Şərqşünaslıq fakültəsi İstiqaməti, şifri və adı: hsm- 040000 Dilşünaslıq İxtisası, şifri və adı: hsm- 040009 Ərəb dili
I FƏSİL SƏNƏDLƏRİN LİNQVOPRAQMATİK XÜSUSİYYƏTLƏRİ
Yüklə 129,86 Kb.
|
| I FƏSİL
SƏNƏDLƏRİN LİNQVOPRAQMATİK XÜSUSİYYƏTLƏRİ Dil yaranmasına, formalaşmasına görə son dərəcə mürəkkəb, çoxcəhətli bir hadisə olduğu kimi, mahiyyət və xidmətinə görə də mühüm, vacib və əvəzsiz bir vasitədir. Buna görə də dil müxtəlif elmlərin tədqiq obyektləri sırasına daxil olmuş və müxtəlif elmlərdə dil ilə əlaqədar xüsusi bəhslər açılmışdır. Məlum olduğu üzrə, dil fəlsəfənin, psixologiyanın, fiziologiyanın, tarixin, ədəbiyyatşünaslığın və musiqişünaslığın tədqiq obyektləri sırasında həmin elmlərlə əlaqədar cəhətlərinə görə tədqiq olunmuş, indi də tədqiq olunur və bu elmlərdə dil ilə əlaqədar dilin fəlsəfəsi, dil və təfəkkür, dilin psixologiyası, nitq prosesi, loqopediya, nitq orqanları, əsəb sistemi və nitq, üslub, vəzn, heca, qafiyə, akustika, vokal sənəti və nitq və s. kimi bəhslər xüsusi yer tutur[8,15]. Lakin bütün bunlara baxmayaraq, dili əsas tədqiq obyekti edən və elmlər silsiləsində xüsusi yer tutan ayrıca bir elm sahəsi yaradılmışdır ki, bu elm “dilçilik” adlanır. Dil hadisəsi çoxcəhətli bir hadisə olduğu üçün əsas tədqiq obyekti dil olan dilçiliyin də bir sıra sahələri vardır. Dilçilik elmləri silsiləsində üslublardan və bu üslubların əsasını təşkil edən ifadəlilik vasitələrinin sistemindən bəhs edən müstəqil bir elm sahəsi vardır ki, bu da üslubiyyat adlanır[8,42]. Üslubiyyat dilin ifadəlilik vasitələrinin məqsədəuyğun surətdə istifadə edilmə qayda və qanunlarından, xüsusiyyət və əlamətlərindən, ifadə vasitələrinin sistem təşkil etməsi xüsusiyyətlərinə görə formalaşan müxtəlif üslubların əlamətdar cəhətlərindən bəhs edən bir elmdir. Üslubiyyatın mövzu və vəzifəsi eyni zamanda onun həcmini və quruluşunu da müəyyənləşdirmək üçün lazımi əsasları verir. Çünki ifadə vasitələrinin məqsədəuyğun istifadəsindən bəhs edən üslubiyyat, şübhəsiz ki, dilin bütün vahidləri ilə, xüsusən başlıca vahidləri olan lüğət tərkibi və qrammatik quruluşu ilə sıx bağlıdır. Elə buna görə də üslubiyyatın həcmi və quruluşu məsələsi bir sıra mülahizələrin də meydana çıxmasına səbəb olmuşdur. Bəziləri, xüsusən keçən əsrlərdə üslubiyyatı daha çox sözlərin istifadəsi ilə məhdudlaşdırıb burada söz bəhsini əsas bəhs, hətta yeganə, mərkəzi bəhs kimi qiymətləndirmişlər. Bəzi üslubiyyatçılar isə lüğət bəhsini ataraq qrammatik vasitələri əsas saymışlar, üslubiyyatı “stilistik qrammatika” istilahı ilə əvəz etmək mülahizəsini irəli sürmüşlər və üslubiyyatda ancaq morfoloji və sintaktik vasitələrin məqsədəuyğun istifadəsindən bəhs etməyi məsləhət görmüşlər[8,20]. Doğrudur, üslubiyyat da fonetik-üslubi vahidlər, leksik-üslubi vahidlər, qrammatik üslubi vahidlər deyilən əsas bəhslərə ayrılır, lakin üslubiyyatda bu bəhslərə daxil olan vahidlər tamamilə başqa sistemdə tədqiq olunur. Hər şeydən əvvəl, belə bir cəhəti yada salmalıyıq ki, məsələn, qrammatikada vahidlər təcrid olunaraq abstraksiya istiqamətində tədqiq edildiyi halda, üslubiyyatda belə vahidlər qarşılaşdırma əsasında tədqiq olunur. Buna görə də, fonetik vahiddən bəhs edərkən leksik, morfoloji və sintaktik sinonim vahidlərin də qarşılıqlı surətdə məhz fonetika bəhsi içərisində nəzərdən keçirilməsi mümkün və bəzən vacib sayılır. Beləliklə də, adları çəkilən bəhsləri təcrid edən hüdudlar aradan qaldırılmış olur. Bu isə dilin öz təbii varlığına daha uyğundur; çünki dil onun bütün vahidlərinin üzvi vəhdətində mövcuddur və heç bir vahid təklikdə dil deyildir[13,44]. Ədəbi dilin müəyyən normalara malik olması və bu normalara riayət etmək tələbi heç də ədəbi dili məhdudlaşdırmır; onun, müxtəlif və dar sahələri təfərrüatı ilə əhatə edə bilməyən və buna görə də bir şeyin ancaq ümumi şəkildə ifadəsinə yarayan məhdud vasitələrə malik dil olduğuna dəlalət etmir. Əksinə, ümumi normaların olması, ədəbi dilin daha geniş dairədə hamı ilə və hər cür şəraitdə dil tapan, hər şeyi bütün təfərrüatı ilə əhatə və ifadə edə bilən bir vasitə olduğunu göstərir. Buna görə də ədəbi dil bir sıra spesifik xüsusiyyətləri ilə fərqlənən və belə xüsusiyyətlər, əlamətlər sistemi ilə də qollara ayrılan vahid ümumxalq dilinin ali forması kimi anlaşılmalıdır. Bu isə o deməkdir ki, ədəbi dilin əsasını ümumxalq dili vahidləri və hamı üçün ümumi olan cəhətlər təşkil edir. Lakin bununla yanaşı olaraq bir sıra məhdud sahələrlə əlaqədar spesifik cəhətlərə malik olduğundan ədəbi dil ifadəlilik vasitələri sisteminə görə müxtəlif qollara ayrılır ki, buna da ümumiləşdirilmiş halda ədəbi dilin üslubları deyilir. Eyni məsələ haqqında, eyni mövzuda ali məktəbdə, kütlə arasında yaxud mütəxəssis alimlər arasında mühazirə oxumaq, məruzə etmək mümkündür; eyni məsələ haqqında qəzetdə məlumat yazmaq, elmi əsər və bədii əsər də yazmaq mümkündür. Bunların hamısı hər hansı bir dildə, məsələn Azərbaycan dilində ifadə edilməsinə baxmayaraq, spesifik ifadə vasitələrinə malik olur və beləliklə də, bir-birindən