Cip onun yumşaq çiyinlərini
möhkəmcə qucaqlayaraq, hər iki skoç-teryerləri ondan aldı, küçükləri
sinəsinə sıxaraq, hər iki tərəfinə sırayla ağaclar əkilmiş cığırla qaçmağa başladı, küçüklər karıxmış
halda onun burnunu, qulaqlarını yalayırdılar. Dördkünc giriş otağından keçib, pəncərəsi çəmənliyə
açılan qonaq otağına girdi, eyvanın qapısı qabağında dayanıb bu bəzəkli, təzə otağa baxmağa başladı,
burada hər şey onun arzuladığı kimi döşənməmişdi. Qara atlas ağacı ilə işlənmiş divarlar ağ idi, hətta
onun ümid elədiyindən də yaxşı görünürdülər. Bağda, onun bağında isə armud ağacları
tumurcuqlamışdı, ancaq hələlik çiçək açmamışdılar. Evin ətrafında bir
neçə nərgizgülü açmağa
başlamışdı, hətta birinin artıq qönçəsi də var idi. Qız hələ də küçükləri özünə sıxıb, onların yumşaq
bədənlərinin istiliyindən həzz alırdı. Sonra da qonaq otağından qaçıb, pilləkənlərlə yuxarı qalxmağa
başladı. Oy, necə də gözəlmiş öz evində olmaq… Birdən qız arxadan kiminsə onu qucaqlayıb yuxarı
qaldırdığını hiss elədi, qız beləcə bir azacıq dəmdəməki halda gözləri ilə şəfəq saçaraq geri döndü, elə
əyildi ki, ərinin dodaqları onun dodaqlarına çata bilsin.
III FƏSİL
Öz yeni evində ilk səhər Cip sərçələrlə, ya da əvvəlcə cürətsiz halda civildəməyə, cikkildəməyə
başlayıb, sonradan nələri var ortalığa qoyub oxuyan hansısa quşlarla eyni vaxtda yuxudan oyandı.
Sanki, Londonun bütün qanadlılar çarlığı onun bağına toplaşmışdılar və yaddaşında
qədim bir şeirin
misraları canlandı.
Təbiətin bütün gözəl övladları
Yeni evlənənlərin yanındadılar
Onlara xeyir-dua verirlər…
Ahəngdar quş xoru da,
Səhərin necə açıldığını
Onlara xəbər verirlər!
Qız çevrilib Forsenə baxdı. O, başını balışda gizlədib uzanmışdı, yalnız sıx pırtlaşıq saçları
görünürdü. O, həmişəlik qızın, qız da onundumu? Bəs bu ev kimindi? Onların ümumi eviydimi? Bu
yad, ancaq artıq daimi otaqlarında, çarpayılarında hər şey ona daha ciddi və həyəcanlı görünürdü. Onu
oyatmamağa çalışaraq, qız sürüşüb odeyalın altından çıxdı və pəncərənin qabağında dayanıb pərdəni
kənara çəkdi. Hələ toran çəkilməmişdi, yalnız uzaqlarda, haradasa ağacların arxasında cəhrayı üfüqlər
işarırdı. Əgər London səhərini bürüyən alçaqdan sürünən duman tüstüsü və yatan paytaxtın zəif səsləri
olmasaydı, hər şey kənd səhərini xatırladardı. O, bu
evin sahibəsi idi, burada sərəncam verməliydi, hər
şeyə baxmalıydı! Bəs küçüklər! Onlara nə yedizdirsin?
Bu, onun insafla düşündüyü çoxlu saatlardan birincisi idi. Onun incə zövqü hər şeyin mükəmməl
olmasını istəyirdi, ancaq bunu başqalarından, xüsusilə də xidmətçilərdən tələb eləməyə üzü gəlmirdi.
Onları bizləməyəcəkdi ki!
