Filologiya
məsələləri, № 15 2017
48
Küçədə günə baxan oğlan mənim qardaşımdır. Birinci cümlədə iki sözün
birləşməsi mürəkkəb söz, ikinci cümlədə isə, feli birləşmə əmələ gətirmişdir.
Hər iki halda “gün” və “baxmaq” sözləri arasında əlaqə yaratmaq üçün
qrammatik şəkilçilərdən istifadə edilmişdir. Birinci sözə ismə yönlük hal
şəkilçisi, felə isə, feli sifət şəkilçisi əlavə edilmişdir. Başlıca olaraq nəzərə
almaq lazımdır ki, söz birləşməsinin tərəfləri öz müstəqil mənasını saxlayır və
cümlə daxilində əlaqələnərək, birləşmə əmələ gətirir. Həmçinin, mürəkkəb
sözün komponentləri birləşərək, bir vurğu altında deyilir. Mürəkkəb sözün
tərkib hissələri öz ilkin mənasından uzaqlaşır və birləşərək konkret bir anlayışı
adlandırmaq üçün istifadə olunur. Bu isə söz birləşməsinin, dilin nominativ
funksiyasının praktik olaraq reallaşmasında böyük rol oynadığını sübut edir.
Yəni, bəzən hər hansı bir məfhumu bildirmək üçün, bir sözə deyil, bir neçə
sözün birlikdə işlənməsinə ehtiyac olur. Təbii ki, nominativ funksiyanı yerinə
yetirmək üçün ilk növbədə sözdən istifadə olunur. Lakin qeyd etdiyimiz kimi,
bəzi anlayışları daha dəqiq ifadə etmək və ya adlandırmaq üçün bir neçə sözün
birləşməsindən istifadə olunur. Bu baxımdan, söz birləşməsi sözə nisbətən daha
konkret məzmun bildirir və anlayışı dəqiq olaraq adlandırır. Məsələn: 1. Sanki
quruya düşmüş balıq özünü yerdən-yerə çırpırdı. Bu cümlədə “Balıq” sözü
mübtəda vəzifəsində işlənərək digər sözlərlə əlaqəyə girmişdir, daha
doğrusu, mübtəda xəbərlə uzlaşma əlaqəsi vasitəsilə bağlanır. “Balıq”
anlayışının cümlədəki ifadə forması dəqiqləşdirilir və bu məqsədlə həmin
sözün əvvəlinə “quruya düşmüş” feli birləşməsi – feli sifət tərkibi artırılır.
Həmin cümlədə təyin vəzifəsində işlənmiş feli birləşməni ixtisar etsək
mübtədanın məzmununda qeyri-müəyyənlik yaranacaq – “Sanki balıq özünü
yerdən-yerə çırpırdı”. Burada artıq balığın nəyə görə belə hərəkət etməsinin
səbəbi öz əksini tapmır. Deməli, söz birləşməsi hadisənin səbəbini
dəqiqləşdirir və cümlə üzvünün məzmununu konkretləşdirir. Eyni zamanda,
söz morfoloji, söz birləşməsi isə sintaktik vahiddir. Söz müstəqil şəkildə, söz
birləşməsi isə, cümlə daxilində əmələ gəlir. Sözlər cümlə daxilində müəyyən
bir şəkilçi qəbul etmədən, müstəqil şəkildə də işlənə bilər. Məsələn: məktəb
ən müasir formada təmir olundu. Bu cümlədə məktəb və təmir sözləri heç bir
hal, mənsubiyyət, xəbərlik və ya digər şəkilçi qəbul etmədən müstəqil
şəkildə cümlədə işlənmişdir və digər sözlərlə əlaqəyə girmişdir. Lakin söz
birləşmələri işində ismi birləşmələrdən yalnız I növ təyini söz
birləşmələrinin komponentləri heç bir şəkilçi qəbul etmədən bir-biri ilə
əlaqəyə girərək söz birləşməsi şəklində işlənir. Digər birləşmələrin, o
cümlədən də feli birləşmələrin komponentləri bir-biri ilə əlaqəyə girmək
üçün müəyyən qrammatik kateqoriyaları qəbul edir. Məsələn: Bu da təzə
kassirşa imiş; Milisioner Qərib tüfəngli yan-yörədə hərlənirdi. Bu cümlədə
işlənən “təzə kassirşa” və “Milisioner Qərib” birləşmələri birinci növ təyini
söz birləşmələridir. Bu birləşmələr sifət və ismin əlaqəyə girməsi nəticəsində
Filologiya məsələləri, № 15 2017
49
əmələ gəlmişdir. Qız davamlı baxışla onu süzüb, sonra birdən özünü palanın
üstünə yıxdı; Yuxarı başda müştükdə papiros çəkən və yaxalığı yanakı
əyilmiş bir kişi irəli çıxdı”. Verilmiş cümlələrdə söz birləşmələrinin tərkib
hissələrinin bir-biri ilə əlaqəyə girməsi üçün qrammatik şəkilçilərdən istifadə
edilmişdir. Belə ki, birinci cümlədə feli sifət düzəldən –ıb şəkilçisindən
istifadə edilmişdir və burada feli birləşmənin məzmunu birləşmə daxilində
görüldüyü bildirilən işin, əsas feildəki işdən əvvəl icra olunduğunu göstərir.