fərqlənir. Bu fərqlər isə dil fərqi deyil, məhz üslub fərqidir[3,28]. Məlum olduğu üzrə, elm və ədəbiyyat varlığın dərk edilməsidir; lakin bunların təzahürü müxtəlif olduğuna görə elm ədəbiyyat deyil, ədəbiyyat (incəsənət) da elm deyildir; ümumiyyətlə, hər sahənin dərketmə üsulu, ifadəetmə üsulu və ifadəetmə tərzi fərqlidir. Elm abstraktlaşmadır, incəsənət, o cümlədən ədəbiyyat konkretləşmədir. Lakin burada, ümumiləşdirmə ilə abstraktlaşdırmanı qarışdırmaq olmaz. İfadə edilməsinə gəldikdə, elmin ifadəsi üçün terminlilik sistemi, bədii ədəbiyyat üçün obrazlılıq sistemi əlamətdar cəhətdir[8,40]. Dil inkişaf etdikcə, onun xidmət sahəsi genişləndikcə, üslubi vasitələr zənginləşir və dilin üslubları da artır. Ümumiyyətlə, dilin tarixi inkişafı həm qrammatik vahidlərdə, sözlərdə və fonetik vahidlərdə, həm də üslubi zənginləşmə, üslubi təkmilləşmə və müxtəlifləşmə şəklində təzahür edir. Bundan başqa dilin üslubi norması da dəyişir, həm də dilin digər vahidlərinə nisbətən daha tez və surətlə dəyişir. İnkişaf etmiş hər bir dilin özünəməxsus üslub qolları olur və bu qollar xüsusi əlamətdar cəhətlərinə görə bir-birindən fərqlənir. İndiyə qədər üslubiyyata dair yazılmış ədəbiyyatda üslubları fərqləndirən əlamətlər müxtəlif nöqteyi-nəzərdən, müxtəlif meyarla ölçüldüyündən üslubların müxtəlif bölgüsü meydana gəlmişdir[3,58]. Məlum olduğu üzrə, qədim yunan filosof-filoloqlarına görə, üslub daha çox danışıqda inandırma tərzi kimi, ritorik vasitə kimi, qədim Hindistanda isə daha çox nitqi gözəlləşdirmə, ifadələşdirmə tərzi kimi qiymətləndirilmişdir; orta əsrlərdə üslub daha çox janrlarla əlaqədar ifadə tərzi kimi qiymətləndirilmişdir. Qədim yunanlarda ümumi şəkildə müəyyənləşdirilmiş olan “üç üslub” anlayışı, xüsusən milli ədəbi dillərin formalaşması dövründə yeni mənada, sinfi üslublar kimi qiymətləndirilmişdir. Üslub anlayışı dilin müxtəlif funksiya dairəsi ilə də ölçülmüş, nitq anlayışı ilə eyniləşdirilmiş; nəhayət, nitq və dil sözləri də “üslub” mənasında işlədilmişdir. Beləliklə də, müxtəlif üslub anlayışlarını ifadə edən müxtəlif üslubi adlar-terminlər yaradılmışdır[8,61]. Belə müxtəlif üslubi adlar isə bu və ya digər münasibətlə ədəbiyyatda işlədildiyindən, biz də bunların ancaq bir qismindən, xüsusən son zamanlar yazılmış ixtisas ədəbiyyatında başlıca üslublar kimi qeyd olunan növlərindən bəhs etməyi məqsədəuyğun bildik. Üslub təfəkkür tərzi ilə bağlıdır və burada nitqin hər cür imkanlarından məqsədəuyğun surətdə istifadə olunur. Buna görə də üslub ilə nitqin müxtəlif təzahür şəkillərini eyniləşdirmək olmaz. Nitqin təzahür şəkilləri əsasən aşağıdakı əlamətlərlə, yəni ifadə vasitəsinə görə və ifadə nizamına görə müəyyənləşir: İfadə vasitəsinə görə nitq iki cür olur: a) şifahi; b) təhriri. Şifahi nitqin ifadə vasitəsi mənalı sözlərdir və onların tərkibdə səslənməsidir; təhriri nitqin ifadə vasitəsi isə hərfi işarələrdir və onların tərkibi ilə düzələn yazıdır. Bu vasitələrin də əlamətdar cəhətləri vardır ki, bunlardan məqsədəuyğunluq əsasında bu və ya digər üslubda istifadə edilə bilər; lakin belə əlamətdar cəhətlərin olması heç də şifahi üslub və təhriri üslub deyə iki üslubun ayrılması üçün əsas ola bilməz. Üslub ifadələrin, sözlərin, qrammatik əlamətlərin və fonetik imkanların məqsədəuyğunluq əsasında seçilmiş sistemində formalaşır; halbuki belə seçilmə təhriri və şifahi nitqi əlamətləndirmir. İfadə nizamına görə nitq iki cür ola bilər: a) mənsur (nəsr); b) mənzum (nəzm). Mənsur nitq ümumi qayda üzrə sözlərin dəyişməsi və birləşməsi əsasında düzəldilmiş cümlələrdən ibarət olur. Belə cümlələrdə sözlərin, hecaların, səslərin miqdarca, səslənməsinə görə bərabər olması, oxşar olması, həmahəngliyi və s. məcburi sayılmır; mənzum nitqdə isə sətirlərin heca miqdarı (ya səslənmə miqdarı) və növü oxşar, bərabər, həmahəng olmalıdır. Nitqin ifadə qurumuna görə belə növlərə ayrılması isə, heç də ayrıca mənzum üslubun və ayrıca mənsur üslubun fərqlənməsi üçün əsas ola bilməz. Mənsur və mənzum nitq həm şifahi, həm də təhriri ola bilər. Doğrudur, bizim dövrümüzdə mənzum nitqin istifadə sahəsi bədii ədəbiyyatdır; lakin qədim zamanlardan və orta əsrlərdən bizə məlumdur ki, mənzum nitqdən bütün sahələrdə istifadə olunmuşdur. Yəni mənzum tibb, riyaziyyat, fəlsəfə, qrammatika kitabları yazıldığı kimi, mənzum lüğətlər də yazılmışdır[8,67]. Nitq mədəniyyəti tədris müəssisələrində ayrıca tədqiq olunan intizam normasıdır. Nitq mədəniyyətinin əsas məqsədi insan nitqini daha savadlı, daha düzgün, dil normalarına uyğun şəkildə tənzimləməkdən ibarətdir. Nitq mədəniyyəti bir elm kimi dilçiliyə aiddir və ədəbi dilin normalarını tədqiq etməklə məşğuldur[4,28]. Məlumdur ki, danışıq iki şəxs arasında olduğu kimi, bir neçə şəxs arasında da ola bilər; xüsusən danışan şəxs bir şəxsə deyil, bir neçə şəxsə, bir salonda yığışanlara, mitinqə toplaşanlara, yaxud indiki şəraitdə radio və televiziya ilə milyonlara müraciət edərək danışa bilər. Şübhəsiz, belə şəraitdən asılı olaraq danışan şəxsin nitqində də bəzi fərqlər olur və