Forsenin səhmana salınmış həyat haqda azacıq belə təsəvvürü yox idi. O, hətta qızın ev işlərini
qadaya salmağa səy göstərməsini də qiymətləndirə bilmirdi. Qız ondan kömək istəməyəcək qədər
məğrur, bəlkə də, olduqca ağıllı idi, əgər
lap istəsəydi də, o, açıq-aydın etiraz eləməyə qadir deyildi.
«Dərd-sər bilmədən yaşamaq!» – onun devizi belə idi. Cipin özü də başqa cür arzulamırdı, ancaq bu
gün ərzində bir neçə dəfə süfrə açılan, üç xidmətçisi olan evdə mümkündümü? Hələ bir iki küçüyü də
bu yandan? Əgər kimsə sənə heç olmaya məsləhətlə də kömək eləmirsə, bütün bunları necə idarə
eləyəsən?
Qız öz qayğılarını kiminləsə bölüşmürdü. Özünü olduqca ehtiyatlı aparmalıydı. Təpədən dırnağa
kimi mühafizəkar olan Betti nə vaxtsa Uintonla olduğu kimi, Forsenlə də çətinliklə yola gedirdi, ancaq
hamısından çətini atası ilə idi. Qız onun üçün darıxırdı, ancaq,
əslində, onunla görüşməkdən qorxurdu.
Birinci dəfə qız uşaq olanda o gəlmişdi, daha doğrusu, gəlməli olmuşdu. İndi də gəlişini artıq qızının
məxsus olduğu «bu tipin» evdə olmamasına hesablayaraq gəldi. Qız özü qapını açdı və atasının iti
gözləri sifətini görməsin deyə, onun üstünə atılıb boynunu qucaqladı. Dərhal da Don və Daff
adlandırıdığı küçüklərindən danışmağa başladı. Onlar, sadəcə, qəşəngdilər! Onlardan heç nəyi qorumaq
olmur, onun ev başmaqlarını cırıq-cırıq eləmişdilər və çini qablar olan dolaba dırmaşaraq, orada
yatmağa dadanmışdılar! Amma
hər şeyə o, özü baxmalıdır!
Danışığına ara vermədən qız atasını pilləkənlə yuxarı, sonra isə aşağı endirib bağa, sonra da
musiqili otağa,– ya da studiyaya, döngəyə ayrıca çıxışı olan evciyə apardı. Studiya ilə qız fəxr eləyirdi.
Forsen burada sakitcə məşq eləyə bilirdi. Uinton dinmədən onunla birlikdə evi dolaşır, aradabir dəqiq
iradlarını bildirirdi. Bağın uzaq küncündə, onları qonşudan ayıran hasara baxaraq, Uinton birdən onun
əlini sıxdı.
– Hə, Cip, özün necəsən?
– Oy, mən, sadəcə, deyə bilərəm, çox gözəl! – Ancaq o, atasına, atası da ona baxmırdı. – Ata, bir
bax! Pişiklər buradan özlərinə cığır açıblar!
Uinton dodaqlarını sıxdı və geri döndü. Skripkaçı haqqındakı fikri yenidən onun qəlbini ağrıtdı.
Qızı görünür, özünü şən və qayğısız göstərərək, ona heç nə deməməyi qərara almışdı,
ancaq onu aldada
bilməzsən!
– Bir mənim çiçəklərimə bax! Bu gün əsl bahardır!
İki-üç arı uçuşurdu. Tər yarpaqlar elə nazik və şəffafdılar ki, künəş şüaları onları asanlıqla dəlib
keçirdi, al-qırmızı krokuslar zərif damarcıqları, qönçəsinin ortasındakı cəhrayı işartıyla içinə günəş
işığı yığılan vazı xatırladırdılar. Mülayim külək budaqları tərpədirdi, gah orada, gah da burada ayaqları
altında quru yarpaqlar xışıldayırdı. Hər şeydə, otlarda, mavi səmada, badam ağacının çiçəklərində artıq
baharın nəfəsi hiss olunurdu.
Cip əllərini yumdu.
– Baharı hiss eləmək necə də gözəldir!
Uinton isə düşünürdü: «O dəyişib!» Qız mehriban, cəld,
daha müdrik, ciddi olmuşdu,