MƏNƏVİ HƏYAT
1. MƏNƏVİ BORC
2. DİN VƏ MƏDƏNİYYƏT
3. DOĞRU VƏ YANLIŞ DÜŞÜNCƏ
4. DAVRANIŞLARIMIZIN MƏNƏVİ “MÜHƏRRİK”LƏRİ
5. DİLİN BƏLALARI: QEYBƏT VƏ İFTİRA
1.MƏNƏVİ BORC
Mətni oxuyub təhlil edin.
Ayxan neçə gün idi ki, dostu Anarın ad gününə hazırlaşırdı. Bu qonaqlıq onun üçün
çox önəmli idi. Çoxdan görmədiyi dostlarını bu məclisdə görəcəkdi. O, təzə
ayaqqabı və köynəyinə tez-tez baxır, ad gününü səbirsizliklə gözləyirdi. Nəhayət,
həmin gün çatdı. O geyindi, güzgüdə özünə baxaraq evdən çıxdı. Hətta qənaət edib
saxladığı pulu da yanında götürməyi unutmadı. Düşündü ki, birdən lazım olar.
Amma hadisələr heç də onun istədiyi kimi olmadı. Çayın üzərindəki körpüyə
yaxınlaşanda bir qadının fəryadını eşitdi. Ana çayda boğulan balaca qızını xilas
etmək istəyirdi.
Ayxan heç nə düşünmədən çaya atıldı. Qızı çaydan çıxardı. Həyəcandan söz tapa
bilməyən ana Ayxana necə təşəkkür edəcəyini bilmirdi. Ayxan geri dönüb iti
addımlarla onlardan uzaqlaşdı. O, islanmış geyimini dəyişməli, ad gününə çatmalı
idi. Əlini cibinə saldı. Pullar yox idi. Yəqin ki, çayda düşmüşdü. Evə çatıb paltarını
dəyişdi. O bu dəfə evdən köhnə geyimdə çıxdı. Buna baxmayaraq, Ayxan
əvvəlkindən daha xoşbəxt görünürdü.
Ayxanın hərəkətini necə qiymətləndirirsiniz? Onun özünü xoşbəxt hiss
etməsinin səbəbi nə idi? Qızı boğulmaqdan xilas etməyə onu nə vadar
etdi? Fikirlərinizi bildirin.
Mənəvi borc və vicdan insanın daxili hissidir. İnsanın cəmiyyət, kollektiv və özü
qarşısında mənəvi borcu vardır. Mənəvi dəyərlərə sahib olmaq çox vacibdir. Bu
baxımdan əxlaqın rolu əvəzedilməzdir. Əxlaq insanlar arasındakı münasibətləri
tənzimləyir. Mənəvi borc müəyyən şərtlərə tabe olmur, ona hər zaman əməl
edilməlidir. Onu təkcə yaxınlarına qarşı deyil, bütün insanlarla münasibətdə əsas
tutmaq lazımdır. Mənəvi borc yerindən, şəraitdən, zamandan, milliyyətdən,
şəxsiyyətdən asılı olmayıb universal xarakter daşıyır.
Mənəvi borc və vicdan anlayışlarına yanaşma müxtəlifdir. Çünki cəmiyyətdə insanlar
fərqlidirlər. İnsan öz borcunu yerinə yetirdikdə və ya vicdanla
hərəkət etdikdə məmnun olur. Bu borc hissi qəbul edilmiş mənəvi dəyərlərə uyğun
gəlməlidir. O, daim xeyirxahlığa doğru yönəlməlidir. Borcun könüllü surətdə yerinə
yetirilməsi həmin şəxsin yüksək mənəvi şüurundan xəbər verir.
Hacı Zeynalabdin Tağıyev öz mənəvi keyfiyyətlərinə görə tariximizin yaddaşında iz
qoyub. Onun xeyirxahlığı məcburi olmamışdır. O, yüzlərlə gəncin təhsil almasına
kömək etmiş, kasıb və kimsəsizlərə yardım göstərmişdir. Hətta 1901-ci ildə
Azərbaycan qadınının təhsil almasında böyük rol oynamış müsəlman Şərqində ilk
dünyəvi qızlar məktəbini açdırmışdır.
Vətənpərvərlik borcunu necə başa düşürsünüz? Nümunələrlə fikrinizi əsaslandırın.
Yuxarıda deyildiyi kimi, insan yalnız cəmiyyət qarşısında deyil, özü və yaxınları
qarşısında da müəyyən borca malikdir. Məsələn, “ailə borcu”, “yoldaşlıq borcu” və s.
Cəmiyyətdə tez-tez maddi və mənəvi borc sözlərini eşidirsiniz.
