90
qanunla, ədalətlə rəftar eləyin? Bu acınacaqlı vəziyyətdən, cənab vəzir, allaha pənah aparıram.
Haraya ayaq basırsan ah-nalələrinin tüstüsü ilə göyləri qaraldan, ürəyi od tutub yanan iranlılara
rast gəlirsən. Onlar ölkənin daxilində olan zülm, haqsızlıq nəticəsində baş götürüb qaçır, xaricdə
isə ondan daha betər cəfalara düçar olurlar. Osmanlı torpağında, Rusiyada hər hansı kəndə,
qəsəbəyə getsən görəcəksən ki, bir ovuc arsız, işsiz avara fərraş bir adamın başına toplanıb
onun adını qoyublar konsul. Hamısı əlbir olub, dövlət dəftərində heç bir ismi-rəsmiləri olmayan
bu cəlayi-vətən etmiş biçarələrin canına daraşıblar. Sağa keçirlər, kəsirlər, sola keçirlər,
siyirirlər. Əvvəla, məmləkətin daxilində nə üçün zülm qapıları bağlanılmır ki, bu yazıqlar da
vətənlərini tərk etməyə məcbur olmasınlar? İkincisi, nə üçün konsullar bu fəqir-füqəranın hər
birisindən gərək təzkirə pulu ünvanı ilə beş manat alıb, öz cibinə salsın?! Əgər buyursanız ki,
onlara bu pulu maaş əvəzinə veririk, allah haqqı, aldanırsınız. Çünki bu pulu dövlət özü alıb
həmin utanmaz mürüvvətsizlərə maaş versə, ildə dövlət xəzinəsinin gəliri xeyli artar, bu kimi
rüsvayçılıqlar da müəyyən dərəcədə azalar. Hal-hazırda Osmanlı ölkəsində və Rusiyada bir iranlı
öldükdə, hansı təbəqəyə mənsub olmasından asılı olmayaraq, onun birinci varisi həmin səfirlər
və konsullardır. Ölünün vərəsələri və tələbkarlarının gücü çatdıqda onlara da müəyyən pay
düşəcəkdir. Əks təqdirdə, əllərinə heç bir şey çatmayacaq. Pasport məsələsi də bunun tayıdır.
Dəqiq şəkildə hesablanıb məlum olmuşdur ki, hər bir iranlı, hər hansı sərhəddən gedir-getsin,
Məkkəni ziyarət eləyib qayıdanadək qırx beş tümən təzkirə və qolçəkmə pulu verməlidir. Hər il
azı dörd min nəfər iranlı Məkkənin ziyarətinə gedir. Bunların təzkirə pulu ildə yüz altmış min
tüməndən artıq olur. Bu pulla Rusiyanın və Osmanlı ölkəsinin bütün mühüm və lazımi yerlərində
müəyyən maaş və təlimatla konsul saxlamaq mümkündür. Maaş verildikdə isə, konsullardan
şikayət olunarsa, onları məsuliyyətə cəlb edib, cəzalandırmaq da caizdir. Bizim və bütün
müsəlmanların qibləsinin darvazası hesab olunan Cəddə limanında təsərrüfat işlərinə baxan
məmur nəcib, ədəbli, dindar, şahnərəst, bilikli, savadlı ailəyə mənsub bir adam olarsa, bunun nə
eybi var? Oranın təsərrüfat işinə baxan məmurun vəzifəsi hərraca qoyulur. Bu vəzifə hər il
müzaidə ilə bir-iki min lirə müqabilində hər bir atasından xəbərsiz, alçaq, savadsızın əlinə
tapşırılır ki, o da hörmət və hüquqlarının qorunması dövlətin öhdəsində olan hacıların canına,
malına hakim kəsilir. Hökumət hər bir təzkirədən bir tüməndən artıq almadığı halda o,
utanmadan, çəkinmədən yarım lirə alır ki, bu da iki tümən yarım eləyir. Hələ bundan sonra da
camaatın yaxasından əl çəkmir, hamballar və dəvəçilərlə əlbir olub, hacıları çapır. Bir dəvəni və
ya ulağı Cəddədən Məkkəyə kirə edəndə başqalarından, yəni Osmanlı, Misir, Əlcəzair,
Hollandiya, Hind və Qafqaz müsəlmanlarından otuz quruş aldıqları halda iranlıdan iki yüz quruş,
yəni altı dəfə artıq tələb edirdilər. Bu məsələləri hər il qəzetlər yazır və hacıların fəryadı göylərə
yüksəlir. Amma bu fəryadları eşidən qulaq hanı?! Onlara zülm edən həyasızlar heç bir cəza
almırlar. Üç aylıq müvəqqəti konsulların İran hacılarından hər il Cəddədə aldıqları pul bir səfirin
maaşına kifayət edər. Cənab vəzir, əgər mənim bu dediklərimdən xəbəriniz vardır və bunların
əhəmiyyətsiz olduğunu zənn eləyirsinizsə, onda icazə verin ərz eləyim ki, çox insafsız
adamsınız. Xəbəriniz yoxdursa, başqa sözlə, sizin öhdənizdə olan idarələrdə nələr olduğunu
bilmirsinizsə, onda hamının haqqı var ki, sizi başısoyuq bir adam hesab eləsin və bu yüksək
məqama layiq olmadığınızı söyləsin. Vəssəlam.”
Vəzir gərnəşərək yerindəcə dik oturdu, məni başdan-ayağa süzüb dedi:
“Ərəbistanın tərbiyəsi bundan artıq olmaz ki!...
91
Axmaq kişi, sən nə dili uzun, qafasız adammışsan. Qanun adını eşidib dilinə dolamısan. Bir
ucdan qanundan dəm vurursan. Daha bunu qanmırsan ki, başqa dövlətlərdə bircə qanun vardır ki,
ildə bir dəfə də icra olunmur. Bizim ölkəmizdə hər bir nazirliyin özünün ayrıca qanunu var.
Onların hər birinin hökmü də yarım saat ərzində yerinə yetirilir. Sənin bircə işindən xoşum gəldi
ki, İran təbəəliyindən çıxmamısan. Yoxsa səninlə başqa cür rəftar edərdim. Dur ayağa, cəhənnəm
ol, ya allah!...”
Gördüm oturmaq yeri deyil. Durub yola düşdüm. Xəcalətimdən tərləyib, cimcilaq su olmuşdum.
Mirzə Kazım bəy sevincək gəlib soruşdu:
“Misir konsulundan şikayət elədinmi?”
“Yox,” -- dedim. -- “Məsələ başqadır. Xudahafiz.”
Məşədi Həsən ilə oradan çıxıb dedim:
“Hərçənd ki, daha gecdir. Amma bu gün bu işi başa çatdırmaq lazımdır.
Gedək hərbi nazirliyə,
görək başımıza nə gəlir.”
Hərbi nazirliyə gəlib çatdıqda qarovullardan hər birinin tüfəngləri baş-başa çatıb bir tərəfdə
oturub çubuq çəkdiklərini gördüm. İçəri girmək istədim. Soruşdular:
“Haraya?”
Məşədi Həsən dedi:
“Ərizəçidir.”
Bilmirəm, nə işarə elədilər. Məşədi Həsən dedi: