23
hərəkətinə görə üzr istəməsi məni ona bir daha bağlamışdı.
Özünü o qədər itirmişdi ki, Cəbhəçilərin tüğyan etdiyi
vətənpərvərlik hislərinin yüksək olduğu bir zamanda dilinin
əzbəri olan “rədd olsun SSRİ!” şüarını unutmayan Ramilin
oxumaq üçün götürdüyü Marksizim və Leninizm fəlsəfəsindən
bəhs edən hansısa bir kitab idi. Bu hadisə yadıma nə vaxt
düşürdü, gülümsəməyə bilmirdim. Bir neçə dəfə də anam buna
görə danlamışdı ki, niyə gülürsən öz-özünə.
Bütün bu düşündüklərimi elə həmin gecə basdırdım
Xocalıda. Neçə illərdi, bu danışdıqlarım yadıma düşəndə
sinəm həyacanla qalxıb enmir, gülümsünə bilmirəm, elə bil
yadıma düşdüyü zaman unutmağa çalışıram. O, mən deyiləm
demək istəyirəm. Amma nə edək ki, insan özündən qaça
bilmir, uzaqlaşa bilmir. Nə olaydı ki, Tanrı bizə bu lütfü də
verəydi. Necə ki bəyənmədiyimiz hər şeyi ata, unuda bilirik,
kaş ki özümüzdə də xoşagəlməz, xatırlamaq istəmədiyimiz
hisləri kəsib ata biləydik...
Saf, məsum, pak gülüşümün donduğu o gecə səbəbkar idi
buna. Həmin gecə ki, camaatın niyə çığırışdığını, hara
qaçdığını, sanki yuxuda görmüşəm. Nə tam xatırlaya bilirəm,
nə də unuda... Amma xatırlamaq istəmədiyim kimi, unuda da
bilmirəm.
*** *** ***
.... Nənəmin ayaqlarını ovurdum. Birdən odun gətirmək
üçün həyətə çıxan anamın pəncərədən: “qaçın”,- deməsi ilə
atəş səsinin açılması bir oldu. Anam susdu... Üzümüzə baxa-
baxa susdu. Gözləri ilə “məni bağışlayın” deyə-deyə susdu...
Sanki anam ölümlə həyat arasındakı bir anlıq baxışında bizə
kömək edə bilməyəcəyi üçün narahat idi. Sanki başımıza
nələrin gələcəyini bilirdi. Bizi başsız gördüyü üçün ürəyi
ağrıyır, gücsüz olduğu üçün əzab çəkirdi...
24
O
zaman
anamın o cür qəddarcasına öldürülməsinə nə
qədər kədərlənmişdimsə, sonralar Tanrıya anamı bu cür
ölümlə mükafatlandırdığına görə dəfələrlə şükür etmişdim.
Sözsüz ki, anam onun ölümü üçün Tanrıya şükür etməyimi
eşidə, görə bilsəydi, məni ömrü boyu bağışlamazdı. Amma
yazıq anam, nə biləydi ki, 6 yaşlı körpəsinin cinsiyyət
orqanından gülələnməsini, əzablar içində qıvrınmasını, mənə
sığınmaq istəməsini, qışqırtısını, fəryadını görmədiyi,
eşitmədiyi üçün Tanrıya şükür etmişəm?! Nə biləydi ki, bir
zamanlar əlinə keçəni cehizləri üçün aldığı, telli-duvağlı gəlin
köçəcəyini ümid edən qızları ömürlərinin bahar çağında üç
erməni dığası və ruslar tərəfindən nənələrinin gözü qabağında
zorlandığını görməməsi üçün Tanrıya şükür etmişəm! Nə
biləydi ki, insan övladına xas olmayan hərəkətlərlə zorlandığı
anda gözlərini analarına dikən, fəryad qoparan, nalə çəkən,
inildəyən qızlarının pəncərədən bütün bu hadisələri sadəcə daş
olmuş, donmuş, lal olmuş kimi baxan analarından kömək
istədiyini eşitməməsi üçün Tanrıya şükür etmişəm?! Nə
biləydi?! Nə biləydi ki, qoca anasının ermənilər tərəfindən
alçaldılacağını, “hə, nə deyirsən, qoca, birdən tamahın düşər
ha, könlündən keçir, sənin də, a kaftar?”-deyilərək heysiyyəti
tapdalanacağını, sonra da nəvələrini müdafiə üçün özünü
qabağa atan bir qocanın sinəsinə kalaşnikovun
doldurulmasını görmədiyi üçün Tanrıya şükür etmişəm!
