494
tərəfdən Türkiyənin Atlantik paktına girməsi üçün DP hökumətinin mövqeyini
dayanaqlı etmişdi, digər tərəfdən Koreya müharibəsi ilə bağlı ölkə içində
hökumətə qarşı mübarizənin əhəmiyyətini heçə endirmişdi. Hökumətin Koreyaya
ordu göndərməsi ilə bağlı məsələnin Məclisdə müzakirəsini tələb edən Milli
partiyadan deputat Osman Bölükbaşı və müstəqil deputat Kemal Türkoğlunun
sorğusuna cavab olaraq bu məsələ dekabr ayının 11-də Məclisin müzakirəsinə
çıxarıldı. Sorğu müəllifləri çıxış edərək bildirdilər ki, onlar prinsip etibarı ilə
Koreyaya türk əsgərinin göndərilməsinin əleyhinə deyillər. Lakin onlar bu
addımın Məclisin razılığı olmadan atıldığını Konstitusiyaya və BMT-nin
Nizamnaməsinin 43-cü maddəsinə zidd hesab edirlər. Onlar xüsusi ilə belə bir
məsələni qabardırdılar ki, hökumət Türkiyənin təhlükəsizliyinə ABŞ tərəfindən
ciddi təminatlar almadan türk əsgərini Koreyaya göndərib. Məclisdəki Xalq
respublikaçı partiyanın nümayəndələri də Koreyaya ordu göndərilməsinin
antikonstitusion xarakter daşıması fikrini dəstəklədilər. Baş nazir A.Menderes və
xarici işlər naziri F.Köprülü məsələ ilə bağlı izahat verərək bildirdilər ki,
Koreyaya ordu göndərmək üçün Məclisin qərarının olması tələb olunmur, belə ki,
burada söhbət müharibə elan etməkdən deyil, sülhün qorunması üçün tədbirlər
görülməsindən gedir. Onlar bildirdilər ki, Koreyaya ordu göndərilməsi BMT-ni
möhkəmləndirir və bununla da Türkiyənin təhlükəsizliyini gücləndirir. Menderes
və Köprülü bildirdilər ki, sorğu müəlliflərinin nöqteyi-nəzəri və onların BMT
Nizamnaməsini şərh etmələri, BMT üzvlərinin böyük əksəriyyətinin deyil, Sovet
İttifaqının nöqteyi-nəzərinə uyğun gəlir. Müzakirələrin gedişində A.Menderesdən
soruşuldu ki, hökumət Koreyadakı türk ordusunun sayını artıracaq, yoxsa əvvəlki
kontingent yetərli olacaq? O dedi: "Ölkənin maraqları tələb edir ki, mən indiki
anda bu məsələ ilə bağlı hər hansı açıqlama verməyim". Məclisdə məsələnin
müzakirəsi hökumətə etimad göstərilməsinin səsverməyə qoyulmasına gətirib
çıxardı. Lakin, səsvermə zamanı 311 deputat hökumətə etimad göstərilməsinin
lehinə, 39 nəfər isə əleyhinə olmaqla A.Menderes hökumətinin ilk sınaqdan uğurla
çıxması ilə nəticələndi (89).
1951-ci ilin ilk günlərindən Türkiyənin ABŞ və Böyük Britaniya ilə hərbi və
siyasi əlaqələri intensiv xarakter aldı, C.Bayar Türkiyənin Amerika, İngiltərə və
Fransadakı səfirlərinə göstəriş verdi ki, NATO-ya girmək məsələsində israrlı
mövqe tutsunlar. Eyni zamanda Xarici İşlər Nazirliyi həmin ölkələrin Ankaradakı
səfirlikləri ilə bu mövzuda aktiv müzakirələrə başladı. Yanvar ayının 10-da
Ankaraya gələn ABŞ-ın Atlantika və Aralıq dənizində hərbi dəniz qüvvələrinin
komandanı admiral Kerniy bir gün sonra C.Bayar tərəfindən qəbul edildi. C.Bayar
Türkiyə ilə ABŞ arasında yaranmış hərbi və siyasi əməkdaşlıqdan razı qaldığını
ifadə etməklə Türkiyənin 20 milyonluq əhalisinin demokratik dünyaya böyük
yardım edə biləcəyi halda, daha zəif dövlətlərin Atlantik paktında yer
495
aldığını və Türkiyənin bu pakta qəbul edilmədiyini təəssüf hissi ilə dilə gətirdi.