olmalıdır. Belə vəziyyətdə dinləyənlərin hazırda və ya qaibdə olması da nitqin az-çox fərqlənməsinə təsir göstərə bilir. Buna görə də şərti olaraq fərdi nitq, ictimai nitq, qiyabi nitq, ələni nitq adları ilə nitqi bir çox çalarlığa görə də qruplaşdırmaq olar; lakin bunlar həqiqi mənada fərqlənən nitq də deyil, üslub da deyil[8,55]. Danışıq üslubları ədəbi janrlarla, ünsiyyət situasiyaları ilə, müəllifin şəxsiyyəti ilə, dil üslubları ilə, ünsiyyətin məqsəd və vəzifələri ilə bağlı olan və nitq mədəniyyətinin dil tərkibinin əsas xüsusiyyətlərini özündə toplayan sabit sistemlər toplusundan ibarətdir[11,44]. Dil və nitq üslublarını, onların əlaqəsini dərk edən zaman insan mədəniyyəti ilə nitq mədəniyyətinin də bir-birilə sıx əlaqədə olduğunu başa düşmək olar. Nitqin kommunikativ keyfiyyətləri heç də həmişə düzgün seçilmiş dil və ya nitq üslublarından asılı olmur[10,34]. Dil üslubları kimi dilin müxtəlif vəziyyətlərdəki fəaliyyətlərinin tiplərini nəzərdə tuturlar. Hər bir situasiya üçün özünəməxsus tələblər irəli sürülür. Ən sərt tələblər əlbəttə ki, rəsmi-işgüzar və elmi üslublarda özünü göstərir. Sözün düzgün və yerində işlədilməsi şərti sənədi tərtib edəndən hər hansı bir sözün konkret sferada (alınma, arxaik, peşəkar və s.) məna çalarlarını tam və dəqiqliklə bilməsini tələb edir. Funksional üslub xüsusi stilistik çalara malik olan, ictimai fəaliyyətin müəyyən formasına uyğun gələn, bu sferada xüsusi dil və nitq vasitələrinin fəaliyyəti ilə yaranan bu və ya digər sosial müxtəliflikdir. İstənilən dilin, xüsusən də ərəb dilinin üslubiyyat sistemini istifadə edərkən həddən artıq diqqətli olmaq lazımdır. Üslubların istifadə sərhədlərini incəliklə ayırmağı bilmək vacib məsələlərdəndir[2,58]. Müxtəlif üslubların qarışığından əsasən bədii üslubda müəyyən effekt yaratmaq üçün istifadə olunur. Funksional üslublara yiyələnmək hər bir insanın nitq mədəniyyətinin vacib elementlərindəndir. Üslublar əsasən, leksik fond əsasında qarşılaşdırılırlar. Belə ki, onlar arasında fərqlər daha çox özünü lüğət tərkibində göstərir. Üslub yaratmaq faktoru özünü onda göstərir ki, üslub danışan və ya yazan individumu seçir, o isə öz hislərinə və auditoriyanın nəzər-nöqtəsinə əsaslanır. Anlaşıqlı sözlərdən əlavə, o həm də anlaşılan üslubu seçib ayırmalıdır. Üslub ayrıca bir söz də ola bilər ki, bu söz də üslub baxımından həm neytral ola bilər, həm də stilistik çalarlara malik ola bilər[9,67]. Danışana qarşı irəli sürülən əsas tələblərdən biri də dilin funksional müxtəlifliklərini ayırmaq və düzgün istifadə etməkdən ibarətdir. Bununla yanaşı, nəzərə almaq lazımdır ki, bu müxtəlif çalarlardan hər biri ünsiyyətin qarşıya qoyduğu məqsədlərə uyğun seçilməlidir. Danışıq dilini (qeyri-ədəbi dil) ədəbi dildən fərqləndirən cəhət ondan ibarətdir ki, danışıq dilinin daşıyıcıları bu dil fərqlərini ya ayırmır, ya da çox pis ayırırlar. Rəsmi-işgüzar sferaya düşdükdə belə insanlar necə danışmaq lazım gəldiyini, hansı terminlərdən harada istifadə olunmasının münasib olduğunu bilməyəcəklər. Dilin müxtəlif funksiyalarını bilmək bu fərqləri bir-birindən ayıra bilmək üçün lazım olan dil vahidlərini seçməkdir[4,73]. Dil üslub qatlarından ibarətdir, bu qatlar isə təfəkkür tərzinə görə fərqlənən ifadə tərzinin məqsədəuyğun ifadəlilik vasitələri sistemi əsasında yaranmış qatlardır. Belə qatların bəzisi dil formalaşandan təşəkkül etmiş, bəzisi isə təfəkkürün və onun ifadə tərzinin inkişafı ilə əlaqədar surətdə sonralar formalaşmışdır. Üslublar yaxud üslub kökləri və üslub budaqları da məhz bu meyarla ölçülür[11,55]. Bu mülahizəni bir az da aydınlaşdıraraq deyə bilərik ki, bədii, elmi və ictimai-siyasi təfəkkür tərzlərinə müvafiq olaraq üç cür də ifadəlilik sistemi yaranır; bunlar da başlıca olaraq aşağıdakı üç üslubun formalaşması üçün əsas təşkil edir: Bədii təfəkkür sistemi − bədii üslub; Elmi təfəkkür sistemi − elmi üslub; İctimai-siyasi təfəkkür sistemi − ictimai-siyasi üslub[8,25]. Ədəbi dilin ilkin formalaşan, nisbətən çox və tez-tez dəyişən, rəngarəng variantları və daha çox kütləvi sayılan üslubu bədii üslubdur. Bədii üsluba bədii dil də deyilir və bu cəhətdən bu iki termin, demək olar ki, sinonim terminlərdir. Bədii üslubu başqa üslublardan, məsələn, elmi üslubdan, siyasi-ictimai üslubdan fərqləndirən əlamətdar cəhətlər burada daha çox dilin ekspressivlik, emosionallıq və təsvir vasitələrinin seçilmiş sistemindədir. Bədii üslub və ya bədii dil obrazlı dildir; bu üslubda obrazı-surəti daha parlaq, daha canlı rəsm etmək üçün ən əlverişli sözü və ya ifadəni tapıb işlətmək tələb olunur. Elmi üslubu başqa üslublardan fərqləndirən bir sıra əlamətdar cəhətlər vardır ki, dilin bütün vasitələrində müxtəlif şəkildə təzahür edir və spesifik sistem təşkil edir. Bu əlamətdar cəhətlərin başlıcası aşağıdakılardır: Terminlilik elmi üslubun lüğət tərkibini digər üslublardan fərqləndirən əsas əlamətdar cəhətlərdəndir. Terminlər elmi məfhumların ən dəqiq ifadəsi kimi elmi üslubda məcburi və müntəzəm işlədilməklə elmi üslubu tipikləşdirən