364
şəcərə
- bir qəbilənin, tayfanın nəsillərinin mənşəyini və qohumluq
dərəcələrini müəyyənləşdirən siyahısı. Şəcərə bəzən nəsil şəcərəsi formasında
təsvir edilir.
Şəddadilər
- Şəddadilər dövlətində hakim sülalə (971 - 1075). Sülalənin
banisi Məhəmməd ibn Şəddaddır. 1075-ci ildə Şəddadilər sülaləsi və dövlətinin
hakimiyyəti səlcuq türkləri tərəfindən ləğv edilmişdir.
Şəddadilər dövləti
- Azərbaycanın şimal-
şərqində dövlət (971 - 1075). Mənşəcə kürd olan
Məhəmməd ibn Şəddad 951-ci ildən, sonra isə onun
oğlanları tədricən Salarilərin Azərbaycanın şimal və
şimal-qərbindəki torpaqlarını tutmağa başlamışlar.
971-ci ildə Gəncəni tutan Şəddadilər bu şəhəri
özlərinə paytaxt edib Şəddadilər dövlətinin əsasını
qoydular. Bir qədər keçdikdən sonra əvvəllər
Salarilərin olmuş Arranın xeyli hissəsi və
Ermənistanın şərqi Şəddadilərin əlinə keçdi.
Şəddadi hökmdarı I Fəzl ibn Məhəmməd 1027-ci ildə Araz üzərindən Xudafərin
körpüsünü saldırmışdır. Onun dövründə Şirvanşahlar və Rəvvadilərlə də dostluq
əlaqələri yaradılmışdır. Əbdüsüvar Şavurun hakimiyyəti illərində Şəddadilər
Gürcüstanla və onunla müttəfiq olan Şirvanşahlar dövləti ilə müharibələr
etmişdilər. Gürcü çarı 1062-ci ildə alanlara Şəddadilər dövlətinə hücum etmək
üçün Gürcüstan ərazisindən keçməyə icazə verdi. Gəncənin müdafiə qabiliyyətini
möhkəmlətmək məqsədi ilə Şavur onun ətrafında qala divarlarının inşasına və
xəndək qazılmasına göstəriş vermişdi. 1063-cü ildə möhkəm şəhər qala qapıları
qurulmuşdu. 1075-ci ildə Şəddadilər dövləti səlcuqlar tərəfindən tutulmuş və ləğv
olunmuşdu.
şəhid
— 1) islamda — "din uğrunda özünü
qurban vermiş, əzablı ölümlə həlak olmuş adam"; 2)
Azərbaycan Respublikasında Qarabağ müharibəsində
qəhrəmancasına həlak olanları da şəhid adlandırırlar; 3)
şahid.
Şəhrdarlar
- Sasanilar dövlətində hakim sülalə
nümayəndələrindən təyin olunmuş vilayət canişinləri.
şəhər-dövlət
(yun. "polis") - ilk şəhər-dövlətlər Qədim Misirdə və
Mesopotamiyada meydana gəlmişdir. Şəhər-dövlətin ərazisi şəhəri və ətraf
kəndləri əhatə edirdi və çox da böyük deyildi; onun bir başından o biri başına hətta
bir neçə saata getmək mümkün olurdu. Hər şəhər-dövlətin öz hökuməti və ya
hökmdarı, qoşunu, xəzinəsi, qanunları var idi; onların hərəsi öz pulunu zərb edirdi.
Şəhər-dövlətlər Qədim Yunanıstanda da var idi. Bunlardan ən iriləri Afina və
Sparta idi.