1. Elşən banka pul borcludur.
2. Elşən anasına kömək etməyə borcludur.
Maddi borc anlayışını yoldaşlarınızla müzakirə edin.
Mənəvi borca insanların üzərinə düşən öhdəlikləri (məsələn, vətən, xalq, kollektiv,
ailə, valideyn qarşısındakı borc), o cümlədən peşə fəaliyyəti (müəllimlik borcu,
həkimlik borcu və s.) ilə bağlı vəzifələri aid etmək olar.
Bizim mənəvi borclarımızdan biri də tarixi abidələrimizin – qoruqların, qalaların və
digər milli sərvətlərimizin qorunub saxlanmasıdır.
Ermənistan hərbi qüvvələrinin torpaqlarımızı işğal etməsi – tarixi mədəniyyət
abidələrimizin dağıdılması ilə nəticələnmişdir. İşğal nəticəsində yüzlərlə tarixi abidə və
muzey məhv edilib, bu proses bu gün də davam etdirilir. Ermənistan tərəfindən tarixi
abidələrmizə qarşı bu münasibət “Silahlı münaqişə baş verdikdə mədəni dəyərlərin
qorunması haqqında” 1954-cü il Haaqa Konvensiyasına, “Ümumdünya mədəni və təbii
irsin mühafizəsi haqqında” YUNESKO-nun 1972-ci il konvensiyasına, “Arxeoloji irsin
mühafizəsi haqqında” 1992-ci il Avropa Konvensiyasına ziddir.
Keçmişimizi unutmayıb 20 Yanvar, Xocalı faciəsi, eləcə də Qarabağ uğrunda gedən
döyüşlərdə canlarından keçən şəhidlərimizi və onların qəhrəmanlıqlarını gələcək
nəsillərə çatdırmaq bizim mənəvi borcumuzdur.
Mənəvi borclarımızdan biri də dinlə bağlıdır. Müxtəlif dinlərə sitayiş edən insanlar öz
dini inanclarına uyğun mərasim keçirir və ayinlərə əməl edirlər. Bütün dinlər insanlara
bir-birini sevməyi, bir-birinə zərər verməməyi, zərərli vərdişlərdən uzaq durmağı
buyurur.
1. Ailə qarşısında olan mənəvi borcunuz hansılardır? Müəyyənləşdirib müzakirə
edin.
2. Vətən borcunun müqəddəs bir hiss olduğunu dəyərləndirib fikirlərinizi qeyd
edin.
3. Təbiət qarşısında mənəvi borcumuz varmı? Münasibətinizi bildirin.
4. “Mənim mənəvi borcum” adlı esse yazın.
Mərdəkan qalası
Qala Dövlət tarix-etnoqrafiya qoruğu
2.DİN VƏ MƏDƏNİYYƏT
Bakıya qonaq gələn Daniyel vaxtının çox hissəsini şəhərin müxtəlif yerlərini
gəzməyə sərf edirdi. O, şəhərin küçələrini gəzdikcə diqqətlə tikililərə baxır, onların
üslubunu müəyyən etməyə çalışırdı. Axı Daniyel memar olmaq istəyirdi.
İçərişəhərdəki Şirvanşahlar sarayı, Qoşa qala qapıları, Azərbaycan Milli Elmlər
Akademiyasının Rəyasət Heyətinin yerləşdiyi bina, Əlyazmalar İnstitutunun binası,
Tarix Muzeyi, “Səadət” sarayı və s. binalar ona sirli və möcüzəli bir məkanı
xatırladır. O, müxtəlif mədəniyyət üslubunda tikilən bu tarixi əhəmiyyətli abidələrə
baxdıqca düşünürdü: “Bu tikililər niyə belə fərqlidir?”
Daniyelin düşüncələrinə münasibət bildirin. Tikililərin nə üçün
fərqləndiyini izah etməyə çalışın.
Sizin ötən illərdən dinlər və onların mədəniyyətlərdə öz əksini tapan mərasimləri
barədə məlumatınız var. Bilirsiniz ki, dinləri müxtəlif cəhətləri ilə yanaşı, ortaq cəhətlər
də birləşdirir. Dini dəyərlər əxlaqımızda və mədəniyyətimizdə öz izini qoyur. Bütün
dinlərin ortaq cəhəti insanları əxlaqlı və dürüst olmağa səsləməkdir. Bu cəhətlər
mədəniyyətlərin formalaşmasında və mədəniyyətlərarası münasibətlərin yaranmasında
mühüm rol oynamışdır.
Hansı səmavi dinləri tanıyırsınız? Bildiklərinizi yada salın.
Dostları ilə paylaş: |