vasitələrdir. Terminlilik ona görə əlamətdar cəhət hesab olunur ki, terminlərin başqa üslublarda işlədilməsi mümkündür, lakin vacib deyil; halbuki, elmi üslub terminsiz olmaz, buna görə də elmi üslubun əsas əlaməti terminlilik sayılır. Həqiqi mənalılıq, yəni sözlərin məcazi mənada deyil, həqiqi mənada işlədilməsi də elmi üslubun əlamətdar cəhətlərindən biri sayıla bilər. Məzmun çalarlığının əsas olması, yəni emosional çalarlığın olmaması və ya əsas olmaması elmi üslubun başlıca əlamətlərindən biridir. Elmi üslubda ekspressivliyin zəruri sayılmaması ilə əlaqədar olaraq nida sözləri, nida cümlələri, birinci və ikinci şəxs üzrə ifadə vasitələri, nəhayət, dialoq tərzi də işlədilməz və ya belə vahidlərin işlədilməsi elmi üslubun əlamətdar cəhəti sayılmaz. Belə bir cəhəti də xüsusi olaraq qeyd etmək lazımdır ki, bu və ya digər üslubun yaranması heç də bunların daim təcrid olunmuş halda işlədilməsi demək deyildir. Bir üslub içərisində digər üslub ünsürləri ola bilər və çox zaman bunların belə qovuşuq işlədilməsi, xüsusən bədii, ictimai-siyasi üslublarda zəruri sayılır. Ümumiyyətlə, fikrin dürüst, dəqiq ifadəsi bütün üslublardan tələb olunur; lakin dəqiqlik və dürüstlük təzahürü üçün hər üslubun özünə xas forması vardır. Elmi üslubda dəqiqlik, dürüstlük ümumi və abstrakt olduğu halda, bədii üslubda, əksinə, daha çox konkretdir, tarixidir və hətta müəyyən üslubla üzvi surətdə bağlıdır[8,29]. Funksional üslublar arasında ən geniş yayılmış üslublardan biri də rəsmi-kargüzarlıq üslubudur. Lakin funksional üslublar arasında qəti sərhəd yaratmaq mümkün deyil. Belə ki, bəzi hallarda rəsmi üslubu kargüzarlıqdan ayırsalar da, bəzən kargüzarlığa daxil edilən sənədləri diplomatik üsluba aid edirlər. Rəsmi-kargüzarlıq üslubunun elmi üslubla oxşar cəhəti isə, burada da bədiiliyə, emosional nitqə yer verilməməsindən ibarətdir. Lakin bir cəhəti də qeyd etmək lazımdır ki, basmaqəlib (trafaret) və şablon ifadələrdən, ştamp, klişe, stereotip cümlə və s. bu kimi metasintaktik elementlərdən istifadə bu üslubun əsas xarakterik cəhətidir [2, 526]. Rəsmi-işgüzar üslub özünün sabitliyi və qapalılığı ilə fərqlənir. Burada daha çox klişelərə, ştamplaşmaya, çətin normativlərə üstünlük verilir. Bu üsluba daxil olan dil vahidlərinin əsas funksiyası rəsmi-işgüzar münasibətləri, yəni dövlət orqanları, təşkilatları arasında və ya daxilində, istehsalat, təsərrüfat, hüquqi fəaliyyət prosesində təşkilatlar və fiziki şəxslər arasında yaranan münasibətləri öyrənməkdir. İşgüzar nitq janr-üslub normalarına uyğun tərtib edilmiş yazılı sənədlərdə əks olunur. Sənədlərin tipləri məzmununa (hansı rəsmi-işgüzar vəziyyətin əks olunmasına görə) və formasına (sənədin mətninin əsas elementləri olan rekvizitlərin quruluş sxemi ilə) görə təsnif edilirlər[13,58]. İşgüzar üslubun ən az 3 altsistemini ayırırlar: -sırf rəsmi-işgüzar; -hüquqi (qanun və fərmanların dili); -diplomatik[50]. Bir sıra fərqlərin olmasına baxmayaraq, bu altsistemlər xarakterik cəhətlərinə görə yaxındırlar. Rəsmi-işgüzar və diplomatik sənədləri bir-birinə yaxınlaşdıran cəhət ondan ibarətdir ki, hər ikisi tərəflər arasında razılıq əldə olunmasına və diplomatik formulların etik təbiətinə əsasən tərəflərin pozisiyalarının müəyyən olunmasına xidmət edirlər; onlardan fərqli olaraq, “qanunlar”ın dili üçün xarakterik cəhət şərt və vəzifələrin, onların hüquqi məsuliyyətlərinin sadalanmasıdır. Lakin işgüzar-rəsmi üslub bütünlükdə öz xüsusiyyətlərini dəftərxana sənədlərində göstərir[11,44]. Rəsmi üslub rəsmi sənədlərə məxsusdur. Müasir dövrdə rəsmi üslub artıq formalaşmış bir üslubdur. Onu digər üslublarla yaxınlaşdıran cəhətlər olduğu kimi, fərqləndirən cəhətlər də vardır. Rəsmi üslubun xüsusiyyətləri bunlardır: inandırıcılq, ardıcıllıq, dəqiqlik, aydınlıq, sadəlik, məntiqilik[14,65]. Bu xüsusiyyətlər isə yazıda ayrı-ayrı dil faktorlarının köməyi ilə yaradılır. Bu baxımdan rəsmi üslubun leksikasını, morfologiyasını, sintaksisini, nəzərdən keçirmək lazımdır[13,69]. Rəsmi üslubun leksikası. Diplomatik sənədlərin və dövlət qanunvericiliyi sənədlərinin dilində fərqlər olsa da, bütün rəsmi sənədlərin dili vahid rəsmi üslubun daşıyıcısıdır. Rəsmi üslubda metaforlaşmaya, epitetlərə, müqayisələrə geniş yer verilir. Bu səbəbdən də rəsmi üslubun özünəməxsus leksikası, standart ifadələri vardır. Rəsmi üslubun leksikasına ümumxalq danışıq dilində, bədii dildə işlənən, lakin rəsmi sənədlərdə rəsmi xarakter daşıyan sözlər və frazeoloji birləşmələr daxildir. Məsələn: “qonaq”, “danışıq”, “görüş”, “elçi”, “söhbət”, “səfər”, “razılıq” və s. Lakin ümumxalq danışıq dilindən və bədii üslubdan fərqli olaraq, bu sözləri rəsmiləşdirmək üçün onların əvvəlinə “rəsmi” sifəti əlavə olunur: “rəsmi görüş”, “rəsmi səfər” və s. Rəsmi üslubun özünəməxsus terminləri vardır: bəyannamə, bəyanat, diplomatik, konsul, müqavilə, nota, ultimatum, fərman, əmr, xasiyyətnamə, etibarnamə, arayış və s. Rəsmi üslubun leksikası ali leksikadır. Bu da diplomatik sənədlərin, rəsmi sənədlərin gücünü, təsirini artırmağa