Qara çevrilən su atmosferdə su buxarının bir formasıdır. Donmuş suyun kristalları o qədər
kiçik olur ki, onları görmək mümkün deyil. Qar yaranarkən bu kristallar atmosferdə hava
axınlarıyla yuxarı-aşağı hərəkət edirlər.
Bu hərəkət zamanı onlar havadakı toz və su zərrələri ətrafında qruplaşır. Kristallardan
ibarət belə qrup getdikcə, daha çox böyüyür - bir nüvə ətrafında bir neçə yüz dənə kristal yığışa
bilər.
Kristallardan ibarət bu qrup böyüdükcə ağırlaşır və yerə düşür. Yerə düşən bu qrupa isə
biz “qar dənəsi” deyirik. Bəzi qar dənəciklərinin diametri üç santimetrə çatır. Dənəciklərin ölçüsü
də temperaturdan asılıdır. Temperatur nə qədər aşağı olsa, dənəciklər də bir o qədər xırda olacaq.
Bəs sizin xəbəriniz var ki, planetimizin bəzi yerlərində rəngli qar yağıb? Göy, yaşıl,
qırmızı, hətta qara... Bu qarın əmələ gəlməsi də havada müəyyən göbələklərin, yaxud tozun
olmasıyla əlaqədardır.
Niyə qışda pəncərələrdə buz naxışlar görünür?
Qışı çox soyuq keçən yerlərdə yaşayan uşaqların pəncərə şüşələrindəki qırova tamaşa
etməkdən xoşu gəlir. Bəzən bu naxışlar çox gözəl olur, yarpaqların, ağacların üzərindəki mürəkkəb
naxışları xatırladır.
Pəncərələrdə, ağaclarda, otda qırov əmələ gəlməsi üçün müəyyən şərait olmalıdır. Qırov
çox xırda donmuş su kristallarından əmələ gəlir. Rütubəti çox olan hava donma temperaturunadək
soyuyanda qırov əmələ gəlməyə başlayır. Donma nöqtəsi dəniz səviyyəsində Farengeyt şkalasıyla
32, Selsi şkalasıyla 0 dərəcədədir.
Hava soyuyanda onun tərkibindəki rütubət azalır. İzafi su pəncərə şüşəsi kimi obyektlər
üzərində kondensə olunur.
Temperatur 0 dərəcədən aşağı düşəndə su kristallaşır. Başqa sözlə desək, suyun üzünü buz
kristalları örtür.
Bəs niyə şaxtada pəncərə şüşələrində naxışlar əmələ gəlir? Bir tərəfdən kristalların öz
strukturları var ki, bu da naxış yaradır. Şaxta Babanın pəncərələrdə gözəl naxışlar salmasına
bundan başqa şüşənin üzərindəki cızıqlar, toz zərrələri, hava axınları da kömək edir.
Ağ qırovun özü iki cür olur: dənəvər və kristal şəkilli. Dənəvər qırov sadəcə donmuş
dumandır. Kristal şəkilli qırov isə havadakı su baxarından yaranır. Qazşəkilli vəziyyətdən birbaşa,
suya çevrilmədən sərt maddə yaranması prosesi baş verir.
Şaxta kənd təsərrüfatı üçün çox təhlükəlidir, çünki ağaclardakı tumurcuqları, yaxud hələ
yetişməmiş meyvələri də vura bilər. Əslində, bitkilərə ziyanlı olan şaxtanın özü deyil, onların
şirəsini dondurmasıdır. Kəndlilər məhsulu qırovdan qorumaq üçün çox üsullar fikirləşiblər.
Onlardan biri istini qorumaq məqsədiylə bitkilərin üzərini yüngül parça ilə örtməkdir. Bağlarda
qalın tüstü pərdəsi yaratmaqla da bitkilərin istisini qorumaq olur.
Yadınızda saxlayın ki, biz Şaxta Babanın saldığı gözəl naxışların seyrinə dalanda,
milyonlarla ton məhsul təhlükəyə məruz qalır.
S
u nə vaxt buza dönür?
Əgər siz nohurun, gölün, yaxud çayın buz bağlamasına fikir vermisinizsə, onda yəqin
görmüsünüz ki, əvvəlcə mütləq suyun üzü buzla örtülməyə başlayır.
Sizə elə gəlmir ki, göllər, çaylar dibindən donmağa başlasaydı, bizim həyatımız tamam
başqa cür olardı? Onda nəinki Yerin iqlimi dəyişər, hətta suda yaşayan bir çox canlılar da məhv
olardı!
Baxaq görək, nohurdakı su buza necə çevrilir. Nohurun üzərindəki hava soyuyanda o suyun
üst qatını da soyudur. Suyun üst soyuq qatı ilıq alt qatlara nisbətən ağırlaşır və tədricən aşağı enir.
Bu proses nohurdakı bütün suyun temperaturu 4 dərəcəyə kimi enənədək davam edir.
