464
səmimi cəhdlər göstərdiyinə inanacaqdır. Aprelin 19-da isə A.Lavrişev Baş nazir
H.Saka tərəfindən qəbul edildi. H.Saka dedi: "Əgər siz siyasi şəraiti müzakirə
etmək istəyirsinizsə, xarici işlər naziri N.Sadak həmişə sizin xidmətinizdədir"
(23).
Aprel ayının 21-də A.Lavrişev Ankaradakı Polşa səfiri Druto ilə görüşdü.
Druto aprel ayının 20-də N.Sadakla olan geniş söhbəti barədə Sovet səfirinə
məlumat verdi. Polşa səfiri N.Sadakdan Sovet-Türk münasibətinin vəziyyətini
soruşduqda xarici işlər naziri bu cavabın SSRİ səfirinə çatdırılacağını nəzərə
alaraq bildirmişdi ki, Türkiyə bu vəziyyətdən razı deyil, Sovet İttifaqı onun daimi
qonşusudur və buna görə də Türkiyə Sovetlərlə dostluq münasibətlərinə can atır.
N.Sadak xatırlatmışdı ki, Türkiyə hələ 1945-ci ildə SSRİ ilə dostluq müqaviləsinin
vaxtını uzatmaq və ya onunla yeni müqavilə bağlamaq istəyirdi. Onun fikrincə,
Türkiyənin bu cəhdləri ona görə uğur qazanmadı ki, həmin vaxt Sovet İttifaqı
Qars və Ərdahana iddialar irəli sürdü. N.Sadak əlavə etmişdi ki, "Sovetlərin indiyə
qədər öz iddialarını geri götürməsi barədə bəyanat verməməsindən Türkiyə
narahatdır. Türkiyə bilmir ki, ona münasibətdə daha hansı tələblər irəli sürüləcək.
Odur ki, gözlənilməz vəziyyətdən yayınmaq üçün Türkiyə hökuməti Sovetlərlə
sərhədi möhkəmləndirmək və böyük ordu saxlamağa məcburdur". N.Sadak qeyd
etdi ki, əgər Sovet İttifaqı tərəfindən xeyirxahlıq göstərilib Türkiyəyə qarşı ərazi
iddiaları geri götürülərsə, Türkiyə SSRİ ilə dostluq münasibətləri yaradılmasına
hazırdır (24).
Aprel ayının sonlarında yeni Sovet səfiri Ankaradakı Kanada, Britaniya və
ABŞ səfirləri ilə tanışlıq görüşləri keçirdi. Görüş zamanı Kanada səfiri Odlum
A.Lavrişevə bildirdi ki, Sovet İttifaqı 1944-cü ildə çox böyük şöhrət qazanmışdı,
indi o bu şöhrəti itirib. O dedi ki, Sovet İttifaqının siyasəti çoxlarının xoşuna
gəlmir, ona görə ki, bu, mahiyyət etibarilə ekspansionist siyasətdir və böyük
dövlətlər arasında əməkdaşlığa mane olur. Britaniya səfiri Kelli ilə görüşdə
A.Lavrişev ərəb ölkələri və Türkiyənin iştirak etdiyi Yaxın Şərq bloku haqqında
maraqlandı. Kelli hesab edirdi ki, belə bir blokun yaradılması ideyası vaxtında
irəli sürülmüşdür. O, dedi ki, ümumi sülhü və təhlükəsizliyi qorumağa yönəlmiş
regional blokların yaradılmasına yaxşı yanaşır. Kelli bildirdi ki, bloklar məsələsi
yeni deyil, belə ki, Qərb ölkələrinin bloku artıq mövcuddur və daha əvvəl faktiki
olaraq Sovet İttifaqı başda olmaqla Şərqi Avropa dövlətlərinin bloku yaradılıb.
A.Lavrişev cavab verdi ki, Şərqi Avropada heç bir blok mövcud deyil, Sovet
İttifaqı Şərqi Avropa dövlətləri ilə ikitərəfli müqavilələrə malikdir və səfirin
fikrincə bu müqavilələrin əsas məqsədi, Almaniya təcavüzü təkrar olunacağı
təqdirdə həmin ölkələrə köməklik göstərməkdən ibarət olmalı idi (25).
1948-ci ilin may ayının ikinci yarısında Türkiyə Məclisinin və hökumətinin bir
sıra üzvləri bölgələrə səfər etdilər. Xarici siyasət baxımından
465
bunlardan ən mühümü Millət Məclisinin xarici siyasət komissiyasının sədri Nihat
Erimin may ayının 16-da Xalq Cümhuriyyətçi partiyanın Kocaeli vilayət
qurultayında və N.Sadakın partiyanın Sivas vilayət qurultayında çıxışı idi. N.Erim
öz çıxışında qeyd etdi ki, xarici siyasət sahəsində Türkiyənin qarşısında duran ən
mühüm məsələ Rusiyanın Türkiyədən bir sıra vilayətləri tələb etməsi və
Boğazlarda baza yaratmaq istəkləri ilə bağlıdır. O dedi ki, son beş yüz il ərzində
türk millətinin taleyi Rusiyanın yeritdiyi siyasətlə sıx bağlıdır. Bütün qonşularla
olduğu kimi, Rusiya ilə də dostluq şəraitində yaşamaq Türkiyənin başlıca
prinsipidir. Lakin türk dostluğunun başlıca şərti ölkənin ərazi bütövlüyünə, milli
ləyaqətinə ziyan vurmamaqdır. Rusiya bu şərtlərə əməl etdiyi vaxt bu dostluq
Türkiyənin xarici siyasətinin başlıca xətti idi. N.Erim dedi ki, indi Türkiyədən
ərazi və Boğazlarda bazalar tələb edən dövlət, təəssüflər olsun ki, Rusiyadır.
Türkiyəyə gəldikdə isə o qeyd etdi ki, onun heç bir ölkəyə münasibətdə
təcavüzkar niyyətləri yoxdur və onun siyasətində heç nə dəyişməyib. May ayının
23-də N.Sadakda Sivasda təxminən buna bənzər bir çıxış etdi və o bildirdi ki,
Türkiyə Sovetlərlə dostluq münasibətlərinin bərpa edilməsini ürəkdən arzulayır.
N.Sadak vurğuladı ki, Sovet rəhbərləri Türkiyənin öz şimal qonşusu ilə mehriban
dostluq şəraitində yaşamaq arzusunu bilirlər. Lakin buna nail olmaq üçün Türkiyə
nə öz torpağından bir qarış, nə də öz suverenliyindən bir damla qurban vermək
fikrində deyil. O əlavə etdi ki, Türkiyə bu məsələdə alver edə bilməz (26). Bir sıra
jurnalistlər N.Sadakın Sivas çıxışını A.Lavrişevin Ankaraya gəldikdan sonra
öyrənmək istədiyi məsələlərə cavab kimi qiymətləndirdilər.
Sivasdan qayıtdıqdan sonra N.Sadak may ayının 27-də A.Lavrişevin şərəfinə
ziyafət verdi. Türkiyə Xarici İşlər Nazirliyi bir qayda olaraq Ankaraya yeni gələn
səfirlərlə bağlı belə mərasimlər keçirirdi. Mərasimdə söhbət zamam A.Lavrişev
Türkiyənin etatizm siyasətindən geri çəkilməsi və dövlət müəssisələrinin bir
hissəsini satmaq istəməsi barədə məbuatda gedən yazılarla maraqlandı. N.Sadak
qəti olaraq bildirdi ki, hakim partiya etatizm prinsiplərindən geri çəkilməyəcək və
o, mətbuatda gedən belə yazıları "Amerikadan gələn dəbin" təzahürü kimi
dəyərləndirdi. A.Lavrişev dedi ki, Ankarada gəzən şayiələrə görə, etatizmdən
imtina etməyi amerikanlar hökumətə tövsiyə edirlər. N.Sadak cavabında bildirirdi
ki, dolayı yollarla amerikanlar məsləhət verdilər, lakin onlar bu məsələ ilə bağlı
bilavasitə türk hökumətinə heç bir təsir göstərmədilər (27). Söhbət zamanı Siyasi
Büronun tapşırıqlarına uyğun olaraq A.Lavrişev Sovet-Türk münasibətlərinə
toxunmadı.
Uzun araşdırmalardan sonra Marşall planı üzrə göstərilən iqtisadi yardımla
bağlı Amerika-Türkiyə sazişi 1948-ci ilin iyul ayının 4-də imzalandı. Türkiyə
hökuməti adından sazişi N.Sadak, ABŞ hökuməti