xidmət edir[14,54]. Rəsmi üslubda əsasən sifətlərdən ibarət olan ali leksika elementlərinə aşağıdakıları misal göstərmək olar: fəxri/qaravul, ali/nümayəndə, yüksək/tərəflər, hörmətli/qonaq, böyük/şəhər və s. Bundan başqa, rəsmi üslubda danışığa təntənəli xarakter vermək üçün, xüsusi hörmət ifadə etmək üçün “cənab”, “zati alilər” kimi xitablardan istifadə olunur; “şah”, “kral”, “əlahəzrət”, “şahzadə”, “ser ” kimi titul bildirən sözlərin işlənməsi də rəsmi üslubun özünəməxsus xüsusiyyətlərindən biridir. Bir qrup feillər də rəsmi üslubda ali leksikanın yaranmasına xidmət edir: “dəvət etmək”, “müşayiət etmək”, “qəbul etmək”, “müdafiə etmək”, “təqdim etmək”, “elan etmək” və s. Sənəd dili- rəsmi üslub Azərbaycan dilinin tarixində heç vaxt ədəbi dilin səviyyəsini əks etdirməyib və ya əksinə, ədəbi dilin enerjisi, çevikliyi heç vaxt sənəd dilində əks olunmayıb. Ona görə ki: 1. sənəd tərtibat işidir, yaradıcılıq deyil və buna görə də bu inventarçılığa təfəkkür müdaxilə etmir[5,24]; 2. Azərbaycan dövlət dili ənənəvi olaraq ərəb-fars dillərindən alınmış sözlərdən ibarət olduğuna görə rəsmi üslub ən çox tərcümə, kalka əsasında müəyyənləşdirilmişdir: belə halda dilin daxili enerjisi səfərbərliyə alınmır [1,21]. Məlumdur ki, rəsmi sənəd dilində standartlar, qəliblər, vahid formalar olmalıdır. Bu standartçılıq həmin üslubdan kütləvi istifadə imkanını təmin etmək üçündür; azsavadlıların da qəlib dairəsində, standart söz və ifadələrlə ədəbi dil normasını icra edə bilməsi üçün bu forma yararlıdır. Üslubun epistolyar qolunda əsas əlamət xüsusilə başlanğıcda və sonda nəzərə çarpır: məhz əvvəldə və sonda ştampçılığa yol verilir − bir qayda olaraq, müraciət olunan şəxsə əvvəldə hörmət əlaməti kimi xeyli təyin göstərilir; sonda isə məktub yazan kiçik təyinlə (təvazökarlıq əlaməti kimi) özünü təqdim edir [2,8]. İşgüzar nitq hüquqi qüvvəyə malik olan sənədlərlə bağlı olduğu üçün burada işgüzar üslubun dil vasitələrindən istifadə qaçılmazdır[20,14]. Rəsmi-işgüzar üslubun xarakteristikası özündə xüsusiyyətlərinə görə fərqlənən iki normanı toplamışdır: Sənədin sxeminə uyğun dil materiallarını idarə edən dil normalarını; Sənədin məzmununu, mətnini idarə edən mətn normalarını. Sənədlərdə təkcə xüsusi üslubu deyil, həmçinin onların tərtib olunması qaydalarının düzgünlüyünü, ştampların mövcudluğunu da ayırırlar. Buna görə də çox vaxt hazır blanklardan istifadə olunur. Rəsmi-işgüzar üslub sənədlərin-beynəlxalq razılıqların, dövlət aktlarının, hüquqi qanunların, işgüzar sənədlərin və s. üslubudur. Məzmun müxtəlifliyinə və janr fərqlərinə baxmayaraq, rəsmi-işgüzar üslub bir sıra ümumi cəhətlərlə xarakterizə olunur. Buraya aiddir: 1.mətnin yığcamlığı; 2.materialın standart formada yerləşməsi; 3.terminologiyanın, nomenklaturanın, mürəkkəb sözlərin ixtisarı, abreviaturanın və s. istifadəsi; 4.mürəkkəb cümlənin hissələrini əlaqələndirmək üçün müxtəlif söz birləşmələrinin, məsdərlərin işlənməsi; 5.sadalamadan istifadə; 6.cümlədə sözlərin düzgün ardıcıllığı; 7.mürəkkəb cümlələrin çoxluğu; 8.ekspressiv leksikanın yoxluğu; 9.individual olmaması[50]. Bundan başqa, işgüzar nitqdə şəxs əvəzliklərinin (o, onlar) istifadəsi yol verilməzdir. Belə ki, onlar məzmunun dəqiqliyinə və aydınlığına xələl gətirə bilər. Sintaksis baxımından işgüzar nitq məntiqi olmalı, faktlara əsaslanmalıdır. Bu səbəbdən də işgüzar mətnlərdə mürəkkəb konstruksiyalar üstünlük təşkil edirlər; bağlayıcılı mürəkkəb cümlələr məntiqi münasibətləri ifadə etmək üçün ən yaxşı vasitədir. İşgüzar üslubun sadalanmış fərqli cəhətləri (stilistik, leksik, morfoloji, sintaktik) bu üslubun yazılı sferasına aiddir və ona aid sənədlərin janrlarını özündə əks edir. Rəsmi-işgüzar üslubun bütün cəhətləri (dil və mətn normaları) dövlət standartlarında əks olunduğu üçün işgüzar sənədlərin standartlaşdırılması və unifikasiyası yüksək səviyyədə aparılır[26,11]. Beynəlxalq siyasi və iqtisadi münasibətlərin genişlənməsi xarici dilləri bilən ixtisaslaşmış mütəxəssislərə olan tələbatı da artırmışdır. Bununla əlaqədar əcnəbi dillərin, xüsusən də liderlik edən ingilis dilinin öyrənilməsi dünya mədəniyyətindən, elm və texnikanın nailiyyətlərindən xəbərdar olmağa şərait yaradır. Fəaliyyətin siyasi, sahibkarlıq, işgüzar və digər sferalarında danışıqlar mühüm rol oynayırlar. Danışıq prosesinin etika və psixologiyasının tədqiqi ilə təkcə ayrı-ayrı tədqiqatçılar deyil, eyni zamanda xüsusi mərkəzlər də məşğul olurlar. Danışıqlar verbal formada həyata keçirilirlər. Bu isə onun iştirakçılarından təkcə savad deyil, həm də nitq mədəniyyəti etikasına riayət olunmasını tələb edir. Bundan başqa, bizim nitqlə yanaşı istifadə etdiyimiz jestlər, mimikalar (qeyri-verbal nitq) da mühüm rol oynayırlar. Nitqin qeyri-verbal aspektlərindən istifadə xüsusən digər dil və mədəniyyətləri təmsil edən xarici tərəfdaşlarla əlaqə zamanı özünü göstərir. Təşkilatın inkişafının bütün mərhələlərində danışıqlar onu müşayiət edirlər. Onların savadlı, psixoloji cəhətdən düzgün tərtib olunmasından, təşkilatın