Lakin havanın temperaturu hələ enməkdə davam edir! Elə ki, suyun üst qatları 4 dərəcədən
artıq soyudu, o artıq dibə enmir, elə yerindəcə qalır. Məsələ budur ki, temperaturu 4 dərəcədən
aşağı düşən su artıq yüngülləşməyə başlayır!
Beləliklə, suyun üst qatı artıq donmağa hazırdır. Temperatur donma həddinə, yəni 0
dərəcəyə yetişəndə, yaxud daha aşağı enəndə, suda xırda kristallar əmələ gəlməyə başlayır.
Hər belə kristalın altı şüası var. Onlar bir-biriylə birləşərək buz əmələ gətirirlər və tezliklə,
suyun üzündə buz qatı yaranır. Əmələ gələn buz hərdən şəffaf olur, hərdən isə yox. Niyə belədir?
Məsələ bundadır ki, su damcısı donanda, ondan xırda hava qovuqcuqları ayrılır. Onlar buz
kristallarının şüalarına yapışırlar. Kristallar nə qədər çox olsa, hava qovuqcuqları da bir o qədər
çox olur və beləliklə, buz şəffaflığını itirir.
Su və bəzi maddələr maye haldan bərk hala keçərkən öz həcmini azaltmır. Su donarkən öz
həcminin doqquzdan biri qədər genişlənir. Yəni doqquz litr su donarkən, on litr həcmində sərt buz
əmələ gəlir! Qışda avtomobillərin radiatorları, su boruları ona görə partlayır ki, onların içindəku
su donaraq öz həcmini artırır!
Tufan nədir?
İnsan həyatda çox şeyə qadir olan, güclü bir məxluqdur, lakin tufan görəndə, o da çaşıb
qalır, nə edəcəyini bilmir! Bəs tufan nədir?
Təbiətdə baş verən və sərt, qəddar təbiətə malik olan nə varsa, onu tufan saymaq olar.
Dənizdə tufan güclü külək, yaxud qasırğa şəklində təzahür edir. Quruda tufan isə güclü yağışlar,
şimşək, dəli küləklərdir.
Birləşmiş Ştatların en dairəsində tufan yüz kvadrat kilometrlərlə ərazini bürüyə bilər. Bu
zaman aşağı təzyiqli yerlərin ətrafında fırlanan hava kütlələri əmələ gəlir.
Bu cür tufanlar cənuba axan soyuq arktik hava kütləsinin tropiklərdən şimala üz qoymuş
isti, rütubətli hava axınlarıyla toqquşması zamanı əmələ gəlir. Bəzi yerlərdə isti havadan ibarət
böyük bir kütlə soyuq hava axının içinə soxulur. Bu axının zirvəsində aşağı təzyiq yaranır deyə,
küləklər ora üz qoyur və həmin yerin ətrafında tufan əmələ gəlir.
Temperaturu müxtəlif olan hava kütlələri qarşılaşanda, ilıq və soyuq havanın qismən
qarışması baş verir. Daha isti hava soyuq havanın üzərinə qalxır, soyuyuq, sıxlaşır. Bu proses
nəticəsində buludlar yaranır, yağış, ya qar yağır.
Şimal yarımkürəsində Yerin fırlanmasına görə havanın hərəkəti sağa meyllənir, ona görə
də bu fırlanmanın içində hava axınları da saat əqrəbi istiqamətində hərəkət edir. Bu da, təxminən,
nəhəng qasırğanı xatırladır.
Ekvatordan şimalda tufan və qasırğalar isti tropik sular üzərində yaranaraq daha çox yayın
axırlarında, ya da payızda baş verir. Onlar qərb və şimal-qərb istiqamətində hərəkət edir, tədricən
sağa meyllənirlər. Tornado çox güclü qasırğadır. Onun gəlişindən burulğan şəkilli buludlarla
yanaşı, şimşək buludlarıda yaranır. Belə burulğanın təməli, əsası cəmi bir neçə yüz metrə çatır,
amma bu kifayətdir ki, qarşısına çıxan hər şeyi dağıdıb məhv etsin. Bu dağıdıcı güc dəhşətli külək
və təzyiqin çox aşağı düşməsindən yaranır. Evlərin divarları yıxılır, ağaclar kökündən qopur!
Tornadolar elə dağıntılara səbəb olur ki, onların tez-tez baş verdiyi nahiyələrdə insanlar qorunmaq
üçün özlərinə xüsusi sığınacaqlar tikməyə məcbur qalırlar.
Niyə şimşək çaxandan sonra göy guruldayır?
Şimşək və gör gürültüsü yəqin ki, ibtidai insanları dəhşətə gətirərək onları öz sehrinə salan
ilk təbiət hadisələri olub. Yaşadığı mühiti hələ tam tanımayan insan göyün bağrını yaran
Dostları ilə paylaş: |