64
zarafatlarına, ibarələrinə. Özlərinin, arvadlarının, uşaqlarının ad
günlərinəcən əzbər bilirəm. Mövqelərinə də bələdəm,
məclislərinə də, tostlarına, tamadalarına... əh!
—Yəni belə pis adamlardır?
—Eh, sən nə yapışmısan: pis-pis! Heç nə başa düşmürsən.
Pis adam. Yaxşı adam! — əlini başına apardı, küləyin dağıtdığı
saçlarını səliqəyə salmağa başladı, — dünyada nə pis adam var,
nə yaxşı adam. Ömür elə uzun çəkir ki, ancaq pis olmağa, ya
ancaq yaxşı olmağa heç kəsin hövsələsi çatmır. Görürsən biri
həyatı boyu gah yaxşı olur, gah pis...
—Yox, baxma, yenə adamnan adamda təfavüt var. Məsələn
tutaq Dadaş necə adamdır?
Güzgüdə baxışları toqquşdu.
Təhminə güldü:
—Ay vələdüzzina, məndən söz almaq istəyirsən?
Zaur:
—Yox, — dedi, — mən camaatın şəxsi işinə qarışmaq
istəmirəm.
Təhminənin baxışında əvvəlcə təəccüb oxundu, sonra nəyisə
anlamış kimi:
—A, belə de, — dedi, ciddiləşdi və əlavə etdi: — Bax, bir
şey məni çox maraqlandırır. Hamı elə bilir ki... — bir an
tutuldu, qısa tərəddüddən sonra davam etdi. — Mən Dadaşın
aşnasıyam. Çox yaxşı, indi məni maraqlandırır görüm, sən bu
barədə nə fikirləşirsən? Bax, sən Zaur Zeynalov.
Zaur:
—Zeynallı, — dedi, — mən? Nə bilim, mənə elə gəlir ki...
—Sən özün də dedin ki, mən dünya gözəliyəm. Çox yaxşı.
Deməli, istəsəm yüz sənin kimi cavan oğlan başıma fırfıra kimi
fırlanar.
Zaur kəskin ədayla:
—Fırlansınlar da!
—Oho, damağına dəydi. Yaxşı, yüz yox, on, beş. Yaxşı,
səndən bircə dənədir, bax, elə sən özün. Məndən xoşun gəlir,
65
eləmi?
Zaur:
—Elədir, lap elədir, — dedi və əsəbi hərəkətlə qazı basdı.
Maşın zəncirdən açılmış kimi irəli cumdu.
—Yaxşı, yaxşı, sakit ol. Dediyim odur ki, Dadaş mənim
nəyimə lazımdır? Keçəl, yekəqarın, yekəburun, qoca. Ondan
bir keçəcəyim, bir təmənnam da yoxdur. Müdirimdir. Çox
olsun lap bəd başına məni işdən çıxartdıracaq, yəni bir yerdə
bir parça çörək qazana bilməyəcəyəm? Siqaret ver görüm...
Yandırdı.
—Ay sağ ol. Məsələ ondadır ki, Dadaş özü də bunu başa
düşür, hərif deyil. — Tüstünü halqa-halqa maşının tavanına
üfürdü. — Dadaş barmağının ucuyla da mənə toxunmayıb.
Yəni onda bir toxunası hal da yoxdur. Hay-hayı gedib, vay-
vayı qalıb, — güldü, — amma burda bir məsələ var. Dadaşa
şayiə, söz-söhbət lazımdır. Çünki o yaşda, o ağız burunda
mənim kimi cavan, gözəl bir arvadın adamı olmaq onun
başının ucalığıdır.
Yolun kənarında bir neçə nəfər dayanmışdı. "Moskviç"i
görüb əllərini qaldırdılar. Maşın yanlarından ötüb keçəndən
sonra arxadan qışqırışdılar.
—Məndən nə gedir? İndi ki bundan Dadaşın könlü xoş olur,
qoy olsun, qoca kişidir.
