60
II Aparıcı: Bəli, Elçin Əfəndiyev canlı, biçimli və köksəyatımlı
obrazlar yaradır. Onun əsərlərində surətlər həyatın axarından
çıxmır, öz daxili məntiqləri ilə hərəkət edir, cizgilərinin bolluğu
ilə fərqlənirlər. Eyni zamanda, yazıçı hekayələrində rəmz və
şərtilikdən, öz-özü ilə söhbət və daxili dialoqlardan tutarlı məcaz,
əfsanə və nağıl ünsürlərindən sıx-sıx istifadə edir. Bunlar da
əsərlərə bədii məziyyət və hərarət gətirir, təsiri dilin şirinlik və
oynaqlığını artırır. Öz əsərlərində uşaqların həyatını qələmə alan
bir yazıçı, heç şübhəsiz, onların özü üçün yazmaya bilməzdi.
Yazıçının uşaqlar üçün yazdığı hekayələrində romantika, işıq,
həyat nəfəsi, sadə, böyük bir dünya öz əksini tapır. Səlim, Günay,
Humay və başqa uşaqların həyatı, onların işıqlı və maraqlı aləmi,
dünyaya baxışları, təsəvvürləri, xəyalları, bütün bunlarla sıx bağlı
olan əhvalatlar, hadisələr Elçin Əfəndiyevin hekayələrində geniş,
hərtərəfli verilmişdir. Ən ümdəsi Elçin Əfəndiyev uşaqları həyata
qarışmağa, həyatla sıx təmasda görməyə çağırır. Məsələn,
“Humayın yuxusu” hekayəsi balaca Humayın bir günlük işıqlı,
mənalı həyatı haqqında aydın təsəvvür oyadır. Bu anda Elçin
Əfəndiyevin Uşaq hekayələri yada düşür. “Səlimin hekayələri”,
“Mənə niyə gülürlər?”, “Gör necə top vuraram...”, “Mən hər şeyi
bilirəm”, “Aysunun, Humayın, Günayın, Yalçının və Nigarın
nağılları”, “Humayın yuxusu” və s.
Hörmətli tədbir iştirakçıları, söhbət Elçin Əfəndiyevin “Uşaq
hekayələri”ndən düşmüşkən, gəlin balaca oxucularımızın ifasında
“Humayın yuxusu”səhnəciyinə tamaşa edək. Səhnə hekayəyə
uyğun dekorasiyalarla bəzədilir. Səhnəyə Humayı, onun topunu,
siçanını, pişiyini, zürafəsini, yaşıl karandaşını, milisioner rolunu
ifa edən balaca oxucular çıxırlar.
Aparıcı:Humay yaxşı qızdır.O, valideynlərinin ona aldığı qırmızı
topunu çox sevir. Ancaq hərdən köhnə oyuncaqları ilə yaxşı rəftar
61
etmir. Yaşıl karandaşını ağzına salıb çeynəyir, çıqqılı siçanı ilə
oynamır,onu evin bir küncünə tullayır, parçadan düzəlmiş bığlı
pişiyinin bığlarını dartır, Uzunboy zürafənin şəklini cırır. Bir gün
Humay yatıb yuxuda nə görsə yaxşıdır? Oyuncaqların ondan
inciyib, küsüb getdiklərini. Gəlin tamaşa edək!
Aparıcı:Humayın topu evdən çıxdı, pilləkənləri aşağı düşdü,
küçəyə çıxdı, hoppana-hoppana getməyə başladı. Onun qarşısına
Çıqqılı siçan çıxdı.
Çıqqılı siçan: Ay Humayın topu , hara gedirsən belə?
Humayın Topu:Gedirəm Humayın dostlarını yığam aparam
Humayın yanına. Humay onlarla oynasın, onları incitməsin.
Çıqqılı siçan:
Humay yaxşı qızdı. O, məni bığlı pişiklə
barışdırmışdı.İnanıram ki, o, məni daha incitməyəcək. Məni də
apar Humayın yanına.
Aparıcı:Humayın topu düşdü qabağa, Çıqqılı siçan da onun
dalınca. Qabaqlarına bığlı pişik çıxdı.
