27
– Bazar günü nə iş?! Heç olmazsa axşamdan xəbər edərdin
vaxtında oyadardım da səni.
Nərminə bunu deyib sanki indi yadına düşürmüş kimi tez
də əlavə elədi:
– Axşam da gec gəlmişdin. Heç görə bildik ki, üzünü
soruşaq da?! Gəlib üstüaçıq yatmısan bu soyuqda. Yaxşı ki,
gecə baxdım.
– Yaxşı, bir az cəld ol, mən getməliyəm.
Nərminə ərinin kefsiz olduğunu görüb daha heç nə demək
istəmədi. Amma düşündü ki, əri evə qayıdanda onunla
dərdləşib əhvalının niyə belə olduğunu öyrənsin. Əgər
Nərminənin düşündüyü kimi idisə, deməli, Ramil yenə də hər
il olduğu kimi dünən gecədən səhərə qədər Aytəkini
düşünmüşdü...
Ərinin çayını süzüb yemək masasının üstünə qoydu. Özü də
yanında əyləşdi. Deyəsən, Ramil çayın gəlməsini də hiss
etmədi. Çənəsini iki ovucunun içərisinə alıb gözlərini
divardakı hansısa naməlum nöqtəyə zilləyərək xəyallara qərq
olmuşdu. Onun bu halı, yanında oturan həyat yoldaşına da
təsir etmişdi. İndi Nərminə də nə barəsindəsə düşünürdü...
*** *** ***
Onlar on iki il əvvəl evlənmişdilər. Hər ikisi ziyalı olduqları
üçün bir-birlərini yaxşı başa düşürdülər. Bir yerdə işlədiklərinə
görə evlənməmişdən əvvəl aralarında sevgidən daha çox
dostluq münasibətləri var idi. Bəlkə, indi də belə idi. Hər
halda Nərminə Ramilə ərə gələndən sonra bunu daha çox hiss
edirdi. Sonralar qayınanası Səmayə xaladan da öyrənmişdi ki,
Ramil onun təkidi ilə evlənib. Tələbə olanda Aytəkin adlı qızı
sevsə də, o, Xocalıda şəhid olur. Və buna görə də Ramil onu
unuda bilmir. Əslində kənardan baxan üçün, bilməyən üçün
Ramilin Aytəkini sevməsi haqqında yalnız bu iki-üç kəlməni
28
demək olardı. Amma Nərminə oxumuş, ağıllı bir qadın idi. O,
ərini çox yaxşı anlayır. Onu heç vaxt qınamırdı da. Hər il
Xocalı faciəsinin ildönümü gələndə ərinin könlünü almağa
çalışır, onun yanında olduğunu, ürəyinə hay verdiyini var
qüvvəsi ilə, bütün qəlbi ilə sübut etməyə çalışırdı. Sözsüz ki,
Ramil də onu yaxşı anlayırdı. Toylarından bir il sonra, qızları
Aytəkin dünyaya gələndə artıq aralarında sevgi hisləri də
cücərməyə başlamışdı.
*** *** ***
– Çayını təzələyim, Ramil, soyutdun, amma içmədin? –
Nərminə sanki indi fikirlərindən ayrılıb hələ də xəyallar
dünyasında olan ərinə səsləndi.
– Yox, belə içəcəyəm. Sən get yat, narahat olma. Bunu
deyib onu uzaqlaşdıraraq sakit düşünmək istəyirdi, deyəsən.
Özü isə stəkandakı soyumaq üzrə olan çayı birnəfəsə başına
çəkərək həyətə düşdü.
Dünən universitetdə Xocalı faciəsinin on doqquz illiyi ilə
bağlı keçirilən tədbirdən sonra “Şəhidlər Xiyabanı”na
getmişdi. Nədənsə, tək qalmaq istəyirdi. Hava qaralana qədər
orada gəzişmişdi. Sonra isə evə gəlmiş, yuxarı qalxmayaraq
29
həyətdə oturub siqaret çəkmişdi. Gəncliyini, nakam sevgisini
düşünmüşdü.
İndi həyətə düşəndə gecədən külqabıda yığılıb qalmış
siqaret kötüklərinə gözü sataşdı, sanki özü də bir anlıq
heyrətləndi. Burada gecə müddətində çəkilmiş iki qutudan çox
siqaret kötüyü var idi. Stul çəkib həyətdəki fındıq ağacının
yanında oturdu. Bir az əvvəl havadakı zəif külək indi
güclənərək, elə bil qalib olmağın məğrurluğunu yaşayırdı.