İkinci cümlədə isə, iki feli birləşmədən istifadə edilmişdir – “papiros çəkən”
və “yaxalığı yanakı əyilmiş”. Bu birləşmələr cümlədə həmcins təyinlər kimi
çıxış edir. Belə ki, birini birləşmədə -ən feli sifət şəkilçisindən istifadə
edilmişdir, ikinci birləşmə isə -mış şəkilçisi vasitəsilə əmələ gəlir. Belə ki,
“papiros çəkən” birləşməsi iki sözün əlaqəyə girməsi nəticəsində əmələ
gəlmişdir. Burada birinci tərəf hərəkətin obyektini bildirir. Əsas tərəf isə, feli
sifətin sifətə məxsus olan əlamət bildirmək funksiyasını daşıyır. Lakin
burada söz birləşməsi daha mürəkkəb konstruksiyanın qurulması və ikidən
çox sözün məna və qrammatik cəhətdən əlaqələnməsi nəticəsində əmələ
gəlmişdir.
Söz birləşmələrinin cümlə və sözlə, eyni zamanda mürəkkəb sözlərlə
oxşar və fərqli cəhətləri həm orta məktəb dərsliklərində, həm də ali məktəb
dərsliklərində öz əksini tapır və tədris edilir. Belə ki, bu məsələlərə həm ali
məktəblərdə sintaksisin tədrisinə həsr olunmuş Ə.Abdullayev, Y.Seyidov,
A.Həsənovun “Müasir Azərbaycan dili”, Q.Kazımovun “Müasir Azərbaycan
dili-sintaksis” dərsliklərində, həm Y.Seyidovun “Azərbaycan dilində söz
birləşmələri” adlı dərs vəsaitində eyni zamanda, digər dərslik və dərs
vəsaitlərində geniş yer ayrılmışdır. Orta məktəblərdə tədris edilən Azər-
baycan dili fənnindən sintaksisin tədrisi zamanı da söz birləşməsinin adı söz,
mürəkkəb söz və cümlə ilə əlaqəsinə diqqət yetirilir. Belə ki, 8-ci sinif
“Azərbaycan” dili dərsliyinin söz birləşmələrindən bəhs edən bölməsində,
söz birləşmələrinin konkret təsnifinə və təhlilinə keçməzdən əvvəl, ümumilikdə
söz birləşməsi anlayışı barədə məlumat verilir, söz birləşməsinin sözlərlə,
cümlələrlə oxşar və fərqli cəhətlərinin izahına ayrıca yer ayrılır. Söz birləşmə-
sinin mürəkkəb sözlərlə müqayisəsi isə, birləşmələrin sözlərlə münasibətini
göstərmək üçün ayrılmış hissənin tərkibində izah edilir.
Orta məktəb dərsliklərində söz birləşmələri ilə qoşa sözlərin
müqayisəsinə yer verilməmişdir. Y.Seyidovun “Azərbaycan dilində söz
birləşmələri” adlı dərs vəsaitində qoşa sözlərlə söz birləşmələrinin oxşar və
fərqli cəhətlərinin izahı geniş şəkildə verilmişdir. Burada “qoşa söz” termininin
inkişaf yolu göstərilmiş, eyni zamanda bu tip sözlərlə mürəkkəb sözlərin
ortaq xüsusiyyətləri, qoşa sözlərin spesifik cəhətləri geniş planda
işıqlandırılmışdır. Məsələn: yollar izlər, dərələr-təpələr, ət-mət və s. (16, 57)
Göründüyü kimi, müəllif orta məktəb dərsliklərində və bir çox ali məktəb