Bığlı pişik: Məni də apar Humayın yanına. Humay söz
verib ki, bir də heç vaxt mənim bığlarımı dartmayacaq.
Aparıcı:Pişik də onlara qoşuldu. Birlikdə gedirdilər, qarşılarına
Uzunboy zürafə çıxdı.
Uzunboy zürafə:Məni də apar Humayın yanına. Humay söz verib
ki, bir də heç vaxt mənim şəklimi cırmayacaq. Məni
incitməyəcək, mənimlə oynayacaq.
Aparıcı:Zürafə də onlara qoşuldu. Qarşılarına Yaşıl karandaş
çıxdı.
Yaşıl karandaş:Ay Humayın topu məni də Humayın yanına apar.
Humay söz verib ki, bir də heç vaxt məni ağzına salıb
dişləməyəcək.Mənimlə qəşəng yarpaq şəkilləri çəkəcək.
Aparıcı:Oyuncaqlar birlikdə Humaygilə yollandılar. Qarşılarına
Polis əmi çıxır.
62
Polis əmi:Belə cərgəyə düzülüb hara gedirsiniz.
Humayın topu: Polis əmi, biz Humayın oyuncaqlarıyıq. O
daha bizimlə yaxşı rəftar edəcək. Onun yanına gedirik.
Polis əmi: Düzdür. Humay mənə də söz verib ki, bir də heç vaxt
ağlamayacaq, bundan sonra həmişə anasının sözünə baxacaq,
yeməyini yeyəcək, böyük bacısı Günayla dalaşmayacaq,
oyuncaqlarını incitməyəcək. Məni də apar onun yanına, ay
humayın topu!...
Aparıcı:Humay yuxudan oyandı. Başa düşdü ki, gördükləri yuxu
imiş.Tez oyuncaqlarının yanına qaçdı. Onları qucaqladı.
Pəncərədən baxıb, yolda duran Milisioner əmiyə salam verdi.
Humay:Mən daha oyuncaqlarımı incitməyəcəyəm. Onları
sevəcəyəm. Polis əminin dediyi kimi ağıllı qız olacağam.
Səhnəcik sona çatır. Balaca ifaçılar tədbir iştirakçıları ilə
sağollaşıb, səhnədən ayrılırlar.
I Aparıcı:İnanırıq ki, istedadlı yazıçı bizim balaca oxucularımızı
bundan sonra da gözəl-gözəl əsərlərilə sevindirəcək. Elçin
Əfəndiyevin əsərlərininn əksəriyyəti ekranlaşdırılıb: “Mən sizin
dayınızam”, “Ah,Paris!.. Paris!..”, “Mənim sevimli dəlim”,
“Mahmud və Məryəm”, “Mənim ərim dəlidir”, “Ölüm hökmü”,
“Şuşa dağlarını duman bürüyüb”, “Poçt şöbəsində xəyal”, “Ağ
dəvə”, “Qatil”, “Ulduz, məhəbbət və şampan şərabı”, “Arılar
arasında” və s. Elçin müəllimin bədii üslubu – əslində, üslublar
sintezidir. Standart üslub ixtisaslaşması Elçin yaradıcılığına
yaddır. Bu yaradıcılıq üslub baxımından dinamikdir. Müəllif epik
təsvirdə də, lirik təsvirdə də, romantik təsvirdə də özünü sərbəst,
azad hiss edir. Elçin Əfəndiyevin yaradıcılığına xas olan bu cəhət
Azərbaycan nəsrinin poetikasına xüsusi bir zənginlik gətirir. Elçin
Əfəndiyevin yaradıcılığı üçün xas olan bir əhəmiyyətli cəhətdə
odur ki, Elçin üçün məhdudluq, coğrafi ərazi məhdudluğu yoxdur.
63
1976-cı ildə böyük ədəbiyyatşünas alim, akademik Məmməd
Cəfər Cəfərov yazırdı: “Elçində bədii idrak duyğusu güclü və
cəlbedicidir. Müxtəlif əhvali-ruhiyyəli, müxtəlif fərdi həyat yolları
keçən adamların mənəvi aləminə eyni zamanda dərindən nüfuz
etmək qabiliyyəti onun yazıçılıq istedadının ən qüvvətli cəhətidir.
