Адил Ъямил
150
ÖMÜR DEDİKLƏRİ
Ömür dedikləri bir dəli çaydır -
Axar məcrasını tapana qədər.
O elə vergidir, o elə paydır
Bir gün bağışlanar, bir gün də gedər…
Əsrlər adlayar paslı bir dəmir,
Bəşərin yaşıcan daşın ömrü var.
Yüz il də ömürdür, bir an da ömür,
Ömrün yaşı varsa, yaşın ömrü var.
Nankor bir məxluqun üstünə gəlsə
Bəzən əcəlin də «əmri» uzanar.
Hər kəs öz ömrünü yaşaya bilsə
Yaxşı adamların ömrü uzanar.
Daşın daş ömrü var, insanın insan -
Tapılmaz insanla daşda oxşayış.
Yaşatmaq çətindir, yaşamaq asan -
Olsa da ömürdə, yaşda oxşayış…
Tikanı mənasız görəndən sonra
Heyifim gəlməyir gülün ömrünə.
Bir də doğularsan öləndən sonra -
Qatsan öz ömrünü elin ömrünə…
1981
Сечилмиш ясярляри
151
DÜŞMƏNLƏRİM
Mənim düşmənim güclüdür –
Gücüm çatana dəymərəm,
Dişim batana dəymərəm,
Çöldə yatana dəymərəm.
Mənim düşmənim dostumdur –
Üzümə gülər – ağlamaz,
Dərdimi bilər – ağlamaz,
«Öl» desəm «ölər» – ağlamaz…
Mənim düşmənim mən özüm –
Heç özümü qorumadım,
Heç özümdən yarımadım;
Göyərmədim, qurumadım…
…Düşmənlərim, düşmənlərim…
Dost olub peşman oldunuz,
Əlinizdən o gəldi ki,
Axırda düşmən oldunuz…
1980
Адил Ъямил
152
ADƏT
Toya da, vaya da adət etmişik,
Qışa da, yaya da adət etmişik,
Adətlər içində yaşayırıq biz,
Adət məcəlləsi daşıyırıq biz.
Adətlər ədədi silsilə kimi
Uzanar ən uzun mənzilə kimi,
İstəyər dünyanı gəzə adətlər,
Köhnəyə qoşular təzə adətlər -
Bu da bir adət…
Gecələr gecənin qaranlığına,
Gündüzlər günəşə adət etmişik.
Qanımız qiymətli qanunlara da
Hər yerdə, həmişə adət etmişik.
Adət etməmişik baharda qışa,
Adət etməmişik vədəsiz yaşa.
Başımız-beynimiz öyrəşməyibdir
Ağıllı beyinə, kamallı başa.
Adət etməmişik can, nəfəs verək,
Barı, heç olmasa son nəfəs verək
Qəfəsdə çırpınan yaralı quşa.
Adət etməmişik, eləmərik də
Havayı yaxşılıq eləməyə biz.
Özünüz bilirsiz, mən deməsəm də -
Adət etməmişik daha nəyə biz…
1981
Сечилмиш ясярляри
153
YAYLAQ XATİRƏSİ
Bulaq başı idi bizim yurd yeri,
Bulağa qonşuydu alaçığımız.
Şığıyan buludu qovardı geri
Keçədən yapılan «qalacığımız».
Büdrəmək bilməzdik dumanda, sisdə,
Quş kimi qonardıq dağın döşünə.
Yuxuya gedərdik göy otlar üstdə -
Döşəyə dönərdi yaşıl döşəmə…
Helləyib dərəyə yıxardıq bəzən
Çobanın o qaya «gündəliyini».
Elə alaçıqdan yığardıq bəzən
Cincilim, qırxbuğum kətəliyini.
Vaxtsız «biçilərdi» biçənək yeri -
Qoyunlar qoruqda ot tıxardılar.
Biçməyə qoymayıb bir çərək yeri
Körpə quzular da otuxardılar…
Haçan ki, gün batıb, şər qarışardı
İnəyin, buzovun mələrtisindən
Qoyunun, quzunun mələrtisindən
Elə bil göy ilə yer qarışardı…
O yurda isnişən atımızı da
Əvəlik şaxına bağlardı atam.
Altı uşaq idik…
altımızı da
Ovcunun içində saxlardı atam…
Адил Ъямил
154
O illər yatdığım yuxu kimidir,
Qismətin qəsdinə durub neyləyim.
Anamın yaydığı yuxa kimidir
Kövrələn ürəyim, yuxa ürəyim…
…Bulaq başı idi bizim yurd yeri;
Bulağa qonşuydu alaçığımız.
İlləri adlayıb qayıdam geri -
Yenə dağlar ola olacağımız..
1983
Сечилмиш ясярляри
155
QƏRİB QUŞLAR, PƏNCƏRƏMDƏN ÇƏKİLİN
Musiqisi Novruz Aslanınıdır
Bu gecəni gözüaçıq yatmışam,
Fikir adlı bir ümmanda batmışam…
Görürsünüz ürəyimi tutmuşam -
Qərib quşlar, pəncərəmdən çəkilin.
Yollar yorub açmadığım iz - qərib,
Ürəyimi yuva bilən söz - qərib…
Nə dilərsiz mən qəribdən siz qərib -
Qərib quşlar, pəncərəmdən çəkilin.
Damarımda axıb gedən duyğusuz,
Ya nənəmin, ya babamın ruhusuz…
Gözlərimdən çəkilməyən yuxusuz -
Qərib quşlar, pəncərəmdən çəkilin.
Asılmayın eyvanımın tağından,
Qopun gedin ürəyimin dağından…
Boylanmayın mənə belə yaxından -
Qərib quşlar, pəncərəmdən çəkilin.
Necə sovum bu dümanı, bu çəni,
Necə qovum göydən yerə «köçəni»?!
Oxumayın ürəyimdən keçəni -
Qərib quşlar, pəncərəmdən çəkilin.
Bu dünyada budağı yox köksüzün,
Mən insanam - yer mənimdir, göy sizin…
Göy üzünü sizə verdim – hey süzün,
Qərib quşlar, pəncərəmdən çəkilin.
Kəlbəcər, 1983
Адил Ъямил
156
ÇİÇƏKLƏNMƏ
Göyərib gölmə-gölmə,
Allahın boz yolu da.
Fərəhdən çiçəkləyib
Qaratikan kolu da…
Gerçəklər yalan olub,
Yalanlar gerçəkləyib.
Bir baba qollarında
Bir uşaq çiçəkləyib…
Qarlı görüb zirvəni
Bənövşələr büzüşüb.
Dağlara düşən şehin
İşığı kəndə düşüb.
Yazın «əlində» gəlib
Qışın «qanlı köynəyi».
Beləcə çiçək-çiçək
Sanki çıxır canından
Təbiətin göynəyi…
1983
Dostları ilə paylaş: |