11
oturan bütün insanların diqqətini özünə çəkdi. Hətta çıxışına
başlayarkən dediyi bu iki cümlədən sonra qəhərləndi də.
Kürsünün küncünə qoyulmuş stəkandakı sudan bir qurtum içib
sözə başladı.
*** *** ***
1992-ci ildə ermənilərin Xocalıda azərbaycanlılara qarşı
törətdiyi həmin qanlı gün hamı kimi məni də sarsıtdı. Çox
sarsıldım... Həmin gün sevimli tələbəlik illərimin ən şirin
xatirəsini – Aytəkinimi itirdim...
Onunla 1990-cı ildə elə universitetdə tanış olmuşduq.
İkimiz də eyni fakültədə oxuyurduq. Tarix fakültəsində. Mən
üçüncü, o isə birinci kursda idi. Bir-birimizi çox sevirdik. Bu,
bəlkə də, xarakterlərimizin oxşar olmasından doğurdu.
Aytəkin vətənini həmişə əziz tuturdu. Vətən haqqında özünün
gözəl fikirləri olurdu həmişə. Hərdən onun belə söhbətlərinə
qulaq asanda qeyri-ixtiyari olaraq özümü tarix dərsindəymiş
kimi hiss edirdim. Bəzən ona zarafatca “ay qız, sən lap canlı
vətənpərvərlik dastanısan ki!” deyərdim. Elə vaxtlar olurdu ki,
bu söhbətlərdə mübahisəmiz də yaranırdı. Hətta bir dəfə
bilərəkdən dediyim “vətənin dərdi sənə qalıb?!” sözündən
sonra bir həftə məni danışdırmadı. Bu sözə görə məndən bərk
incimişdi. Onda hələ beş-altı ay idi ki, tanış olmuşduq.
Sonradan mənim bu sözləri ürəkdən demədiyimi anladı və
mənə inandı. O vaxt biz bir-birimizi dəlicəsinə sevirdik. Öz
aramızda saf gənc qəlbimizin ölənə qədər bir olacağına and
içib əhdü-peyman bağlamışdıq. Amma evlərində deməmişdi.
Həmin yay Xocalıya – öz yurduna yay tətilinə gedəndə söz
vermişdi ki, anasına deyəcək. Ancaq.... Məni qoyub getdi!
Əhdinə sadiq qaldı. Mən isə bunu bacarmadım. Ailə həyatı
qurdum, işlədim, övlad sahibi oldum... Qızıma onun adını
verdim. Beşinci sinifdə oxuyur. Tarix dərslərini çox sevir...
12
Aytəkin kimi... Ona baxanda 19 il əvvəli və sonranı
düşünürəm həmişə. Neçə-neçə talesiz insanlarımız gözlərimin
önündə canlanır. Qarabağdakı döyüşlərimizi xatırlayıram.
Gecə də, gündüz də bu fikirlərimlə yatıb qalxıram. Fikirlərim
isə ümidli olmağa çağırır məni. Ümidlərimin izinə düşüb
dünyanı qarış-qarış gəzib Aytəkinimi axtarmaq istəyirəm...
Qardaşı Kənanı, bacısı Gülcahanı, həmin yay Naxçıvandan
onlara qonaq gəlmiş qoca nənəsini, namusu tapdalanmış
analarımızı, bacılarımızı, gəlinlərimizi, qocalıq ixtiyarları
əlindən alınmış ata-babalarımızı, uşaqlıq sevincləri gözlərində
qalmış körpələrimizi, qisas almaq atəşi ilə dişi bağırsaqlarını
kəsən cavan oğullarımızı haraylamaq istəyirəm... Və bir də...
Bir də həmin məktubu oxumaq istəyirəm. Sonuncu
məktubuma Aytəkinimin yazdığı şad xəbər dolu cavab
məktubunu. Demişdi ki, aramızdakı münasibəti, bir-birimizi
sevdiyimizi anama deyən kimi sənə məktub yazacağam.
Görəsən, demişdimi?!
Əgər demişdisə, məktub da
yazmışdımı?!...
*** *** ***
Universitet müəlliminin çıxışı yarımçıq qaldı. Ola bilsin
ki, fikirlərini tamamlamışdı. Onsuz da deyəcəyini deyib
hamını xeyli kövrəltmişdi. Rektorun işarəsi onun halının
pisləşdiyini göstərirdi. İki nəfər tələbə gənc kürsüyə yaxınlaşıb
onun düşməsinə kömək etdilər. Deyəsən, zaldan çıxarırdılar.