365
şəhər islahatı
(Şimali Azərbaycanda) - çar hökuməti tərəfindən 1870-ci il
iyunun 16-da qəbul olunmuş "Şəhər qaydaları" əsasında keçirilmiş şəhər islahatı;
guya, yerli əhali buna "hazır olmadığından" Bakıya yalnız 1878-ci ildə şamil
edildi. Burada yaradılmış şəhər dumasına seçmək hüququ müəyyən əmlak və yaş
senzi (25 yaş) ilə məhdudlaşdırılmışdı. Praktik olaraq Bakı şəhər Dumasına
keçirilən seçkilərdə şəhər əhalisinin yalnız 2 - 3%-i iştirak etmişdi. Şəhər dumasına
seçilən "qeyri-xristianlar" üçün limit qoyulmuşdu, belə ki, seçilən müsəlmanların
sayı deputatların ümumi sayının yarısından artıq olmamalı idi. Şəhər dumasının
fəaliyyəti sırf təsərrüfat məsələləri ilə məhdudlaşdırılırdı, amma bu məsələlərin də
həllinə qubernator tərəfindən nəzarət edilirdi. Şəhər islahatı bir qədər ixtisar
olunmuş halda 1897-ci ildə Yelizavetpol (Gəncə), Şuşa, Şamaxı, Lənkəran, Quba
və Şimali Azərbaycanın bir sıra başqa şəhərlərində də keçirildi.
şəhər soveti
(şurası) - senyorlarla mübarizə dövründə müstəqillik əldə etmiş
şəhərlərdə ali seçkili özünüidarə orqanı.
Şəhərcik
- möhkəmləndirilmiş qədim məskən və ya şəhər qalıqları. Mədəni
təbəqə olması ilə qeydə alınır. Şəhərciklər bütün ölkələrdə məlumdur və müxtəlif
dövrlərə aiddir. Şəhərciklərin arxeoloji tədqiqi tarixin bərpa edilməsi üçün son
dərəcə mühümdür.
şəxsi asılılıq
– şəxsi azadlığını itirən və feodaldan asılı vəziyyətə düşən
kəndli. Erkən orta əsrlərdə müdafiə olunmaq üçün feodala müraciət edən kəndli
onun tabeliyinə keçməli və ya torpaq payını himayədarın mülkiyyətinə verməli idi.
Belə kəndlilər ağadan tamamilə asılı idilər və əmlakları ilə istədikləri kimi rəftar
edə bilməzdilər. Bu kəndlilərin uşaqları və nəvələri də torpaq sahibindən şəxsi
asılılıqda qalırdılar.
şəxsiyyət
- özünün sosial-müqəddəm və fərdi ifadəli keyfiyyətləri olan
adam.
Şəxsiyyətə pərəstiş
- bir adamın (şəxsiyyətin) rolunun süni şəkildə
böyüdülməsi və ucaldılması, ona fövqəltəbii keyfiyyətlər şamil edilməsi, tarixin
gedişinə onun təsiredici qüvvəyə malik olmasının iddia edilməsi. SSRİ-də Stalin və
Brejnevin, Çində Mao Tszedunun şəxsiyyətinə pərəstiş mövcud olmuşdur. Başqa
ölkələrdə də ayrı-ayrı şəxslərə pərəstiş edilirdi.
şəkər
- ilk dəfə Qədim Hindistanda şəkər qamışından istehsal edilməyə
başlanılmışdı. Hindistanda o, "şakkara" adlanırdı. "Şəkər" adı ilə Şərqə, "saxar",
"tsukor", "şuqa" adı ilə Avropaya daxil olmuşdur.
Şəki (Nuxa) xanlığı
- Şimali Azərbaycan ərazisində 1743 - 44-cü illərdə
Nadir şaha qarşı baş vermiş Şəki üsyanı zamanı Hacı Çələbi Qurban oğlu
tərəfindən əsası qoyulmuş xanlıq. Hacı Çələbi 1741-ci ildə Şəkinin vəkili
seçilmişdi, lakin şahın məliyi Nəcəf Nadir şaha xəbər göndərmişdir ki, Hacı Çələbi
şah fərmanlarının icra olunmasına maneçilik törədir. Nadir şah Hacı Çələbini
yanına çağırtdırmış və əmr vermişdir ki, onu edam eləsinlər, lakin Hacı Çələbi onu
inandıra bilmişdir ki, məlik Nəcəf pis işlərlə məşğul olur. Şəkiyə qayıdan Hacı