47
1612 (Sərab sülhü) və 1639-cu illərdə imzalanmış mügavilələr (Qəsri-Şirin sülhü)
nəticəsində uzunmüddətli Osmanlı-Səfəvi müharibələrinə XVIII əsrin əvvəllərinədək son
qoyulur və Azərbaycanda müvəqqəti sakitlik bərpa olunur.
XVIII əsrin əvvəllərindən Azərbaycanda Səfəvi idarəçiliyinə qarşı narazılıq
getdikcə artır və əyalətlərdə kortəbii üsyanlar başlayır. Bu dövrdə Avropada və dünyada
mərkəzləşmiş dövlətlərin getdikcə güclənməsi, müstəmləkə hərəkatının vüsəti və
ənənəvi imperiyaların tədricən keçmiş müstəmləkə ərazilərindən sıxışdırılması prosesi
gedirdi. Azərbaycanda Səfəvi dövlətinin zəifləməsi və əyalətlərdə onun idarəçiliyinə
qarşı getdikcə artan narazılıq ölkənin tezliklə müxtəlif xanlıqlara parçalanmasını
qaçılmaz edirdi. Bu proses daha çox həmin dövrdə Qafqaz, Xəzər-Qara dəniz
hövzəsində getdikcə öz imperiya maraqlarını reallaşdırmağa başlayan Böyük Britaniya
və Rusiyanın işinə yarayırdı.
XVIII əsrin əvvəllərindən başlayaraq Rusiya artıq Dərbənd, Şirvan, Gəncəyə və
digər bölgələrə diplomatik missiyalar, kəşfiyyat məqsədi güdən ekspedisiyalar göndərir
və I Pyotrun böyük Xəzər və Qafqaz yürüşləri üçün planlar hazırlayırdı. Ruslar ayrı-
ayrılıqda Qafqazda həm Osmanlı, həm də İran hökmdarları ilə separat danışıqlar aparır,
onların arasındakı ziddiyyətdən öz müstəmləkə siyasəti naminə istifadə etməyə
çalışırdı. Rusiya 1722-1723-cü illər ərzində Dərbənd, Bakı və Rəştə yürüş edərək
Azərbaycanın Xəzərboyu vilayətlərini ələ keçirir. İranda Səfəvilərin getdikcə zəifləməsi,
baş verən hakimiyyət dəyişikliyi, osmanlıların və rusların Qafqaz qarşıdurması, nəhayət,
onların qarşılıqlı olaraq qanlı müharibələrdən qaçmaq istəyi 1724-cü ildə İstanbulda sülh
müqaviləsi imzalanması ilə başa çatır. Müqaviləyə görə, Türkiyə İranın “Rusiyaya
güzəşt etdiyi Xəzərsahili” Azərbaycan torpaqlarının yeni statusunu təsdiq edir, əvəzində
isə Rusiya Şirvan istisna olmaqla Səfəvilərə məxsus digər Azərbaycan ərazilərinin və
Cənubi Qafqazın bir hissəsinin Osmanlı dövləti tərəfindən tutulmasına etiraz
etməyəcəyinə təminat verir. Beləliklə, Rusiya və Osmanlı dövlətləri Azərbaycan
ərazilərini İrandan alaraq öz aralarında bölüşmək barədə razılığa gəlirlər. Ruslar
Xəzərətrafı əraziləri ələ keçirəndən sonra bir qədər sakitləşsələr də, Osmanlı dövləti ilə
İran 1724-1735-ci illərdə Cənubi Azərbaycan və Cənubi Qafqaz uğrunda ciddi
mübarizəyə başlayırlar. Bu illərdə İran Nadir şahın rəhbərliyi ilə Türkiyəni bütün Cənubi
Azərbaycan və Cənubi Qafqazdan çıxarmağa nail olur. 1735-ci ildə Rusiya ilə “Gəncə
müqaviləsi” adlanan sülh müqaviləsi bağlayan Nadir şah rusları da bütün Xəzərsahili
ərazilərdən geri çəkilməyə məcbur edir, Azərbaycan torpaqlarını öz hakimiyyətinə tabe
edərək 1747-ci ilə qədər İranda hökmdarlıq edir.