Onun müxtəlif sənət sahibləri olan obrazları nəinki mənəvi-əxlaqi
keyfiyyətləri, arzuları, əməlləri, həm də peşələrinə və yaşlarına
görə də qocası qoca, cavanı cavan, uşağı uşaq kimi inandırıcıdır,
realdır.”
II Aparıcı:Görkəmli rus tənqidçisi Lev Anninski yazır: “Elçin...
kədərli bir sehrkardır, bərq vuran, qızılı, gümüşü rənglərə üstünlük
verən impressionistdir...” Doğrudan da, Elçin mücərrəd obrazlar
yaratmaq
qabiliyyətinə
malik bir
yazıçıdır. Yazıçının
“Bayraqdar” povestini oxuyarkən insan düşünür: nəhayət ki,
Azərbaycan nəsrində qaçqınlarımızın böyük faciəsinin miqyası
müqabilində layiqli əsər meydana çıxdı. Ermənistanın Qarabağ
iddiası, ölkəmizə təcavüzü, tökülən qanlar, zəhərlənmiş talelər o
qədər böyük milli yaramızdır ki, bu yara yalnız yüksək bədii-
estetik səviyyədə öz təcəssümünü tapmalıdır. “Bayraqdar”
povestində və “Qarabağ şikəstəsi” hekayəsində olduğu kimi. Elçin
Əfəndiyevin bunlarla yanaşı,“Bayraqdar” əsəri sanki ustalıqla
toxunmuş bir əsərdir. Burada heç bir ipin ucu boş buraxılmır.
Bütün iplər öz funksiyasını yerinə yetirərək sənətkarlıqla
düyünlənir. Tam mənzərə yaranır. Estetik bütövlük əldə olunur.
“Bayraqdar” povesti həmin böyük faciənin yığcam bədii
panoramını yaradan, eyni zamanda, ən dərin qatlarını üzə çıxaran
sənət əsəridir. Bu əsər öz müəllifinə müasir dövrdə - XXI əsrin
əvvəllərində də ədəbi bayraqdarlıq ucalığı gətirmişdir.
I Aparıcı:Bildiyimiz kimi Elçin Əfəndiyev yaradıcılığı
boyu bir sıra povestlər, kinopovestlər yaratmışdır.
64
Bunlardan “Bir görüşün tarixçəsi”, “Toyuğun diri qalması”,
“Dolça”, “Bayraqdar”, kinopovestlərdən “Ox kimi bıçaq”,”Aman
ovçu, vurma məni...”, “Hökmdarın taleyi” və s. misal göstərmək
olar. Yaradıcılığı çoxcəhətli bədii tapıntı, orijinal rəng və boyalar
üzərindən keçən Elçin Əfəndiyev, bir qayda olaraq, əsərlərinin
məzmunu müasir həyatdan, gəncliyi düşündürən, narahat edən,
bizim günlər üçün səciyyəvi və tipik görünən problemlərdən alır.
Çünki yazıçı müasir həyatla yaşayır, onun axar və istiqamətini
dərindən duyur, zəhmət adamlarının arzusunu, duyğu və
düşüncəsini ifadə edir, gah əxlaqi-mənəvi təmizlikdən, fədakarlıq
və qayğıkeşlikdən, gah da xalqa, ucsuz-bucaqsız Vətənimizə
məhəbbətdən yazır. Elçin Əfəndiyev gənclərin narahat və yaradıcı
axtarışlarından, onların romantik xəyal, arzu və düşüncələrindən,
məişətdən, ailə həyatından yazanda şirin söyləmə üsulu seçir,
mənalı yumor lirizmə qarışır, surətin mündəricəsini sətiraltı
qənaətlər tamamlayır. Bəli, Elçin Əfəndiyev həyatı, bədii obrazı
dərindən düşünür. İnsanı özünəməxsusluğu, daxili ziddiyyətləri ilə
təsvir edir.
