____________________________________________
66
onların əsərlərinin əksəriyyətini oxumuşam.
Amma sizin
çoxunuzla ilk dəfədir ki, üzbəüz görüşürəm. Bu da mənim üçün
çox əhəmiyyətlidir. Güman edirəm ki, yaşlı nəsillə olduğu kimi,
sizinlə də aramızda əlaqələr yarana bilər və biz ədəbiyyatımızın
inkişafı naminə bu əlaqələrdən istifadə edə bilərik. Hesab
edirəm ki, görüşümüzün məqsədi bundan ibarətdir. Görüşümüzü
konkretləşdirmək üçün indi kimsə nə isə deməli, məlumat
verməlidir. Buyurun.
AZƏRBAYCAN YAZIÇILAR BİRLİYİNİN
SƏDRİ ANARIN ÇIXIŞI
Möhtərəm Prezident!
Möhtərəm görüş iştirakçıları!
Hörmətli Prezidentimizin dediyi kimi və sizin bildiyiniz kimi,
dünən belə bir görüş oldu. Belə gərgin vaxtda imkan tapıb bu
görüşü keçirdiyinə görə dünən prezidentimizə hamımızın
adından təşəkkür etdim və indi də gənc yazıçılarla görüşə görə
təşəkkür edirəm. Burada ədəbiyyatımıza öz səsi ilə gələn
istedadlı şairlərimiz, nasirlərimiz, tənqidçilərimiz toplaşıblar. Bu
o demək deyil ki, burada olmayanlar istedadsızdır, yaxud da az
istedadlıdır. Hamını dəvət etmək mümkün deyil. Ona görə də
istədik ki, Siz bir qrup ilə görüşəsiniz. Onlar qurultayda da
iştirak edəcəklər.
Yazıçılar Birliyi cavanlarla bağlı müəyyən işlər görür. Vaqif
Yusifli o qədər cavan deyil, amma gənclərin yaradıcılığı ilə
məşğul olur. Mən ondan xahiş etdim ki, burada məlumat versin.
Yazıçılar Birliyində bir müşavirə keçirdik, orada da tənqidçi,
həmin Vaqif Yusifli cavanların yaradıcılığı haqqında danışdı.
Sonra gənclərin özləri danışdılar. Cavan yazıçı
____________________________________________
67
Rafiq Tağının və cavan şair Adil Mirseyidin əsərlərinin
müzakirəsini keçirdik. Mən başa düşürəm ki, daha çox iş
görmək olardı. Amma indi sezilən işlər bunlardır.
Bundan başqa, Yazıçılar Birliyinin Natəvan adına klubunda
"Avanqard" adlı cavanlar birliyi toplaşır. Orada əsasən
yaradıcılıq söhbətləri aparırlar, arabir Yazıçılar Birliyini də
tənqid edirlər. Mən də bundan çox razıyam. Çünki
demokratiyadırsa, tənqid də olmalıdır.
Güman edirəm ki, buraya toplaşanların taleyini heç kəs
əvvəlcədən xəbər verə bilməz. Amma mən arzu edərdim ki,
onların yaradıcılıq taleyi uğurlu olsun və gələn görüşlərdə,
hörmətli Prezident, bugünkü gənclər Sizinlə artıq ağsaqqallar
kimi görüşsünlər və onlardan sonra gənc nəsil gəlsin. Hələ
ağsaqqal olana qədər onlar cavandırlar, burada çıxış edib öz
sözlərini deyə bilərlər.
Mən xahiş edərdim ki, Vaqif Yusifli onların yaradıcılığı
haqqında qısa məlumat versin.
TƏNQİDÇİ VAQİF YUSİFLİNİN ÇIXIŞI
Hörmətli Prezident!
Hörmətli görüş iştirakçıları!
Çağdaş Azərbaycan ədəbiyyatının cavan nəsli ilə keçirilən
belə bir görüş, heç şübhəsiz, ədəbi-tarixi bir görüşdü və belə bir
missiyanın yerinə yetirilməsidir.
Hörmətli Prezidentimiz əvvəlki illərdə də cavanların
yaradıcılığı ilə ciddi maraqlanmış, onların ayrı-ayrı əsərlərinə,
bütöv yaradıcılıqlarına öz münasibətini bildirmişdir.
Yazıçıların X qurultayı ərəfəsində ədəbiyyatımızın gələcəyi
olan istedadlı gəncliyin ölkə prezidentinin məsləhət və
tövsiyələrini, xeyir-dualarını eşitməsi xoşdur.
____________________________________________
68
Qədim yunan filosofu Sokratın belə bir məşhur kəlamı var:
"Bircə şey bilirəm ki, heç bir şey bilmirəm". Əslində bu müdrik
kəlamı söyləyənə qədər Sokrat çox şey bilirdi, zəmanəsinin ən
böyük filosofu səviyyəsinə yüksəlmişdi. Lakin çox bilməyi ilə
öyünmürdü və bildiklərini bilmədiklərinin müqabilində
dəryadan, ümmandan bir zərrə hesab edirdi.
Bu gün hər bir gəncin söz eşitməyə, öz yaradıcılığı barədə
hansısa bir tövsiyəni eşitməyə doğrudan da böyük ehtiyacı
vardır. Əlbəttə, onların istedadının, yaradıcılığının daha da
çiçəklənməsi, üzə çıxması üçün belə bir görüşdən çox şey
gözləyirlər. Hörmətli Prezident, onların adından Sizə öz
minnətdarlığımızı bildiririk.
Mən əvvəlcə hörmətli prezidentimizi buradakı gənclərin
adları ilə tanış etmək istəyirəm. Burada ədəbiyyatın müxtəlif
janrlarında yazıb-yaradan gənclər əyləşiblər. Gənc nasir
Mübariz Cəfərlinin bir neçə hekayə və povest kitabı çıxıb. Onun
yanında oturan Orxan Fikrətoğlu gözəl şairimiz Fikrət Sadığın
oğludur, bir neçə hekayələr kitabının müəllifidir. Daha sonra
"Ulduz" jurnalının baş redaktoru, gözəl şairimiz Ələkbər
Salahzadə, "Ədəbiyyat qəzeti"nin redaktor müavini, gənc
tənqidçi Tehran Əlişanoğlu, gənc şair Əjdər Ol, orijinal yazıları
ilə diqqəti cəlb edən gənc şair Salam Sarvan, Əlizadə Nuri,
Saday Şəkərli, gənc tənqidçi Nizaməddin Mustafa, gənc şair
Yalçın Qoca, gənc şair və tərcüməçi Mahir Qarayev, gənc
tənqidçi, ədəbiyyatşünas Şəlalə Həsənova, gənc şairə Mahirə
Abdullayeva, yaşı az olsa da öz elmi yazıları ilə professorluq
səviyyəsinə çox tez yüksələn tənqidçi, ədəbiyyatşünas Nizami
Cəfərov, özünü gənclikdən qətiyyən ayırmayan filologiya
elmləri doktoru, professor Rafael Hüseynov. Bu tərəfdən
əyləşənlər - Xeyrəddin Qoca, yaradıcılığa yeni başlayan Səyyad
Aran.
Heydər Əliyev: O, yaşına görə cavan hesab olunur, yoxsa
yaradıcılığına görə?