O Tanrıya ki, yaratdığı bu dünyada şər qüvvələrə bu qədər
imkan verdiyi üçün onu dəfələrlə lənətləmişəm də. Dünyasına
sahib çıxa bilmədiyi üçün qınamışam, daim şərin əməllərinə
göz yumduğu üçün dünyasına da, özünə də yox demişəm, rədd
etmişəm. Zalımın zəifə verdiyi işgəncələrdən zövq almasına
qapı açan bizi yaradan ola bilməz dediyim Tanrıya bir neçə
saatdan sonra da şükür etmişəm. Çox qəribədir...
25
Özü kimi yaratdıqları da ziddiyyətlidir. Mən ateist
olmasam da, hərdən üsyankar fikirlər söylədiyim zamanlarda
zalımın zülmünə qurban gedən, ömrünün sonuna qədər
tanrısına tapınan, daima “o bilən məsləhətdir” deyən
rəhmətlik nənəm həmişə deyərdi ki, Tanrı öz sevdiklərini daha
çətin imtahanlara çəkər. Mənsə bu cür sevgini istəmirdim
mənim tanrımdan... Kaş ki məni sevməyəydi... Heç nifrət də
etməyəydi. Heç yaratmayaydı da...
Bu sanki bir aşiqin öz sevgilisini sınamaq üçün soyundurub
başqa bir kişiyə təqdim etməsinə bənzəyir. Və həmin aşiq
bununla da sevgilisinin ona olan sədaqətini görmək istəyir.
Əzmlə mübarizə apardığını görmək istəyir, qısqanclığını
ovundurmaq istəyir. Sonra da iş-işdən keçir. Sədaqətini
yoxlamaq istədiyi sevgilsi ona da, sevgisinə də nifrət edir. Bu
da sevginin sonu olur, nifrətin əvvəli...
Ümid edirəm ki, gördüklərimdən sonra ölümümə belə razı
olmayan Tanrı nənəmin dediyi kimi, hələ də məni imtahana
çəkir...
26
3. Acı peşmançılıq
Xəfif əsən qış küləyi azacıq aralı qalan qapıdan özünə
yol tapıb nəhayət ki, içəri keçərək özü ilə bayırdakı soyuq
havanı da içəri gətirdi. Sanki gecədən bəri apardığı
mübarizədən sonra qapıya qalib gələn külək indilərdə bir-bir
otaqları gəzirdi. Dəhlizdən baxdıqda qarşı tərəfdə bir geniş
otaq, sol tərəfdə isə ümumi giriş qapısı ilə əlaqələnən zalın
kənarlarında daha iki otağın qapılarının bağlı olduğu diqqəti
çəkirdi. Hava artıq çoxdan işıqlanmışdı. Bazar günü olduğu
üçün ev sakinləri hələ ki, səssizcə yatırdılar. Təzəcə işıqlanmış
mənzilə nəzər saldıqda zalın sonundakı divanda gecədən yatıb
qalmış yorğun ev sahibini görmək olardı. Üstü qalın yorğanla
örtülsə də, paltarlarını soyunmadığı, işdən gəldiyi kostyumda
yatdığı aydın görünürdü.
Qonşu otağın qapısı açıldı. Otaqdan çıxan qadın ərini
oyatmamaq üçün barmaqlarının ucunda koridora keçib
mətbəxə tərəf getdi. Çaydanı təzəcə dəmə qoymuşdu ki,
kiminsə koridora çıxdığını görüb geri çevrildi.
– Sabahın xeyir, Ramil! Allah məni öldürsün, oyatdım səni
hə?! Nərminə özünəməxsus ahənglə ərinə səsləndi.
– Çoxdan oyanmışdım, gedəcək yerim var. Mənim üçün
çay qoy, çıxmalıyam bir azdan.
Dostları ilə paylaş: |