II Aparıcı: Bəli, Elçin hər əsərində Elçindir, hər əsərində
sənətkardır, əsərlərinin hər birində mükəmməl söz ustasıdır, gözəl,
aydın və məhz özünün olan üslub sahibidir. Elçin Əfəndiyevin
belə bir fikri var: Bədii söz aysberqə oxşamalıdır. Görünməyən
hissəsi görünən hissəsindən çox olmalıdır. Elçinin “Ədəbi
düşüncələr”i bədii aysberqlərin görünməyən hissəsini duymağın
yollarını öyrədir. Elçin Əfəndiyevin “Ədəbi düşüncələr”ini
fərqləndirən bir amil də odur ki, bunlar yazılarkən, heç bir
sistemə, zaman, janr, məktəb ardıcıllığına riayət olunmayıb. Elçin
Əfəndiyevin Abşeron mövzuları ədəbiyyatımızın şedevrlərindən
sayılır. Bəli, yazıçı hər mövzuya görə dilini xüsusi kökləyə bilir.
O, filoloji biliyi ilə öz yaradıcılığına da nəzarət edir. Yazıçı öz
65
əsərləri ilə sübut etdi ki, sənət həyatın mahiyyətinə nüfuz etməli
və bu mahiyyəti üzə çıxarmalıdır. Onun komediyalarını oxucu
ların şüurunda güclü partlayış yaradan qumbaraya bənzətmək olar.
Bu komediyalardakı konfliktlər gerçəkliyin mürəkkəb daxili
ziddiyyətlərini yüksək bədiiliklə əks etdirir. Nasir Elçinin xoşbəxt
taleyi olduğu kimi, dramaturq Elçin Əfəndiyevin də xoşbəxt teatr
taleyi var.Onun pyeslərini həm oxucular, həm tamaşaçılar, həm də
sənətçilər sevirlər. Onun dramaturgiyasını xarici ölkələrdə
tanıyırlar, sevirlər, oynayırlar... Bəli, yazıçı bu gün çağdaş
Azərbaycan dramaturgiyasının ən fəal təmsilçisidir. Elçin
Əfəndiyev siyasi quruluşlarda yazdıqlarının bircə cümləsini, bircə
sözünü də dəyişmədən bu gün də könül xoşluğu ilə çap etdirə
bilən yazıçılardandır. Bu, sənətin mərdanəliyi, sənətkarın
xoşbəxtliyidir.
II Aparıcı: Elçin Əfəndiyev məhsuldar yazıçıdır. Yazıçı
ədəbiyyatşünaslığımızı bu gün də məşğul edən, ayrı-ayrı hallarda
sənətşünaslıq və estetika elmləri ilə sərhədlənən problemləri iki
aspektdə – həm bədii nəsrin təcrübəsində, həm də onun tənqidində
diqqət və ehtiyatla araşdırır, müqayisələr aparır, bədii əsərləri və
tənqidi fikirləri, müxtəlif müəlliflərin rəylərini tutuşdurur, nəticə
çıxarır, yüksək səviyyəli elmi xülasələr əldə edir... Elçin
Əfəndiyev saxtanı həqiqətdən, elmi- nəzəri mülahizəni
doqmatizmdən, ehkamçı və subyektiv fikirlərdən seçməyi bacarır.
Belə hallarda o cəsarətlə tənqid edir, amma
ehtiram və təvazökarlıq cızığından da kənara çıxmır. Elçin
Əfəndiyevin əsərləri və ədəbi-ictimai fəaliyyəti Azərbaycanda və
xarici ölkələrdə bir çox mükafatlara layiq görülmüşdür. Bunlardan
“Humay”, “Füzuli”, “Qızıl Dərviş”, “İlin ən yaxşı hekayəsi”,
“Yaddaş”, “Proza N”, “R. Rza” və s mükafatlar və s. Elçin
Əfəndiyev Azərbaycan xalqının tarixi-mənəvi varlığını, bədii
66
sözü ədəbiyyat aləmində inadkar inamla qoruyan, əks etdirən
yazıçı və tənqidçilərindən olub, çağdaş Azərbaycan ədəbiyyatının
canlı klassiklərindəndir. Son dövrlərdə xalq yazıçısı Elçinin bir
çox beynəlxalq mükafatlara layiq görülməsi onun böyük və geniş
ədəbi şöhrətə malik olduğuna əyani sübutdur.