gələcək fəaliyyəti və uğuru tamamilə asılıdır. Danışıqlar zamanı çətinliklər əsasən dünyagörüşünün fərqli olması ilə bağlıdır ki, bu da çox vaxt milli xüsusiyyətlərin müxtəlifliyindən irəli gəlir. Danışıqlar zamanı milli spesifikanı bilmək, tərəfdaşlar arasında anlaşmanı da asanlaşdırır. Etnopsixologiyada kontekst nöqteyi-nəzərindən aşağı və yuxarı səviyyədə olan mədəniyyətləri ayırırlar. Birincilərə ifadə olunan sözün hərfi mənada başa düşüldüyü, heç bir mətnaltı məna ifadə etmədikləri mədəniyyətlər aiddirsə, ikincilərə isə kontekstin mənası yüksək olan mədəniyyətlər aiddir ki, buradakı mətnaltı məna bəzən bütövlükdə mətnin mənasını dəyişdirməyə qadir olur. Birinciyə amerikan, alman dilləri, ikinciyə isə fransız, yapon dilləri misal ola bilər. Ərəb ölkələrində isə danışıqlar zamanı qarşılıqlı inam atmosferi yaratmaq vacibdir. Avropalılar məsələnin həlli zamanı işin gedişatını əvvəlcədən təxmin etməyə öyrəşmişlərsə, ərəblər əksinə daha çox keçmişə nəzərən, öz adət və ənənələrinə əsaslanaraq hərəkət edirlər. Ümumilikdə, ərəb dünyası eynitipli deyil və müxtəlif ərəb ölkələrində işgüzar ünsiyyətin üslublarında nəzərə çarpan fərqlər var. Lakin ən tipik işgüzar əlaqələr misirlilərdə mövcuddur. Misirlilər milli azadlıqla bu və ya digər şəkildə əlaqəli olan məsələlərə qarşı həddən artıq həssas olduqları üçün, onların daxili işlərinə qarışan istənilən məsələyə kəskin etiraz edirlər. Misirlilər, həmçinin bütünlükdə ərəblər öz tərəfdaşlarını daha isti qarşılayırlar ki, bu da onların dünyagörüşü ilə bağlı olan və əsrlər boyu formalaşan bir xüsusiyyətdir[52]. İşgüzar məktub dünyada biznesin təşkili üçün ən vacib element olub və bugün də olmaqdadır. İşgüzar yazışma olmadan işgüzar münasibətlər qurmaq mümkün deyil. Demək olar ki, bütün telefon və telefonoqram danışıqları yazılı təsdiq tələb edirlər; işgüzar əlaqələrin yaradılması zamanı isə, düzgün tərtib olunub formalaşmış məktub firmanı ən yaxşı formada təqdim edə və haqqında müsbət fikir yarada bilər. Bir sıra sadə əsasları öyrənməklə, işgüzar məktub tərtib etmək olar. İlk öncə qarşı tərəfin pozisiyasını nəzərə almaq lazımdır; problemə onun nöqteyi-nəzərindən baxmaq, onun istəklərini, planlarını nəzərə almaq vacibdir. Məktub səmimi olmalı, inam yaratmalı, orada şübhə doğuracaq fikirlərə yol verilməməlidir. Əks təqdirdə məktub effektini itirəcək. Hər hansı bir məhsul, xidmət və ya ideyanın təklifi ilə bağlı olan işgüzar məktublar canlı, inamverici olmalı, hər hansı bir mənfi fikir əks etdirməməlidir. İşgüzar məktub yazmanın qaydaları. Məktubun mətnini tərtib etmək zəhmət tələb edən prosesdir. Məktubun tərtibi zamanı əsas məsələ onun informasiya cəhətdən bolluğu, yəni tərkibinə kifayət qədər məlumatın toplanmasıdır. Məktublar təkaspektli və çoxaspektli olur. Təkaspektli məktublarda, adından da göründüyü kimi, mətnin məzmununu bir aspekt təşkil edir və belə məktublar adətən cavab tələb etmir. Çoxaspektli məktublar aşağıdakı hissələrdən ibarət ola bilər: bölmə, maddə, bənd, abzas. Hər bir aspekti yazmağa abzasdan başlamaq lazımdır. İşgüzar yazışmalar üçün çoxaspektli məktubların tərtibi daha xarakterikdir. Məktub adətən sxem üzrə tərtib olunur: giriş, əsas hissə, son. Giriş hissəsi özündə əsasnaməni, sənədin ayrı-ayrı maddələrini və s. birləşdirir. Əsasnamədə sənəd haqqında məlumatlar aşağıdakı ardıcıllıqla verilir: sənədin növünün adı, müəllif, tarix, sənədin qeydiyyat nömrəsi, başlıq. Əsas hissədə hadisələrin, yaranmış vəziyyətin təsviri, onların analizi və faktlar sadalanır. Məhz sənədin bu hissəsində inandırmaq lazımdır ki, istehsal olunan məhsul və ya təklif olunan xidmət yüksək səviyyədədir. Son hissə özündə xahiş, təklif, fikir, imtina, xatırlatma və s. formalarda olan nəticələri əks edir. Məktubun yalnız bir sonluğu ola bilər. Məktubun əsas məsələlərini formalaşdırıb düzgün ardıcıllıqla yerləşdirmək lazımdır ki, onları qavramaq daha asan olsun. Adətən, işgüzar sənədlər aşağıdakı struktur elementlərindən ibarət olurlar: Başlıq. Məktubun bu hissəsində solda təşkilatın adını, onun post və digər rekvizitlərini, həmçinin məktubun qeydiyyat nömrəsini və qeydiyyat tarixini özündə əks edən kənar möhürü yerləşir. Əgər məktub cavab məktubudursa, burada həmçinin hansı sənədə əsaslandığı da qeyd olunur. Başlığın sağ tərəfində adresatın rekvizitləri əks olunur. Kənar möhüründən aşağıda sənədin mətninin başlığı yazılır. Başlığın dil konstruksiyası aşağıdakı formalardan birində ola bilər: isim (adlıq h.) + haqqında → avtomobillərin çatdırılması haqqında isim (adlıq h.) + ilə + əlaqədar → binanın balansdan silinməsi ilə əlaqədar Sənədin mətni. Sənədin mətnini tərtib edərkən, nəzərə alınan cəhətlər əsasən aşağıdakılardan ibarətdir: Mətn bir qayda olaraq, bir məsələyə və yaxud da bir-birilə əlaqəli olan və təşkilatın eyni qurumunda baxılacaq bir neçə məsələyə toxuna bilər. Mətn adətən iki hissədən ibarət olur. Birinci hissədə məktubu tərtib etmək üçün əsas sayılan səbəblər sadalanır. İkinci hissədə isə nəticələr, təkliflər, qərar və xahişlər yer