Bununla yanaşı C.Bayar dedi: "Bu təşkilata qəbul olunmamağımız bizim
siyasətimizdə heç bir dəyişiklik etmir. Biz bundan sonra da qayə və prinsiplərimiz
uğrunda eyni şəkildə çalışmaqdayıq və çalışacağıq" (90). Admiral Kernin səfəri
zamanı Ankarada türk ordusunun Baş qərargahının rəisi, hərbi dəniz qüvvələrinin
və hərbi hava qüvvələrinin komandanı ilə danışıqlar aparılmışdı. Yanvar ayının
12-də mətbuata verdiyi açıqlamada Kerniy bildirdi ki, Türkiyə Baş qərargahında
bilavasitə Türkiyəni maraqlandıran məsələlər və Aralıq dənizinin müdafiəsi ilə
bağlı səmərəli danışıqlar aparılıb və bu məsələdə bizim aramızda fikir ayrılığı
yoxdur (91).
1951-ci il yanvar ayının 22-24-də İngiltərənin Yaxın Şərq ordusunun baş
komandanı general Brayrı Robertson ilə admiral Kerniy arasında Maltada
keçirilən görüşdə Türkiyənin Yaxın Şərq regionunun təhlükəsizliyində oynaya
biləcəyi rol müzakirə edildi. General Robertson coğrafi baxımdan Türkiyənin daha
çox Orta Şərq ölkəsi olduğuna istinad edərək onun gücündən bu regionda
təhlükəsizliyin təmin edilməsində istifadə edilməsini irəli sürdükdə admiral
Kerniy Türkiyəni silahla təmin edən ölkənin ABŞ olduğunu xatırlatdı və onun
Aralıq dənizinin təhlükəsizliyi prosesində iştirakını daha vacib saydı. Az sonra
fevral ayının 22-də Ankaraya səfər zamanı general Robertson öz fikrini Türkiyə
hərbi və siyasi dairələri ilə də bölüşdü. Səfər zamanı Robertson Türkiyənin
müdafiə naziri Şövket İnce, Baş qərargah rəisi Nuri Yamut, xarici işlər naziri
F.Köprülü və prezident C.Bayar tərəfindən qəbul edildi. Apardığı danışıqlarda
Robertson Türkiyənin silahlı qüvvələrinin Aralıq dənizində NATO
komandanlığının əmrinə verilməkdənsə Orta Şərq təhlükəsizlik sistemində
İngiltərə ilə ittifaq qurmasını daha əhəmiyyətli hesab etdi. Səfər zamanı general
Robertson Ankara və İstanbulun hərbi məktəb və müəssisələrinə baş çəkdi.
General Robertsonun səfəri ilə bağlı Sovet səfirliyi Moskvaya yazırdı ki, onun
Türkiyəyə və Yaxın Şərq ölkələrinə səfəri ingilis və amerikanların bu regionu öz
təcavüzkar planlarına cəlb etmək xarakteri daşıyır (92).
Türkiyənin təhlükəsizliyini daha da etibarlı etmək üçün yanvar ayının 23-də
Vaşinqtondakı türk səfiri F.C.Erkin ABŞ hökumətinə 1939-cu ildə imzalanmış
ingilis-fransız-türk müqaviləsinə qoşulmaq təklifi ilə müraciət etdi. Türkiyə siyasi
dairələri belə hesab edirdilər ki, ABŞ-ın bu müqavilədə iştirakı ölkənin hər hansı
hücum qarşısında müdafiəsini daha təminatlı edə bilərdi. Lakin məsələ ilə tanış
olduqdan sonra ABŞ bu müqaviləyə qoşulmağa hazır olmadığını və tələsik yeni
formula hazırlamağa isə imkanının olmadığını bildirdi. ABŞ öz üzərinə hər hansı
əlavə öhdəlik götürmək istəmir, digər tərəfdən ingilis-fransız-türk müqaviləsinə
qoşulmaqla Yunanıstan və İranı Türkiyədən ayırmaq istəmirdi (93).