Tədbirin sonunda söz kitabxananın rəhbərliyinə verilir:
Müdiriyyət:Bu gün Elçin Əfəndiyevin 73 yaşı tamam olur. Bizim
ölkədə 20- 80 yaş arasında elə bir insan təsəvvür etmək olmaz ki,
Elçin yaradıcılığının çox qismini doyulmaz zövq ala- ala, ruhi bir
qüdrət qazana- qazana oxumasın, onun lirik-psixoloji üslubu,
poeziya ovqatlı, duzlu-məzəli dram əsərlərinə tamaşa etməsin.
Elçin Əfəndiyevin ad günü yalnız onun özünün, ailəsinin, minlərlə
oxucusunun bayramı deyil, həm də çoxəsrlik ədəbiyyatımızın,
mədəniyyətimizin bayramıdır. Çox hörmətli, görkəmli ədibimizə
əvvəlkilərdən daha güclü yaradıcılıq müvəffəqiyyətləri arzusu ilə
ona uzun ömür, cansağlığı, işıqlı təfəkküründən, xalqa nurlu
məhəbbətindən rişət tapan gumrahlıq, nikbinlik diləyirik. Biz
inanırıq ki, yaradıcılığının ən yetkin dövrünü yaşayan ədib kimi
siz müasir ədəbi prosesə ciddi təsir edən yeni-yeni əsərlərinizlə
bundan sonra da Azərbaycan oxucusunu sevindirəcək, müstəqillik
dövrü
ədəbiyyatımızın zənginləşməsi işinə öz töhfənizi
verəcəksiniz.
Tədbirin sonunda iştirakçılara Elçin Əfəndiyevin qələmə aldığı
quruluşçu rejissoru Ramiz Fətullayev və Dövlət Fəthullin olan
“Hökmdarın taleyi”filmi təqdim olunur.
67
İstifadə olunan ədəbiyyat siyahısı:
1.
Əfəndiyev Elçin. Seçilmiş əsərləri. 10 cilddə. I cild.- B.:
Çinar-Çap, 2005. - 626 səh.
2.
Əfəndiyev Eçin. Seçilmiş əsərləri. 10 cilddə. II cild.- B.:
Çnar-çap, 2005. - 523 səh.
3.
Əfəndiyev Elçin. Bayraqdar. B.: Qapp-Poliqraf
nəşriyyatı, 2004. - 170 səh.
4.
Əfəndiyev Elçin. Ömrün anları. - B.: Çinar-Çap, 2009. -
656 səh.
5.
Əfəndiyev Elçin. Pyeslər. - B.: Çaşıoğlu, 2012. - 944 səh.
6.
Vaqif Yusifli, Cavanşir Yusifli. “Bu nə sehrdir belə”
(Elçin haqqında əlli altı söz). - B.: Elm, 1999.- səh. 260
7.
Zahid Xəlil. Seçilmiş əsərləri. VI cild.- B.: 2008, səh 256 –
263.
68
Müqəddəs söz-sənət ocağının nurlu varisi Elçin
Əfəndiyev E.Əfəndiyevin anadan olmasının 73-cü
ildönümü münasibəti ilə respublika uşaq kitabxanaları
üçün hazırlanmış metodik vəsait
Kompyuter yığımı
və dizayn: Ruhiyyə Məmmədli
Ünvan:AZ-1022 Bakı şəh.,S.Vurğun küç.88;
E-mail: childlibbaku@yahoo.com
URL:www.clb.az
F.Köçərli adına Respublika
Uşaq Kitabxanasında
çap olunmuşdur.
Sifariş: 26
Çapa imzalanmışdır:14.05.2016
Tirajı:100
Pulsuz
Dostları ilə paylaş: |