alır. Məktublar standart A4 və ya A5 vərəqində çap olunurlar; sənəd 2 və daha artıq səhifədə çap olunduqda ikinci səhifədən etibarən sənədin yuxarı hissəsində səhifələr qeyd olunur. Məktub səlahiyyətli şəxsin blankında çap olunursa, onda onun mətni I şəxsin təkindən çıxış edilərək yazılır: xahiş edirəm, göndərirəm. Digər hallarda isə III şəxsin təkindən istifadə olunur. Məktuba qoşma əlavə olunarsa, o əsas mətndən aşağıda qeyd olunur: Qoşma: 10 vərəq, 1 nüsxə. Qoşmalar 2 və daha çox olduqda, onların hər biri səhifələrinin və nüsxələrinin sayı qeyd olunmaqla sadalanır. İmza. Bu hissə adi qaydada tərtib olunur: sənədi imzalayan şəxsin vəzifəsi və soyadı qeyd olunur. Sənədin icraçısı digər şəxs olduqda, onun soyadı və telefon nömrəsi (və ya lazım olduqda digər rekvizitləri) aşağı sol küncdə qeyd olunur[51]. İşgüzar məktublar tərtib edilib yazıldıqdan sonra onları redaktə etmək vacibdir. İşgüzar məktub demək olar ki, həmişə müraciətlə başlayır. Həcmcə çox da böyük olmayan bu hissə sırf ünsiyyət qurmağa xidmət edir. Düzgün seçilmiş müraciət qarşı tərəfin diqqətini cəlb etməklə yanaşı, həmçinin məktuba lazımi tonallıq verir, işgüzar münasibətlərin yaradılmasına və tənzimlənməsinə yardım edir. Müraciətdən sonrakı durğu işarəsi xüsusi əhəmiyyətə malikdir. Müraciətdən sonra vergül yazılması məktuba gündəlik xarakteri verir, nida işarəsi vaciblik və rəsmilik verir. Məktubun tərtibçisi aşağıdakı faktorları nəzərə almalıdır: ictimai rəyi; tanışlıq dərəcəsini, münasibətlərin xarakterini; vəziyyətin rəsmiliyini (qeyri-rəsmiliyini); etiket qaydalarını[50]. Məktubun mətni nəzakət formulları ilə bitə bilər. Nəzakət formulları “imza” rekvizitindən əvvəl gəlir, abzasdan yazılır və vəzifədən vergüllə ayrılır. Vəzifənin adı təşkilatın təsisedici və ya normativ- hüquqi sənədlərində qəbul edilmiş şriftlərlə yazılır. Əgər məktub həmin səlahiyyətli şəxsin blankında yazılacaqsa, onda “imza” rekvizitində vəzifəni yazmaq vacib deyil. Rəsmi yazışmalarda rəsmi-işgüzar üslub istifadə olunur. İşgüzar üslub işgüzar-rəsmi münasibətlər sferasında xidmət edən dil vasitələrinin cəmidir. İşgüzar üslubun xüsusiyyətləri, ona xas xarakterik cəhətləri, stilistik normaları işgüzar münasibətlərin inkişaf etdiyi vəziyyətə uyğun formalaşmışdır. Bu şərtlər aşağıdakılardır: təşkilatların informasiya əlaqələrinin xarakter və məzmunu kifayət qədər nizamlanmışdır; işgüzar ünsiyyətin predmeti kimi təşkilatın fəaliyyəti çıxış edir; idarəetmə sənədləri əksər vaxt konkret insana ünvanlanır; təşkilatın fəaliyyəti zamanı meydana gələn və yazılı ifadəyə ehtiyacı olan situasiyaların əksəriyyəti təkrarlanan, eynitipli situasiyalara aiddir. Qeyd edilmiş şərtlər işgüzar ünsiyyətə bir sıra tələblər irəli sürür. İnformasiya mübadiləsinin effektiv olması üçün işgüzar sferada informasiya bir sıra xüsusiyyətlərə malik olmalıdır: İlk növbədə rəsmi olmalıdır. Bu xüsusiyyət münasibətlərin işgüzar əsasda olduğunu, qeyri-şəxsi xarakter daşıdığını, tərəflər arasında müəyyən məsafənin olduğunu göstərir. Ünvanlı olmalıdır. Belə ki, işgüzar məktub hər zaman konkret şəxsə, səlahiyyətli nümayəndəyə, təşkilata və ya qrupa ünvanlanır. Aktual olmalıdır. Sənəd hazırki zaman kəsiyində effektiv qərar qəbul etmək üçün lazımi məlumatları əks etməlidir. Obyektiv və faktlara əsaslanmış olmalıdır[51]. İşgüzar üslub onu digər üslublardan - elmi, publisistik, danışıq, ədəbi-bədii üslublardan fərqləndirən xüsusi əlamətlərin toplusundan ibarətdir. İşgüzar üsluba irəli sürülən tələblər aşağıdakılardır: məzmunun standartlaşdırılması; ifadə üçün neytral tonun seçilməsi; formulların dəqiq, birmənalı olması; mətnin lakonik, qısa olması; dil formullarının istifadəsi; terminlərin istifadəsi; leksik və qrafik ixtisarların istifadəsi; məsdər tərkibli söz birləşmələrinin istifadəsi; sadə geniş cümlələrin çoxluğu[14,25]. İşgüzar sənədlərin standartlaşdırılması dilin bütün səviyyələrini-leksika, morfologiya və sintaksisi əhatə edir. İndiki dövrə qədər işgüzar nitqdə çoxsaylı termin, formul və birləşmələr toplanmışdır. Hazır konstruksiyaların istifadəsi standart situasiyaları xarakterizə etmək üçün ifadələrin axtarılmasına az vaxt sərf etməyə imkan verir. İşgüzar nitqin standartizasiyası sənədin informasiya tutumunu artırır, onun anlaşıqlı olmasına şərait yaradır. Məzmunun neytral tonu rəsmi işgüzar ünsiyyətin normasıdır. O, özünü mətnin ciddi xarakterində göstərir. Neytral ton mətnlərdə ekspressiv və emosional dil vasitələrinin (danışıq leksikası və nida), məcazi mənada anlaşıla bilən ifadəli söz və vasitələrin istifadəsinin qarşısını alır. Məktubun mətnində əks olunan informasiya öz xarakterinə görə rəsmidir. Bu səbəbdən də sənədlərdə şəxsi, subyektiv fikirlər minimuma endirilməlidir. Sənədlərin dilindən emosional çalara malik olan sözlər (müqayisə dərəcəsinin suffiksləri, nidalar) çıxarılır. Lakin rəsmi sənədlərin emosionallıqdan məhrum olduğunu düşünmək düzgün olmaz. Əksər sənədlərin məqsədi qarşı tərəfi maraqlandırmaq, inandırmaq, doğru istiqamətə yönəltməkdir. İşgüzar sənəd