Sevgilisini itirəndən sonra ali təhsilini yarımçıq qoyub
müharibəyə yollanan Ramil müəllim ətrafında olanları heyrətə
gətirən yüksək şücaətlə Qarabağdakı qanlı döyüşlərdə iştirak
etmişdi. Dəfələrlə ölümlə üz-üzə gəlmişdi. 1993-cü ildə Ağdam
rayonu uğrunda gedən döyüşlərdə başından ağır yaralanmış,
iki ilə qədər müalicə alsa da, hərdən səhhətində belə
çətinliklərlə üzləşirdi. Həkim həyəcanlanmağın ona çox pis
13
təsir etdiyini dəfələrlə demişdisə də, Ramil müəllim buna
məhəl qoymurdu.
*** *** ***
Mayor Qüdrətov tədbir yekunlaşan kimi ayağa qalxıb
arxa qapı tərəfdən çıxışa yaxınlaşdı. Sürətlə pilləkənləri aşağı
düşüb universitetin həyətinə çıxdı. Ətrafda bayaqkından daha
çox adam gözə dəyirdi. Təxminən saat yarımlıq tədbirdən
sonra sanki bu insanlar daha qayğısız görünürdülər. Elə bil
ildə bir dəfə verməli olduqları danışmaq borclarını yerinə
yetirib rahatlamışdılar. Bunu Qüdrətov görə bilirdi. Amma
nədənsə çox fikirli idi. Siqaret yandırıb özünəməxsus ustalıqla
ətrafa göz gəzdirdi. Baxışlarından bu dəqiqələrdə kimisə
axtardığı aşkar hiss olunurdu. Bu baxışlarda maraq, təəccüb
və hətta, heyrətdən doğan qəribə bir ahəng var idi. Məxfi
şöbənin gizli agentinin bu qədər böyük istəklə həyətdə
görməyə çalışdığı adam, görəsən, kim idi?!. Bəlkə, bir az əvvəl
tədbirdə çıxış edərək hamını kövrəldən həmin o Ramil
müəllim?! Bəlkə, tədbiri giriş sözü ilə açan rektor?! Yox,
deyəsən, birinci idi. Çünki elə bu saniyələrdə rektor onun üçün
açılmış arxa sağ qapıdan dövlət nömrə nişanlı qara maşına
oturaraq oradan uzaqlaşdı. Sürücünün idarə etdiyi maşın
hətta Qüdrətovun iki addımlığından keçib getsə də, bu
mayorun diqqətini çəkmədi. Deməli, o, həqiqətən də, Ramil
haqqında düşünürdü. Kəskin baxışlarında qətiyyət hiss
olunurdu. Bu, adətən, o hansısa bir əməliyyata başladıqda,
yaxud nəyinsə üstünü açdıqda daha çox biruzə verirdi.
Görəsən, Ramil müəllimlə bağlı mayorun kəskin marağına
səbəb olan nə idi?!
*** *** ***
Qüdrətov arxa həyətdə saxladığı maşınına çatar-
çatmaz pultu işə saldı. Qapını açıb əlindəki qara cildli kitabı
14
və paltosunu soyunub arxa oturacağa qoyaraq tərəddüd
etmədən mühərriki işə saldı, onun üçün açılmış darvazadan
çıxaraq oradan uzaqlaşdı.
– Universitetin tarix fakültəsində yaşı 40-42 arası olan
Ramil adlı müəllim haqqında bu gün axşama qədər ətraflı
məlumat istəyirəm. Bu gün tədbirdə çıxış edib, baş müəllimdir.
Zəng etdiyi adama bunları tapşırıb telefon əlaqəsini kəsdi.
İndi onun idarə etdiyi tünd göy rəngli “BMW” markalı maşın
Mətbuat prospektindən Badamdar qəsəbəsi istiqamətində
sürətlə irəliləyirdi. Evə tələsirdi. Deyəsən, axtardığı öz iş
otağında kitablarının, yaxud da sənədlərinin içərisində olmalı
idi.
Həmin gündəlik... Qüdrətov onu axıra qədər
oxumuşdumu?! Bir-neçə dəfə cəhd etmişdi, alınmamışdı.
Amma sonra hansısa araşdırma zamanı əməliyyata gərəkli
materiallar toplaması üçün bir dəfə axıra qədər oxumuşdu,
deyəsən. İnsanın qanını damarda dondururdu orada
yazılanlar. Bəs indi təcrübəli təhlükəsizlik işçisini həmin
dəftərçəni yenidən oxumağa sövq edən nə idi?! Doğrudanmı,
Dostları ilə paylaş: |