, fərmanı sənsən.
Əsən küləyimsən, doğan günəşim,
Odundan nurlanır ocaq atəşim,
Ulu məhəbbətə səcdədi işim,
Eşqimin həyatda imanı sənsən.
Getmə, sevdiciyim, dünya fanidir,
Zamanın gözündə ömür anidir,
Canı təndən alan ölüm anidir,
Qəlbimin həyatda səhmanı sənsən.
Sevda göylərində, tərlanım, uç gəl,
Ayrılıq İlahi yanında suç gəl,
Ürəyim yollarda qalıbdı quc gəl,
Bu dünyamın ən xoş zamanı sənsən.
Etmə həyatımı hicranlara tuş,
Vaxtımız fələyin süfrəsində nuş,
Saniyə saatın əqrəbində quş,
Gələn hər məqamın amanı sənsən.
18. 04. 2003
Dostları ilə paylaş: |