—Düz demirsən. Mən eşitmişəm ki, söz düşəndə Dadaş
həmişə bu şayiəni danır.
—Ay allah, nə yaman uşaqsan sən hələ! Əlbəttə danacaq. O
vaxt ki, bu şayiə yox idi, onu yaratmağa cəhd edirdi. Bəli, bəli,
bu fikir onun özündən başqa heç kəsin ağlına gəlmirdi. Özü
başladı belə rəy yaratmağa. Əlbəttə, çox ustalıqla, altdan-
altdan. Nə bilim işdən bir yerdə çıxmaq, məni ötürmək, ikibaşlı
sözlər, mənalı baxışlar. Məsələn, otaqda mənimlə qəsdən sırf
rəsmi danışırdı. Çöldə-bayırda, dəhlizdə isə tutub uzun-uzadı
söhbət edirdi. Özü də xısın-xısın, pıçıltıyla. Hamı da görür axı.
Deyirlər, balam, bu nə söhbətdir ki, otaqda hamının yanında
66
eləmirlər; xəlvətə çəkilirlər? Sonra başqa şeylər də vardı.
Məsələn, bax belə xırda təfərrüat. Axşam bizə zəng eləyir,
mənimlə, Manafla danışır. Görürsən, deyirəm ki, xəstəyəm,
bəlkə sabah işə gələ bilmədim. Bəli, səhər, idarədə bunu belə
xüsusi cür xəbər verir: Təhminə bir balaca kefsizləyib, bu gün
işə gəlməyəcək.
—Yaxşı, sən də sözbazlıq eləmə də, burada nə var ki?
—Başa düşmürsən? Guya bu məlumatı sadəcə telefonla
almayıb, hamıda belə təsəvvür oyanır ki, guya bu nə isə yaxın,
məhrəm adamdır, bir sözlə, ev adamıdır. Ailənin içindən gəlib
işdə xəbər verir. — Susdu və bir qədər əsəbi əlavə etdi: —
Təhminə işə gəlməyəcək. Guya başqası bunu zəng eləyib bilə
bilməzdi. Kibriti ver görüm. Sönüb. Aha... Hə, sonra ki, başladı
söz-söhbət, eyhamlar, onda da arifdi, başladı danmağa, özü də
elə can-başla danmağa başladı ki, yatanları da ayıltdı. Çox
vaxt görürsən, özü bu söhbəti heç eşitməyənlərə eşitdirirdi: əşşi
mənimçün söz çıxarıblar, yaxşı deyil, qızım yerindədir; gedər
ərinə çatar, duz-çörək kəsmişik, filan-peşməkan. Deyərsən
daha bundan namuslu adam yoxdur, — istehzayla əlavə etdi,
— qeyrət dağarcığı, — susdu, sona yenə sözünə davam etdi. —
Hə, belə-belə hamıda fikir oyandı ki, bəli, burda mütləq bir iş
olmamış deyil. Mən də qaldım gic vəziyyətdə. Hər sözümü, hər
hərəkətimi başladılar müəyyən yerə yozmağa. Dadaşa
mehribanlıq da göstərsəm, etinasızlıq da, heç fərqi yoxdur. Hər
şeyi bir cür başa düşürlər.
Birdən nədənsə Zaurun Təhminəyə yazığı gəldi. Düşündü
ki, bütün bu yüngülməcazlığına,
əzilib-büzülməsinə
baxmayaraq, yəqin onun da öz dərdi-səri var.
Təhminə:
—Əlbəttə, — dedi, — mən də istəsəm, yüz cür kələk qurub
işin içindən çıxaram. Məsələn, bəd ayaqda adımı bir
başqasıynan çıxardaram. Dadaş da qalar qurumsaq kimi baxa-
baxa.
Qəfildən maşının güzgüsündə gözləri Zaurun nigaran
Dostları ilə paylaş: |