Dünənki günü və gecənin narahatlığı içərisində yatdığı qısa
vaxt ərzində gördüyü qarışıq yuxunu xatırladı...
*** *** ***
İndi onun xəyalları on səkkiz il əvvələ, qara xəbəri
eşitdiyi günə qayıtmışdı. O gün Ramil dostlarından birini
itirmişdi. Adili... Kəlbəcərdə şəhid olmuşdu Adil. Heç
meyitini də vermədilər ermənilər.
1993-cü ilin mart ayı idi. Novruz bayramı təzəcə bitmişdi.
Heç “bitmişdi” demək olmazdı da. Amma müharibə dövrü
olduğu üçün indikindən fərqli olaraq, camaatda bayram əhval
ruhiyyəsinin yerini döyüş istəyi doldurmuşdu. Ramil dostu
Adillə görüşüb universitet şəhərciyinə gəldi. Bir vaxtlar onlar
burada tanış olmuşdular. Adil biologiya fakültəsində oxusa
da, universitetin aktiv gənclərindən olan Ramili yaxşı
tanıyırdı. Onda Adil birinci kursda oxuyurdu. Ramildən bir
neçə yaş kiçik olmasına baxmayaraq, bir-birlərini yaxşı
anlayırdılar. Aralarındakı səmimi münasibət sonralar
dostluğa çevrilmişdi. Bəlkə də, bu, onların oxşar talelərindən
irəli gəlirdi. Çünki hər ikisi təhsillərini yarımçıq qoyub
müharibəyə yollanmışdı.
Gəzə-gəzə universitetin həyətindəki skamyalardan
birində oturdular. Çox söhbət etdilər.
30
– İki-üç gündən sonra gedirəm Kəlbəcərə. Evdə də
anamgilin dolanışığını gördüm, çox narahat oldum.
Doğrudur, atam işləyir. Amma mən istəyirəm ki, qardaşım
üçün kiçik də olsa, dükan kimi yer götürüm. Məktəbdən
gələnə kimi anam baxar, qardaşım dərsdən qayıdandan sonra
onu əvəz edər. Birtəhər dolanarlar...
– Ay Adil, şükür Allaha, dolanırlar da. Nəyinə lazımdır?
Sən özündən muğayat ol, yetər – Ramil onun sözünü yarımçıq
qoydu.
– Yox, mən istəyirəm rahat gedim. Ona görə... – sözünün
davamını gətirmədi. Deyəsən, pərt olmuşdu. Ramil isə necə
oldusa, bunu hiss etmədi:
– Hamı sənə kömək edir, ay Adil. Yenə də narazısan
vallah. Düzəlmədin də sən..!
Əslində Ramil bir-neçə dəfə dostu Adilə maddi baxımdan
köməklik etmişdi. Adil də öz növbəsində Ramilə çox
yaxşılıqlar etmişdi. Başqa cür ola da bilməzdi. Onlar dost
idilər. Və əgər dost idilərsə, deməli, çətin günlərində də bir-
birilərinin yanında olmalı idilər. Amma indi Ramilin bu
sözləri Adilə çox pis təsir etdi.
Ramil isə həmin gün bunu o qədər də hiss etmədi.
Yalnız üç gün sonra bildi əhvalatı. Günorta evə gələndə anası
Səmayə arvadı kədərli görüb soruşdu:
– Nə olub ay ana?! Yenə niyə kefin yoxdur?
– Adil getdi Kəlbəcərə. Bu dəqiqə orada vəziyyət yaxşı
deyil. Nigaran qaldım yazıq uşaqdan. Allah yazıq etməsin.
– Ay arvad, dayan bir görək. Necə yəni getdi?! Sən haradan
xəbər tutdun? Bəs məni görməmiş niyə gedib? Ramil sanki hər
şeyi bir anın içərisində anlamağa çalışıb birnəfəsə suallarını
yağdırdı.
– Bizimlə görüşməyə gəlmişdi. Dedi ki, inciyib səndən... –
Səmayə arvad məyus halda dilləndi. Oğluna da acıqlana
Dostları ilə paylaş: |