48
Lakin Nadir şahın ölümündən sonra XVIII əsrin ortalarından Azərbaycan
dövlətçiliyi meydana çıxan xanlıqların timsalında yenidən bərpa olunur. Bu illərdə
Cənubda Təbriz, Urmiya, Xoy, Qaradağ, Sərab, Marağa, Maku, Ərdəbil, Şimalda isə
Qarabağ, Gəncə, Bakı, Quba, Naxçıvan, Şəki, Şamaxı,İrəvan, Talış və Cavad xanlıqları
yaranır. Daxili idarəçilik sistemini quran xanlıqlar müstəqil siyasət yürütməyə, qonşu
dövlətlərlə – Rusiya, Türkiyə və İran ilə əlaqələr yaratmağa başlayırlar.
Bu xanlıqlar hərbi-siyasi cəhətdən regionun böyük dövlətlərinin müstəmləkə
siyasətinə qarşı çıxa bilməsə də, Azərbaycan xalqının dövlətçilik ənənələrini qoruyub
saxlamış, ətraf dövlətlərlə sərbəst münasibətlər qura bilmişdilər. Regionda XVIII-XIX
əsrlərdə yerli xanlıqlarla Rusiya, Türkiyə və İran arasındakı münasibətlər daha çox milli
təəssübkeşlik və dini birlik amili üzərində qurulurdu. Bu dövlətlər yerli xanlıqlardan öz
siyasi və strateji maraqları naminə istifadə edərək Cənubi Qafqazda, o cümlədən
Azərbaycanda möhkəmlənməyə çalışırdılar. Rusiyanın məqsədi Gürcüstanı,
Türkiyəninki isə azərbaycanlıları və digər xalqları öz himayəsi altına alaraq, onların
xarici aləmlə təmaslarına nəzarət etməkdən ibarət idi.
Azərbaycanın taleyi bu bir əsrlik dövrdə (Şimali və Cənubi Azərbaycan Rusiya ilə
İran arasında 1813 və 1828-ci ildə tam bölünənə qədər) Rusiya-İran, Rusiya-Türkiyə və
Türkiyə-İran arasında bir neçə müharibə nəticəsində həll edildi. 1804-1813 və 1826-
1828-ci illər Rusiya-İran, 1806-1812 və 1828-1829-cu illərdə Rusiya-Türkiyə
müharibələri ilə Rusiya Şimali Azərbaycanı və Qara dənizin şərq hissəsi daxil olmaqla
Cənubi Qafqazın digər ərazilərini tam işğal edir və öz tərkibinə qatır. Gülüstan və
Türkmənçay müqavilələrinin (1813,1828) şərtlərinə görə, Cənubi Azərbaycan İranın
tərkibində qalır. Beləliklə, I Dünya müharibəsində Rusiyanın məğlubiyyəti, bu dövlətdə
baş verən bolşevik inqilabının qələbəsi və Rusiya imperiyasının dağılması (1918-ci il)
dövrünə qədər Şimali Azərbaycan bütövlükdə bu ölkənin işğalı altında olmuşdur.
Birinci dünya müharibəsi çar Rusiyasında gedən ictimai-siyasi prosesləri daha
da mürəkkəbləşdirdi və ucqarlarda milli özünüdərk hissinin yaranmasına, onun getdikcə
güclənməsinə böyük təkan verdi. Həmçinin, 1917-ci il fevral inqilabı çar Rusiyası və milli
ucqarlarda davam edən böhranlı vəziyyəti daha da ağırlaşdırdı. Zaqafqaziyanı idarə
etməyin getdikcə çətinləşdiyini nəzərə alaraq, bu regionu nəzarətdə saxlamaq üçün
Dövlət Dumasının Cənubi Qafqazdan olan bir qrup deputatının təşəbbüsü ilə yaradılan
Xüsusi Komitənin fəaliyyəti də səmərəsiz oldu. Çünki bölgədə xalqların milli müstəqillik
və muxtariyyət uğrunda mübarizəsinin qarşısının alınması, çoxsaylı siyasi partiyaların
və ictimai təşkilatların fəaliyyətinin dayandırılması mümkün deyildi. 1917-ci il oktyabr