emosionallıqdan məhrum olarsa, bu məqsədlərinə nail ola bilməz. Lakin burada emosionallıq gizli olmalı, dillə deyil, məzmunla çatdırılmalıdır. O, neytral ton arxasında gizlənməlidir. İşgüzar nitqin xüsusiyyətlərindən biri dil formullarının-şablonların geniş istifadə edilməsidir. Bu və ya digər hərəkəti əsaslandırmaq üçün aşağıdakı ifadələrdən istifadə olunur: Xəbər veririk ki, (cari ilin mart ayının 16)-dan (17)-dək ......; Bildiririk (xəbər veririk) ki, (yaranmış) vəziyyətə görə; Razılaşdırılmış məktubu (müqaviləni) sizə göndəririk; Xahiş edirik adıçəkilən (müzakirə olunan) məsələyə baxasınız və s. [26,78] Dil formulları təkrarlanan situasiyalarda istifadə olunan dil vasitələrinin unifikasiyası nəticəsində yaranır. Tipik məzmunu ifadə etməklə yanaşı, dil formulları həm də sənədə hüquqi qüvvə verir. Müəyyən, xüsusi məna kəsb edən söz və ya birləşmə termin adlanır. Ayrıca bir elm və ya peşə fəaliyyəti sahəsinə aid terminlərin cəmi həmin sahənin terminlər sistemini və yaxud da terminologiyasını təşkil edir. Terminlərin yalnız ifadə etdikləri mənada istifadə edilməsi mətnin yalnız bir mənada anlaşılmasına xidmət edir ki, bu da işgüzar ünsiyyət zamanı çox vacibdir. İdarəetmə sənədlərində istifadə olunan terminologiya yalnız bir sahəyə aid olan və sənədlərdə istifadə olunan terminləri əhatə edir. Terminlərin praktikada istifadəsində sabitlik və düzgünlüyə yalnız terminoloji lüğət və standartlardan istifadə etməklə nail olmaq mümkündür. Bu lüğət və standartlar anlayış və terminlərin birmənalı olmasını və terminologiyanın qaydaya salınmasını təmin edir. Terminlərin istifadəsi zamanı diqqət yetirmək lazımdır ki, həmin termin ünvanlanan şəxsə də aydın olsun. Məktubun müəllifi hər hansı bir terminin şübhə yaradacağını düşünürsə, onda aşağıdakılardan birini etməlidir: -terminin rəsmi mənasını verməli; -termini neytral leksika ilə izah etməli; -termini ya silməli, ya da ümumi, danışıq sözü ilə əvəz etməli. Terminlərin istifadəsində yaranan çətinliklər həm də terminlər sisteminin dəyişkən olması, mövcud olan anlayışların məzmununun dəyişməsi, yeni anlayışların yaranması, bəzilərinin köhnəlməsi, onları ifadə edən anlayışların sıradan çıxması ilə bağlıdır. Çoxmənalı terminlərin (termin-sinonimlər) istifadəsi zamanı nəzərə almaq lazımdır ki, bir sənəddə termin yalnız bir mənada istifadə olana bilər. Məsələn, “müqavilə”, “razılıq” terminləri sinonim olsalar da, istifadə praktikasına görə fərqlənirlər. İşgüzar nitqin daha bir xüsusiyyəti ondan ibarətdir ki, ixtisarlardan geniş istifadə olunur. Sözlərin ixtisarını iki qrupa ayırırlar: Leksik (abreviaturlar) – mürəkkəb söz birləşmələrinin tərkib hissəsi olan sözlərin hərflərin ixtisarı. Məsələn, MDB, FHN, MMC və s. Qrafik-yazıda sözlərin ixtisarla yazılması. Məsələn, km, v-ş, dəq və s. Məzmunun sadəliyi, sadə geniş cümlələrin üstünlüyü işgüzar sənədlərin əsas əlamətlərindəndir. İşgüzar üslubun əsas cəhəti sadə geniş cümlələrin, təktərkibli və ya cüttərkibli cümlələrin istifadəsindən ibarətdir[1,35]. Məktubu bir məsələyə əsasən tərtib etmək məqsədəuyğundur. Eyni anda təşkilata bir neçə məsələ üzrə müraciət etməyə ehtiyac varsa, onda hər məsələ üçün ayrı məktub tərtib etmək daha düzgün olardı. Ənənəvi dil formulları ilə yanaşı, məktubun mətnində alınma söz və birləşmələrə də rast gəlmək olar. Onların bir hissəsi tanınır, bir hissəsi daha az işlənir. Məzmun və mənasına görə məktublar ayrılırlar: -instruktiv məktublar; -zəmanətverici məktublar; -informativ məktublar; -müşayiət məktubları; -təşəkkür məktubları; -təbrik məktubları; -reklam xarakterli məktublar. Həmçinin, xahiş, sorğu, cavab, dəvət və s. məktublar da var. Məktubların hər birinin tərtibinin özünəməxsus xüsusiyyətləri var. İşgüzar məktubun məzmununun üslubu. Məktubun qavranılması üçün onun məzmununun üslubu da xüsusi əhəmiyyət kəsb edir. İşgüzar məktubları xüsusi üslubda yazmaq lazımdır. Xidməti-işgüzar üslub kimi tanınan bu üslub dilin funksional müxtəlifliyini əks edir. Bu üslubun xarakterik cəhətləri: Xüsusi qeyd olunan rəsmilik və işgüzarlıq, sənədlərin tərtibində standart qaydalara riayət olunması; Konkret şəxsə və ya təşkilata ünvanlanması; Tematik cəhətdən məhdudluğu; Məzmunun leksik və kompozisiya cəhətdən eynitipli olması; Neytral ton; Mətnin aydın və dəqiq olması[4,43]. Üslubun xarakteristikasına əsaslanaraq, işgüzar məktubun məzmununu hazırlayarkən aşağıdakıları etmək tövsiyə olunur: Mətnin məzmununu sadə, qısa, lakin primitiv olmayan cümlələrlə ifadə etmək; Standart söz birləşmələri və klişelərdən istifadə etmək; lakin tərtibat prosesində 1-2 çoxyayılmış standartlarla kifayətlənməmək; Terminləri ümumi, anlaşılan mənalarda istifadə etmək; Cümlə üzvlərinin düzgün ardıcıllıqla gəlməsinə fikir vermək; Köhnəlmiş söz və məfhumları (arxaizmlər), yerli dialektdən alınma sözləri istifadə etməmək. İşgüzar sənədlərin informativ-məlumat sənədlərinə aid olduğunu nəzərə alaraq, onların tərtibi zamanı bu xüsusiyyətlərə diqqət yetirmək lazımdır. Yüklə 129,86 Kb. Dostları ilə paylaş:
|